Jɔn 4

Yesu nɛ Samɛria be kache ko be asheŋ

1Jemanɛ ko Efarisiana na nu fanɛ Yesu daa nya nseŋ daa bɛr bebɛsopo a chɔ Jɔn kabɔrɛbɛrpo. 2Ama kashenteŋto, Yesu gbagba daa maŋ bɛr esa kikɛ kabɔrɛbɛr. Mbe bebɛsopo e daa bɛr basa kabɔrɛbɛr. 3Enyɛnpe ka nu fanɛ Efarisiana na nu kesheŋ na nɛ e lar Judiya be efuli na so nɛ e naŋ bɛta n yɔ Galili be kasawule so.

4Ndoŋ nna nɛ k ba fanɛ e bɔla Samɛria be kasawule so n choŋ. 5E ta loŋ m ba fo kade ko nɛ baa tre Sikaa ashi Samɛria. Sikaa nɛ kasawule nɛ Jeekɔb daŋ ta n sa mo pibi Josɛf na daa maŋ wɔ kufɔ. 6Jeekɔb be ketirbu daa wɔ ndoŋ nna nɛ Yesu nite ŋ gben m ba fo ndoŋ kapaso chɛŋchɛŋ nseŋ kilgi n chena ketirbu na ase. 7Ndoŋ nna nɛ Samɛria be kache ko ba nɛ e ba jɔ nchu nɛ Yesu kaŋɛ mo le: “Jande, sa ma nchu nɛ n nuu.” 8Saŋɛ na so nɛ mbe bebɛsopo yɔ kade to nɛ b ya tɔ ajibi. 9Nɛ Samɛriache na bishi mo: “To, fo la Juw nna nɛ ma alɛ la Samɛriache, nɛ nuso nɛ fee wora a kule ma nchu nuuso?” [Kache na daŋ kaŋɛ loŋ nna, ŋkpal manɛ so, Juwebi nɛ Samɛriaebi maŋ kɔ shɛŋ bumo be nferinto.] 10Nɛ Yesu kaŋɛ mo: “Keni alako fo daa nyi Ebɔrɛ be kakɛ nna nseŋ daa nyi esa nɛ e bee kule fo nchu nuuso ere, fo daa beeŋ kule mo nɛ e sa fo nchu nɛ a bee sa ŋkpa.” 11Ndoŋ nna nɛ kache na bishi mo: “To, Ebunyampo, fo maŋ kɔ shɛŋ nfe nɛ fo jɔ nchu ketirbu ere to, ketirbu ere malɛ wɔ nchiŋ nna nɛ nnɛ nɛ feeŋ nya nchu nɛ a bee sa ŋkpa na? 12An nananyɛn Jeekɔb e ta ketirbu ere n sa anyi, mo alɛ nɛ mbe mbia nɛ mbe asɔbɔya kikɛ nuu kumo to be nchu, amoso, fo yɛ fo ŋini fanɛ fo chɔ mo nna ŋko nuso?” 13Nɛ Yesu kaŋɛ mo le: “Esa kama nɛ e nuu nchu ere, achukoŋ beeŋ naŋ pɛ amodoŋwura, 14ama esa kama nɛ e nuu nchu nɛ meeŋ sa mo na maaŋ naŋ shu achukoŋ kikɛ. Kashenteŋto, nchu nɛ meeŋ sa amodoŋwura na beeŋ baa wɔ mo to a bul fanɛ ketirbu na a sa mo ŋkpa nɛ k maŋ kɔ ekar na.” 15Ndoŋ nna nɛ kache na kaŋɛ mo: “Ebunyampo, kumo ere fo sa ma loŋ be nchu na nɛ achukoŋ e sa maŋ naŋ pɛ ma kikɛ nɛ n sa maŋ naa ba m ba kaa jɔ nchu.” 16Nɛ Yesu kaŋɛ mo: “Ya tre fo kul m ba nfe.” 17Nɛ kache na kaŋɛ mo: “M maŋ kɔ ekul.” Nɛ Yesu kaŋɛ mo: “Kashenteŋ nɛ fo ji ŋ kaŋɛ fanɛ fo maŋ kɔ ekul na. 18Ŋkpal manɛ so, bekul anu nɛ fo kil ŋ ku so, nɛ enyɛn mo nɛ fo nɛ mo kraa wɔtɔ ere malɛ gba maŋ la fo kul. Amoso, kusɔ nɛ fo baŋ kaŋɛ ere la kashenteŋ nna.” 19Nɛ kache na kaŋɛ: “Ebunyampo, n wu fanɛ fo la anebi nna. 20Kebee ere so nɛ an nanaana daa bunyaŋ Ebɔrɛ, ama menyi ere Juwebi kaŋɛ fanɛ kakpa nɛ k daga an ka bunyaŋ Ebɔrɛ e la Jerusalɛm.” 21Nɛ Yesu kaŋɛ mo: “Kache manɛ, yirda ma kamalga ere fanɛ saŋko beeŋ ba fo nɛ basa maaŋ naa bunyaŋ Etuto na kebee ere so, bumo alɛ maaŋ naa bunyaŋ Etuto na Jerusalɛm to gba. 22Esa nɛ men maŋ nyi nɛ menyi Samɛriaebi bee bunyaŋ, ama anyi ere nyi esa nɛ anyee bunyaŋ, ŋkpal manɛ so, Juwebi so nɛ Ebɔrɛ beeŋ bɔla m mɔlga basa. 23Ama saŋko beeŋ ba fo, k teŋ fo gba nɛ basa e bɔla Ebɔrɛ be Kiyoyu be eleŋ so a bunyaŋ Etuto na kashenteŋto. Bumo nɛ b kɔ le be bunyaŋ ere nɛ Etuto na bee fin. 24Ebɔrɛ la Kiyoyu nna nɛ a daga fanɛ bumo nɛ baa bunyaŋ mo e baa bɔla mbe Kiyoyu be eleŋ so a bunyaŋ mo kashenteŋto.” 25Nɛ kache na kaŋɛ Yesu le: “Ma alɛ gba nyi fanɛ kachako Mesaya nɛ baa tre Kristo na beeŋ ba, mo alɛ kaŋ ba, e beeŋ bugi kusɔ kama to n sa anyi.” 26Ndoŋ nna nɛ Yesu kaŋɛ: “Ma nɛ mee malga fo kutɔ ere e la mo na.”

27Kumo be saŋɛ na so nɛ Yesu be bebɛsopo shi kade to m bɛta m ba nɛ e bee malga kache na kutɔ nɛ k chinchiŋ bumo ga. Ama bumo alɛ be ekama maŋ tiŋ m bishi kache na: “Manɛ nɛ fee sha?” Ŋko m bishi Yesu: “Manɛ e ba nɛ fee malga kache na kutɔ?” 28Ndoŋ nna nɛ kache na yige mbe kusɔjɔnchu ndoŋ nseŋ kilgi n yɔ kade to n ya kaŋɛ basa le: 29“Kadeebi, men ba keni kanyɛn nɛ e tiŋ ŋ kaŋɛ ma kusɔ nɛ ŋ koso n wora kikɛ, shere Kristo na nna.” 30Ndoŋ nna nɛ b lar kade na to m pɛ Yesu kutɔ be keyɔ be ekpa.

31Kesheŋ ere ka bee wora kade to le ere nɛ Yesu be bebɛsopo malɛ bee kule mo fanɛ e ji ajibi a kaŋɛ mo: “Eŋinipo, wora ania n ji kusɔ ko.” 32Ama le nɛ Yesu daŋ kaŋɛ bumo: “Ŋ kɔ kejibi ko nɛ n ji nɛ men maŋ nyi kumo be asheŋ.” 33Nɛ bebɛsopo na bishi abar: “Ŋko esa ko e bar mo ajibi ŋko nuso?” 34Ndoŋ nna nɛ Yesu kaŋɛ bumo le: “Ma ajibi e la kewora esa nɛ e shuŋi ma na be aparsheŋ nɛ keloge mbe kushuŋ. 35Mannɛ menyi basa e naa kaa kaŋɛ fanɛ: ‘A ka afɔl ana nɛ kasɔteŋi be jemanɛ e fo’ na a? Ma e kaŋɛ menyi na fanɛ men bugi menyi be anishi ŋ keni kananɛ adɔana du. Asɔ kikɛ daŋ bel nna m pere a jo keteŋi. 36Men keni asɔteŋipo na tea nya mbe kakɔka, mo alɛ bee teŋi asɔ nna a yili ŋkpa nɛ k maŋ kɔ ekar na be jemanɛ, saŋɛ na so, eduupo na nɛ eteŋipo na kikɛ be ŋgbene beeŋ fuli bumo. 37Basa ka bee kaa malga loŋ be kesheŋ na malɛ fanɛ: ‘Esa ko e naa duu nɛ eko malɛ bee teŋi na’, la kashenteŋ nna. 38N daŋ shuŋi menyi nna nɛ men ya teŋi asɔ nɛ men gbagba maŋ dɔ. Beko e dɔ nɛ menyi ere bee ji amo be tɔnɔ na.”

39Kade na to be Samɛriaebi damta daŋ yirda Yesu nna ŋkpal kache na be shɛda nɛ e daŋ ji ŋ kaŋɛ le na so, e yɛ: “E kaŋɛ ma kusɔ nɛ n wora kikɛ.” 40Amoso, Samɛriaebi na ka ba mo kutɔ, nɛ b ba kule mo fanɛ e ya chena bumo kutɔ nɛ e ya ji nchɛnnyɔ ndoŋ. 41Ndoŋ nna nɛ basa damta ko malɛ gba naŋ yirda mo n ti so ŋkpal mbe mmalga na so. 42Nɛ bumo gbagba kaŋɛ kache na: “Naniere bre, mannɛ fo ka kaŋɛ anyi so nɛ an yirda, an gbagba nu mmalga na nseŋ pin fanɛ kashenteŋto kanyɛn ere e la durnya ere be Emɔlgapo.”

Yesu ka bɛta n yɔ Galili be asheŋ

43Yesu ka ji nchɛnnyɔ na ndoŋ n loge nɛ e yɔ Galili be kasawule so. 44Mo ere Yesu gbagba e daŋ chɛr ŋ kaŋɛ fanɛ: “Anebi kama maŋ kɔ bunyaŋ mo gbagba be basa to.” 45E ka ba fo Galili nɛ ndoŋebi sɔ mo nɛnɛ, ŋkpal manɛ so, b daŋ wu asheŋ nɛ e daŋ wora ashi Jerusalɛm to Kebansonchoŋ be kejigboŋ be daŋkare be jemanɛ na. Bumo alɛ gba daa wɔ ndoŋ nna nɛ loŋ be asheŋ na kikɛ daŋ wora.

Yesu ka chɛ enimu ko pibi be asheŋ

(Matiu 8:5-10; Luuk 7:2-10)

46Ndoŋ nna nɛ Yesu yaŋ yɔ Keena ashi Galili, kakpa nɛ e daŋ keta nchu ŋ ki yabra belbelso na. E ka yɔ nɛ abane be krachi nimuso ko pibinyɛnsobi ko dese Kapɛɛniam a lɔ. 47Kanyɛn na ka nu fanɛ Yesu shi Judiya m ba Galili nɛ e yɔ mo kutɔ n ya kule mo fanɛ e yɔ Kapɛɛniam n ya chɛ mo pibinyɛn nɛ e daa sha nɛ e wu na n sa mo. 48Nɛ Yesu kaŋɛ mo le: “Nɛ men be ekama baa maŋ wu mamachi be etɔɔnɛsheŋ, men maa yirda kikɛ.” 49Ndoŋ nna nɛ krachi na kaŋɛ Yesu le: “Ebunyampo, jande, ba nɛ an yɔ nɛ ma kebia na e sa maŋ wu pɔɛŋ nɛ an fo ndoŋ.” 50Nɛ Yesu kaŋɛ mo: “Baa yɔ, fo pibi na maaŋ wu.” Ndoŋ nna nɛ kanyɛn na yirda Yesu be kamalga na nseŋ choŋ. 51E kraa wɔ epe be ekpa to nna a yɔ nɛ mbe anya shɛr mo ekpa to ŋ kaŋɛ mo fanɛ mbe kebia na nya alenfia. 52E ka bishi bumo saŋɛ mo nɛ mbe kebia na fara a nya alenfia nɛ b kaŋɛ mo: “Ndre kapaso kerfi koŋwule nɛ mbe kayurbeldɛ na yige mo.” 53Ndoŋ nna nɛ etuto na nyiŋi fanɛ kumo be saŋɛ na so gbagba nɛ Yesu kaŋɛ le na: “Fo pibi na maaŋ wu.” Ndoŋ nna nɛ mo nɛ mbe kowu to ebi kikɛ yirda Yesu.

54Kesheŋ ere e daa la mamachi be tɔɔnɛsheŋ nyɔsopo nɛ Yesu daŋ shi Judiya m ba Galili m ba wora.

Terpilih Sekarang Ini:

Jɔn 4: GJNb

Highlight

Kongsi

Salin