Cakirok 13
13
Abram gi Loti jopokere
1Ameno Abram okadho yumalo wok Misir kodi cege gi kisi gimoro m'oyido nitie gine, to Loti kadho gine yupiny. 2Abram oyido oŋaŋ swa; nitie gi rombo, diegi, dhok, kiri gi feza gi zahabu. 3Kenyo go oeye kenyo aka okadho yo Bethel, i kabedo ma go oyido oger'iye wema pere i cakirok i dier Bethel gi Aya; 4kenyo go oyido oget'iye migam, aka olamo Rwoth kenyo.
5Loti bende oyido nitie gi rombo, diegi, dhok, gi peco pere won kodi ŋecin. 6Ameno lowo oyido kirom jario bedo kanyacel rupiri oyido jonitie g'ogwaŋe madit. 7Aka dhaw ocakere i dier jokwath dhok pa Abram kodi jokwath dhok pa Loti. I hongo no Jokanan kodi Joperiz oyido fodi jobedo i lowo no.
8Kenyo Abram owaco ri Loti ni, “Wabedo wade, aka kiripi ni cwo paran g'aperin jowodhaw. 9Riameno weyi wapokere. Yer adec ma lowo m'imito; aka an abino kadho racuc, to in ikadho racam.”
10Loti otiŋo waŋe malo to neno milelo Yordan nger m'oyido nitie gi pi kweth paka ndelo pa Rwoth, paka lowo ma Misir yo Zowar. Me oyido mafodi Rwoth k'oreyo Sodom gi Gomora. 11Ameno Loti oyero milelo Yordan je rigo won, aka Loti okidho yuwok ceŋ; aka ameno apaka jario jopokere. 12Abram obedo i lowo ma Kanan, aka Loti i tindi madongo ma milelo aka ocoro wema pere kiri cegin gi Sodom. 13Onyo cwo ma Sodom oyido jokidakana, aka jotimo reco madongo kwoŋ Rwoth.
Abram kadho i Hebron
14Rumacen munyo Loti otieko pokirok gi go, Rwoth owaco ri Abram ni, “Tiŋi waŋin malo, aka iŋiy maber gi kam'initie iye i kisi thenge. 15#Tim 7:5Kole lowo m'ineno no je abino miyin gi nyikwayin 16Abino miyin nyikwayin madit pa fukefuke ma lowo; ŋey ka nyatoro nyalo kwano fukefuke ma lowo, nyikwayin bende nyalo kwanere. 17Ay, iwothi i lowo gipi, rupiri akidho miyin gikululu.” 18Ameno Abram okodo wema pere, aka obino to bedo cegin gi olwa pa Mamire i Hebron; aka kenyo ogeto ri Rwoth migam.
Terpilih Sekarang Ini:
Cakirok 13: DHOPE
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Dhopadhola DC Bible © Bible Society of Uganda, 2018.