Nengeulaula 3
3
Is Kebewii Zuen te Etew he Pigket
1Ne sengeandew te zutun he timpu mibpezumahà si Pedro wey si Juan is edtekezeg pehendiyà te Valey te Megbevayà su uras en te ked-ampù su liwazè en he ebpenaug is andew. 2Ne zuen lilimusan dutun he puun pa te ked-enaka kandin kenè en ebpekehipanew. Kada andew ed-uwiten sikandin te menge zuma zin ne idsavuk dan diyà te uvey te pultahan te simbahan he egngezanan te Valey te Megbevayà, sikan is pultahan he egngezanan te Mekempet. Iyan idsevuka kandin dutun su wey mekevuyù te limus diyà te menge etew he edseled dutun te simbahan. 3Ne hein neehè din si Pedro wey si Juan is edseled dutun te simbahan, mibuyuan din te limus. 4Ne midtengtengan sikandin ni Pedro wey ni Juan ne ke si Pedro te, “He Mama, ahaa key kenikew.” 5Ne midlingehè din sikandan su kunaan din ke zuen selapì he ibeg̵ey kandin. 6Ne migkag̵i si Pedro te, “Wazè ku naazen he vulawan wey selapì, iyan, is naazen ku, ibeg̵ey ku kenikew. Tenged te g̵ehem te ngazan ni Jesu Kristu he tigNeserit, ebpekehipanew ka!” 7Ne zutun migewezan ni Pedro is kewanan he velad dutun te kenà ebpekehipanew ne mid-enew zin. Ne zutundutun neteg̵uan te zesen is menge paa zutun te etew. 8Ne midtik-ew medhitindeg ne midhipanew ne miduma kandan te edseled dutun te simbahan he se mekelinglingketew ne se mekelangkadlangkad he edalig te Megbevayà. 9Ne is langun he menge etew zutun he nekeahà kandin te edlangkadlangkad he edalig te Megbevayà, 10ne nekilala zan he iyan kes lilimusan he ziyà ebpimpinuu te uvey te simbahan duen te pultahan he egngezanan te Mekempet. Ne utew zan nengeinuinu zutun te kegkeulii kandin.
Is Kedwali ni Pedro Ziyà te Valey te Megbevayà
11Ne te kemulu pa sikandin ebpaag̵ak ki Pedro wey ki Juan, nengevurun is langun he menge etew he zutun, ne mibpelelag̵uy ne midlig̵uy kandan su nengeinuinu zan. Ne ziyà sikandan te uvey te simbahan dutun te helungà he egngezanan te Helungà ni Sulumun. 12Ne hein naahà haazà ni Pedro, migkeg̵iyan din haazà is menge etew te, “Menge kezuzumahi ku he menge kevuwazan ni Israyil, maan is igkeinuinu niw utew heini? Maan is edtengtengan key keniyu? Kunaan niw vuwa ke pinaag̵i te kenami en he g̵ehem wey ke tenged be te wazè dey salà, ne neulian dey heini wey mekehipanew. 13Is Megbevayà he ed-ezapen te menge kepuun tew he si Abraham, si Isaak, wey si Hakub, midtulus din is sulug̵uen din he si Jesus. Ne te wazè pa sikandin tulusa, impalad niw ziyà te menge punuan ne midsumpalit niw ziyà te etuvangan ni Gubirnedur Pilatu. Ne si Pilatu, edlibriyen din pezem si Jesus, 14iyan, sikiyu, wazè niw mesuati sikandin is wag̵as he wazà kandin he mezaat he ulaula. Midhangyù kew he iyan libriya ni Pilatu kes teremunù he nepirisu. 15Ne sikan is puunà te untung he wazà pidtemanan, midhimetayan niw, iyan, mibanhew sikandin te Megbevayà. Ebpeketistig̵us key he nevanhew en si Jesus su neehè dey. 16Ne iyan nekeulì kayi te kenà ebpekehipanew is gehem te ngazan ni Jesus. Heini is etew he kilala niw he neehè niw g̵untaan, tenged te kedtuu zey ki Jesus neulian heini kayi te etuvangan niw su nekesarig key te g̵ehem te ngazan ni Jesus.
17Ne g̵untaan menge suled, netuenan ku he sikiyu wey is menge punuan tew, mibeelan niw is mezaat diyà te ki Jesus tenged te wazè niw mesavut ke hentei sikandin. 18Impesavut dengan te Megbevayà pinaag̵i te tagnà te ebpemeneuven din he edresayen te menge etew is mibpilì din he ibpahadì. Ne midhimu zin he metuman heini pinaag̵i te mid-ulaula niw. 19Ne g̵untaan kinahanglan he ed-iniyug̵an tew en is memezaat he ulaula. Ed-empuan tew is Nengazen ne ebpeseyluwen kiw zin te menge salè tew. Ne zutun duen timpu he ebeg̵ayan is gehinawa tew te zesen he ziyà ebpuun te kandin. 20Ne edsug̵uen din dini te kenitew si Jesus he iyan kes mibpilì din he ibpahadì kenitew. 21Diyè pa si Jesus ebpekeubpà te langit taman te kenè pa edhimuwen te Megbevayà he veg̵u is minsan hengkey sumalà te netagnà dengan pinaag̵i te ebpemeneuven din. 22Migkag̵i si Moises dengan te, ‘Is Megbevayè tew he Nengazen te langun, edsug̵uen din dini te keniyu is ebpeneuven din iring te kedsug̵ua zin kedì. Ne haazà is edsug̵uen din, duma tew zaan he Hudiyu. Kinahanglan he edtumanen niw is minsan hengkey he sug̵ù din keniyu. 23Ne sikan is kenà ebpemineg kandin te ebpeneuven te Megbevayà, kenè en sikandin idragkes te menge etew he ed-ulinan te Megbevayà,’ ke si Moises dengan. 24Ne is menge zuma he ebpemeneuven dengan he ebpemenagnà,” ke si Pedro, “iring ki Samuel wey is nemekesunud kandin, netagnè dan daan is egkengeulaula g̵untaan. 25Ne zuen impenaad te Megbevayà dengan pinaag̵i te ebpemeneuven din. Ne iyan kiw is menge Hudiyu sikan is mibpenaazan dengan te Megbevayà te langun he meupiya he idtuvad din. Umba ebpekeambit kiw zaan te impenaad dengan te Megbevayà diyà te menge kepuun tew, su migkag̵i is Megbevayà diyà te ki Abraham te, ‘Pinaag̵i te kevuwazan nu edtuvazan ku te meupiya is tivuuk he menusiyà dini te kelibutan.’ 26Umba,” ke si Pedro, “hein midsug̵ù te Megbevayà is sulug̵uen din he si Jesus, impehuna zin ipehendini te kenitew te menge Hudiyu su wey kiw zin metevangi pinaag̵i te kebpeengkezi zin kenitew te memezaat he ulaula tew.”
Terpilih Sekarang Ini:
Nengeulaula 3: mbbNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2001, Wycliffe Bible Translators, Inc., All rights reserved.