Juan 1
1
Sa'ad As Hesus Sija Nan Ukud Apudyus
1Sa'ad san chaan ma'gwa nan losan nisisikud nan Ukud ad sa'ad nan Ukud nihuyun an Apudyus ad sa'ad nan Ukud, Apudyus. 2Nisisikuchay nihuyun nan Ukud an Apudyus san chaan ma'gwa nan luhung. 3Ad kapu san Ukud inggwan Apudyus nan losan. Ad maid kun na'gwa nu wha'on as kapu san Ukud. 4Sa'ad nan Ukud sija nan merpugwan nan whijag ad nannaja whijag sija nan silaw gway mamadcha san somsomo' chanan taku. 5Sa'ad nan silaw papadchaona nan manghulingot ad nan manghulingot achi kun ma'aawha' san padcha.
Nan Chamun Nan Nipaakammugwan Nan Whayuway Chamag Mipangkop An Hesus
6Iningkaw nan osa takuway ingwhaun Apudyus gway Juan nan ngachanna. 7Kun ummalis sija tot iwhakana nan mipangkop san silaw tot losan otjan chanan taku mamati kapu san iwhakana. 8Wha'on kus sija nan silaw gwon ummalina ekay impano'no' nan mipangkop san silaw. 9Sa'ad nan kadto'ay silaw gway mamadcha san somsomo' chanan taku, sija nan umali ad asna luhung.
10Gwon ta'on nu ummalis sija ad asna luhung ja na'gwa nan luhung kapu an sija, achin ku chanan taku whinigwhig as sija nu ngachanna as sija. 11Ummoy as sija san ilina gwon achin ku chanan ailijana Hudyu whinigwhig as sija. 12Gwon sa'ad chanan namigwhig an sija ja namati an sija nangngachanona chichas ana' Apudyus. 13Wha'on kus nangngachancha ana' Apudyus kapu san nerpugwancha gwinnu kapu san whinayun nan manasagwa gwon kapu san whinayun Apudyus.
Nan Ukud Gway Nangngachan Taku
14Nangngachan taku chay Ukud kun na'aumili an chita'u ad asna luta. Amod nan inawhayuna ja sija nan mangipaakammu san atuttugwaan. Inilami nan ina'erjadna gway nangipaila san ina'apudyus Apudyus gway naayana as osossa''anay ana' Amana gway Apudyus.
15Kun pinano'no'an Juan gway manghohonjag nan mipangkop an sija kun impa'uyna gway manggwana, “Annaja chay ingwhaka' say manggwanaa'on, ‘Sa'ad nan umali mipasu an sa'on nangatngatu an sa'on kapu tan nisisikud as sija san chaan'u mijana'an.’ ”
16Kapu san maid ku agwat nan inawhayuna mansinu'nub nan whayuway inatodna an chita'u. 17Inatod Apudyus nan Lintogna kapu an Moses gwon sa'ad nan inawhayuna ja atuttugwaan gway mipangkop an sija, naatod an chita'u kapu an Hesu Kristu. 18Maid kun osas nangila an Apudyus. Ahus nan osossa''anay Ana'na gway Apudyus ahos ekay as sija gway pagchot nan mihuyunana an Amana. Sija nan nangipaakammu an chita'u an Apudyus.
Ingwhawhagkan Juan Gway Wha'on Kus Sija Nan Kristu
19Ad sa'ad chanan papangat nan Hudyu ad Jerusalem nangiwhauncha sasan papachi ja chanan Levita tot umoycha imuson an Juan ananon, “Ngachan'a?”
20Kun ingwhawhagkan Juan nan tuttuwa gway achina kun insulib kun anana, “Wha'ona' kus Kristu.”
21Kun anancha an sija, “Ad ngachan'a nu'? Si'a chay Elias?”#1:21 Sa'ad as Elias iningkaw as sija ad asna luta san tagwonay 850 BC (san chaan Kristu mijana'an). Akasukasut gway tagwon asiyot as Juan gway Manghohonjag mijana'. Inayan Apudyus as Elias ad langit gway matattaku (Mawhasa san 2 Ar-Ari 2:11). Sa'ad chanan Hudyu uullajonchas sija gway managkulin ad asna luta as tapin chi erkaw tot sija nan mangisakana sasan taku san umaliyan Kristu (Mawhasa san Malakias 3:1, 4:5-6).
Kun anana, “Wha'ona' kun.”
Kun anancha, “Si'a chay profetan Apudyus gway uullajonmi?”#1:21 Mawhasa san Deuteronomio 18:15-22.
“Wha'on,” anana.
22Gwot anancha an sija, “Ngachan'a man nu'? Sungwhatam cha'ami ta agwad iwhakami san nangiwhaun an cha'ami. Ngachamma anam san mipangkop an si'a?”
23Kun anan Juan gway summungwhat, “Sa'on chay anan Isaias gway profetan Apudyus san agwiyon, ‘Anna nan osaay iniingkaw san luta gway maid kun ingkaw as taku gway mampa'upa'uy gway ananaon pawhayugwonju nan manadchayanan nan Apu.’ ”
24Ad sa'ad chachay ingwhaun chanan Pariseo gway ummoy an Juan 25inimuscha an sija gway manggwana, “Nu wha'on'a kus Kristu gwinnu wha'on'a ku an Elias gwinnu wha'on'a kus profetan Apudyus, ka'a manghonjag nu'?”
26Kun anan Juan gway summungwhat, “Manghonjaka' san chanum jon agwad an cha'aju nan osaay achiju kun agakammu nu ngachanna as sija. 27Sija nan umali mipasu an sa'on gwon achiya' kun miwhilang as mansilwhi an sija uyay mangaan san sinilasna.”
28Na'gwa losan nannachaja san ilid Betania san chomang nan gwanggwangay Jordan gway ad aschi nan nanghonjahonjakan Juan.
As Hesus Nan Ma'gwaniyon Kerneron Apudyus
29Mawhikat kun inilan Juan as Hesus gway takangay mi'atum an sija kun anana, “Anchiya nan Kerneron Apudyus gway michatun gway malligwat san whersun nan losanay takud asna luta! 30Sija chay ingwhakawhaka' san manggwanaa'on, ‘Umchas an sa'on nan osa takuway nangatngatu an sa'on kapu tan nisisikud as sija san chaan'u mijana'an.’ 31Achi' kun naimatunan san chamu gway sija chay takuway ingwhaka' gwon ummaliya' manghonjag san chanum tot mipaakammus sija sasan ijIsrael.”
32Kun impano'no' Juan gway manggwana, “Inila' nan Ispilitun Apudyus gway chumo''ocho''oya gway isun chi kaob nan kalapati gway nerpud langit kun ummoy inumpa an sija. 33Achi' kun naimatunanay sija chay takuway ingwhaka'. Gwon sa'ad as Apudyus gway nangiwhaun an sa'on gway umali manghonjag san chanum anana an sa'on, ‘Mailam nan Ispilitu' gway chumo''ocho''oya ad iningkaw an sija. Sija nan mangipaali san Ispilitu' gway ingkaw sasan taku.’ 34Ad kapu tan inila' nannaja na'gwa an Hesus, ta'choya' gway sija nan Ana' Apudyus.”
Chanan Pangpangu Gway Pasuyut Hesus
35Asin ku mawhikat agwad ahos cha Juan ja nan chugwa sasan pasuyutna ad aschiyay summisi'ad. 36Intollong kun Juan as Hesus gway manadchadchayan anana, “Anchiya nan Kerneron Apudyus.”
37Chingngorn ku chachay chugwaay pasuyut Juan nan ingwhakana tinunudchas Hesus. 38Nantulili kus Hesus inilana chichaay mituntunud an sija. Kun anana an chicha, “Ngachan nan anaponju?”
Kun anancha an sija, “Rabbi, agwan nan iingkagwam?” (Nan pijaona anan nan apapat gway “Rabbi”, Mistuyu.)
39Kun anan Hesus an chicha, “Gwayyu ta umaliju ilan.” Summingwhattang as anchu nan tayun san nitunuchancha an Hesus san ikawna kun iningkawcha an sija ingkanas maschom.
40Sa'ad as Andres sija nan osa sasay chugwaay nangngor san ingwhakan Juan gway nitunud an Hesus. Sunud Simon Pedro as sija. 41Kun sija ummunana inggwa nan ummoyna inanap as Simon gway sunudna kun anana an sija, “Inchasanmi nan Mesias.”#1:41 Nan Mesias sa'ad nan pijaona anan “pinilin Apudyus.” (“Kristu” nan anancha san Grinegoway apapat.) 42Kun iyoy Andres as Simon an Hesus.
Kun intotollong Hesus as Simon kun anana, “Si'a uwa as Simon gway ana' Juan? Mangngachan'a Cefas.” (Nan Cefas isuna san Pedro gway sa'ad nan pijaona anan “whatu”.)
Nan Nangajakan Hesus An Cha Felipe An Natanael
43Mawhikat kun simsimmo' Hesus gway umoy ad Galili. Kun inchasana ad aschi as Felipe kun anana an sija, “Mitunud'a an sa'on ad nangngachan'a pasuyut'u.” 44Sa'ad as Felipe iBetsaida, sa'ad nan Betsaida ilin cha Andres an Pedro. 45Kun inanap Felipe as Natanael gwot inchasana kun anana an sija, “Inchasanmis sija gway chay illistan Moses san nibyun nan Lintog ja illistan ahos chachay profetan Apudyus. Sija as Hesus gway iNazaret gway ana' Josep.”
46Kun anan Natanael an sija, “Ama' agwad whayu as merpud Nazaret?”
Kun anan Felipe an sija, “Gwaynu ta umalim ilan.”
47Inilan kun Hesus gway umoy as Natanael an sija anana san mipangkop an Natanael, “Annaja nan kadto'ay ijIsrael gway achi kun mansi'ap.”
48Kun anan Natanael an sija, “Ka akammum as sa'on?”
Kun anan Hesus gway summungwhat, “Inila' si'a gway iniingkaw san puun nan ajuway igos san chaan Felipe mangajakan an si'a.”
49Kun anan Natanael gway summungwhat, “Mistuyu, si'a nan Ana' Apudyus! Si'a nan Alin chanan ijIsrael!”
50Kun anan Hesus an sija, “Kapu tan ingwhaka' an si'a gway inila' si'a san puun nan ajuway igos sijachi nan mamatiyam? Amamod pay'a nan mailam sannaja!”
51Kun anana an chicha, “Iwhaka' an cha'aju nan tuttuwa gway mailaju nan langit gway miibwhat ja chanan a'anghel Apudyus gway mansinuhotay manakacha ja manosog san agwacha' gway Ana' nan Taku.”#1:51 Sa'ad nan “Ana' nan Taku” sija nan ingngachan Hesus san longagna tot achi ku madlaw nan mangiwhagana gway sija nan Kristu. San Daniel 7:13-14 nilista nan nipadtu mipangkop san Ana' nan Taku gway sija nan Kristu. Annaja nan nangallan Hesus gway ingngachanna san longagna.
Terpilih Sekarang Ini:
Juan 1: NUA
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2019, Wycliffe Bible Translators, Inc. All rights reserved.
