ሉቃሴ 15

ባይቄ ማራይ ኮኦኪንሢ

(ማቲ. 18፥12-14)

1ኮርሞ ዓሶይዳፓ ሚኢሾ ቡኩሳ ዓሶና ጎሞ ዓሶና ቢያ ዬሱሴ ዔርዛ ዔርዚፆ ዋይዛኒ ቡኪንቲ ዒዛ ኮራ ሙኬኔ። 2ፔርሴ ዓሶና ሙሴ ዔርዜ ዎጎ ዔርዛ ዓሶና ጋዓንቴ ዬያ ዛጋዖ፦ «ሓይ ሃይሾ ጎሞ ዓሶ ናሽኪ ዔኪ፥ ዔያቶና ዎላ'' ሙዓኔ» ጌዒ ጌዒ ዬሱሴ ዾንኪሢ ዓርቄኔ። #ሉቃ. 5፥29-30። 3ዬያሮ ዬሱሴ ሃያ ኮኦኪንሦ ዔያቶም ሂዚ ጌዒ ኬኤዚሢ ዓርቄኔ።

4«ዒንሢዳፓ ፄኤታ ማራይ ዓኣ ዓሲ ፔቴ'' ማራይ ባይቄቶ ዎይታንዳያ ዒንሢም ማላይ? ታዞጲታሚ ታዞጶ ማራቶ ካያ ሃሺ''፥ ዬያ ባይቄ ማራዓሢ ዴንቃኒ ኮዓኒ ዴንዳዓዳ? 5ዬካፓ ዒዚ ዴንቃዖ ኮሺ'' ዎዛዺ፥ ጌኤታ ኬዲ ማሂ ዔኪ ሙኪ፥ 6ማኣሪ ሄሌ''ስካፓ ፔኤኮ ላጎና ዓሺኖና ፔቴ''ይዳ ዔኤሊ''፦ ‹ታኣኮ ባይቄ ማራዓሢ ታ ዴንቄሢሮ ታ ዎዛዻኔ፤ ታኣና ዎዛዹዋቴ!› ዔያቶም ጋዓንዳኔ። 7ጎሜ ቡኡፂ ማዓኒ ኮይሱዋ፥ ታዞጲታሚ'' ታዞጶ ጌኤዦ ዓሶይዳፓ ባሼ ጎሞ ቡኡፂ ጌኤሽካ ፔቴ'' ጎሜ ዓሲ ዛላና ፆኦሲ ካኣቱሞይዳ ዎዛ ማዓኔ ታ ዒንሢም ጋዓኔ» ጌዔኔ።

ባይቄ ሚኢሼ ኮኦኪንሦ

8ሄሊ''ሳዖ ዬሱሴ፦ «ታጶ ቢራ ዓኣ ላኣሊኮ ፔቴ'' ቢራ ባይቄቶ ዒዛ ዎዳ''ንዳያ ዒንሢም ማላይ? ፖዒ ፖዒሲ ጋሮዋ ፒፂ'' ዴንቃንዳያ ሄላ''ንዳኣና ዓኣሺንቴ ቤዞ ቢያ ኮዓዓዳ? 9ዬካፓ ዒዛ ዴንቃዖ ዒዞኮ ላጎና ዓሺኖና ፔቴ''ይዳ ዔኤሊ'' ‹ታኣኮ ባይቄ ቢሬሎ ዴንቂ ታ ዎዛዻሢሮ፥ ታኣና ዎላ'' ዎዛዹዋቴ!› ዔያቶም ዒዛ ጋዓንዳኔ። 10ጎሜ ቡኡፂ ጌኤሽካ ፔቴ'' ጎሜ ዓሲ ዛላና ጫሪንጮይዳ ኪኢታንቻ ዬያጉዲ ዎዛዻኔ፥ ታ ዒንሢም ጋዓኔ።»

ባይቂ ጴዼ ናዓሢ ኮኦኪንሦ

11ሃሣ ዬሱሴ፦ «ፔቴ'' ዓሲኮ ላምዖ ናይ ዓኣኔ፤ 12ጌኤዛሢ ዓዳሢ ኮራ ‹ዓዴ! ኔኤኮ ዓኣ ባካፓ ፓቂ፥ ታና ሄላ''ዞንሢ ሃሢ ታኣም ዒንጌ› ጌዔሢሮ፥ ዓዳሢ ዓኣ ባኮ ላምዖ ናኣቶ''ም ጊሽኬኔ። 13ዻካ'' ኬሊ''ኮ ጊንፃፓ ጌኤዛሢ ፔኤኮ ፓቂ ዔኬ ባኮ ሻንቺያ ሻንቺ ሃሣ ላኣሚያ ላኣሚ ዔካዖ ሃኬ ዓጪ ዴንዴኔ፤ ዒኢካ ዒ ዓኣዼ ቤዛ ፔኤኮ ሚኢሾ ቢያ ጉሪ ላኣሊ ባይዜኔ። 14ሚኢሾ ዒ ፔኤኮ ቢያ ጋፒሴስካፓ ዬኖ ዓጬ''ሎይዳ ሚርጌ ናይዚ ኬስኬሢሮ ሜቶይዳ ዒ ኬዴኔ። 15ዬያ ሜታሢዳፓ ዔቄያና ዬኖ ዓጮ''ይዳ ዓኣ ፔቴ'' ዓሲስኬያ ኮይላ'' ናንጋኒ ጌላዛ፥ ዬይ ዓሢ ፔኤኮ ቆሎ ጉዱንፆ ሄንቂሴኔ። 16ናያ ዶዴሢሮ ናዓሢ ጉዱንፃ ሙዓ ሃኣኮ ዲልቦ ሙዒ ሚሽካኒ ዓፃዼቶዋ ዬያ ዒዛም ዒንጋ ዓሲ ባይቄኔ፤ 17ዒማ''ና ናዓሢ ፔኤኮ ዻቢንቶ ዔሪጋፓ ‹ታ ዓዶ ማኣሮይዳ ማዾ'' ማዻኒ ጌላ ዓሳ ካሦ ሙዒ ሚሽኬም ዓዓታንቴ፥ ታኣኒ ሃይካ ናዮና ሃይቃኔ፤ 18ዓካሪ ታ ዔቂ ታ ዓዶ ኮይላ'' ዓኣዺጋፓ፦ «ዓዴ! ፆኦሲና ኔኤናና ቤርታ ታ ዻቤኔ፤ 19ሃካፓ ሴካ ኔ ናይ ታ ጌይንታኒ ታኣም ኮይሱዋሴ፤ ጋዓንቴ ኔኤኒ ማዺሻ፥ ዓይሎ''ይዳፓ ፔቴ''ሢ ታና ማሄ ታ ጋዓንዳኔ» › ጌዒ ማሌኔ። 20ዬያ ጋዓዖ ዔቂ ዓዶ ባንሢ ዓኣዼኔ።

«ዬካፓ ዓዴ ሃጊ ሃኬ ዓኣንቴ ናዓሢ ዴንቃዖ፥ ሚጪንቲ ዒዛ ባንሢ ጳሽኪ ኮንቂ ዒዛ ሄርቄኔ። 21ናዓሢያ፦ ‹ዓዴ! ፆኦሲና ኔኤና ቤርታ ታ ዻቤኔ፤ ሃይፓ ሴካ ኔኤኮ ናይ ጌይንታኒ ታና ኮይሱዋሴ› ጌዔኔ። 22ዓዴ ጋዓንቴ ማዻ ዓሶ ዔኤላ''ዖ፦ ‹ዑካዺ ቃራ ማኣዖ ዔኪ ሙኪ ማይሱዋቴ፤ ኬኤሎ''ይዳ ዢኢሮ፥ ቶኮ''ይዳኣ ዱርሲ ዓኣሡዋቴ፤ 23ሃሣ ቃራ ማሊ'' ቡዋ ዔኪ ሙኪ ሹኩዋቴ፥ ሙዒ ኑ ዎዛዾም፤ 24ዓይጎሮ ጌዔቶ ሃይ ናዓሢ ታኣኮ «ሃይቄኔ» ታ ጌዔንቴ፥ ሃይሾ ሃሢ ሼምፖና ዓኣያ ማዔኔ፤ ባይቄያታዖ ጴዼኔ› ጋዓዖ፥ ዎዛዺሢ ዓርቄኔ።

25«ዬማና ቶይዳሢ ማዾ''ሮ ቦኦሎ'' ዓኣዼዖ ማዒ ሙኪ ማኣሮኮ ዑኬ ዎዶ''ና ኮሢ ኮርጎንቴ ዋይዜኔ፤ 26ዬካፓ ዒዚ ዓይሎ''ይዳፓ ፔቴ''ስኬያ ዔኤላ''ዖ ‹ሓይ ዓይጎዳይ?› ጌዒ ዖኦጬኔ። 27ዓይላ''ሢ ማሃዖ ‹ኔ ጌኤዚ'' ማዒ ሙኬኔ፤ ኔ ዓዴ ዒ ኮሺ ዓኣንቴ ዒዛ ዴንቄሢሮ ማሌ'' ቡዋሢ ዒዛም ሹኬኔ› ጌዔኔ።

28«ዬያሮ ቶይዳሢ ሚርጌና ዻጋዻዖ፦ ‹ማኣሪ ታ ጌላዓ› ጋዓዛ፥ ዓዴ ካሮ'' ኬስኪ ጌላንዳጉዲ ዒዛ ሺኢቄኔ። 29ናዓሢ ጋዓንቴ ዓዶም ‹ሃኣዛጌ፥ ሃያጉዴ ሌዔ ታ ኔኤም ማዼኔ፤ ኔ ዓይሤ ባኣዚ''ያ ዒፂ ታ ቤቂባኣሴ፤ ዓካሪ ታኣኒ ታ ላጎንሢና ዎላ'' ዎዛዻንዳጉዲ ፔቴ'' ዋናናይታዖ ታኣም ኔ ዒንጊ ቤቂባኣሴ። 30ሃይ ኔኤኮ ናዓሢ ጋዓንቴ ኔጊዳፓ ፓቂ ዔኬ ባኮ ዞኦዞ ላኣሎና ዎላ'' ኩርሲ ማዔ ዎዶ''ና ማሌ'' ቡዋሢ ኔ ዒዛም ሹኬኔ› ጌዒ ማሄኔ። 31ዓዳሢ ማሃዖ፦ ‹ታ ናዓሢዮ! ኔኤኒ ቢያ ኬሊ'' ታኣና ዎላ''ኬ፤ ታኣሲ'' ጉቤ ኔኤሮኬ። 32ሃይ ኔ ጌኤዚ'' «ሃይቄኔ» ታ ጌዔንቴ፥ ሃሢ ሼምፖና ዓኣያ ማዔኔ፤ ባይቄያታዖ ሃሢ ጴዼኔ፤ ዬያሮ ሚርጌ ኑ ዎዛዻንዳያ ኑና ኮይሴኔ› » ጌዔኔ።

Terpilih Sekarang Ini:

ሉቃሴ 15: MNT

Highlight

Kongsi

Salin