Kufita 5
5
Moizi do Arɔ̃ɔ à bɔ wajui ilaalui Ezibiti
1Si anyiɛ Moizi do Arɔ̃ɔ à bɔ bi Faraɔ̃ nɔ à sɔ̃ɔ à ni, Aɔ̃ Lafɛ̃ɛ, Lafɛ̃ɛi inɛi Izirɛli ŋa í ni i jɔ̀ inɛ nŋu ŋa a nɛ a koo a ce jingau gɔ si gbaa do iri nŋu.
2Nɔ Faraɔ̃ í jɛ nŋa í ni, yooi í jɛ Aɔ̃ Lafɛ̃ɛ n bɛi n jirima ideɛ n jɔ̀ inɛi Izirɛli ŋa a nɛ. N kù mà Aɔ̃ Lafɛ̃ɛ nɔ n kaa n jɔ̀ inɛi Izirɛli ŋa a nɛ.
3Nɔ à sɔ̃ɔ à ni, Aɔ̃ Lafɛ̃ɛ, Lafɛ̃ɛi awa inɛi Ebɛɛ ŋai í naa si wa. Na nŋu, à waa tɔɔɛi, jɔ̀ ka ce isɛɛnɛ ajɔ mɛɛta si gbaa ku ba kaa ceaa kuwee ŋa, ku ba ku maà dasi wa bɔ̃ɔ nla nla ka ku, walakɔ ku jɔ̀ a kpa wa si igũ.
4Ŋɔi ilaalui Ezibitiu í ni, awɔ Moizi do Arɔ̃ɔ, na mii í ce ì waa sinda inɛ ŋau hai si icɛ nŋa ŋa. I koo i nɛ icɛ nŋɛ. 5Nɔ í ni má, wee nsɛi, inɛ ŋau ihɛ̃ à kpɔ si ilɛu nɔ iŋɛ ì waa ganji ŋa si icɛ nŋa ŋau.
Faraɔ̃ í kɔ̃ɔsi icɛi inɛi Izirɛli ŋa
6Nɔ ajɔ nŋu mɔi Faraɔ̃ í na inɛi Ezibiti ŋa, aŋa iyi à jɛ inɛ ngboi icɛu, do inɛi Izirɛli ŋa iyi à ya maa cɔ yaasei icɛu wooda í ni, 7i maà na inɛ ŋau fɔfɔ má bɛi ì ya tako i na ŋa a maa ceò biiki ŋau. Aŋa taka nŋa a koo a ko fɔfɔ wa do ara nŋa. 8Amma do nŋu fei i jɔ̀ a ce jiai biiki bɛi à ya tako à ceu, i maà kaye nkãma. Inɛ ŋau ilu ika ŋai. Nŋui í jɔ̀ à wasi ku weewea à waa ni, kaa cea Ilaaɔ̃ Lafɛ̃ɛ nwa kuwee ŋa. 9Na nŋu, ka kãa inɛ ŋau asoi icɛ ku ba laakai nŋa fei ku wa si icɛu nɔ a maà dasi idei ibo ŋa naanɛ má.
10Ŋɔi inɛ ngboi icɛ ŋau do woo cɔ yaasei icɛ ŋau à koo à sɔ̃ inɛ ŋau à ni, Faraɔ̃ í ni nŋu kaa na ŋɛ fɔfɔ má. 11Iŋɛ taka nŋɛ i koo i dɛdɛ fɔfɔ wa hai bii aa ba ŋa. Amma do nŋu fei, jiai biiki bɛi ì ya tako i ce ŋa wo, bɛɛbɛ mɔi aa ce má ŋa. 12Ŋɔi inɛi Izirɛli ŋa à fangaa si ilɛi Ezibitiu fei à bɔ fɔfɔ iyi aa na a ceò icɛ ku ko. 13Ŋɔi inɛ ngboi icɛ ŋau à ya maa mante ŋa a maa ni, ajɔ akã fei i ya ce jiai biiki bɛi ì ya ce ŋa wo waati iyi à ya na ŋɛ fɔfɔu. 14À cã hee do inɛi Izirɛli ŋa iyi aŋa taka nŋa à jilɛ wo a ya maa cɔ yaasei icɛu nɔ à bee ŋa à ni, bɛirei í ce ana do nnyi i kù tã jiai biiki iyi à da nŋɛ bɛi tako ŋa wo.
15Ŋɔi inɛi Izirɛli woo cɔ yaasei icɛ ŋau à koo à waa weewea bi Faraɔ̃ à ni, bɛirei í ce ì waa kpã awa woo ce icɛɛ ŋa iju bɛ ihɛ̃. 16A ci ya na wa fɔfɔ má nɔ do nŋu fei à ni ka nya biiki. À ya maa cã wa mɔm nii. Nɔ wee aŋa taka nŋai à nɛ taale.
17Ŋɔi Faraɔ̃ í jɛ nŋa í ni, iŋɛ ilu ika ŋai, ì nɛ ika ŋai hee í caa. Ŋɔi í jɔ̀ ì waa ni iŋɛ aa koo i cea Aɔ̃ Lafɛ̃ɛ kuwee ŋa. 18Nsɛi, i koo i ce icɛ ŋa. A kaa na ŋɛ fɔfɔ má, amma biiki zaka akãu dei aa ya nya ŋa.
19Woo cɔ yaasei icɛ ŋau à yɛ iyi wahalai aŋa á kɔ̃ɔsi si na iyi í jɔ̀ à nɛ a sɔ̃ inɛi Izirɛli ŋau a ni, i maà kaye jiai biiki iyi aa nya ŋa. Ajɔ fei zaka bɛi à da nŋɛ, bɛɛbɛi aa nya ŋa. 20Iyi à waa fita wa hai bi Faraɔ̃ ŋɔi à ko Moizi do Arɔ̃ɔ à waa degbe ŋa. 21Nɔ à sɔ̃ Moizi do Arɔ̃ɔ à ni, Aɔ̃ Lafɛ̃ɛ ku cɔ mii iyi ì ce nwa nɔ ku kiiti ŋɛ. Na iri nŋɛi Faraɔ̃ do inɛɛ ŋa à cé wa. Í yɛ bɛi ì da nŋa taakuba si awɔ a kpa waò ŋai.
22Ŋɔi Moizi wa ce kutɔɔ má í ni, Lafɛ̃ɛ, na mii í jɔ̀ ì cea inɛ ŋau ihɛ̃ laalɔ. Na mii í jɔ̀ ì bɛm wa. 23Hai waati iyi ǹ bɔ bi Faraɔ̃ ǹ koo ǹ fɔ ide do iriɛ í ya maa wahala inɛ ŋau ihɛ̃i, nɔ hee nsɛi i kù faaba ŋa si nkãma.
Terpilih Sekarang Ini:
Kufita 5: MKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
2021, SIM International et UEEB