Jɔnn 1
1
Limiɛfol a Mɔbonl
1Dulinya a piinim ni ki miin wan wee bi yi u ke Limɔbonlin pii nan be le, le Limɔbonlin nan be nin Uwonbɔr, Limɔbonl nmɔn nan ye Uwonbɔr le. 2U nan be nin Uwonbɔr le dulinya a piinimin.
3U bu le niwann biɛn nan naan; niba kaa be ki nan naan wee waa be niin ni. 4U ni le limiɛfol nan be, limiɛfol nmɔn nan ye usaal a wonweem le. 5Nwonween nin nan wonn libunbɔnlin, amaa le libunbɔnlin kaa nan biɛ mi.
6Le Uwonbɔr nan tun uja uba, le u dan; u yinl le nan ye Jɔnn. 7U nan dan ki ye siɛra jir le ki wɔɔn nwonween nmɔn bu, wee u ma bu uninfosaal n ŋa yada. 8U ma baantɔɔl kaa nan ye nwonween nin ni; u le nan dan nwonween nin a siɛra a jim bu le. 9Ibamɔn a wonweem man tenn uninfosaal biɛn nwonween nin nan chaan dulinya nan yaan le.
10U nan be dulinya nan yaan le, nin dulinya nan kaah le nan naan u bu nan yɔli dulinya kaa nan biɛ wi. 11U nan dan u yaabin le, amaa le u yaab nmɔn kaa nan gaa wi. 12Nin ni ma biɛn ni, ban biɛn nan gaa win, nin ban nan ŋa yada u yinl bu-n, le u nan sei bi nsan ke bin nin ŋa Uwonbɔr a buwaab. 13Bi yin ye nbuwaab ban kaa nan ye ncham a maaŋ, bee tigbanann a bam, bee uja a bami, amaa Uwonbɔr a bam.
14Limɔbonlin nan kpann tigbanann nin ncham le ki nan ŋa u kukɔɔbol ti ban. Ti nan kan u paga, kupag kiba kpeŋ kpeŋ, kan nan nyan ti Baa ban nin, ki gbee nin linyunyunbasanl nin ibamɔn nin.
15Jɔnn nan jin siɛra u bu ki sei bininfob. U nan tiɛn paab npɔɔn bu ke, “U ma le n nan len ke, ‘Wan yin dan n bɔɔn nin yab jon ma, nan bu-n u ma nan chinim.’ ” 16Waah gbee nin linyunyunbasanlin bu le ti biɛn gaan tikaar ki kpiɛg. 17Uwonbɔr le nan che Moziz sei ti nsiim; le Yisa Masiya mu bu le ti kan linyunyunbasanl nin ibamɔn. 18Uba kaa nyi kan Uwonbɔr i, amaa U ma Uwonbɔr a binba, wan be Baa-n a logilin che bi biɛ wa.
Jɔnn Wan nan Fu Bininfob Uwonbɔr a Nyunfulin a Bɔr
(Matiu 3:1-12; Mag 1:1-8; Lug 3:1-18)
19N-yonn man wee Juu yaab ban be Jerusalam nan tun biminmanib nin Liifai yaab ke bin tan baan Jɔnn waah ye wan nin a siɛra sɔ. 20Waa nan walin un jiin guri, amaa le ki pag npaan ni u wiib ke, “Maa ye Masiya nni.”
21Le bi baan u ke, “Ke a ni ye ŋmiɛ? A ye Elaja lee?”
Le u ke, “Maa ye wi.”
“A ye ulinlenn nin lee?”
Le u jiin ke, “Aai.”
22Njoorimin le bi baan u ke, “A ye ŋmiɛ? Sei ti njiim ni wee ti ta jir ban tun ti-n ban. A ke a ye ŋmiɛ?”
23Le Jɔnn jiin ki len ulinlenn Azaya a mɔboi ni ke,
“N ye wan a kukɔl tann kukunkɔɔg bu-n le,
‘Ŋa nsan mu li tel ki sei Uyudaan na.’ ”
24Le Farasiim ban wee bi nan tun nin, 25ni nan baan u ke, “Ni ye ke ŋaa ye Masiya-n, kaa ye Elaja, bee Ulinlenn nin ke, ba ŋa wee a fu bininfob Uwonbɔr a nyunfulaa?”
26Le Jɔnn jiin ke, “N jɔɔ nnyum le ki fu bininfob Uwonbɔr a nyunful, amaa uba si ki ŋmar ni ban le naa nyi wi. 27U ma ye wan nan yin ŋɔɔrin n bɔɔn, wan a naatagunn wee maa kpaan n lori.”
28Ni nan biɛn nan ŋa Betani, Jɔdann a kpengonl lan yaan wee Jɔnn nan fu bininfob Uwonbɔr a nyunfulin le.
Uwonbɔr a Peebig
29Ni nan wonn le Jɔnn nan kan Yisa kaah chaan u ban le ki ke, “Lig, Uwonbɔr a Peebig, wan nyann dulinya nan a birin! 30U ma le n nan len, maah nan ke, ‘Uja wan yin ŋɔɔrin n bɔɔn nin yab jon ma, nan bu-n u ma nan chinim.’ 31N baantɔɔl kaa nyi wi, amaa nan bu wee n nan dan ki nan fu bininfob Uwonbɔr a nyunfulin nan ye le ke un bin kpiir u ba ki sei Iziral yaab.”
32Tɔ le Jɔnn nan sei siɛra nan: “N nan kan Kinaaŋ kaah nyan papaab ki jiirin ke ulanjelin le ki nan tɔɔn u bu. 33Maah bi li nyi wi, wee naa ye wan nan tunim ke n nan fu bininfob Uwonbɔr a nyunfulin le nan beim, ‘Uja wan wee ni kan Kinaaŋ jiirin ki nan tɔɔn u bu-n le ye wan li ta Kasi a Naaŋ ki fu bininfob Uwonbɔr a nyunful.’ 34N nan kan na, le ki jin siɛra ke Uwonbɔr a Bija-n sɔ.”
Yisa a Chinchinn a Bɔɔnɔɔb
35Ni nan wonn kutaag le Jɔnn ji nan be niin nin u bɔɔnɔɔb bilee. 36Waah nan nan kan Yisa jo chaa-n le u ke, “Lig, Uwonbɔr a peebigin!”
37U bɔɔnɔɔb bilee-n kaah nan gbir u len man nin, le bi nan nɔɔ Yisa. 38Yisa kaah nan gbiɛ lig ki kan bi nɔɔ win le u baan bi ke, “Ni ban baa?”
Le bi ke, “Rabbi” (ni taai li ye wan wɔɔnn), “Laban wee a kɔɔ?”
39Le u jiin ke, “Ni dan, ni na li kan.”
Le bi nan jon ki tan kan waah kɔɔ nan yaan, le ki be u ban lidaal nmɔn. Ni nan ye kijɔɔg a kur tina paam le.
40Anduru, wan ye Simɔnn Piita a waalin nan ye bininfob bilee ban nan gbir Jɔnn kaah nan pag man nin wee ki nan nɔɔ Yisa-n a ni uba le. 41Anduru kaah nan ŋa man nan ye un chinn ban kan u kpel Simɔnn le ki bei u ke, “Tim ban kan Masiya nna” (uma ye ufeer). 42Le ki taa u dan Yisa ban.
Yisa nan lig u le ki ke, “A ye Jɔnn a bija Simɔnn le. Bi ni li yiŋ ke Sifasi” (le li labirim le ye Piita#1:42 Sifasi le ye Aramayig a leen le, le li labirim Girig a leen le ye Piita, le litaai le ye litangbagil.).
Yisa kaah Yin Filib nin Nataniɛl man
43Ni nan wonn kutaag le Yisa nan bon ke un nya jo Galilii. Waah ban kan Filib nan, le u bei u ke, “Li nɔɔm ni.”
44Filib nan nyan Befisada a tiŋin le, u ma nin Anduru nin Piita 45Le Filib nan ban kan Nataniɛl le ki bei u ke, “Tim ban kan Moziz kaah nan sɔb wan a bɔr nsiimin nin na, nin wan a bɔr wee bilinlem tɔɔl nan sɔbin, u ma ye Yisa wan nyan Nazarif, ki ye Josef a bija-n.”
46Le Nataniɛl baan ke, “Nazarif aa! Niwann ŋan li fir nyann niin naa?”
Le Filib len ke, “Dan ki nan lig.”
47Yisa kaah nan kan Nataniɛl be forin nin, le u bei u ke, “Iziral a big bamɔŋ kan kaa jɔɔ igalin nin sɔ.”
48Le Nataniɛl baan ke, “A ŋaa nii ki nyi maa?”
Le Yisa jiin ke, “N bi kaŋ ŋaah la bi ka bikinkamin a tum wee Filib nin bi yiŋin.”
49Le Nataniɛl nin len npaan ni ke, “Wan wɔɔn, a ye Uwonbɔr a bija-n le; a ye Iziral a bɔr takpenl le.”
50Le Yisa ke, “Nan bu wee a ŋa yada-n ye maah beiŋ ke n bi kan ŋaah ka bikinkam a tumin le. A li kan niwann nan jon man.” 51Le u ji len ke, “N beiŋ ibamɔn le, a li kan papaab kaah loor, le Uwonbɔr a malakam do paab ki jiirin Uninfosaal a Bija-n bu.”
Terpilih Sekarang Ini:
Jɔnn 1: KUGL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Komba New Testament © Bible Society of Ghana, 2014.
