Litoonl 6
6
Bititerib bilile a bɔr
1N-yonn man wee Yisa a bɔɔnɔɔb nan mann kpiɛgin, le Juu yaab ban pag Girig a leen yin, nan ŋulin Juu yaab ban pag Hiiburu a leen yin bu, nan bu-n bi pukɔɔi kaa nan gaan tijiir naah bi ye bi li gaan man ni ni. 2Le itoon piig nin bilee-n yin Yisa a bɔɔnɔɔbin biɛn ki lagin tab, ki bei bi ke, “Naa ŋan nin ti jiɛn Uwonbɔr a bɔr a mɔɔnim ki paar tijiir a tolimin ni. 3N nabum, ni lig wee ki gann bijab bilile ni sisiigin, ban wee ni nyi ke bi gbee nin Kinaaŋin nin nlam gɔr kaam, wee ti ta man a toon ki sei bi, 4wee tim nta ti tɔɔl a saŋi ki ŋa liwonmiɛlin, nin Uwonbɔr a bɔrin a wɔɔnimin.”
5Ni nan gbee bininfobin biɛn a numa, le bi gann Sitifin, wan gbee nin Kasi a Naaŋ ki jɔɔ yada nan, nin Filib, Pirokorusi, nin Nikanor, nin Timonn, nin Pamenasi, nin Nikolasi, wan nan nyan Antiɛg wee ki kpenn u wonjiɛnl ki nɔɔ Juu yaab a wonjiɛnlin. 6Le bi ta bi jon itoon nan ban, le bi ta bi nɔɔi ki paan bi bu ki miɛ Uwonbɔr ki sei bi.
7Le bi mann mɔɔn Uwonbɔr a bɔrin. Le Yisa a bɔɔnɔɔb ban be Jerusalam nan a kanl nan kpiɛ weem weem, le Uwonbɔr a minmanib takpem chee Yisa a bɔŋann nin ki ŋa u yada.
Baah nan choo Sitifin man
8Daandaan nan, Sitifin uja wan wee Uwonbɔr a nyunyunbasanl nin u pɔɔm nan be u bu-n, u nan tun ligaril a siɛra nin lijinjeel a toon le bininfobin a sisiigin. 9Le bininfob biba nan fii ki yii Sitifin a bɔr, bi nan ye ‘Yemba’ le ki nyan ban nan kan nŋmarim ki be Juu yaab a wonjiɛn#6:9 Bi nan ye biyom ban kan ŋmarin ki be Juu yaab a Wonjiɛn niin ni le bolin (ke baah yi bi man ni) bi nan nyan Sarene nin Alɛgzandira nin Silisiya, nin Asiya le. Le bi biɛn nan piin ki far limɔkpel nin Sitifin. 10Amaa baa nan fir pag nyaŋ Sitifin ni, nan bu-n u na pag nin nlam gɔr kaam le nin Kinaaŋ a pɔɔm.
11Le bi kɔɔ bininfob biba bu ki gbaa bi ke bin len ke, “Ti gbir waah pag imɔbon iba ki sugir Moziz nin Uwonbɔr.”
12Baah len man n-yonn man nin, le bininfobin, nin bininkpeebin, nin ban wɔɔnn Uwonbɔr a siimin a ŋuui fii, le bi fii ki choo Sitifin, ki ta u jon Juu yaab a yudamin ban. 13Le bi ji ŋmag bininfob biba ni, ki ke bin por tibɔkar ke, “Iyoo biɛn uja nan le choon le ki pag ki bii iwonjiɛn niin nin Moziz a siimin. 14Nan bu-n ti gbir u ke Yisa wan ye Nazarif a ninfo win li ber iwonjiɛn niin ki ji kpenn Moziz a kaal lan wee u nan ta sei ti nan.”
15Le ban nan lagin ka Juu yaab a yudam a laguŋ nmɔn yaan biɛn nan ta bi numbili ki kpaa Sitifin, ki nan kan u num paam kaah nann Malaka a num.
Terpilih Sekarang Ini:
Litoonl 6: KUGL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Komba New Testament © Bible Society of Ghana, 2014.