Luuk 18

Ekulpoche nɛ demujipo ko be asheŋ

1Nɛ Yesu bɔ bumo keŋasa ere a ŋini kananɛ a daga fanɛ b baa kule Ebɔrɛ saŋkama nsaa maa pɔ aba. 2E yɛ: “Demujipowura ko e daa wɔ kadegboŋ ko to a maa ŋana Ebɔrɛ, mo alɛ maa sa nyiŋgbasa kikɛ bunyaŋ. 3Ekulpoche ko malɛ daa wɔ kade na to a wɔtɔ a ba mo kutɔ m ba kaa kaŋɛ mo le: ‘Jande, keni ma nɛ ma doŋ be demu ere to n ji kashenteŋ n sɔ ma n yige.’ 4Sososo demujipowura na daŋ kini kenu nna n sa ekulpoche na, ama kumo be kaman nɛ e gben ŋ kaŋɛ mbe kumu le: 5‘N nyi ŋ ka maa ŋana Ebɔrɛ, ma alɛ maa sa nyiŋgbasa kikɛ bunyaŋ, ama ŋkpal kananɛ kache ere bee tɔrɔ ma ere so, meeŋ keni mbe kesheŋ na to n sa mo. Nɛ mannɛ aloŋ, e beeŋ baa wɔtɔ a ba nfe loŋ hale nɛ ebɔl e ya lar ma.’ ”

6Nɛ Yesu kaŋɛ basa na le: “Men nu kusɔ nɛ demujipo kebirkɔnshiwura na kaŋɛ nna na. 7To, nɛ a ji nuso nɛ Ebɔrɛ bre maaŋ keni mbe basa laraso nɛ b wɔtɔ a shu kapa nɛ kanyɛ a tre mo na be asheŋ to n sa bumo? E beeŋ kini kenu manaŋ n sa bumo a? 8Ma e kaŋɛ menyi na fanɛ e beeŋ keni bumo be asheŋ na to amo be ekpa so manaŋ n sa bumo. Ama nɛ fanɛ ma, Nyiŋgbasa Pibinyɛn na kaŋ ba durnya to, meeŋ nya basa nɛ b kɔ yirda na a?”

Farisinyɛn ko nɛ lamposɔpo ko be asheŋ

9Yesu e daŋ bɔ basa nɛ b daŋ yirda bumo gbagba be alelasheŋ a tama fanɛ b la basa cheembi nsaa wɔtɔ a fɛl beko na keŋasa ere. 10E yɛ: “Basa anyɔ ko daŋ yɔ bɔrɛlambu to nɛ b ya kule Ebɔrɛ. Eko daa la Farisi nna nɛ eko malɛ la lamposɔpo. 11Ndoŋ nna nɛ Farisinyɛn na ya yili ŋ kule Ebɔrɛ ŋ kaŋɛ: ‘Ebɔrɛ, mee chɔrɔ fo ga fanɛ ma ere maŋ du fanɛ m braana a suge basa ŋko a la esa lubi ŋko a la esa nɛ e wɔtɔ a kɔ eche nsaa di beche jijiga ŋko a du fanɛ lamposɔpo nɛ e yil ere gba. 12Ela anyɔ nɛ mee kishi bɔkwe kama to nsaa lara ma kpanjawu to be kusɔ kama be kudukudusopo a ba bɔrɛlambu ere to.’ 13Ndoŋ nna nɛ lamposɔpo na malɛ ya yili kufɔ ŋ kur kumu n yuu kasawule nseŋ bri mbe kagbene so ŋ kaŋɛ: ‘Ebɔrɛ, n la alubiworapo nna, wu ma kuwɔr.’ ” 14Nɛ Yesu naŋ kaŋɛ: “Ma e kaŋɛ menyi na fanɛ Ebɔrɛ shin nɛ lamposɔpo na ki elelapo mbe anishito n yɔ epe. Ama Farisinyɛn na bre maŋ nya loŋ, ŋkpal manɛ so, esa kama nɛ e bee maŋ mbe kumu so, baaŋ bar mo kaseto, ama ekama nɛ e bee bar mbe kumu kaseto, baaŋ maŋ mo so.”

Yesu ka nɛfa mbiwurbi be asheŋ

(Matiu 19:13-15; Maak 10:13-16)

15Kachako basa daa bar mbiwurbi gba Yesu kutɔ nna fanɛ e beta bumo, ama mbe bebɛsopo na ka wu loŋ nɛ b fara a ŋmenyaŋ basa na. 16Ndoŋ nna nɛ Yesu tre bumo ŋ kaŋɛ le: “Men shin nɛ mbia na e baa ba ma kutɔ, men sa maa kuŋ bumo ekpa, ŋkpal manɛ so, Ebɔrɛ be kuwura na la loŋ be basa peya nna. 17Kashenteŋ nɛ mee kaŋɛ menyi nna fanɛ esa kama nɛ e maŋ sɔ Ebɔrɛ be kuwura na fanɛ kebibi maaŋ luri kumo to kikɛ.”

Damawura ko be asheŋ

(Matiu 19:16-30; Maak 10:17-31)

18Nɛ Juwebi be ebunyampo ko bishi Yesu le: “Eŋinipo lela, manɛ nɛ meeŋ wora n tiŋ n nya ŋkpa nɛ k maŋ kɔ ekar na?” 19Nɛ Yesu bishi mo: “Manɛ e ba nɛ fee tre ma elelapo? Elelapo kama maŋ wɔtɔ she Ebɔrɛ nawule. 20Fo nyi mbraana nɛ a bee kaŋɛ, sa maa ji kubojua, sa maŋ kaŋ mɔ, sa maŋ kaŋ yuri, sa maŋ kaŋ ji efɛ be shɛda, baa bunyaŋ fo tuto nɛ fo nio na ŋko?” 21Nɛ kanyɛn na kaŋɛ le: “Ma kebiato kikɛ nɛ m bɛ amo ere kikɛ so.” 22Yesu ka nu loŋ nɛ e kaŋɛ kanyɛn na le: “Kusɔ koŋwule e kraŋ ka nɛ fo wora. Kumo alɛ nde: Ya fa fo asɔ kikɛ nyam n ta amo be amansherbi n chige betirpo. Loŋ nɛ feeŋ nya ekpanjawu ashi ebɔrɛso. Ade be kaman nɛ fo ba bɛ ma so.” 23Kanyɛn na ka nu loŋ nɛ mbe kagbene jija mo, ŋkpal manɛ so, e daa la damawura gbagba nna kashenteŋto. 24Ndoŋ nna nɛ Yesu keni mo boeŋ nseŋ kaŋɛ le: “Kashenteŋto, a beeŋ nu damawuraana ga pɔɛŋ nɛ b luri Ebɔrɛ be kuwura na to. 25Damawura be keluri Ebɔrɛ be kuwura na to du kpakpa a chɔ b ka beeŋ ta kemamprɔŋ n wɔtɔ kebasibi be kemaŋ to.” 26Ndoŋ nna nɛ basa nɛ b nu Yesu be kamalga na bishi mo: “To, nɛ basa mo malɛ e naaŋ tiŋ n nya kumɔlga?” 27Nɛ Yesu kaŋɛ bumo le: “Kusɔ nɛ nyiŋgbasa maaŋ tiŋ n wora, Ebɔrɛ bre beeŋ tiŋ n wora kumo.”

28Nɛ Pita kaŋɛ Yesu: “Keni, anyi ere yige anyi be asɔ kikɛ nna nseŋ ba kaa bɛ fo so na.” 29Nɛ Yesu kaŋɛ bumo le: “Ma e kaŋɛ menyi kashenteŋto na fanɛ esa kama nɛ e yige mo pe ŋko mbe eche ŋko mo sipoana nɛ mo daana ŋko mo nio nɛ mo tuto ŋko mbe mbia ŋkpal Ebɔrɛ be kuwura na so, 30amodoŋwura beeŋ nya bumo nɛ e yige na be bedamta naniere n tal to nɛ b baa chɔ bumo nɛ e yige na nɛ jemanɛ nɛ k bee ba na to e naaŋ nya ŋkpa nɛ k maŋ kɔ ekar na.”

Yesu ka naŋ malga mbe luwu be asheŋ

(Matiu 20:17-19; Maak 10:32-34)

31Saŋko Yesu keta mbe bebɛsopo na n lar ekarso ŋ kaŋɛ bumo le: “Men keni, anyee yɔ Jerusalɛm nna nɛ asɔ nɛ anebiana na wu ma, Nyiŋgbasa Pibinyɛn be asheŋ n sibɛ n nase na kikɛ e ya bɔla ekpa. 32Ŋkpal manɛ so, baaŋ ya ta ma m bɔɔ nnyamase enɔ nɛ b wora ma eyurto nɛ amɔmɔshiasheŋ damta nseŋ tuu echɔl n fea ma. 33Baaŋ ya kuya ma so nseŋ mɔ ma. Ama kumo be nchɛ asa to meeŋ tiŋi luwu na to.” 34Ama bebɛsopo na daa maŋ pin mbe mmalga na be kekama to, ŋkpal manɛ so, Ebɔrɛ daa maŋ bugi amo be afito n sa bumo, amoso, b daa maŋ pin mbe mmalga na to.

Yesu ka chɛ tanponyɛn ko be asheŋ

(Matiu 20:29-34; Maak 10:46-52)

35E ka ba kaa taga to Jɛriko nɛ tanponyɛn ko tase ekpakar a kule. 36E ka nu jimaŋ ka bee choŋ nɛ e bishi kusɔ nɛ k ba. 37Nɛ b kaŋɛ mo le: “Nazarɛt be Yesu e naa choŋ.” 38Ndoŋ nna nɛ e boŋ to a tre Yesu a kaŋɛ le: “Yesu, Ewura Deevid mo Nanabi, wu ma kuwɔr!” 39Nɛ basa nɛ b daa wɔ anishito na ponte mo so ŋ kaŋɛ mo fanɛ e lo mbe kɔnɔ, ama e lɔŋɛ m boŋ to a chɔ sososo na a kaŋɛ: “Ewura Deevid mo Nanabi wu ma kuwɔr!” 40Ndoŋ nna nɛ Yesu yili nseŋ kaŋɛ fanɛ b bar tanponyɛn na mo kutɔ. E ka ba taga to nɛ Yesu bishi mo: “Manɛ nɛ fee sha fanɛ n wora n sa fo?” 41Nɛ kanyɛn na kaŋɛ mo: “Enyɛnpe mee sha ŋ ka naŋ nya ma anishi nna a wu.” 42Kumo be kaman nɛ Yesu kaŋɛ mo le: “Naŋ nya fo anishi a wu. Fo yirda e chɛ fo.” 43Epul na malɛ to nɛ kanyɛn na nya mbe anishi a wu nseŋ bɛ Yesu so a di Ebɔrɛ epaŋ. Basa na kikɛ ka wu kumo be loŋ nɛ b di Ebɔrɛ epaŋ ga.

Terpilih Sekarang Ini:

Luuk 18: GJNb

Highlight

Kongsi

Salin