BEGGAR 8
8
Sa-hindungv Xoa kunam
1Hvbmabde Pwnbov Noa nvla mwwg lvgab hulu uraho doonbo gunggo-nyiiyongam hoo tuun-mee mwlwngam mwwpanum. Hoo Pwnbov swcw aoso pwd dooi ak lywrab mvnum, hoo issiv xoanum. 2Urag iss gwwlv hoo doag viyapv ciqtum kunum, doa hoqgv nyodongv hongin kunum, 3hoo issiv ked urab hoodul doonum. Aal 150 kokw so issiv xoa kunum, 4hoo pool kvnwg aal camleq kvn ho Ararat puutu ho hulungv joonu kunum. 5Hoo issiv pool bvryw namgub xoal xobdul doonum; pool bvrywg otuq aalho puutu tulug niqtuqkam kaapa kunum.
6Aal campig vtwr-anya moodho Noa hulug pupum mam mwv mvko nv 7poaq dorg kanam namlinum. Hv swcw nvg aoso issiv pwtw maady deedib toloq-boloq jarkar yvnum. 8Ho swcw nvg aoho issiv xoopa kuba dw ham kaam dvb, mwwg hoqgv mwv pukum dorg kanam namlinum. 9Hvbmabde pukumv jarp ko nyook dooma ko-gab mwn hulub jorkur kunum, hoggab swcw nvg gvda mwlwho issiv xooma daab doonum. Ho mwv mwwg alaqkam ilin banv pukum mam mwwg dook hulu urab nvvlwqnum. 10Mwv aal kvn go hvraqb kaayal doonum, hoo mwv lokta pukum mam hulu ura hoqgv kanam namlinum. 11Hoo pukumv ariyum mwwg dookub haaknum, hoo kaato, mwnwg xiibu ho leelaq busurbo olib ok borg baqanum. Ho issiv swcw hoqgv xoa pakde hvl Noa cengknum 12Ho mwv aal kvn gota kaayal doopel hoo pukum mam kanam namlinum, hoo mwn mwwg dookub jorkur kumanum.
13Lwwx la ak vnywg otuq poolwg otuq aalho swcw ao hoqgv issiv xootwr kunum. Hoo Noa hulungam lwqko tvl hoo kaanum, hoo kaanamv, ked aongv pwtw kunum. 14Pool bvrnyig aal camnyi leq kvnho swcwngv pwtw rwrw kunum. 15Ho Pwnbov Noannvn benum, 16“Hulu ura hoqgv lengt ku, no la noqg nywxwngv, hoo noqg ko tuup tulungv hoo noqg ko tuup tulug nywxw tulungam noqg lvgab lengm to. 17Noqg lvgab swwl doonbo luucw-luut svdin tulungam no boolin tuku—pvtangam hoo svdinam hoo swcw nvg aoso gwn-xarnbo tulungam— ho bulam swcw nvg aoso mipar-gooiyiql hoo dumtwq-miilyw swwlin mvto.” 18Ho Noa lvvgwb lengknum, hoo mwwg lvgab mwwg ko tuup tulungv hoo mwwg nywxwngv hoo mwwg ko tuup tulug nywxwngv lengknum. 19Gunggo-nyiiyo luuxiv, gwn-xarnbo luuxiv, hoo pvta luuxiv, swcw aoso biin-tabn bo mwlwngv imiq dvparb nyitwl hulu hoqgv lvvgwb lengknum.
Pwnbo Noa lvgab Pvvb Birnam
20Ho Noa At Sw gab yugw ak mvnum hoo luuxy cwr dvrwqbo svdinam la pvtangam boyuqnam akiam yugw ho aky jinum. 21Hoo hwdlo At Sw sungam bo nongam suupa yin, At Sw mwwg hang uraho benum, “Nyia ko nyigo gab ngo nywywngam gvda sam lokta beekram, hoggab nyia koog hang tuugabnamv alman boam mwwg yaapa swwca yik hoqgv jaq nyidu dvn. Ngoqg soq sib twrdwb nyinam sam ngo nywywngam lokta swwl doonbo tulungam twrm dvb nyitin kuram. 22Swcw si doody deedib, vly liidam la vly naad moodam, swkwr moodam la og moodam, dwram la dvra moodam, aalam la ai moodam dooky mvtayin.”
Terpilih Sekarang Ini:
BEGGAR 8: NYISBSI
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.