پێدایش 1
1
بُنگێج
1بُنگێجا، هُدایا آسمان و زمین اَڈّ کرتنت. 2زمین بێدرۆشم اَت و هچّی مان نێست‌اَت. تهاریا جُهلانکی سرپۆش کرتگ‌اَت و هُدائے روه آپئے سربرا نێم‌بال#1:2 نێم‌بال، بزان زمین یا آپئے سرا چِست اِنت، بله آسمانا بال نه‌اِنت. اَت.
3هُدایا گوَشت: ”رُژنایی ببیت“ و رُژنایی بوت. 4هُدایا دیست که رُژنایی شَرّ اِنت، گڑا رُژنی چه تهاریا جتا کرت. 5هُدایا رُژنئے نام ”رۆچ“ کرت و تهاریئے نام ”شپ“. شپ گوَست و سُهب بوت. اے ائولی رۆچ اَت.
6هُدایا گوَشت: ”آپانی نیاما کُبّهے#1:6 کُبّه، بزان بُرزێن گُمبُدپئیمێن گِردی. ببیت که آپا چه آپا جتا بکنت.“ 7هُدایا کُبّه اَڈّ کرت و کُبّهئے چێرئے آپ چه سربُرئے آپان جتا کرتنت. اے کار بوت. 8هُدایا کُبّهئے نام ”آسمان“ کرت. شپ گوَست و سُهب بوت. اے دومی رۆچ اَت.
9هُدایا گوَشت: ”آسمانئے چێرئے آپ یکّ نێمگے ببنت و هُشکی پَدّر ببیت“ و اَنچُش بوت. 10هُدایا هُشکیئے نام ”زمین“ کرت و یکجاه بوتگێن آپانی نام ”دریا“. هُدایا دیست که اے کار شَرّ بوت.
11هُدایا گوَشت: ”زمین سبزگ برۆدێنیت؛ تُهمدارێن کِشار و نیبگ دئیۆکێن درچک، که هر درچکئے برا، آییئے جندئے تُهم مان ببیت، آیانی جندئے تَهرئے هسابا“ و اَنچُش بوت. 12زمینا سبزگ رۆدێنت؛ تُهمدارێن کِشار و نیبگ دئیۆکێن درچک که هَمُک درچکئے بَرا وتی تُهم مان اَت، آیانی جندئے تَهرئے هسابا. هُدایا دیست که اے کار شَرّ بوت. 13شپ گوَست و سُهب بوت. اے سئیمی رۆچ اَت.
14هُدایا گوَشت: ”آسمانئے کُبّها رُژناێن چیزّ مان ببیت که رۆچا چه شپا جتا بکننت. اے رُژناێن چیزّ مۆسم، رۆچ و سالانی نشانی ببنت. 15اے، کُبّها نور جۆڑ ببنت و زمینا رُژنا بکننت“ و اَنچُش بوت. 16هُدایا دو مزنێن نور اَڈّ کرت، مسترێن نوری اَڈّ کرت که رۆچئے سرا هاکمی بکنت و کَسترێن نور شپئے سرا. اِستاری هم اَڈّ کرتنت. 17هُدایا اے نور، آسمانئے کُبّها اێر کرتنت که زمینا رُژن بدئینت و 18رۆچ و شپئے سرا هاکمی بکننت و رُژنا چه تهاریا جتا بکننت. هُدایا دیست که اے کار شَرّ بوت. 19شپ گوَست و سُهب بوت. اے چارمی رۆچ اَت.
20هُدایا گوَشت: ”آپ چه سَهدارانی رَمان#1:20 رَم، بزان مُچّی، ٹۆلی، رَمگ. پُرّ ببنت و بالی مُرگ، زمینئے سربُرا، آسمانئے کُبّها بال بکننت.“ 21گڑا هُدایا مزنێن دریایی سَهدار و وڑ وڑێن دگه سَهدار اَڈّ کرت که اے، وتی تَهرئے هسابا رَم جۆڑ بوتنت و دریااِش پُرّ کرت. همے پئیما وڑ وڑێن بالی مُرگی اَڈّ کرت، آیانی جندئے تَهرئے هسابا. هُدایا دیست که اے کار شَرّ بوت. 22هُدایا اے سجّهێن برکت دات و گوَشتنت: ”چُکّ و بَر کنێت. گێش بئیان ببێت و دریایان پُرّ کنێت. بالی مُرگ هم زمینا سکّ باز ببنت.“ 23شپ گوَست و سُهب بوت. اے پنچمی رۆچ اَت.
24هُدایا گوَشت: ”زمین هر پئیمێن سَهدار پێدا بکنت، آیانی جندئے تَهرئے هسابا؛ دَلوَتا#1:24 دَلوَت، بزان لۆگئے دَپی جانوَر چۆ که پَس و گۆک. بگر تان لاپکَشّێن#1:24 لاپکَشّ، هما جانوَر که په لاپ راهَ رئونت یا راها لاپِش گِرّان اِنت، چۆ که مار و گۆج. جانوَر و وَکشیێن هئیوانا، هر یکّے وتی تَهرئے هسابا.“ اے کار بوت. 25هُدایا زمینئے وَکشیێن هئیوان آیانی جندئے تَهرئے هسابا، دَلوَت آیانی جندئے تَهرئے هسابا و زمینئے سرا لاپکَشّێن جانوَر آیانی جندئے تَهرئے هسابا جۆڑ کرتنت. هُدایا دیست که اے کار شَرّ بوت.
26هُدایا گوَشت: ”بیا اِنسانا وتی جندئے درۆشما اَڈَّ کنێن، وتی شِکلا که دریائے ماهیگ، آسمانئے مُرگ، دَلوَت، سجّهێن وَکشیێن هئیوان و لاپکَشّێن جانوَرانی سرا هاکمی بکنت.“
27هُدایا اِنسان وتی شِکلا اَڈّ کرت،
وتی جندئے هُدایی شِکلا اَڈّی کرت،
مردێن و جنێنی اَڈّ کرتنت.
28هُدایا آ، برکت دات و گوَشتنت: ”چُکّ و بَر کنێت، باز ببێت و زمینا پُرّ کنێت و زمینئے سرا هاکمی بکنێت. دریائے ماهیگ، آسمانئے مُرگ و زمینئے سجّهێن سُرِندَهانی سرا هاکمی بکنێت.“ 29هُدایا گوَشت: ”بچارێت، من شمارا زمینئے سرئے هما سجّهێن سبزگانَ دئیان که تُهمَ کارنت و هما سجّهێن درچکانَ دئیان که بَرانِش جندئے تُهم مان اِنت. اے شمئے وراک اَنت. 30من زمینئے سجّهێن هئیوان، آسمانئے سجّهێن مُرگ، سجّهێن لاپکَشّێن جانوَر، بزان هَمُک سَهدار هم په وراکا سبزگ داتگ.“ اے کار بوت. 31هُدایا وتی سجّهێن جۆڑ کرتگێن چیزّ چارتنت. دیستی که اے کار سکّ شَرّ بوت. شپ گوَست و سُهب بوت. اے شَشُمی رۆچ اَت.
Terpilih Sekarang Ini:
پێدایش 1: HPKB
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2016-22 Wycliffe Bible Translators, Inc.