Litoonl 8
8
1Sɔɔl tɔɔl nan chee Sitifin a kum buu.
Sɔɔl kaah nan mugir biwonjiɛm a laguŋ man
Lidaal nmɔn le limugil takpenl nan dan biwonjiɛm a laguŋ kan nan be Jerusalam n bu, le bi biɛn nan nyan ki yal jon Judiya nin Samariya a tinbumin, ki jiɛn Yisa a toon n yaa binba nin yaan. 2Le bininfob ban san Uwonbɔr nan ta Sitifin ki tan pii, le ki mɔr ki fabin takpem u bu. 3Amaa le Sɔɔl ma piin ki bii biwonjiɛm a laguŋ. Ki kɔɔ bi niin yin ki chor bijab nin bipiib, ki tan loog bi kuloondiigin.
Tibɔŋannin kaah mɔɔn Samariya a tiŋin man
4Biwonjiɛmin kaah nan yalin, bi ni nan mɔɔn tibɔŋann nin le nan yaan biɛn wee bi jon. 5Le Filib jon Samariya a tiŋ kiba ni ki tan mɔɔn Masiya a bɔr ki sei bi. 6Le kuninfogbaluŋin kaah gbir Filib a bɔrin ki ji kan ligaril a siɛra a toon yan wee u tun ni, le bi biɛn ni nan mann pel u bɔr nmɔn. 7U na nyan nnaanbiim takpem bininfobin, le bi yigin papaab ki sin nyan, ki ji teb tigbanann kpiindam nin nwɔbim takpem kan kutebug. 8Mambu nmɔn takpem nan be kitiŋ nmɔn yaan.
9Le uja u ba mu nan be kitiŋ nmɔn yaan, ki ye unyɔgdaan, le u yinl ye Simɔnn, u nan tun ligaril a toonl le ni gar Samariya yaab biɛn. U nan far u gbingbanl ke u ye uninfoja le, 10bininfob pɔɔndam nin bilanjiim biɛn nan pelig u bɔr le ki len ke, “Uja nan jɔɔ nween a pɔɔm le Npɔɔn Takpen.” 11Nan bu-n u nyɔgi a toon nmɔn nan ŋa bi ligaril le ke ni yuur, ni bu le che bi nan chee sei u ki nɔɔ u. 12Amaa Filib kaah dan ki nan wɔɔn bi Uwonbɔr a naam a bɔŋann nin, nin Yisa Masiya a yinlin, bijab nin bipiib nan ŋa u yada, le u fun bi Uwonbɔr a nyunful. 13Simɔnn tɔɔl nan ŋa u yadau, le u fun u nnyumin. Le u nɔɔ Filib ki choon nan yaan biɛn wee u chaa ki ga ligaril a siɛra a toon gbingbemin yan wee u ŋaan nin, le ni gar u.
14Yisa a toon ban be Jerusalam nan kaah gbir ke Samariya yaab gaa Uwonbɔr a bɔrin ni, le bi tun Piita nin Jɔnn bi ban. 15Baah nan tan foon, bi nan miɛ Uwonbɔr le ki sei bi ke bin gbee nin Kasi a Naaŋ, 16nan bu-n Kasi a Naaŋin kaa la nan jiirin bi ni u ba bu; bi nan fun Uwonbɔr a nyunful Uyudaan Yisa a yinlin a binba le. 17Le Piita nin Jɔnn nan ta bi nɔɔi ki paan bi bu, le bi gbee nin Kasi a Naaŋ.
18Simɔnn kaah nan kan Yisa a toon n kaah ta bi nɔɔi ki paan bi bu, wee Uwonbɔr sei bi Kinaaŋin, le u sei bi ilig, 19ki bei bi ke, “Ni seim npɔɔn nmɔn ni, wee n mu ti ta n nɔɔi ki paan wan bu ke un gbee nin Kasi a Naaŋ.”
20Amaa le Piita jiin u ke, “A tug ke a li fir ta ilig ki daa Uwonbɔr a piin yaa? Fin nin a ligi nmɔn n gabim yɔli! 21Ŋaa tun niba ti toon nan yaan ni, nan bu-n a sufu kaa be nbamɔm nin Uwonbɔr i. 22Ni bu jiɛn a potiɛbir nmɔn na, ki kpenn a binbem wee ki miɛ Uyudaan. Ni ba ke u li jiɛn a potiɛbir nmɔn ki periŋ. 23Nan bu-n n kan ki miin a gbee nin npooton le, ki ji ye tibir a yomu. 24Le Simɔnn bei bi ke, “Ni miɛ Uyudaan ki seim ni, wee nan wee ni len nan n laa kan mi.”
25Ni bɔɔn bu Piita nin Jɔnn kaah nan mɔɔn Uyudaan a bɔrin ni, le bi jir Jerusalam. Baah nan chaan bi nan mɔɔn Yisa a bɔŋann n le, Samariya a tinbumin.
Filib nin Itopiya a toontunn sanliiru a bɔr
26N-yonn nmɔn le Uyudaan a malaka bei Filib ke, “Fii ki li chaa ki tan nɔɔ a nɔɔgam paam a sam man nyan Jerusalam ki chaa Gaza a tiŋin ni.” 27Le Filib fii ki nyan ki piin u sanchonl, le ki to Itopiya a jau uba wan wee bi faarin ki miin u mu nyan lisanchonl le ki chaa kun. Uja nmɔn nan ye Itopiya a piibɔru wan a naam a yinl nan ye Kandasi a lig ŋmagib a gbansɔbib a yudaau le, u nan jon Jerusalam le un tan jiɛn Uwonbɔr, 28ki nan chaa jir kun ki ka u toroko a poolin, le itaan dar u. Waah nan chaa n-yonn man nin, le u be karin ulinlenn Azaya kaah sɔb kugbɔŋ kan nin. 29Le Kinaaŋ bei Filib ke, “Fɔɔr ki mal toroko nan ban na.”
30Le u guun jon niin, ki gbir ujan kaah karin Uwonbɔr a linlenu Azaya a gbɔŋin. Le Filib baan u ke, “A biɛr nan wee a karin nan a taai yaa?”
31Le u jiin ki ke, “N yin ŋa nii ki biɛ ni taai yaa, wee naa ye uba le wɔɔm maa?” Le u yin Filib ke un kɔɔn ki nan kal kpiɛ u bu. 32Uwonbɔr a gbɔŋin tibɔr tan wee lijafaalin nan be karin nmɔn ye nan le,
“Le u chee ki jon a li ke baah ti dar upee chaa bin tan ku man nin,
Ki ŋmin ke baah chiɛ kipeebig a kor ke ki ŋmin man nin,
kaa yaar u mɔbi.
33 #
Azaya 53:7-8
U fai a jimin, bi nan mɔu ibamɔn na.
Ki junn u miɛfol dulinya nan yaan.
Ke ŋma ji li fir pag u yaabili a bɔraa?”
34Le lijafaal nmɔn baan Filib ke, “Beim ni, ŋma wee ulinlenn nmɔn pagaa? U pag ki jiin u tɔɔl paam le bee uba paam maa?” 35Le Filib piin nan yaan wee lijafaal nmɔn bi karin chaan, ki bei u Yisa a bɔŋann.
36Baah nan nɔɔ nsan nmɔn ki chaa n-yonn man nin, le bi tan kan nnyum nba kaah dɔ, le lijafaal n bei Filib ke, “Lig nnyum sɔ. Ba yin ŋa wee ŋaa li fum Uwonbɔr a nyunfulaa?” 37#8:37 Chinchinn a sɔbim nin nsɔbim man wee ti num gbee mu terim ki kpiɛ bitinkpegib a siɛra jib kaa jɔɔ Litoonl 8:37. Le Filib bei u ke, “Ni ye a ŋa Yisa yada nin a sufu biɛn ke n li fuŋ.” Le u jiin ke, “N ŋa yada ke Yisa Masiya ye Uwonbɔr a Bija le.” 38Le lijafaalin che itaan nin sir, le u ma nin Filib jiir nnyumin yaan, le Filib fun u Uwonbɔr a nyunful. 39Le bi nan nyan nnyumin yaan ki don, le Uyudaan a Naaŋ ta Filib yaar jon, le lijafaalin kaa ji kan wi, le ki kɔɔ u toroko a poolin ki kun nin nmɔn. 40Filib nin nan tan be Azotusi le, ki jin ntim ntim biɛn ki mɔɔn Yisa a bɔŋann hali nin waah nan nan foo Sizariya.
Terpilih Sekarang Ini:
Litoonl 8: KUGL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Komba New Testament © Bible Society of Ghana, 2014.