Markus 11
11
Yeesu Nattii Urucaliima
(Maatiyu 21.1‑11; Luka 19.28‑40; Yahaya 12.12‑19)
1Nde ɓe ɓadii Urucaliima, to gariije Betafaaji e Betani to Hocceere Nde Leɗɗe Jaytun, sey Yeesu lili tokkuɓemo ɗiɗo, 2o wi'iɓe, “Nattee gariyel gongel yeeso mooɗon. E nattuki mooɗon, on taway mbabba mola e nga haɓɓii, ɗum meeɗaayi waɗɗaakinga. Pittoyeenga ngaddonnga ɗo'o. 3To goɗɗo ƴamii'on, ‘Ko waɗi pittotonnga?’ mbi'eemo, ‘Moodibbo e yiɗi huutirkinga, o waɗay ɗum wartiranga naa' ko neeɓi.’ ”
4Sey ɓe njahi ɓe tawi mbabba mola ngan e haɓɓii to dammugal, haade ɗatal. E ɓe pittanga, 5sey woɓɓe dariiɓe ɗon ƴamiɓe mbi'i, “Ngam ɗume pittotonnga?”
6Kamɓe boo ɓe mbi'iɓe ko Yeesu wi'i, sey yimɓe ɓen aliɓe ɓe ndillidi e maaga. 7Ɓe njaaraninga Yeesu, ɓe mbe''iti cuddaari maɓɓe dow magga. Yeesu waɗɗiinga. 8Sey yimɓe ɗuɗɓe mbe''iti cuddaari maɓɓe dow ɗatal, woɓɓe boo mbe''iti haako ko ɓe ngewoyi to saabeere. 9Yimɓe wonɓe yeeso maako e wonɓe gaɗa maako, e ɓe mbi'a e sembe, “Hosaana! O barkiɗinaaɗo on ɗon garoyɗo nder inde Joomiraawo!#Jab 118.25,26. 10Laamu maama meeɗen Dawda garayɗum ɗum barkiɗinaaɗum! En mantu Allah Mo Dow!”
11Sey Yeesu natti Urucaliima, o natti Wuro Ceniingo, o raari koo ɗume gaɗeteeɗum ɗon. Ngam naange hiirii, sey o wurtii, o dilli Betani kanko e tokkuɓemo sappo e ɗiɗo.
Yeesu Laanii Lekki Ibbi
(Maatiyu 21.18,19)
12Nde weeti, e ɓe ala Betani, Yeesu nani weelo. 13O haynii lekki ibbi gooduki haako, o yahi o yi'a koo o heɓay ibbe to maaki. Nde o yottii to maaki, o tawaayi goɗɗum sey haako, ngam naa' ɗum carel ɓikkoy maaki. 14Sey o wi'i lekki kin, “To' koo moye ɓeyda nyaamuki ɓikkoy daga to maaɗa!” Tokkuɓemo boo nanii ko o wi'i.
Yeesu Laaɓinii Wuro Ceniingo
(Maatiyu 21.12‑17; Luka 19.45‑48; Yahaya 2.13‑22)
15Nde ɓe natti Urucaliima, Yeesu natti Wuro Ceniingo, sey o fuɗɗi riiwuki soorooɓe e soodooɓe nder maggo. O talli teeburji gaylitooɓe ceede Roomanko'en yaaki ceede Wuro Ceniingo e jooɗorle coorooɓe pooli. 16O haɗi koo moye ƴaɓɓodoo e dongal nder njayri Wuro Ceniingo. 17O wi'iɓe, “Ɗum windaama, Allah wi'ii, ‘Ɗum noddiray wuro am wuro do'aare ngam leƴƴi fuu,’ ammaa onon on ngartiriingo luuro wuyɓe.”#Ica 56.7; Irm 7.11.
18Mawɓe ardiiɓe diina e moodiɓɓe Attawra nani ko Yeesu waɗi, sey ɓe ngaɗi ka ɗaɓɓutuki laawol no ɓe mbardatamo. E ɓe kulamo, ngam yimɓe fuu kayɗini e ekkitinol maako.
19Nde naange hiiri, Yeesu e tokkuɓemo mburtii gariiri ndin.
Ibbi Ki Yeesu Laani Ki Yoorii
(Maatiyu 21.20‑22)
20Subaka e ɓe ƴaɓɓoo, sey ɓe ngi'i lekki ibbi kin yoorii haa e ɗaɗi maaki. 21Biiturus siftori wi'i Yeesu, “Moodibbo, raaru! Ibbi kin ɗon ki laanuɗaa ki yoorii.”
22Yeesu nootii wi'iɓe, “Koolee Allah. 23E mi wi'a'on goonga, to goɗɗo wi'ii hocceere nde'e, ‘Dillu, kuboɗaa hoore maaɗa nder mbeela,’ to o waɗaayi seko nder ɓernde maako, ammaa o hoolii ko o wi'i ɗum waɗay, ɗum waɗanaymoɗum.#Maat 17.20; 1Kor 13.2. 24Ngam non e mi wi'a'on, fuu ko toriiɗon nder do'aare, koolee on keɓiiɗum, nden ɗum wartay ɗum mooɗon. 25-26Koo ndeye to on ndarake on ngaɗa do'aare, to e woodi mo njogitiiɗon nder ɓerɗe mooɗon, njaafaneemo, ngam Nyaako mooɗon Mo Dow maa yaafanoo'on hakke mooɗon.”#Maat 6.14,15.
Ƴamol Dow To Laamu Yeesu Ƴiwoyi
(Maatiyu 21.23‑27; Luka 20.1‑8)
27Ɗonmaa Yeesu e tokkuɓemo natti Urucaliima. Yeesu e yiiloo nder Wuro Ceniingo, sey mawɓe ardiiɓe diina e moodiɓɓe Attawra e mawɓe yimɓe ngari to maako. 28Ɓe mbi'imo, “E laamu moye ngaɗataa kuuɗe ɗe'e? Moye hokkumaa laamu waɗukiɗe?”
29Yeesu nootii wi'iɓe, “Mi ƴamay'on ƴamol go'o. Nootaneeyam, nden mi wi'ay'on e ɗume laamu ngaɗiraymi kuuɗe ɗe'e. 30Baptisma ɗum Yahaya waɗi, to Allah ɗum ƴiwoyi, koo to yimɓe ɗum ƴiwoyi? Nootaneeyam!”
31Sey ɓe meddi hakkunde maɓɓe, ɓe mbi'i, “To en mbi'ii, ‘Daga to Allah ɗum ƴiwoyi,’ o wi'ay, ‘Ko waɗi on jaɓaayi ko o wi'i?’ 32Ammaa to en mbi'ii, ‘To yimɓe ɗum ƴiwoyi…’ ” Ɓe mbi'u non ngam e ɓe kula yimɓe, ngam koo moye jaɓii Yahaya o annabiijo. 33Sey ɓe nootii ɓe mbi'i Yeesu, “Min andaa.”
Yeesu wi'iɓe, “Non min maa, mi wi'ataa'on koo e ɗume laamu ngaɗiraymi kuuɗe ɗe'e.”
Terpilih Sekarang Ini:
Markus 11: fuv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2010, Bible League. All rights reserved.
