Juan 18

Is Kedekepa ki Jesus

(Juan 18:15-18; Mateo 26:69,70; Marcos 14:66-68; Lucas 22:55-57)

1Ne te neketapus si Jesus dutun he ebpengumew-umew, sikandin wey is menge sumusundan din, midrapas dan te zal-ug he egngezanan te Kidrun. Ne zuen menge kayu he impemula zutun ne zutun dan mebpundu. 2Ne si Hudas, sikan is ed-akal kandin wey mehimetayi, netuenan din haazà is mibpunduwan dan su si Jesus wey is menge sumusundan din, layun dan edtig̵um dutun. 3Ne zutun nekeuma si Hudas he edumahan te sengekumpeniya he sundaru wey pulis he midsug̵ù te menge punuan he memumuhat wey menge Perisiyu. Ne ebpenusulù he nengeg̵umeenan sikandan. 4Ne zutun, si Jesus, geina te wazà mekeeles diyà te kandin is langun he egkehitavù kandin, midsinug̵ung din sikandan ne mid-insà te, “Hentei is ebpen-ahaan niw?” 5Ne midtavak dan te, “Si Jesus he tigNeserit.” Ne migkag̵i si Jesus te, “Iyan a ebpen-ahaan niw.”

Ne zutun en daan si Hudas, kes mid-akal ki Jesus. 6Ne hein migkag̵i si Jesus te, “Iyan a,” nemekepemuley-ang dan ne nengepiley zan. 7Ne mid-uman med-insà si Jesus te, “Hentei is ebpen-ahaan niw?” Ne midtavak dan med-uman te, “Si Jesus he tigNeserit.” 8Ne migkag̵i si Jesus te, “Migkag̵i ku en he iyan a. Emun iyan a ebpen-ahaan niw, kenè niw mulà dekepa heini is menge zuma ku.” 9(Umba nekag̵i zin heini su egketuman sikan is in-ampù din he egkag̵i te, “Is minsan sevaha zà te menge etew he imbeg̵ey nu kediey, wazà netazin.”) 10Duen ubpit ni Simon Pedro ne midhulavut din ne midtibas din is sulug̵uen te lavew he memumuhat ne netenaan haazà diyà te kewanan he telinga ne nesapla haazà is telinga zin. Is ngazan dutun te sulug̵uen, si Malkus. 11Ne midawey ni Jesus si Pedro, ke sikandin te, “Ig̵umè nu heeyan is ubpit nu su is ibpaantus kedì te Amey ku, kenè ku ve ed-entusen?”

Is Ked-uwita ki Jesus Diyà te ki Anas

12Ne zutun, haazà is menge sundaru wey is kepitan dan wey elin daan is menge pulis te menge Hudiyu, midakep dan si Jesus ne mibakus dan. 13Ne midhunaan dan uwita sikandin diyà te ki Anas su enug̵ang si Anas ni Keyipas te lavew he memumuhat dutun he tuig. 14Iyan si Keyipas kes midsambag te menge Hudiyu he kinahanglan he ebpatey is sevaha he etew he elili te tivuuk he kehudiyuwan.

Is Nehuna he Kebarew ni Pedro

(Juan 18:15-18; Mateo 26:69,70; Marcos 14:66-68; Lucas 22:56,57)

15Si Pedro wey is sevaha pa he sumusundan, edteltelukun dan ki Jesus. Ne haazà he sumusundan, nekilala sikandin te lavew he memumuhat ne tenged dutun miduma ki Jesus ne midseled dutun te lama te valey te lavew he memumuhat. 16Ne si Pedro mulà, diyè dà sikandin te g̵awas uvey te pultahan. Ne zutun midlawang is sevaha he sumusundan he kilala te lavew he memumuhat ne midlelag̵an din haazà is bahi he impevantey zutun te pultahan ne impeseled din si Pedro. 17Ne haazà is bahi zutun te pultahan, mid-insaan din si Pedro te, “Sumusundan ke ve zaan keniyan te etew?” Ne midtavak si Pedro te, “Kenà.”

18Ne midtetavun te uring is menge pulis wey menge sulug̵uen su meg̵enew haazà, ne edhizazang dan dutun. Ne mid-amur zutun si Pedro te kandan su edhizazang.

Is Ked-imbistigaha ki Jesus Duen te Lavew he Memumuhat

(Juan 18:19-24; Mateo 26:57-66; Marcos 14:55-64; Lucas 22:66-71)

19Ne zutun in-insà ki Jesus te lavew he memumuhat is menge sumusundan din wey is penurù din. 20Ne midtavak si Jesus te, “Wazà mekeeles is menge penurù ku ziyà te menge etew su ziyà a mebpenurù te menge simbahan wey ziyà daan te Valey te Megbevayà he egketig̵uman te tivuuk he kehudiyuwan. Wazè ku ieles is minsan hengkey he lalag ku. 21Maan is iyan a ed-insaan nu? Insai niw is nemekezineg kedì su netuenan dan is migkag̵i ku kandan.” 22Ne te nekag̵i ni Jesus haazà, midsumbag sikandin te sevaha he pulis he edhithitindeg dutun te uvey zin ne migkag̵i haazà is pulis te, “Maan is nekeg̵ehem ka he edtavak te iring keniyan diyà te lavew he memumuhat?” 23Ne midtavak kandin si Jesus te, “Emun mezaat is migkag̵i ku, keg̵iya nu ke hengkey is mezaat he nekag̵i ku, ne emun ke wazà mezaat, maan is midsumbag a kenikew?”

24Ne zutun impeuwit ni Anas si Jesus he mibakus diyà te ki Keyipas he iyan tutuu he lavew he memumuhat.

Sikan is Ikezuwa wey Sikan is Huziyan he Kebarew ni Pedro

(Juan 18:25-27; Mateo 26:71-75; Marcos 14:69-72; Lucas 22:58-62)

25Ne kemulu pa si Pedro zutun is edhidhizazang. Ne zuen menge etew zutun he mid-insà kandin te, “Kenè ke ve sumusundan daan ni Jesus?” Iyan, mibarew ni Pedro. Ke sikandin te, “Kenà a iyan.” 26Ne zuen daan dutun sevaha he sulug̵uen te lavew he memumuhat. Haazà he sulug̵uen, megeget duen te nelepungan ni Pedro te telinga. Ne migkeg̵iyan din si Pedro te, “Henduen be te neehè ku sikew g̵eina ziyà te midekepan ki Jesus. Duma ke zin buwa?” 27Ne mibarew en maan si Pedro ne segugunà mid-ukarà is manuk.

Is Ked-imbistigaha ni Pilatu ki Jesus

(Juan 18:28-38; Mateo 27:1,2,11-14; Marcos 15:1-5; Lucas 23:1-5)

28Ne zutun mid-uwit dan en maan si Jesus puun dutun te valey ni Keyipas ne midhendiyè dan te turug̵an te gubirnedur he Rumanu. Ne meselem pa utew zutun. Ne ziyè dà is menge punuan he menge Hudiyu te g̵awas su wey kenè dan mekesupak te vetasan dan te kegkelumpiyuwi su ke edseled dan dutun wazà itug̵ut kandan is kedtampu te kegkaan te Idlavung te Kedlevayi. 29Tenged dutun migawas si Gubirnedur Pilatu ziyà te kandan ne ke sikandin te, “Hengkey is idsumbunga niw kayi te etew?” 30Ne midtavak is menge punuan te, “Emun kenà selaan heini, kenè dey pezem id-etuvang kenikew.” 31Ne midtavak si Pilatu te, “Kuwaa niw sikandin dini su iyan kew susi kandin sumalà is ibpenurù te kesug̵uan niw.” Ne migkag̵i is menge Hudiyu te, “Wazà itug̵ut kenami te velaud niw te menge Rumanu is kedhukum te kemetayen.” 32(Umba neulaula heini su egketuman is midtagnà ni Jesus he edhimetayan sikandin pinaag̵i te kedrensanga te krus.) 33Ne midseled si Pilatu zutun te turug̵an ne mid-umew zin si Jesus. Ne migkag̵i si Pilatu te, “Hadì ke ve te menge Hudiyu?” 34Ne midtavak si Jesus te, “Kenikew zè be he isip heini is insè nu ke hadì a wey ke ziyè be ebpuun heini te selakew en he etew?” 35Ne midtavak si Pilatu te, “Hudiyu e ve! Is menge zuma nu he Hudiyu wey is menge punuan he memumuhat, iyan mid-uwit kenikew zini. Hengkey is salè nu?” 36Ne midtavak si Jesus te, “Is keg̵ehem ku te kedhadì, kenà dini ebpuun te kelibutan. Su ke zini ebpuun mibpekidtebek en geina is menge sakup ku wey a kenà mezakep te menge Hudiyu, iyan, kenà dini te kelibutan ebpuun is keg̵ehem ku te kedhadì.” 37Ne migkag̵i si Pilatu te, “Hadì ke ves?” Ne midtavak si Jesus te, “Tutuu heeyan is nekag̵i nu su hadì a. Umba midhendini a te kelibutan. Umba neetew a zini te lumpad. Midhendini a su wey ku ikepesavut ke hengkey is tutuu he tuluuwen. Is langun he menge etew he egkesuatan dan he metueni zan is tutuu he tuluuwen, ebpemineg dan kediey.” 38Ne zutun migkag̵i si Pilatu te, “Meupiya pezem ke zuen netau te tutuu he tuluuwen.”

Ne zutun te nekag̵i zin heini, midlawang en maan si Pilatu ziyà te menge Hudiyu ne ke sikandin diyà te kandan te, “Wazè ku egketuenan he salè din. 39Ne zini te keniyu te menge Hudiyu, duen betasan niw he emun Pista te Kedlevayi, ibpaawà ku is sevaha he egkesuatan niw he pirisu. Egkesuatan niw ve he ibpaawè ku heini is hadì niw te menge Hudiyu?” 40Ne mibpememensag dan te, “Kenà iyan sikandin, kekenà, iyan nu ipaawà si Berabas.” (Ne haazà si Berabas, tulisan.)

Terpilih Sekarang Ini:

Juan 18: mbbNT

Highlight

Kongsi

Salin