Kusintii Andunya 44
44
Zozɛfu í cã idɔi igbãɛ ŋa
1Si anyiɛ nɔ Zozɛfu í sɔ̃ inɛ ngboi woo ce icɛi kpasɛ̃ɛ í ni, da nŋa si amaajɛ si saaki nŋa ŋa zaka bɛi aa yɔkɔ a so. Nɔ i sindoa aŋa fei fia nŋa si saaki nŋa ŋa. 2Nɔ i so kɔɔfum nɔu iyi à ce do isɔ fũfũ jiidau i dasi si saakii ifɔ nŋau do fiaɛ ajɔ.
Nɔ inɛɛu í ceò idei Zozɛfuu icɛ dee dee bɛi í fɔ. 3Iyi iju í má daakɔ gbakã à jɔ̀ ŋa à nɛ do gbankɛlɛ nŋa ŋa. 4Iyi à nɛ à jĩò iluu keeke gbakã nɔ Zozɛfu í sɔ̃ inɛ ngbo woo ce icɛi kpasɛ̃ɛu í ni, hãmɛɛ inɛ ŋau. Bii ì koo ì ba ŋa, bee ŋa i ni, na mii í ce à ce nŋɛ jiida nɔ iŋɛ ì sã nwa laalɔɛ ŋa. 5Ì ce ilei kɔɔfui lafɛ̃ɛm ŋa, si bii í ya mɔ inyi nɔ ku ceò alisi. Mii iyi ì ce ŋa kù sĩa.
6Ŋɔi inɛɛu í koo í ba ŋa nɔ í bee ŋa ideu. 7Nɔ aŋa mɔ à jɛaa à ni, bɛirei í ce ì waa má wa ide bɛɛbɛ. Ilaaɔ̃ ku waasu mii iyi á jɔ̀ awa amaacɛɛ ŋa ka ce daa dimi bɛɛbɛ. 8Awa iyi à koo à yɛ fia si saaki nwa ŋa hee ilɛi Kanaã ide nwa nɔ à nyiò wa? Bɛirei aa ka ce ka ce ilei wura walakɔ isɔ fũfũ má hai kpasɛ̃i lafɛ̃ɛɛ. 9Si asoi inɛ nwa iyi ì yɛ kɔɔfuu bii ì bi, jɔ̀ a kpa lafɛ̃ɛ. Nɔ awa iyi à gbe mɔ, mu wa aru. 10Nɔ inɛɛu mɔ í jɛ í ni, to, í sĩa, ǹ gbɔ bɛi ì dɔ̃ ŋa. Amma do nŋu fei, inɛ iyi ǹ yɛ kɔɔfuu si asoɛ, nŋu akãi á jɛ arum. Iŋɛ iyi ì gbe i nɛ nŋɛ.
11Ŋɔi inɛ ŋau à sɔ aso nŋa ŋa gbãa gbãa, inɛ fei wa fũ tɛɛ. 12Nɔ inɛɛu í wusɛ saaki nŋa ŋa. Í sinti hai si saakii inɛ ngbo nŋau nɔ í koo í kpa iriɛ do ti ifɔ nŋau. Nɔ í koo í yɛ kɔɔfuu si saakii Bɛnzamɛɛ. 13Nɔ arai inɛ ŋau fei í ku, à mu ibɔ nŋa ŋa à gaa. Nɔ aŋa fei à kãa gbankɛlɛ nŋa ŋa asou má, à nyi inɔ ilu.
Zudaa í gba ideu na irii Bɛnzamɛɛ
14Iyi Zudaa do igbãɛ ŋa do ifɔɛ ŋau à to wa kpasɛ̃i Zozɛfu à baa bɛ, kù bɔ bii gɔ. Nɔ à koo à sɛɛbataa. 15Nɔ í bee ŋa í ni, na mii í jɔ̀ ì ce bɛɛbɛ ŋa. I kù mà ŋa iyi amanɛ bɛi amu á yɔkɔ ku ce alisi? 16Nɔ Zudaa í jɛaa í ni, lafɛ̃ɛ, yoomai aa ka fɔ má. A kaa ka yɔkɔ ka ni à jɛ dee dee domi Ilaaɔ̃ í yɛ kurara iyi à tako à ce. Awa fei aa ka jɛ aruɛ ŋai do inɛ iyi à yɛ kɔɔfuu si asoɛu ajɔ. 17Nɔ Zozɛfu í ni, aawo. Kù sĩa n ce bɛɛbɛ. N kaa n mu inɛ gɔ aru bii kù jɛ inɛ iyi à yɛ kɔɔfuu si awɔɛ. Iŋɛ ì nɛ nŋɛ do laakai ì koo ì ba baa nŋɛ.
18Nɔ Zudaa í sɛkɛɛ siɛ í sɔ̃ɔ í ni, lafɛ̃ɛm, jɔ̀ n fɔ ide keeke, nɔ i maà jɔ̀ ku kɔ̃ idɔɛ, domi ǹ mà iyi awɔ do Faraɔ̃ fei ì waa munga ŋai. 19Waati iyi à tako à naa, awɔ lafɛ̃ɛ nwa ì bee wa mà baa nwa í wɛɛ hee nsɛi, nɔ ì bee mà à nɛ ifɔ má. 20Nɔ à jɛɛ à ni, baa nwa í wɛɛ si hunde, nɔ à nɛ ifɔ iyi í bí si agboɛ. Ifɔ nwau mɔ í nɛ igbã iyi aŋaò à jɛ iye akã. Amma igbãɛu kù wɛɛ. Nŋu akãu bɛi í gbe, nɔ baa nwa í buu ntɔ ntɔ. 21Nɔ ì sɔ̃ wa awa woo ce icɛɛ ŋa ì ni ka gbã ka naaɛ wa, awɔ ì waa bi ku yɔɔ. 22Nɔ à sɔ̃ɛ à ni, baau ci ya jɛ amau ku sɛkɛɛ. Bii amau wa bɔ bii gɔ gbakã, baau í ya ni nŋu á kui. 23Nɔ ì sɔ̃ wa ì ni i kaa gba wa bii a kù gbã ifɔ nwa a kù naaò wa. 24Si bɛɛbɛ nɔ à nyi ide bi baa nwa à koo à sisiaa bɛi ì fɔ fei. 25Iyi í ce ajɔ minji ŋɔi mii ku jɛ nwau í tã. Nɔ baa nwa í ni ka nyi wa ka naa ka ra ijɛ keeke wa má. 26Amma à sɔ̃ɔ à ni, bii kù jɛ ifɔ nwa í too wa sisi, a kaa ka koo, domi bii kù too wa fei inɛ ngboi ilɛu kaa gba wa. 27Nɔ baa nwa í sɔ̃ wa í ni, isa iŋɛ taka nŋɛ ì mà ŋa iyi ama minji lege legei abom Rasɛli í bíim ya. 28Inɛ akã n kù mà bii í wa, amu de ǹ tamaa mɛɛmui sako gɔi í kpaa, domi n kù na n kù yɔɔ má. 29Nɔ iŋɛ mɔ ì waa bi i so sim inɛ ihɛ̃ má. Bii laalɔ gɔ í koo í baa, inɔ kufɔ á kpam, si bɛi ǹ gbou ihɛ̃.
30Na nŋu, nsɛi, bɛirei an ce n nyi ide bi baa nwa bii amau kù wa si inɔ nwa. Kuwɛɛi mɔkɔ ngbo nwau fei na irii amau ihɛ̃i. 31Bii í yɛ amau kù wa si inɔ nwa, á kui. Nɔ kurara nwai á jɔ̀ inɔ kufɔ ku kpaa si agboɛ. 32Nɔ iyi í re mɔm amu ǹ sɔ̃ baa nwa ǹ ni, bɛi í na í ce fei amui ǹ jɛ irii ideu. Bii n kù baaò amau wa an jɛ ilu taale si wajuɛ hee do ajɔ fei. 33Lafɛ̃ɛ, ǹ wa n tɔɔɛi, jɔ̀ amu takam n wa ihɛ̃ n jɛ aruɛ, n maa n ceɛ icɛ si agbɛi Bɛnzamɛɛ. Nɔ i jɔ̀ɔ ku too igbãɛ ŋa ku bɔ ide. 34Bii amau kù wa fiti nwa n kaa n jɛ n bɔ ide bi baa nwa. Ilaaɔ̃ ku maà jɔ̀ n yɛ inɔ kufɔ iyi á ba baa nwa.
Terpilih Sekarang Ini:
Kusintii Andunya 44: MKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
2021, SIM International et UEEB