Jɔnn 21
21
Yisa kaah nan degir bibɔɔnɔɔb bilile bu man
1Ni bɔɔn bu, Yisa ji nan degir u bɔɔnɔɔb bu Tiberiya a mɔgilin. Naah nan tun man sɔ: 2Simɔnn Piita, nin Tomasi (wan wee bi yi u ke kijaaŋin), nin Nataniɛl (wan nyann Kena kan be Galilii a tiŋin nin), nin Zebedi a naachimin, ki kpiɛ Yisa a bɔɔnɔɔb bilee bi biɛn nan lagin be le. 3Le Simɔnn Piita bei bi ke, “N chaa jan chool le.”
Le bi jiin bei u ke, “Ti li nɔɔŋ jo.” Le bi nyan ki kɔɔ kubulunkpoŋin, amaa kunyiɛmuŋ nmɔn biɛn baa nan choo niba.
4Le njakpanyiɛn, le Yisa sir nnyum a gbaam, amaa bibɔɔnɔɔbin kaa nan biɛ ke Yisa le yen ni.
5Le u baan bi ke, “N jɔtiib, naa jɔɔ ijan naa?”
Le bi jiin u ke, “Aai.”
6Le u bei bi ke, “Ni ta ni janlaaŋin ki jaa kubulunkpoŋin a jiim paama, wee ki choo ijan. “Baah ta bi janlaaŋin ki jaa nnyumin nin le kaa ji li fir daar ki kɔɔn kubulunkpoŋin yaan ni, nan bu-n bi nan choo ijan le takpem.
7Le ubɔɔnɔɔr wan wee Yisa jiɛ-n bei Piita ke, “Uyudaan le yen!” Piita kaah gbir ke “Uyudaan le yen” nin, le u yuur u kinkenl gab (u pii nan gabir li le bil) le ki yug lu nnyumin. 8Le bibɔɔnɔɔb bi miɛnin ta kubulunkpoŋ ki ŋɔɔr u taai, ki dar kujanlaaŋin ke ki gbee nin ijan, nan bu-n bi bol kaa nan fɔg nin likpengonli, ni nan ye itaadann kobig paam le. 9Baah nan don likpengonlin, le bi kan iŋmisakɔɔn a ŋmiim le ijan pul niin, nin boroboro.
10Le Yisa bei bi ke, “Ni li jɔɔn ijan yan wee ni choo-n iba ni.”
11Le Simɔnn Piita don kubulunkpoŋin a poolin ki dar kujanlaaŋin donn likpengonl. Ki nan gbee nin ijan gbingbem le, i biɛn nan lagin ye ijan kobig nin piŋmu nin itaa le, amaa hali nin yaah le nan yab man nmɔn biɛn na kujanlaaŋin kaa nan chiɛ. 12Le Yisa bei bi ke, “Ni dan nan chann ni mɔb.” U bɔɔnɔɔb nmɔn a ni uba kaa nan baan u ke, “A ye ŋmiɛ?” Bi nan nyi waah ye Uyudaan. 13Le Yisa dan, ki nan yuur boroboro ki ta sei bi, ki ji yuur ijan nin mu ki sei bi.
14Ni niɛ nan le nan kpiɛ nfimitaa le Yisa degir u baa u bɔɔnɔɔb ban, waah nan fii nkumin a bɔɔn.
Yisa nin Piita
15Baah nan jin diɛ-n, le Yisa baan Simɔnn Piita ke, “Simɔnn Jɔnn a bija, a jiɛm ibamɔn ki jon bi niɛ waa?”
Le u jiin ki bei u ke, “Nn n Yudaau, a nyi ke n jiɛŋ.”
Le Yisa ke, “Li jinn n peebum nan na.”
16Le Yisa ji len ke, “Simɔnn Jɔnn a bija, a jiɛm ibamɔn naa?”
Le u jiin ke, “Nn, n Yudaau, a nyi ke n jiɛŋ.”
Le Yisa len ke, “Li guu n peei nan na.”
17Nan nan kpiɛ nfimitaa-n le u bei u ke, “Simɔnn Jɔnn a bija, a jiɛm maa?”
Piita a sufu nan bii le nan bu-n Yisa kaah nan baan u ki tan kpaa nfimitaa ke, “A jiɛ maa?” Le u ke, “Uyudaan, a nyi niwann biɛn; a nyi ke n jiɛŋ.”
Le Yisa ke, “Li jinn n peei nan na. 18N beiŋ ibamɔn le, ŋaah nan pɔɔn nin, a ti yee a wan yɔɔr a tɔɔl le ki jo ŋaah ban nan paam; amaa ni ye a por ke a yin tann a nɔɔi le, le uba n ta a wann yɔɔr ki yeeŋ ki taaŋ jo ŋaah kaa ban a jo nan paam.” 19Yisa nan len man ki wɔɔn nkum man a bol wee Piita yin kpo wee ki ta kupag sei Uwonbɔr nle. Le ki bei u ke, “Li nɔɔm ni!”
Yisa nin ubɔɔnɔɔr umiɛnin a bɔr
20Le Piita gbiɛ lig ki miin ubɔɔnɔɔr wan wee Yisa jiɛ-n nɔɔ bi le. (U ma nan ye baah nan ka ji kujɔɔg a jiir wee wan nan ka den Yisa ki nan baan u ke, “Uyudaan ŋma yin nya a bɔɔn naa nin?”) 21Piita kaah kan win, le u baan u ke, “Uyudaan, ke u ma?”
22Le Yisa jiin u ke, “Ni ye n ban u li be nin u miɛfol ki nan kpaa n-yonn man wee n li jirin ke, ni ye ba ki sei ŋaa? Ni kpaa le nin a nɔɔm.” 23Ni niɛ nan bu, le tibɔr nan mɔɔn u bɔɔnɔɔbin a sisiigin ke ubɔɔnɔɔr uniɛ ma kaa yin kpo. Amaa Yisa kaa ke waa yin kpo; u len le ke, “Ni ye n ban u li be nin u miɛfol ki nan kpaa lidaal lan wee n na li jirin ke, ni ye ba ki sei ŋaa?”
24Ubɔɔnɔɔr nmɔn le jin tiwann nan a siɛra le ki sɔb ni bil. Ti nyi ke u siɛra nmɔn ye ibamɔn le.
Ndiɛm
25Daandaan nan, Yisa ji nan tun tiwann takpem tibama, ni ye ni biɛn bi sɔb dɔ ke, n tiɛr ke hali dulinya munl nan kaa bi li kan npaan man wee bi li ta tigbann tan wee bin sɔb nan ŋa.
Terpilih Sekarang Ini:
Jɔnn 21: KUGL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Komba New Testament © Bible Society of Ghana, 2014.
