Matio 9
9
Cecoc e kikehatc iriniwa e niponesiritci
(Natawapata kaie Mark 2.1-12; Luc 5.17-26)
1Cecoc ki positcimew. Ki acoham minawatc aniheriw sakihikaniw, otenamik#9.1 otenamik: Ekota neta e ici tacikekopanen, Capernaüm otenak. e icatc. 2Ki pe iciwitowakaniwiw iriniwa e niponesiritci, tetaskonikanik e miciniritci, atita iriniwa e pe miwirikotc. Ka wapamatc Cecoc anahweriw iriniwa e apitc asperimototakotc, ki itew anihi ka niponesiritci: “Sokitehe, nikosis! Ki kasihamakowin kipactatowina!”
3Aci atita ka kiskinohamaketcik cota aiamihe irakonikewiniw aititowok: “Marerimew Kice Manitowa anahwe iriniw!”
4Cecoc kiskeritamopan e iteritamiritci. Ki itew: “Kekwan wetci matci iteritamekw? 5Kirawe ia wetan kitci iteian: ‘Ki kasihamakowin kipactatowina,’ kekotc kitci iteian: ‘Pasiko, pimote tca’? 6Aric ni nataweriten kitci kiskeritamekw ohwe: kackitaw anahwe Ka ki pe iriniwihitisotc#9.6 Ka ki pe iriniwihitisotc: Arimomitiso ota Cecoc. kitci kasihak pactatowiniw ota askik.”
Ekoni e ici itatc anihi iriniwa ka niponesiritci: “Pasiko! Otapina kitetaskonikan! Kiwe kimikiwamik!”
7Anahwe iriniw ki pasiko. Ki matcaw e tca kiwetc. 8Aniki kaskina iriniwok neta ka tacikewaspan ka wapatakik aniheriw e isparinik, ki micta sekisiwok,#9.8 ki micta sekisiwok: Peikon kata ki ici nisitotakon: ki micta mamiskateritamok. kaie ki mirwatcimewok Kice Manitowa e ki miraritci iriniriw ani kitci ici kackitaritci.
Matio e wicamikotc Cecoca
(Natawapata kaie Mark 2.13-17; Luc 5.27-32)
9Cecoc matcapan neta. E pimotespan, peikw iriniwa ki wapamew, Matio#9.9 Matio: Matthieu ka icinikasoritci, e taci apiritci neta ka ici otamirotcik ka natockaketcik. Ki itew Cecoc: “Pe nosanehici!” Ekoni e ici pasikotc anahwe Matio e tca nosanehwatc.
10Minawatc Cecoc ki nta mitciso neta Matio omikiwamirik. Mitcetiwok ka natockaketcik kaie kotakihik iriniwok aka ka kicterimakaniwitcik#9.10 iriniwok aka ka kicterimakaniwitcik: Peikon kata ki ici nisitotakon: “pactati iriniwok” ka iterimakaniwitcik. neta ki pe nta orapiwok mitcisowakanatikok e ici apiritci Cecoca kirika owitcewakana. 11Pharisien iriniwok ka wapatakik e isparinik, ki itewok Cecoca owitcewakaniriw: “Kekwariw wetci, witci mitcisomatc anahwe kikiskinohamake irinimiwaw anahweriw ka natockakeritci kaie tca anihi kotakihi iriniwa aka ka kicterimakaniwiritci?”
12Ki petawew Cecoc ani e iteritci. Ki itew: “Iriniwok ka miro pimatisitcik nama takatc mackiki iriniwa natawapamewok. Ka akositcik, enko aniki ke natawapamatcik mackiki iriniwa. 13Matca wikokwe nisitotamokw anihe ka masinatek Kice Manito Omasinahikanik:
‘Ni nataweriten kitci kitimakerimekw kiwitc iriniwaw,
nama kitci aiamihe pakitinikeiekw, e ickwaswekok awesisak.’ Osée 6.6
Nama meka ni ki otci pe ican kitci wicamakik iriniwok aci icikowisk ka iterimitisotcik, aric kirawe aniki ka kiskerimitisotcik ka pactatitcik.”
Roskosowiniw e arimotak Cecoc
(Natawapata kaie Mark 2.18-22; Luc 5.33-39)
14Capatis owitcewakana ki pe natcikapowictawewok Cecoca, e kokwetcimatcik: “Nanikotin ni roskosonan, kirika Pharisien iriniwok kaie wirawaw roskosowok. Kekwariw tca wetci aka totakik kir kiwitcewakanak?”
15Itikowok Cecoca: “Kecpin e ickwa nipowinaniwok, makocaniwon. Anahwe ka nipowitc wicamew okwimesa kitci pe nta witci mitcisomikotc. Kit iteritenawaw ia, aniki ka wicamakaniwitcik kata kackeritamok aka tca kitci ki mitcisotcik mekwata kiapatc e tacikeritci anihi okwimesiwawa ka nipowiritci? Nama ketcinatc! Nikotin aric maninamowakaniwitawe anihi ka nipowiritci, aci nta kata roskosowok.”
16“Nama awik pokoham kete wikasiriw, ocki pakiwanicekiniw kitci totak. Kecpin actate aniheriw, minawatc kisisipatate owikasim, aniheriw pokonehikaniw kata manipariniw. Kirawe tca kata iti micariw neta e pikockarik.”
17“Nama kaie sikinikatew kete omackimotewanik ka pakekiniwonik ocki minicapo anotcikwetc e ki ocitakaniwok. Osam meka kata pakickiparin anihe kete mackimotewan,#9.17 kata pakickiparin anihe kete mackimotewan: Ekoni ke isparik, osam anihi ocki minicapo kiapatc kata otamiromakan e ocihomakak. ekotca kitci onactakaniwok anihe minicapo kaie anihi mackimotewana. Patoc ocki mackimotewanik kata actakaniwon ocki minicapo, matci tca kinowec kitci kanaweritcikatek.”
Cota okimaw otanisa, kirika iskwew ka ki takinak Cecoca owikasimiriw
(Natawapata kaie Mark 5.21-43; Luc 8.40-56)
18Mekwata Cecoc e taci itespan niheriw, peikw cota okimaw ki pe takociniw. Pe nipiskoctawew Cecoca, e itatc: “Anotcikwetc ki nipo nitanis. Aric petcimote! Pe nta takini, ekoni kitci pimatisitc!” 19Cecoc ki pasiko e nosanehwatc, kaie wirawaw owitcewakana e nosanehikotc.
20Takopan neta iskwew, mocak e onitakopanen omikw, mitato acitc nicw tato pipona esko itapinekopanen. Aci anahwe iskwew nta icikapowiw otananik Cecoca e pimoteritci, e takinamowatc nitek okapotowaniriw. 21Iteritamokopan meka: “Kecpin tepirak takinamwake owikasim, ni ka mirwatisin.”
22Cecoc ki pe kiwekapowiw. Wapamew anihi iskwewa. Aci itew: “Sokitehe, nitanis! Tapwe kit asperimototawin, ekoni wetci ki kikein.” Ekoni mia e iti kiketc anahwe iskwew.
23Minawatc ki takociniw Cecoc neta omikiwamirik anihi cota okimawa. Aci wapamew neta metowe iriniwa e taci kicatapiritci kitci rikwaskaniwonik kirika kotakihi iriniwa e mitcetiritci e moskwataritci anihi ickweca. 24Ki itew: “Orowikw ota! Nama ni nipo anahwe ickwecic! Tepirak ni nipaw!” Papirotowakaniwiw aniheriw e itetc. 25Minawatc ka ickwa orowiticohwakaniwitcik aniki mitcet iriniwok, Cecoc ki pitakew neta aricapik. Ki otapiniskenew anihi ickweca kaie e iti pasikoritci. 26Kaskina wiec neta ki petakaniwoniw aniheriw ka ickwa iciwepanik.
Nicw iriniwok e kikehakaniwitcik aka ka wapitcik
27Apitc neta ka otci matcatc Cecoc, mekwata e pimotespan, nicw iriniwa aka ka wapiritci pe nosanehiko, e itikotc e tepweritci: “Okimaw Tapit Okosa,#9.27 Okimaw Tapit Okosa: Wi itemakanotake: otaniskotape osima. kitimakerimicinan!”
28Ka ickwa takocik Cecoc neta mikiwamik, aniki iriniwok aka ka wapiritci ki pe natcikapowictako. Ekoni e ici kokwetcimatc, e itatc: “Ki tapwetenawaw ia kitci kackitaian anihe kitci itotiskeian?”
Aniki itewok: “Ehe, Teperitcikein.”
29Takinew Cecoc ockicikowariw e itatc: “Osam e asperimototawiekw, ki mirikowaw Kice Manito e ici nataweritamekw!”
30Ekoni e ki wapitcik. Minawatc kaketin ki aimihikowok Cecoca, e itikotcik: “Wewerita natotamokw ke ititakok: nama actew awik kitci kiskeritak ka ki isparinik.”
31Ki matcawok aric kaskina wiec neta askik ki nta aiarimomewok Cecoca.
Cecoc e kikehatc iriniwa aka ka arimweritci
32Mia e iti matcatcik, Cecoc pe iciwitowakaniwiw peikw iriniwa aka e kackitaritci e arimweritci, osam e ki pitciteheckakoritci matci manitowa. 33Mia apitc Cecoc e ickwa matceticohwatc anihi matci manitowa, kek anahwe iriniw kackitaw e arimwetc. Iriniwok neta ka mitcetiwaspan ki micta kockowapamowok kirika e itetcik: “Nama wiskat ki otci wapatcikatew anihe towi Israël askik!”
34Aric aniki Pharisien iriniwok itewakopan: “Anahwe ka tiperimatc matci manitowa, enko na ka ki miratc Cecoca kitci kackitaritci kitci matceticohwaritci matci manitowa!”
Cecoc e kitimakerimatc iriniwa e mitcetiritci
35Cecoc pa pimotepan kaskina otenak kaie otenacik. Pa kiskinohamakepan cota aiamihe mikiwamiskak. Kakeskwepan, e tipatcimospan Mirwatcimowiniw ka otci kiskeritcikaterik Kice Manitowa Okimawiniw. Kaskina kaie kikehepan ka akosiritci kotc ka itapineritci. 36E wapamaspan ko e mitcetiritci iriniwa, micta kitimakerimepan. Aieskosiwakopan meka aniki iriniwok kaie atwerimowakopan, mia maritcenicak aka e taritci awiriwa ke kanawerimikotcik e iteritakosiwakopanen. 37Aci Cecoc itew owitcewakana: “Ki ka witamatinawaw e iterimakik: mia kitikan askik e icinakosiwok, mitcen otamirowin ke ki totcikatek neta, aci e otcitciparik kitci mawotcitakaniwok kitikan, nama aric mitcetiwok iriniwok ke otamirotcik. 38Pakoserimakw anahwe ka mitatc e mawotcitakaniwonik kitikaniw#9.38 anahwe ka tiperitak e mawotcitakaniwonik kitikaniw: Enko na Kice Manito ka arimomakaniwikwen. kitci pe iciticohwatc kotakihi iriniwa kitci pe nta witcihiweritci.”
Terpilih Sekarang Ini:
Matio 9: ATMK
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Canadian Bible Society, 2014
