SHURAI 4
4
Kain ae Abel
1Chuo Adam nou puh chapfü Ef ye koa züloure alia Ef nou poupfü loua Kain#4.1 kain: Zhih haina hai Hebrew maila hinou “polouyu” touyu raiwe. ye naloure alia haibüa paoe, “Mapao vei soukha vanou E mai ali ngaoloue.” 2Süthaia nahpoutu ali Abel teanou honapai nou naloue. Abel hai zhaotu khoe, ae Kain hai tatamai ali soue. 3Teile phajü touthai Kain nou dou hinou tatalouyu shira pove Mapao ye sheelae, 4alia Abel nou zhaotu toukou arai nahai ae sünavei sou touveih zhatao poa sheelae. Mapao nou Abel ye sü jüpae alia puhvei sheelayu haisü popeie, 5ana Kain ye ngaorae ae puhvei sheelayu nasü popei bare. Süvanou Kain hai raroua pah pfüshou loure. 6Mapao nou Kain hi paoe, “Ne daivanou rarouwe ae nepah daidonou pfüshouwe? 7Nenou kaozü nasü soulouyu thaio, neye popei laimowu? Ana nenou souzü vah soulou more toulouzü, mah nanou ne kikhu phinou neye dah-a bure, mah nanou ne jünou veiloure tea bure, ana nenou mah jünou kolowo.”
8Kain nou puh thaihou Abel ye “Ahai koa douhi taho laikhe”#4.8 La dapakhai touyu kamai hia Ahai koa douhi taho laikhe; touyu haina hai Hebrew Baibel hi loumoe. tea kuloue. Alia puhai nou douhi bua bukinou Kain nou puh thaihou Abel ye sü dathare. 9Süthaisü Mapao nou Kain hi paoe, “Ne thaihou Abel daikinou bue?” Puh nou chila peie, “E sümoe, E athaihou ye khoyu maiwu?” 10Mapao nou paoe, “Ne daili soupeiwure? Ne thaihou vei zhesü ahi shusoua deiphinou rapao-a bure. 11Chuwo ne bah nou soupayu ne thaihou vei zhe sünaye teilouyu dei süna hinou neye chaapeire. 12Nenou dou tathouyuma neye thou ali-a shipei laimoe; neye panou ki ha-a deiphao hi hrü sühao-a tayu mai soulai.”
13Kain nou Mapao hi paoe, “Ahi tudee peiyu hai Enou pfülou hore. 14Zhukhaio chuwo nenou Eye hulaiwure, alia Esü ne nghoujü hinou tutsü talaire, alia deiphao hi ki ha-a hobu haibua tayumai ali soulaire alia Eye vedaoyu mai tara linoua Eye southa bailai.”
15Ana Mapao nou puh hi paoe, “Sükulai moe! Mai tara linoua neye dathare toulouzü puh hisü bakha anai khüphoulai.” Süthaisü Mapao nou Kain va hisü shee soukhai peie, sütou more toulouzü puhye ngaolouyu mai tara linou puhye southawulai. 16Süthaisü Kain nou Mapao nghoujü nou tapaloua Eden teinghi palo Nod teanou kuyu füdei hisü hotare.
Kain vei Tyaonahtao
17Kain nou puh chapfü ye süloure, süthai honapai nou nahpoutu Enok ye naloue. Süthaisü puhnou nuhdu ali soushuloue alia nuhdu süna zhih hai puh nahpoutu Enok zhih hinou saloue. 18Enok hinou nahpoutu Irad ngaoloue, ae Irad hai Mahujael puoe, ae Mahujael sü Methushael puoe, ae Methushael sü Lamek puoe. 19Alia Lamek nou maipfü ahai naloue. Puh hai zhih sü Adah ae Zillah toue. 20Adah hinou Jabal naloue. Puhsü kikhaorü kiyu ae sahpao hinou hrüyu tyahrü taovei puopaoe. 21Jabal sü puh thaihoue, puh hai lousoua lana vayu ae shaa houngyu tyahrü taovei puopaoe. 22Zillah nou Tubal Kain ye napeie. Hu vei baseina veishi hai puhnou soupeie. Naamah hai Tubal Kain vei tupaie.
23Lamek nou puh chapfü ahai hi paoe,
“Adah ae Zillah,
Enou paoyu achi keipei khaio;
Lamek chapfü haire,
Enou paoyu chi sü keilo:
Eye zhi peilai tea buyu ae Eye southalai tea buyu nahlemai ali Enou southare.
24Kain ye southayu donou mai anai hrirai polai toulouzü,
Lamek khü hai mai rainai-nai poyu phae.”
Seth ae Enosh
25Adam nou puh chapfüye koa buloua nahpoutu ali napuloue. Puh zhih hai Seth#4.25 seth: Zhih haina hai Hebrew mai la hinou “peiyu” touyu raiwe. tea saloue, daiolouzü Kain nou Abel ye dathayu thao Ramai nou nah poutu ali ahi peie tea maipfü nou paoe. 26Seth hia nahpoutu ali ngaoloue ae puh zhih hai Enosh tea saloue. Süteile hinou maikhe mainou Ramai zhih kua ratho shure.
Terpilih Sekarang Ini:
SHURAI 4: POUMBSI
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.