JENESIS 12
12
Ka jingkhot U Blei ïa u Abram
1 #
Ki Kam. 7:2,3; Heb. 11:8 U Trai u ong ha u Abram, “Mihnoh na la ka ri, na la ki ba-ha-ïing ha-sem, bad na ka ïing u kpa jong me, bad leit sha ka ri kaba ngan sa pyn-i ha me. 2Ngan ai ïa me bun ki khun ki ksiew, bad kin sa long ka jaitbynriew kaba khraw. Ngan kyrkhu ïa me bad ngan pyndonnam ïa ka kyrteng jong me, ba kumta men sa long ka jingkyrkhu.
3 #
Gal. 3:8
“Ngan kyrkhu ïa kito kiba kyrkhu ïa me,
Hynrei ngan tim ïa kito kiba tim ïa me.
Bad da me ngan kyrkhu ïa ki jaitbynriew baroh.”
4Haba u Abram u la dap hynñiewphew san snem ka rta, u la mihnoh na Haran, kumba U Trai u la bthah ïa u ban leh; bad u Lot u la leit lem bad u. 5U Abram u la shim ïa ka Sarai ka tnga jong u, bad ïa u Lot u pyrsa jong u, bad ïa ka spah ka phew baroh, bad ïa ki mraw baroh ba ki la lah ïoh ha Haran, bad ki la ïamihnoh ban leit sha ka ri Kanaan.
6Haba ki la poi ha ka ri Kanaan, u Abram u ïaid lyngba ïa ka ri haduh ba un da poi ha u dieng kyntang jong u Moreh, ka jaka bakhuid ha Shekhem. (Ha kata ka por, ki Kanaan ki dang don ha ka ri.) 7#Ki Kam. 7:5; Gal. 3:16U Trai u la mihpaw ha u Abram bad u ong ha u, “Kane ka dei ka ri kaba ngan ai ha ki khun ki ksiew ong me.” Nangta u Abram u la tei hangta ïa ka duwan ha U Trai, uba lah mihpaw ha u. 8Hadien kata, u la leit shaphang shathie sha ka ri lum ha ka phang mihngi jong ka Bethel bad u la pynïeng ïa ka dara hapdeng ka Bethel shaphang sepngi bad ka Ai shaphang mihngi. Hangta ruh u la tei ïa ka duwan bad u la mane ïa U Trai. 9Nangta u la ïaid na kawei ka jaka sha kawei pat, u da leit shaphang ka bynta bashathie jong ka ri Kanaan.
U Abram ha ka ri Ijipt
10Hynrei la don ka 'nemsniew ha ka ri Kanaan, bad ka la long kaba jur shikatdei eh kat haduh ba u Abram u la leit jngai shaphang shathie sha ka ri Ijipt ban shong ban sah hangta shipor. 11Hamar ba un sa rung ha ri Ijipt, u ong ha ka Sarai ka tnga jong u, “Pha long ka kynthei kaba bhabriew. 12Haba ki nong Ijipt kin ïohi ïa pha, kin tharai ba pha dei ka tnga jong nga, bad kumta kin pynïap ïa nga bad shah ïa pha, ban im. 13#Jen. 20:2; 26:7Ïathuh ïa ki ba pha dei ka para jong nga; khnang ba na ka bynta jong pha kin shah ïa nga ban im bad lehbha ïa nga.” 14Haba u la rung sha ka ri Ijipt, ki nong Ijipt ki la ïohi ba ka tnga jong u ka la long kaba bhabriew. 15Katto katne na ki rangbah synshar ki la ïohi ïa ka bad ki la ïathuh ha u syiem haduh katno ka la long kaba bhabriew; kumta te ki la ïalam ïa ka sha ka ïing u syiem. 16Namar jong ka, u syiem u la lehbha ïa u Abram bad u la ai ha u ki kynhun langbrot bad ki blang, ki masi, ki kada, ki mraw bad ki ut.
17Hynrei namar ba u syiem u la shim ïa ka Sarai, U Trai u la phah ki jingpang bashyrkhei halor jong u bad halor ki briew ha ka ïing jong u. 18Nangta u syiem u la khot ïa u Abram, bad u kylli ïa u, “Me leh aïu ïa nga? Balei mem shym la ïathuh ïa nga ba ka dei ka tnga jong me? 19Balei me ong ba ka dei ka para jong me, bad shah ïa nga ban shim ïa ka kum ka tnga jong nga? Kane hangne ka tnga jong me; shim noh ïa ka bad khie mihnoh.” 20U syiem u la ai hukum ïa ki briew jong u, kumta ki la shim ïa u Abram bad ki la leit buh ïa u shabar ka ri lem bad ka tnga jong u bad baroh kat kiba u don.
Terpilih Sekarang Ini:
JENESIS 12: KHACLBSI
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Khasi CL Bible
Copyright © Bible Society of India, 2016.
Used by permission. All rights reserved worldwide.