Luuk 24

Yesu be ketiŋi luwu to be asheŋ

(Matiu 28:1-10; Maak 16:1-8; Jɔn 20:1-10)

1Kewushiachɛ na ka ji ŋ klade be bɔkwe na be kachɛ juŋkparso be chipurdidi nɛ beche na ta ŋku dufɛsoana nɛ etulale nɛ b daŋ wora na n yɔ nchaŋ na akpa. 2B ka yɔ nɛ b wu fanɛ b gbelti kejembu nɛ b daŋ ta n ti nchaŋ na be kɔnɔ so na ashi to. 3Ama b ka luri nchaŋ na to, b keni kumo to n fin Yesu be kebuni na ŋ gben. 4B kraa yil ndoŋ nna nɛ kesheŋ na bee chinchiŋ bumo nɛ benyɛn anyɔ ko buu epiŋi fuful parrbiana ko m ba yili m mata bumo epul na to. 5Ndoŋ nna nɛ kufu pɛ beche na nɛ b kur amu n yuu kasawule nɛ benyɛn na bishi bumo le: “Manɛ e ba nɛ menyee fin esa keniso bubuni to? 6Men baa nyiŋi kusɔ nɛ e daŋ kaŋɛ menyi saŋɛ nɛ e daŋ kraa wɔ Galili na 7fanɛ a daga b ka ta mo, Nyiŋgbasa Pibinyɛn m bɔɔ alubiworapoana enɔ nɛ b gbir mo m mata kedibi largato so nɛ e tiŋi kumo be kachɛ sasopo to na.” 8Ndoŋ nna nɛ b nyiŋi Yesu be mmalga na 9nseŋ shi nchaŋ na akpa m bɛta n yɔ epe n ya ta asheŋ na kikɛ ŋ kaŋɛ bebɛsopo kudukako na nɛ bumo nɛ b ka na kikɛ. 10Mɛɛri Magdalin nɛ Joana nɛ Jeems mo nio Mɛɛri nɛ beche nɛ b daŋ ti bumo so na e daŋ ya kaŋɛ beshuŋipo na. 11Ama b daa maŋ yirda bumo nseŋ daa tama fanɛ bumo be mmalga na daa la mmalga fuloŋ nna. 12[Nɛ Pita koso n shile n yɔ nchaŋ na akpa n ya murgi n jule ŋ keni kumo to nɛ kesaŋɛ nɛ b daŋ ta m mea Yesu na nawule e dese to. Ndoŋ nna nɛ e bɛta a yɔ epe nɛ kesheŋ na bee chinchiŋ mo.]

Yesu ka lar bebɛsopo anyɔ ko so be asheŋ

(Maak 16:12-13)

13Kumo be kamɔnchɛ na kikɛ nɛ Yesu be bebɛsopo anyɔ ko yili Jerusalɛm n nite a malga asheŋ nɛ a wora na kikɛ be asheŋ a yɔ kadebi ko nɛ baa tre Ɛmeeyes na. 14Kumo nɛ Jerusalɛm daa la fanɛ emayɛl ashunu nna. 15B kaa bee malga a ber asheŋ nɛ a wora na be bare a yɔ nɛ Yesu gbagba ya tu bumo ekpa na to a yɔ. 16Ama bumo be anishi daŋ ki nna gbrum nɛ b maŋ tiŋ m pin mo. 17Nɛ e bishi bumo le: “Nuso be bare nɛ men kɔ a na a ber le ere?” Nɛ b kilgi a yil a keni asheŋ kagbenejijaso. 18Nɛ bumo be eko nɛ baa tre Kliopas na bishi mo le: “N tama fanɛ fo nawule e la Jerusalɛm ere to be efɔ nɛ e maŋ nyi asheŋ nɛ a wora ndoŋ nchɛnnyɔ ere to ŋko?” 19Nɛ e bishi bumo: “Manɛ be asheŋ?” Nɛ b kaŋɛ mo: “Nazarɛt be Yesu na be asheŋ. E daa la anebi nna nɛ mbe mmalga nɛ asheŋ woraso daa la asheŋgboŋ ashi Ebɔrɛ nɛ basa kikɛ be anishito. 20Ama anyi be bɔrɛmatapowuraana nɛ benimuana ta mo m bɔɔ Romebi be benimu enɔ nɛ b ji mo demu ŋ kaŋɛ fanɛ e daga luwu n ta mo ŋ gbir m mata kedibi largato so m mɔ. 21Anyi alɛ daa tama fanɛ mo nɛ Ebɔrɛ daŋ lara fanɛ e sɔ Israɛlebi n yige. Kumo be buushi kesheŋ na ka wora kumo be nchɛ asa nde kabre. 22Ade malɛ kikɛ be kaman anyi to be beche ko shin nɛ mamachi pɛ anyi nna. B wule nna n yɔ mbe nchaŋ akpa chipur ere 23n ya fin mbe kebuni ŋ gben nseŋ bɛta m ba kaŋɛ fanɛ emalaika lara bumo be amu nna ŋ ŋini bumo nseŋ kaŋɛ bumo fanɛ Yesu na tiŋi luwu to a wɔ ŋkpa to. 24Anyi to be beko ka yɔ nchaŋ na akpa nɛ b ya wu asheŋ nɛ beche na kaŋɛ na gbagba chap, ama Yesu bre gbagba, b maŋ wu mo.” 25Ndoŋ nna nɛ e kaŋɛ bumo le: “Men maa wora nfɛra kuraa, ŋkpal manɛ so, asɔ nɛ anebiana na sibɛ n nase na kikɛ be keta n wɔtɔ menyi be ŋgbene to du menyi so kpakpa kashenteŋto geeŋ. 26Men maŋ nyi fanɛ asheŋ nɛ a wora ere kikɛ daga kewora Kristo na nna pɔɛŋ nɛ e luri mbe kemaŋkura na to a?” 27Ndoŋ nna nɛ e fara Mosis be abɔrɛsibɛ to m bugi asɔ nɛ a bee malga mo gbagba be asheŋ kikɛ to ŋ kaŋɛ bumo loŋ hale n ya bɔla anebiana na kikɛ be abɔrɛsibɛana to nyam.

28B ka ba fo kadebi na nɛ Yesu wora fanɛ e ka daa sha kekpar so n yɔ anishito na. 29Nɛ basa anyɔ na kule mo ŋ kaŋɛ: “Sa maŋ yɔ, ba luri anyi be laŋ to, ŋkpal manɛ so, epeŋi teŋ tɔr nɛ kaboŋ bee jija to.” 30Ndoŋ nna nɛ Yesu shuli n tu bumo n yɔ. Mo nɛ bumo ka ya kaa tase ejikpa nɛ e ta bodobodo na n nɛfa kumo nseŋ bu kumo to n ta n sa bumo. 31Ndoŋ nna nɛ bumo be anishi bugi nɛ b pin mo nɛ e foe bumo to epul na to. 32Nɛ b kaŋɛ abar le: “Amoso nɛ e daŋ bugi abɔrɛsibɛ na to a malga a sa anyi ekpa to nɛ anyi be ŋgbene daŋ fuli anyi ga loŋ na.”

33Epul na gbagba to nɛ b bɛta n yɔ Jerusalɛm n ya tu bebɛsopo kudukako na nɛ bebɛsopo ko malɛ ti bumo so n shɛr a tase. 34Nɛ bebɛsopoana na kaŋɛ bumo benyɔ na le: “Enyɛnpe tiŋi kashenteŋto hale n lar Saimɔn so.” 35Ndoŋ nna nɛ bumo benyɔ na malɛ kaŋɛ bumo asheŋ nɛ a wora Ɛmeeyes be ekpa na to kikɛ nɛ kananɛ b pin mo ashi bodobodo na be kebuto to.

Yesu ka lar mbe bebɛsopo so be asheŋ

(Matiu 28:16-20; Maak 16:14-18; Jɔn 20:19-23; Ashuŋ Shunso 1:6-8)

36B kraa kute asheŋ ere nna nɛ Yesu gbagba ba yili bumo kikɛ to. 37Ama kananɛ e daŋ lar bumo so na daŋ chinchiŋ bumo n ta kufu m pɛ bumo ga nɛ b daa tama fanɛ kebuniyoyu nna. 38Nɛ e bishi bumo le: “Manɛ be kufu e kɔ menyi loŋ? Nɛ manɛ malɛ be nfɛra nɛ menyee fɛ menyi be ŋgbene to ere? 39Men keni ma enɔana nɛ ma aya m pin fanɛ ma nna. Men beta ma ŋ keni, ŋkpal manɛ so, kebuniyoyu maŋ kɔ eyur nɛ awibi fanɛ kananɛ ŋ kɔ ere.” 40E ka kaŋɛ loŋ na nɛ e ta mbe enɔana nɛ aya ŋ ŋini bumo. 41Bumo be ŋgbene ka fuli bumo ga nɛ kesheŋ na kraa chinchiŋ bumo nɛ baa yirda kumo a gben nɛ e bishi bumo le: “Men maŋ kɔ kusɔ jiso ko nfe a?” 42Ndoŋ nna nɛ b sa mo kɔrɔtɔ ŋaseso 43nɛ e ta kumo n we bumo be anishito ndoŋ.

44Kumo be kaman nɛ e kaŋɛ bumo le: “Asheŋ ere kikɛ nɛ n daŋ kaŋɛ menyi saŋɛ nɛ ma nɛ menyi daŋ kraa wɔtɔ na fanɛ ma asheŋ nɛ a wɔ Mosis be abɔrɛsibɛ to nɛ anebiana na kikɛ peyaana to nɛ Nshɛ to na kikɛ daga kebɔla ekpa na.” 45Ndoŋ nna nɛ e shin nɛ bumo be ŋgbene bugi nɛ b tiŋ m pin abɔrɛsibɛ na be afito 46nseŋ kaŋɛ bumo le: “Abɔrɛsibɛ na bee kaŋɛ fanɛ a daga fanɛ Kristo na ka ji awurfoŋ n wu, 47ama kumo be nchɛ asa to e beeŋ tiŋi luwu na to. Mbe ketre so nɛ baaŋ bɔla n yili Jerusalɛm m bɔ kelar alubi to nɛ Ebɔrɛ be keyige alubi m paŋ na be baru na n sa efuli kama so ebi. 48Menyi e la asheŋ ere be eshɛdajipoana. 49Meeŋ shin nɛ n Tuto be kɔnɔ naseso be kakɛ e ba menyi so. Amoso, men baa wɔ kade ere to hale nɛ eleŋ e ya shi esoso m ba buu menyi.”

Yesu ka yɔ ebɔrɛso be asheŋ

(Maak 16:19-20; Ashuŋ Shunso 1:9-11)

50Ndoŋ nna nɛ e juŋkpar bumo n lar n yɔ hale Bɛtani n ya maŋ mbe enɔana so n nɛfa bumo. 51E ka bee nɛfa bumo nɛ e fara a yige bumo a yɔ ebɔrɛso. 52Nɛ b bɛta n yɔ Jerusalɛm nɛ kagbenefuli damta 53n ya kaa wɔtɔ a ba a ba bɔrɛlambu na to saŋkama m ba kaa di Ebɔrɛ epaŋ.

Terpilih Sekarang Ini:

Luuk 24: GJNb

Highlight

Kongsi

Salin