Matio 4
4
Kǔ-a pɔ̀n Jusu blu̍ja̍a̍ po̍-ɛ i̍
(Maɛ 1.12-13; Luu 4.1-13)
1Wɛ̀ Nyɔsoa-a Sùù gba̍ Jusu dě kwlǎslò we̍, Kǔ iě ɔ̍-e blu̍ja̍a̍ poe. 2Dě ɔ̍ nɛ ɔ̍ po̍ jlǔh dǒ sɔ̀n wǐh-a kwela nyìɛ̍ ke wlù wǐh-a kwela nyìɛ̍ di̍i̍. Sɔ nɛ̀ mɔ̌-a nu̍ ɔ̍ la̍-ɛ. 3Wɛ̀ Kǔ ji̍ iě ɛ̍ la̍a̍, “Jusu, pò ìn tù Nyɔsoa-a Jǔ chɛ̀-ɛ, nɛ̀ ìn wlu dě sɔɔ̌ᵻ la we̍ i̍h iě blèe̍ gba̍nᵻ sàɛ̀.”
4Wɛ̀ Jusu sà ɛ̍ wlu̍ pɔ̀n we̍, ɔ̍ la̍a̍, “Nyɔsoa-a wlu̍ la̍a̍, ‘Nyi̍ɔ̍-a feɛ se̍ di̍-dɛ̍ nɛ due wlì tè. Jɛ wlu̍ kli̍hgbɛ̍ ɛ̀ sɔ-a dě Nyɔsoa wɔ̍ɔ̍n-ɛ, ɛ̍ bo ɛ̀ nɛ-ɛ nyɔ̍ kmɔ̌.’ ”
5Wɛ̀ Kǔ gba̍ Jusu dě Juluslɛn, ɛ̀ nu̍-a Juu-a tùgbàwlɔ̀ ɛ̀ kɔn-a dǒ Nyɔsoa we̍-ɛ. Wɛ̀ ɛ̍ jǎ-ɛ Jusu dě Nyɔsoa-a slaǎ sà gbò-a tɔ̀u̍n we̍. 6Iě ɛ̍ la̍a̍ dě ɔ̍ we̍, “Pò ìn tù Nyɔsoa-a Jǔ chɛ̀-ɛ, nɛ̀ ìn po̍ àn chɛ̀ sɔ̀n. Dɛ̍nu̍ɛ, ɛ̍ chlǐh-ɛ dě Nyɔsoa-a wlu̍ di̍i̍, ɛ̍ la̍a̍,
‘Nyɔsoa-a mu̍ ɔ̍ ǐnchɔ̀ dbo̍ i̍h iě dǒ ìn we̍ i̍ gbɛ̀n.
Nɛ̀ i̍h-i bo ìh-a mu̍ ìn sɔ̍nᵻ we̍ i̍ naɛ
wɛ̀ sɔɔ̌ je̍e àn boɔ-a chɛ̀ i̍ kwǐi.’ ”
7Wɛ̀ Jusu la̍a̍ dě ɛ̍ we̍, “Nyɔsoa-a wlu̍ dɛɛ la̍a̍, ‘Nyɔsoa ɔ̀ nu̍-a mɔ̀-a Joi-ɛ, nyɔ̍ bɔ̌ ɔ̍ i̍ tɛ̀n-ɛ.’ ”
8Wɛ̀ ɛ̍ gba̍ Jusu dě tlu̍h tɔ̀ɔ̀n dlǔ dɛ, iě ɛ̍ toe ɔ̍ bloa̍ kli̍hgbɛ̍, ɛ̍ ke i̍h-a wɔ̍n ku̍ dɛ̍ᵻ nɛ-a i̍h di̍i̍ i̍-ɛ ke. 9Wɛ̀ ɛ̍ la̍a̍ dě ɔ̍ we̍, “Pò ìn ja i̍ chlìi mu̍ dǒ ǐn jǔ wɛ̀ ìè ǐn wɛɛ sà-ɛ, nɛ̀ ǎn mu̍ ìn ìh kli̍hgbɛ̍ la nyǐ ìè i̍h kɔn.”
10Wɛ̀ Jusu la̍a̍ dě ɛ̍ we̍, “Sɔ da̍a ǐn we̍-e Setɔn. Nyɔsoa-a wlu̍ la̍a̍, ‘Sà àn Joi Nyɔsoa wɛɛ, nɛ̀ ɔ̍ nɛ due gbài̍ bo ìè jǔ dbee.’ ”
11Wɛ̀ Kǔ sɔ dǒ ɔ̍ we̍-e. Iě Nyɔsoa-a ǐnchɔ̀ ji̍ wɛ̀ i̍h gbǎ ɔ̍ we̍.
Jusu tè ɔ̍ dbo̍ gbɔ̀ dě Kaladii bloa̍ kɛ̍n
(Maɛ 1.14-15; Luu 4.14-15)
12Ti̍ Jusu wɔ̌n-a Chɔɔn ɔ̀ po̍-a nyɔ̍ nǐ dlǔ-ɛ, ɔ̍ kasoo gbǎ pɔ̀n-ɛ, dǒ-o bo ɔ̍ mu̍-i Kaladii bloa̍ kɛ̍n. 13Jɛ ɔ̍ se̍ dǒ Naaslɔɛ wlɔ̀ di̍i̍ tǐn. Kepanium bo ɔ̍ tǐn dǒ pɛ̍nu̍ klaa wɔ̍i̍n, dě Sɛɛbeloun ke Natali fɔɔ. 14Ìh kli̍hgbɛ̍ la i̍h nɛ-ɛ, wɛ̀ dɛ̍ Nyɔsoa-a tu̍owli po̍ nyɔ̍ Asaia bla̍-aɛ, ɛ̍ iě tìh-a taǐn nu̍. Ɔ̍ la̍a̍,
15“Sɛɛbeloun ke Natali bloa̍,
mɔ̀ nɛ dě Jɔɔdɛn nǐ de̍e̍ dě jbǒ wlì.
Kaladii bloa̍ ɛ̀ ùh se̍-a Juu nyɔ̍-ɛ tǐn-a dǒ kɛ̍n-ɛ, dǒ mɔ̀ nɛ ke.
16Mɔ̀ɔ̍ ùh tè-a dě kwile i̍ de-ɛ,
mɔ̀ jě sɔ̀npli ɛ̀ ku̍-a wɔ̍n-ɛ wɛ̀.
Mɔ̀ɔ̍ ùh tù-a se̍ Nyɔsoa juo tìh ùh mɛ̌-a wlɔ̀ i̍-ɛ,
sɔ̀npli-a mu̍ la̍ fa̍n dě mɔ̀ we̍.”
17Sɔ dǒ ti̍ laa̍ di̍i̍ Jusu tè tìh bla̍-a gbɔ̀, ɔ̍ la̍a̍, “Mɔ̀ bǐi i̍ mɔ̀ iě gblɛ̍n sɔ̀ɛ̀n nu̍-ɛ i̍ tǎli. Dɛ̍nu̍ɛ, Nyɔsoa-a kmɔ̌ wlu̍ i̍ kɔn ti̍ kɔǎn we̍ wɛ̀.”
Jusu dǎ nǐ sè nyɔ̍ nyìɛ̍
(Maɛ 1.16-20; Luu 5.1-11)
18Ti̍ Jusu-a naɛ-a pɛ̍nu̍ klaa nɛ-a Kaladii bloa̍ kɛ̍n-ɛ wɔ̍i̍n-ɛ, wɛ̀ ɔ̍ jě de̍di̍i̍ᵻ sɔɔ̌n. Due-a nynɛ̌ nu̍ Samo, ɔ̍ nynɛ̌ diih nu̍ Pitɛ. Wɛ̀ dɔɔ nu̍ Andlu. Ɔ̍ iě-a u̍h jě-ɛ, nɛ̀ u̍h-a po̍ sɔ̍ dǒ niɔ̍. Dɛ̍nu̍ɛ, ɛ̍ bo ɛ̀ nu̍ u̍h naɛ dbo̍ kleǐn u̍h-a nu̍. 19Wɛ̀ ɔ̍ la̍a̍ dě u̍h we̍, “Mɔ̀ gbǎ dǒ ǐn de̍e̍, ǎn mu̍ ɛ̍ nu̍ ka mɔ̀-a nu̍-a smìi̍ wlɔ̀ ja-ɛ, mɔ̀ iě laǎn nyɔ̍ Nyɔsoa we̍ ja-a nu̍ ke.” 20Dǒ tàdùè laa̍ u̍h si̍e̍ u̍h-a sɔ̍ᵻ iě u̍h gbǎ dǒ ɔ̍ de̍e̍.
21Ɔ̍ klɛɛn-a dǒ nya̍-ɛ, ɔ̍ jě de̍di̍i̍ᵻ sɔɔ̌n duuh. Due-a nynɛ̌ nu̍ Chiin, dɔɔ-a nynɛ̌ nu̍ Chɔɔn. U̍h baa nu̍ Sɛɛbedii, nɛ̀ ɔ̍ ke u̍h nɛ dě blǎgbè di̍i̍ u̍h-a nma̍le sɔ̍ᵻ. Wɛ̀ Jusu dǎ u̍h ke. 22Dǒ u̍h nyna u̍h si̍e̍ blǎgbè ke u̍h baa, iě u̍h gbǎ dǒ ɔ̍ de̍e̍.
Jusu bɔ̌ɛ poa-dɛ̍ᵻ ke wɛ̌ᵻ kli̍hgbɛ̍
(Luu 6.17-19)
23Wɛ̀ Jusu na Kaladii bloa̍ kli̍hgbɛ̍ we̍, ɔ̍ po̍ nyɔ̍ nǎ dě Juu nyɔ̍-a wɛɛ sà gbòᵻ sɔ̀n-i. Iě ɔ̍ bla̍ pɔ̀n chɛ̀-a tìh dǒ Nyɔsoa-a kmɔ̌ wlu̍ i̍ kɔn dɛ we̍. Wɛ̀ ɔ̍ bɔ̌-ɛ nyɔ̍gbei-a poa-dɛ̍ᵻ ke wɛ̌ᵻ kli̍hgbɛ̍. 24Sɔ ɛ̍ nu̍ ɛ̍ ɔ̍ pɔ̀n sɛ̍ i̍ dě Siwlia fɔɔ kli̍hgbɛ̍. Wɛ̀ u̍h ja poa-nyɔ̍ kli̍hgbɛ̍ dǒ ɔ̍ we̍. Juh kɔn dɛ̍ᵻá chlɛ̌n-a ke, wɛ̌ᵻ kaɛn-a nu̍ nyɔ̍ ke, jeědih-a de̍e̍ nɛ nyɔ̍ ke, dbaǎdɛ-a nu̍ nyɔ̍ ke, ɛ̍ ke sɔ̍nᵻ ke bu̍hᵻá mɛ̌ nyɔ̍ ke, iě ɔ̍ pǔh-i u̍h kli̍hgbɛ̍. 25Iě nyɔ̍ tlùgbei̍ wɔ̀ dǒ ɔ̍ de̍e̍, duuh sɔ Kaladii fɔɔ, wɛ̀ duuh sɔ blǔh dɛɛ kɛ̍n, u̍h-a dǎɛ ɛ̍ Wlɔ̀ᵻ Pùè, iě duuh sɔ Juluslɛn wlɔ̀ ke Judia bloa̍ kɛ̍n. Iě duuh sɔ dě Jɔɔdɛn nǐ de̍e̍.
Terpilih Sekarang Ini:
Matio 4: KDNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
The New Testament in Western Krahn published as KU̍O̍ DELEE © The Bible Society in Liberia, 1999.