Jɔnn 6
6
Yisa kaah Jin Bininfob Turiŋmu man
(Matiu 14:13-21; Mag 6:30-44; Lug 9:10-17)
1Ni nan a bɔɔn, le Yisa nan don Galilii a mɔgil a gbaam nan fɔg (li ma ye, Tiberiya a mɔgilin), 2le kuninfobabug nan nɔɔ u, nan bu-n bi nan kan ligaril a siɛram yan wee u nan tun ki sei bibaaribin le. 3Le Yisa nin u bɔɔnɔɔb nan don lijɔɔl a paab ki tan kal. 4Juu yaab a Yuglagir a Chiigin nan mala. 5Yisa kaah nan nan lig ki kan kuninfobabugin kaah chaan u ban nin, le u bei Filib ke, “Ti yin da boroboro laa ki sei bininfob nan njii?” 6U nan baan man ke un mag u le, amaa u pii nan nyi u poolin waah nan yin ŋa man.
7Le Filib jiin u ke, “Iŋmal iniin a yɔr kaa li fir da boroboro wee i yin yab ki foo wee bi biɛn pii nyiri!”
8Le Anduru wan ye u bɔɔnɔɔb uba ki ye Simɔnn Piita a waalin nan pag ke, 9“Kibig kiba sɔ ki jɔɔ boroboro bum miŋmu kpeŋ kpeŋ nin njanbum milee, amaa ni yin ŋa nii ki tol foo kuninfogbaluŋ nan naa?”
10Le Yisa len ke, “Che bininfob nmɔn nkala.” Timɔɔr takpem le nan be niin yaan, le bijabin nan kal, bi nan foo bijab turiŋmuu. 11Le Yisa nan yuur boroboro-n, ki poor Uwonbɔr i bu, le ki nan che bi por i ki sei ban nan ka-n le bi biɛn gaa baah ban man. U ji nan ŋa man le ijan nin bu. 12Bi biɛn kaah nan nan jin gbee-n, le u nan bei u bɔɔnɔɔb ke, “Ni lagin baah jin gur yan nin na. Ni laa che niba npaar yɔli.” 13Le bi nan lagin lagin baah nan jin ki gur boroboro biŋmu-n a poolin nin le ki gbeen tikachar piig nin tilee.
14Bininfobin kaah nan kan ligaril a siɛra yan wee Yisa nan tun nin a bɔɔn, le bi nin piin ki len ke, “Ibamɔn, ulinlenn wan yin dan dulinya nan yaan nin sɔ.” 15Yisa kaah nan biɛ ke bi lol le ke bin dan ki nan mug ŋa u ubɔrin, le u ji nan woon nyan niin ki don lijɔɔl a paab u binba.
Yisa Chonn Nnyum bu
(Matiu 14:22-33; Mag 6:45-52)
16Kujɔɔg kaah nan foo-n, le u bɔɔnɔɔb nan jiir limɔgilin, 17nin yaan le bi nan kɔɔ kuŋaluŋ ki don limɔgilin ki jon Kapeniɛm. N-yonn nmɔn ni nan bɔŋa, le Yisa kaa la nan dan bi ban ni. 18Ntafapɔɔrim le nan daar le tinyungbann nan fii. 19Baah nan kɔɔ kuŋaluŋ ki don maal itaa bee itaa nin li genlin, le bi nan kan Yisa chonn nnyum bu ki forin kuŋaluŋin ban, le nin nan ŋa bi bijawaam le bi jegil. 20Amaa le u nan bei bi ke, “Ni ye min le; ni laa san bijawaami.” 21Tɔ le bi ni nan ban bin ta u kɔɔn kuŋaluŋin a poolin, le libol nmɔn le kuŋaluŋin foo likpengonl lan yaan wee bi chaa-n.
Bininfob ban wee bi nan jin nin kaah ban Yisa a bol man
22Kutaag kaah nan won nin le kuninfogbaluŋ ban nan paar be limɔgil a doolin nan nan biɛ ke kuŋaluŋ kiba le nan be niin, le bi nan biɛ ke Yisa kaa nan nɔɔ u bɔɔnɔɔb ki kɔɔ ki, amaa bi nan jon bi binba le. 23Tɔ le tiŋalin tiba nyan Tiberiya ki nan sir ki mal nan yaan wee Uyudaan nin nan poor Uwonbɔr ki sei boroboro-n wee bininfobin nan jin nin. 24Nin yaan le kuninfogbaluŋin nan biɛ ke Yisa nin u bɔɔnɔɔbin kaa nan be niin ni, le bi kɔɔ kuŋaluŋ ki jon Kapeniɛm ki tan chonn ban u bol.
Yisa le ye Limiɛfol a Boroboro
25Baah nan nan ban kan u limɔgil a nanbu a doolin, le bi baan u, “Wan wɔɔn, ibayoo a foon doo?”
26Le Yisa jiin ke, “N bei ni ibamɔn le, ni chonn bam le, naa ye naah kan ligaril a siɛra bu, amaa naah ŋman boroboro le ki gbee-n bu. 27Ni laa tun ki ban tijiir tan li bii, amaa ni li gbaar ban tijiir tan li che ni kan limiɛfol lan kaa jɔɔ diɛm, tan wee Uninfosaal a Bigin yin sei ni-n. Uwonbɔr wan ye Baa-n le ta u cheem a daagim ki paan u bu.”
28Tɔ le bi baan u ke, “Ti yin ŋa nii ki tun Uwonbɔr kaah ban itoon yan naa?”
29Le Yisa jiin ke, “Uwonbɔr a toonl ye nan le: Ŋaam wan wee u nan tun nin yada.”
30Mambu le bi baan u ke, “Baa a garil a siɛra wee a yin ŋa sei ti wee ti kan ki ŋaaŋ yadaa? 31Ti yaajam nan ŋman kulɔŋ a boroboro kukunkɔɔg bu; ke na pii nan sɔb man nin: ‘U nan sei bi boroboro kan nyan paabin le bi jin.’ ”
32Le Yisa bei bi ke, “N bei ni ibamɔn le, naa ye Moziz le nan sei ni boroboro kan nan nyan paabin ni, amaa n Baa le tenn boroboro bamɔn kan nyan paabin. 33Nan bu-n Uwonbɔr a boroboro ye min wan nyan paab ki jiirin ki nan tenn dulinya nan a ninfob limiɛfolin le.”
34Le bi ke, “Uyudaan, naah nyan dinan ki jɔɔ chaa li tenn ti boroboro nan na.”
35Le Yisa ni nyan pag npaan ni ke, “Min li ye limiɛfol a boroboro. Wan dan n ban ke nkom kaa ji li choo wi, le wan ŋaam yada ke nnyunyum kaa li nyi choo wi. 36Amaa ke maah bei ni man nin, ni kan ma amaa le kaa ŋa yada. 37Nan biɛn wee Baa-n ta seim li dan n ban, le wan biɛn dan n ban ke maa li ŋɔɔr wi. 38Nan bu-n maa nan nyan paab jiirin ke n nan tun n wiib kaah ban man le amaa ke n nan tun Uwonbɔr wan nan tunimin a wiib kaah ban man. 39Le Uwonbɔr wan nan tunimin a wiib kaah ban man sɔ, ke n laa lann nan biɛn wee u ta seimin ni, amaa ke lidajoorikaalin ke n don bi paab. 40Baa-n kaah ban man ye le ke wan biɛn lig kan Bija-n ki ŋa u yada ke u li kan limiɛfol lan kaa jɔɔ diɛmin, le lidajoorikaalin n li don u paab.”
41Ni nan bu le Juu yaab nin nan piin ki ŋulin, waah nan len ke, “Min le ye boroboro kan nan nyan paab ki jiirin nin.” 42Bi nan ke, “Naa ye Yisa, Josef a bija-n sɔɔ? Wan a baa nin u naa ti nyi-n naa? U nin yin ŋaa nii ki len ke, ‘N nyan paab le ki jiirin’ naa?”
43Le Yisa jiin ke, “Ni jiɛn iŋulin tab ban na. 44Uba kaa li fir dan n ban wee naa ye Baa wan tunimin li ta u dan nin, le lidajoorikaalin ke n li don u paab. 45Ni sɔb bilinlem a gbɔŋin ke: ‘Uwonbɔr na li wɔɔn bi biɛn.’ Ban biɛn pelig Baa-n kaah len man nin wee ki tinn u ban nin li dan n ban. 46Uba kaa la nyi kan Baa-n ni, man ke wan nyan Uwonbɔr ban nin; u yaa binba le nan kan Baa-n. 47N bei ni ibamɔn le, wan ŋa yada jɔɔ limiɛfol lan kaa jɔɔ diɛm. 48Min le ye limiɛfol a boroboro. 49Ni yaajam nan ŋman kulɔŋ a boroboro kukunkɔɔgin le, amaa bi nan kpou. 50Amaa boroboro kan nyann paab ki jiirin nsɔ, ki ma le uninfo li fir ŋman le kaa li kpo. 51Min le ye boroboro kan fo-n wee ki nyan paabin. Ni ye uninfo wan ŋman boroboro nan ke, u yin be le ki gbaa be. Boroboro nan le ye n gbanann, tan wee n yin ta sei dulinya, dulinya nan a miɛfol bu.”
52Nin yaan le Juu yaab a ŋuui nan fii le bi nan piin ki far tab imɔkpel ke, “Uja nan yin ŋa nii ki tenn ti u gbanann wee ti ŋmaa?”
53Le Yisa bei bi ke, “N bei ni ibamɔn le, naa ye ni ŋman Uninfosaal a Bija a gbanann ki nyun u cham ke, naa jɔɔ limiɛfol ni ban ni. 54Wan biɛn ŋman n gbanann wee ki ji nyun n cham ke u jɔɔ limiɛfol lan kaa jɔɔ diɛmi, le lidajoorikaal ke n li don u paab. 55Nan bu-n n gbanann ye tijiir le ibamɔn le n cham ye nan nyu le ibamɔn. 56Wan biɛn ŋman n gbanann ki nyun n cham ke u be n ban, le n mu be u ban. 57Ke Baa wan fo-n kaah nan tum wee n be ki jɔɔ limiɛfol Baa-n bu-n, man mu le wan ŋman n gbanann li jɔɔ limiɛfol n bu. 58Boroboro kan nyan paab ki jiirin nin sɔ. Ni yaajam nan ŋman kulɔŋ a boroboro le ki kpo, amaa wan ŋman boroboro nan ke u li be ki gbaa be.”
59Waah nan be Kapeniɛm a wonjiɛndiigin ki wɔɔn nin le u nan len man.
Limiɛfol lan kaa jɔɔ diɛm a Mɔboi
60U bɔɔnɔɔbin kaah nan gbir man nin, le bi takpem len ke, “Nwɔɔnim nmɔn pɔɔ hali, ŋma li fir gaa maa?”
61Yisa kaah nan biɛ ke u bɔɔnɔɔbin ŋulin le waah pag man nin bu-n, le u baan bi ke, “Ni bii ni sufu lee? 62Ke ni ye ke ni kan uninfosaal a bija-n kaah don waah nan nyan nan yaan nin ke! 63Kinaaŋin le tenn limiɛfol; tigbanann ma be yɔli le. Imɔbon yan wee n pag tenn ni nan ye kinaaŋ le, ki ji ye limiɛfol. 64Amaa ni biba be kaa ŋa yada.” Npiinimin, Yisa pii nan nyi bi ma nmɔn wan kaa nan ŋa yada nin wan na li kɔɔr u. 65Le u ji len ke, “Mambu le n nan bei ni ke uba kaa li fir dan n ban ni, man ke Baa-n li sei u nsan.”
66N-yonn nmɔn ki jɔɔ chaa le u bɔɔnɔɔb takpem labir ki jir le kaa ji nɔɔ wi. 67“Le Yisa baan itoon Piig nin bilee-n ke, “Nim kaa li ban ni fɔri, bee ni li fɔraa?”
68Le Simɔnn Piita jiin u ke, “Uyudaan, ti ni yin jo ŋma ban naa? A jɔɔ limiɛfol lan kaa jɔɔ diɛmin a mɔboi le. 69Ti ŋa yada ki nyi ke a ye Uwonbɔr a Kasi Daan le.”
70Le Yisa jiin ke, “Maa nan gann ni Piig nin bilee lee? Nin ni ma biɛn nin, ni ni uba ye ulinlaril le!” 71(U nan len Judasi, wan ye Simɔnn Isikariya a bija-n le, wan nan ye Piig nin bilee-n a ni uba-n, amaa ki nan nan yin kɔɔr win.)
Terpilih Sekarang Ini:
Jɔnn 6: KUGL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Komba New Testament © Bible Society of Ghana, 2014.
