Nengeulaula 7
7
Is Menge Lalag ni Esteban Diyà te Menge Punuan
1Ne zutun mid-insaan si Esteban te lavew he memumuhat, ke sikandin te, “Tutuu ve heini is langun he insumbung dan mehitenged kenikew?” 2Ne midtavak si Esteban te, “Sikiyu is menge ebmeg̵urangen wey menge suled ku, pemineg̵a niw is menge lalag ku keniyu. Dengan, kes kepuun tew he si Abraham, mibpaahà kandin is mekeg̵eg̵ehem he Megbevayà te kemulu pa ziyà si Abraham ed-ubpà te tanà he Misuputamya hein wazè pa sikandin medhalin diyà te inged he Haran. 3Ne migkeg̵iyan si Abraham te Megbevayà te, ‘Awè ka kayi te inged nu wey menge suled nu wey lukes nu, ne ziyè ka ubpà te ibpeehè ku kenikew he tanà.’ 4Ne zutun mid-awà diyà te inged he Keldiya ne midhalin diyà te inged he Haran. Ne hein minatey is amey zin impahalin en maan sikandin te Megbevayà dini te tanà he neubpaan tew g̵untaan. 5Ne zutun he timpu wazè pa izata te Megbevayà diyà te ki Abraham is minsan deisek dà kayi te tanà, iyan, impenaad te Megbevayà he ibeg̵ey zin ki Abraham heini is tanà ne egkeazen heini ni Abraham wey te menge kevuwazan din. Ne hein impenaad heini ziyà te ki Abraham, wazè pa anak ni Abraham. 6Ne migkag̵i kandin is Megbevayà te, ‘Is kevuwazan nu, diyè dan keuzemà ebpekeubpà te kenà kandan he inged. Ne egkeuripen sikandan te meg̵inged dutun ne mezaat is ed-ul-ulahan kandan. Ne emun egketapus is heepat he g̵atus he tuig, 7edsilutan ku is menge teg̵iuripen kandan ne ed-ewaan dan dutun haazà is inged ne ed-ulì dan dini. Ne siak is Megbevayà, dini zan ed-azap te kediey.’ ” 8Ne ke si Esteban te, “Duen daan impenaad te Megbevayà ki Abraham. Midsug̵ù te Megbevayà he mebpesirkunsidar is langun kandan te menge maama su iyan tuus te kebpekid-uyun dan mehitenged te impenaad te Megbevayà. Umba hein nevuwad si Abraham ki Isaak, nekewalu zutun te ked-enaka kandin midsirkunsidar ni Abraham. Ne hein nevuwad si Isaak ki Hakub, midsirkunsidar zin daan. Ne hein iyan en maan nenganak si Hakub, midsirkunsidar zin daan kes sepulù wey zezuwa he anak din he kepuun tew te menge Hudiyu.”
9Ne ke si Esteban te, “Si Jose is sevaha he anak ni Hakub, nesina kandin is menge kakey zin ne imbelegyè dan sikandin ne neuwit diyà te Ihiptu. Iyan, midumahan si Jose te Megbevayà, 10ne midlibri zin te langun he menge mereg̵en he nengehitavù kandin. Midtuvazan si Jose te Megbevayà ne tenged dutun ingkesuat si Jose te hadì diyà te Ihiptu su neehè din he zekelà is ketau he imbeg̵ey kandin. Ne is hadì, midhimu zin si Jose he gubirnedur te tivuuk he g̵inhedian din wey iyan ebayàbayà te langun he menge azen din. 11Na,” ke si Esteban diyà te menge punuan te, “mid-ag̵i is dekelà he vitil ziyà te tivuuk he tanà he Ihiptu wey ziyà daan te Kenaan ne nereg̵enan is menge meg̵inged dutun. Ne is menge kepuun tew, wazè dan egkekuwaan te keuyag̵an dan. 12Umba hein nezineg ni Hakub he zuen egkeenen diyà te Ihiptu, midsug̵ù din is menge anak din he maama, sikan is menge kepuun tew, he medhendiyè dan. Iyan heini kes nehuna he kedhendiyè dan te kedlag̵ud te egkeenen. 13Ne zutun te ikezuwa en he kedhendiyè dan te Ihiptu, mibpekilala si Jose kandan te menge suled din ne human dutun metueni te hadì ke hentei is menge kezuzumahi ni Jose. 14,15Ne intelaan ni Jose is amey zin he medhendiyà te kandin wey is langun he kezuzumahi zin. Ne zutun midhendiyà ensi Hakub te Ihiptu. Is kezakel zan dutun te midhendiyà te Ihiptu, ne kepituwan wey lelima he etew. Ne hein neug̵et, minatey si Hakub diyà te Ihiptu ne minatey zaan kes menge anak din he kepuun tew. 16Ne kada is ebpatey kandan, id-ulì is lawa zin diyà te mibpuunan dan, diyà te Sikim ne zutun ileveng te surung he penlevengà he mibpemasa he zaan ni Abraham. Mibpemasa zin te selapì he pelata ziyà te menge anak ni Hamur he iyan meg̵inged dutun te Sikim.
17Ne neug̵et dutun hein meg̵aan en edtumanen te Megbevayà sikan is impenaad din diyà te ki Abraham he edlibriyen is menge kevuwazan din dutun, utew en dekelà diyà te Ihiptu is menge kevuwazan te menge kepuun tew. 18Ne zutun, duen midhadì diyà te Ihiptu he wazè din hanew te kedhadì dengan ni Jose. 19Na,” ke si Esteban, “heini is hadì, mibpesipelahan din is menge kepuun tew wey mezaat is mid-ulaula zin kandan. Pinaag̵i te peg̵es impetimbag din te menge Hudiyu is menge anak dan he utew pa vatà diyà te meziyù wey mebpatey. 20Ne iyan haazà daan timpu te ked-enaka ki Moises. Utew sikandin mekempet he vatà ne ingkesuat te Megbevayà. Seled te tetelu he vulan is ked-elimahi kandin te lukes din. 21Ne hein insavuk sikandin diyà te meziyù, naahà te vahi he anak te hadì. Ne mid-anak-anak din si Moises ne ziyè en medekelà te kandin he iring te tutuu he anak din. 22Ne impepenurù din diyà te ki Moises is langun he ulaula te menge tig-Ihiptu ne nevantug sikandin tenged te ketau te kebpesavut wey te menge vaal zin.
23Ne hein kepatan en is penuig̵en ni Moises, neisip din he ebpenumbelayan din is menge zuma zin he menge kevuwazan ni Israyil. 24Ne hein nekeuma en sikandin neehè din is maama he Hudiyu he ebpesipelahan te tig-Ihiptu. Ne midtevangan haazà ni Moises is duma zin he Hudiyu ne midhimetayan din haazà is tig-Ihiptu. 25Kunaan ni Moises ke nesavut en te menge zuma zin he Hudiyu he iyan sikandin nepilì te Megbevayà wey zin melibri sikandan te menge tig-Ihiptu, iyan, wazè dan mesavut. 26Ne hein nepawà dutun, midlikù med-uman si Moises. Ne zuen neehè din he zezuwa he menge Hudiyu he ebpetebekà. Ne ebpelangen din pezem haazà is dezuwa su ke sikandin te, ‘He menge suled, kenè kew medtebek su teltelesuled kew.’ 27Iyan, haazà is nekesalà te zuma zin, kenà ebpemineg; intukù din si Moises, ne ke sikandin te, ‘Hentei is mibeg̵ey kenikew te keg̵ehem te kedatùdatù kenami? 28Kela ke edhimetayan a kenikew iring te kedhimetayi nu g̵evii te tig-Ihiptu?’ 29Ne hein nezineg ni Moises heini, mibpelag̵uy ne ziyà med-ubpà te tanà he Madyan. Ne ziyà te Madyan ianak is dezuwa he anak din he maama.
30Ne neug̵et pa zutun, menge kepatan he tuig, duen belinsug̵uen te Megbevayà he mibpaahà ki Moises diyà te Siney, diyà te tanà he kenà ed-ubpaan te etew. Naahà ni Moises is belinsug̵uen te Megbevayà diyà te merapung he zug̵iyen he sagbet he egkeregreg. 31Ne hein naahà ni Moises haazà, nein-inuwan din ne mid-uvayan din su edsusiyen din. Ne hein uvey en dutun, migkag̵i is Nengazen te, 32‘Iyan a Megbevayà he ed-ezapen te menge kepuun nu he si Abraham, wey si Isaak, wey si Hakub.’ Ne migkerker si Moises ne wazà mekeaku te kedtengteng dutun su nahandek. 33Ne migkeg̵iyan sikandin te Nengazen te, ‘Ewaa nu is sepatus nu su mibulusan ku heini is tanà he nehitindeg̵an nu. 34Neehè ku is kebpesipelahi te menge tig-Ihiptu te menge pinilì ku he menge etew ne nezineg ku is dag-es dan. Umba zini ad guntaan te tanà su edlibriyen ku sikandan. Ne g̵enat ke en su edsug̵uen ku sikew ziyà te Ihiptu.’
35Ne heini si Moises,” ke si Esteban diyà te menge punuan, “daan he wazè dan dewata te menge Hudiyu is penavang din, kekenà, migkeg̵iyan dan dà te, ‘Hentei is mibeg̵ey kenikew te keg̵ehem te kedatùdatù kenami?’” Ne ke si Esteban en maan te, “Ne pinaag̵i zutun te velinsug̵uen he mibpaahà kandin dutun te egkeregreg he sagbet, midsug̵ù si Moises te Megbevayà. Ne midhimu zin si Moises he pengulu he iyan edlibri te menge Hudiyu. 36Ne mid-uwit ni Moises is menge kepuun tew ne mid-awè dan diyà te Ihiptu. Ne zutun te wazè dan pa med-awà diyà te Ihiptu, duen menge egkengein-inuwan wey menge singyal he impeehè din. Ne ziyà te zag̵at he egngezanan te Merig̵à, wey ziyà daan te imbayè dan he tanà he wazà duen ed-ubpà he etew, impeehè din daan is iring dutun he menge vaal. Kepatan he tuig is ked-uwita ni Moises kandan diyà te tanà he wazà dutun ed-ubpà he etew. 37Ne si Moises, migkeg̵iyan din is menge kepuun tew te, ‘Keuzemà duen daan ebpeneuven te Megbevayà he ed-uwit keniyu iring kedì te ebpeneuven din. Ne heini he ebpeneuven keuzemà, duma niw zaan he Hudiyu.’ 38Ne hein nengetig̵um is menge kepuun tew ziyà te tanà he wazà dutun ed-ubpà he etew, pinaag̵i ki Moises nekepekidlalag dan te velinsug̵uen te Megbevayà diyà te vuntud he egngezanan te Siney. Ne nezawat ni Moises dutun kes kenà egkehanew he menge Lalag te Megbevayà wey zin daan ikeveg̵ey kenitew. 39Ne wazà tumana te menge kepuun tew is ibpeulaula ni Moises kandan. Ne kenè dan egkesuatan he pengulu zan sikandin. Ne neisip dan he meupiya ke edlikù dan diyà te Ihiptu. 40Ne migkeg̵iyan dan si Arun, kes kakey ni Moises, te, ‘Beeli key te menge ledawan he egkehimu he menge ziwata he edsunuzen dey su heini si Moises, is mid-uwit kenitew puun diyà te Ihiptu, wazè dey en hanew ke hendei en sikandin mekepevayà.’ 41Ne zutun,” ke si Esteban, “mibeelan dan is ledawan he nati te vaka ne mibpelengesahan dan ne midlipey zan su nesuatan dan haazà is mibeelan dan. 42Ne zutun mid-iniyug̵an is menge kepuun tew te Megbevayà ne mibpesagdan din sikandan is ed-azap te menge vituen diyà te langit. Ne zuen insurat he Lalag te Megbevayà diyà te libru te ebpemeneuven dengan he edhenduen te,
‘He menge kevuwazan ni Israyil,
kenà a iyan sikan is mibpemuhat niw zengan
hein seled te kepatan he tuig diyà kew te tanà
he wazà duen ed-ubpà he etew,
kekenà, selakew is mid-azap niw.
43Iyan niw edyeyungen kes ibpeubpaan niw
zuen te ed-ezapen niw he si Muluk
wey kes ledawan he vituen
he ed-ezapen niw he si Ripan.
Menge ledawan heini he mibeelan niw ne mid-azap niw,
ne tenged dutun ibpeuwit ku sikiyu ziyà te meziyù,
diyà dapit te inged he Bebilunya.’ ”
44Ne ke si Esteban te, “Dengan te kemulu pa ziyà is menge kepuun tew te tanà he wazà duen ed-ubpà he etew, insarig kandan sikan is lawig he manggad he iyan tuus he kenà edsuwey ziyà te kandan is Megbevayà. Midhimu zan heini sumalà is insug̵ù te Megbevayà diyà te ki Moises, sumalà is ebpeiringan te Megbevayà kandin. 45Ne neug̵et dutun, is menge anak kayi te kepuun tew, hein nekebkevilin dan en haazà is lawig he ed-ubpaan te Megbevayà kenè dan haazà edsuwayen dutun te keduma zan ki Josue te kedseled dan kayi te tanè tew. Ne naangken dan heini is tanà hein impaawà te Megbevayà is menge zaan he meg̵inged kayi. Ne haazà is lawig he ed-ubpaan te Megbevayà, wazà maawà kayi taman te wazè pa medhadì si David. 46Ne hein nehimu en sikandin he hadì, ingkesuat sikandin te Megbevayà ne midhangyù si David he tug̵uti sikandin te Megbevayà he iyan sikandin mekevangun te hustu he valey he simbahan he zutun ed-ezapa is Megbevayà he iyan sikan is ed-ezapen dengan te kepuun tew he si Hakub. 47Iyan, wazà tug̵uti te Megbevayà si David su si Sulumun, iyan nekevangun te Valey te Megbevayà.”
48Ne ke si Esteban te, “Ne minsan pa zutun, is lavew he Megbevayà, kenà diyè dà ed-ubpà te valey he vineelan te etew su zuen insurat te ebpeneuven he,
49‘Egkag̵i is Nengazen te,
“Is langit, ne pinuuwè ku wey is tanà,
ne iyan edsevukan ku te paa ku.
Wazà baley he egkeveelan niw he ed-ereg̵an ku.
Kenè kew zaan ebpekevaal te hustu
he edhimelayan ku
50su iyan a midlimbag kayi te tanà
wey is langun he tag̵ù din.” ’ ”
51Ne ke si Esteban te, “Sikiyu is menge zuma ku he Hudiyu, utew memehunit is gehinawa niw. Kenè kew egkesuat he ebpemineg; ne kenè kew zaan edtuman te Lalag te Megbevayà. Kenè kew ed-engked he edsupak te Wag̵as he Mulin-ulin. Kes mid-ulaula te menge kepuun tew, iyan daan ed-ul-ulahan niw. 52Duen be minsan sevaha zà he ebpeneuven dengan he wazà resaya te menge kepuun tew? Wazà. Mibpenhimetayan dan is midsug̵ù te Megbevayà, sikan is nemeketagnà dengan te kebpekeuma te metazeng he sulug̵uen din he si Jesus. Ne sikiyu zaan guntaan su heini si Jesus, is sulug̵uen te Megbevayà, mid-ekalan niw ne mibunù niw. 53Ne is kesug̵uan te Megbevayà, imbeg̵ey kenitew zengan pinaag̵i te menge velinsug̵uen te Megbevayà, iyan, nasì wazè niw tumana,” ke si Esteban.
Is Kedhimetayi ki Esteban
54Ne hein nezineg te menge punuan he menge Hudiyu haazà is lalag ni Esteban, utew zan nengepauk. Ne migkeg̵etket is bag̵ang dan te kegkererengiti zan utew. 55Ne si Esteban, nepurung sikandin ulini te Wag̵as he Mulin-ulin ne midlingahà diyà te langit ne neehè din is mekeg̵eg̵ehem he anlag te Megbevayà. Ne elin dutun neehè din si Jesus he ziyà edhithitindeg te zapit te egkekewanan te Megbevayà. 56Ne ke si Esteban te, “Ahaa niw man! Egkeehè ku en is langit he nepuwasan ne zutun is Kakey te Menusiyà he edhithitindeg te zapit te egkekewanan te Megbevayà.” 57Ne zutun haazà is menge punuan, nekekulahì dan ne midsabpeng dan is telinga zan su wey kenè dan en mezineg is menge lalag ni Esteban ne midlingketawan dan. 58Ne inggawas dan sikandin puun dutun te inged ne midtuleng dan te vatu. Ne sikan is nemekesumbung kandin, insavuk dan is menge kumbalè dan diyà te uvey te etew he egngezanan ki Seulu. 59Ne zutun te kedtulenga zan ki Esteban, nengumew-umew sikandin te Nengazen. Ke sikandin te, “He Jesus he Nengazen ku, dewata nu is gimukud ku.” 60Ne zutun nekeluhud ne mid-uman megkag̵i te, “He Nengazen, kenè nu isipa he idsilut kandan heini is salè dan.” Ne te nekag̵i zin haazà, naawà is gehinawa zin.
Terpilih Sekarang Ini:
Nengeulaula 7: mbbNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2001, Wycliffe Bible Translators, Inc., All rights reserved.