Kufita 19
19
Inɛi Izirɛli ŋa à wa kɔkɔi iri kutai Sinai
1-2Si anyii nŋu, inɛi Izirɛli ŋau à nɛ hai Refidimu. Ajɔ sintei cukpa mɛɛtasia si anyii kufita nŋa hai ilɛi Ezibiti à to si gbaai Sinai. Tengi bɛi à buba kɔkɔi iri kutai Sinai. 3Ŋɔi Moizi í gũ iri kutau í bɔ Ilaaɔ̃ ku ko.
Nɔ Aɔ̃ Lafɛ̃ɛ í kpoo hai lelei antaii iri kutau í ni, ide iyi aa sɔ̃ tɔkui Zakɔbu inɛi Izirɛli ŋau wee. Sɔ̃ ŋa i ni, 4Aɔ̃ Lafɛ̃ɛ í ni, ì yɛ bɛi ǹ cea inɛi Ezibiti ŋau ŋa do yaase bɛi ǹ naaò ŋɛ wa ihɛ̃ kɔkɔi amu takam do awɔ gbugbãm nɔ ǹ so ŋɛ wa bɛi kungbã í ya so amaɛ ŋa. 5Nsɛi bii ì gbɔ idem do laakai nɔ ì waa jirima akabuum ŋa, iŋɛi aa jɛ titom. Andunya fei í jɛ titom, amma si inɛi andunya ŋa fei iŋɛi aa jɛ inɛm ŋa iyi ǹ cica n jilɛa aram. 6Amu takam nii ǹ jɛ ilaalu nŋɛ nɔ iŋɛ fei aa jɛ bɛi woo weem ŋa, nɔ aa jɛ dimi iyi à nya ikã ŋa. Ide ŋa iyi aa sɔ̃ inɛi Izirɛli ŋau mbɛ.
7Iyi Moizi í baa ŋɔi í tɔtɔɔ inɛ ngboi inɛi Izirɛli ŋau nɔ í sisi nŋa ide ŋau fei si bɛi Aɔ̃ Lafɛ̃ɛ í sɔ̃ɔu. 8Ŋɔi inɛ ŋau aŋa fei à ni, aa ka jirima woodai Aɔ̃ Lafɛ̃ɛu fei.
Nɔ Moizi í so idei inɛ ŋau má í bɔ ku sisia Aɔ̃ Lafɛ̃ɛ. 9Nɔ Aɔ̃ Lafɛ̃ɛ í sɔ̃ Moizi í ni, an naa bi tɛɛ si kudũi ijĩ nla nla ku ba inɛ ŋau a maa gbɔ bɛi ǹ wa n baɛ ide ku fɔ nɔ a ya maa naanɛɛ waati kãma fei.
Iyi Aɔ̃ Lafɛ̃ɛ í fɔ bɛɛbɛ í tã, ŋɔi Moizi í sisiaa idei inɛ ŋau.
Aɔ̃ Lafɛ̃ɛ í ba Moizi ide ku fɔ si antaii iri kutai Sinai
10Nɔ Aɔ̃ Lafɛ̃ɛ í sɔ̃ Moizi má í ni, koo bi inɛ ŋau nɔ i jɔ̀ a ce buki iyi á jɔ̀ a má nɔ a fɔ jĩnɛ nŋa ŋa nnyi do ala. 11Nɔ i sɔ̃ ŋa a wɛɛò sɔɔlu si ajɔ mɛɛtasiau, domi si ajɔ nŋu bɛ amu Aɔ̃ Lafɛ̃ɛ an kita wa si iri kutai Sinaiu si wajui inɛ ŋau fei. 12Nyaa inɛ ŋau kɔɔ i kaakoɛ, nɔ i sɔ̃ ŋa i ni a mu ara nŋa a maà gũ iri kutau nɔ a maà lu baa itĩɛ. Inɛ iyi í lu irii kutau fei lafɛ̃ɛ á kui. 13Bii amanɛi walakɔ bii mɛɛmu mɔi a kaa jɔ̀ɔ iyi a kù kpaa. Amma a kaa luu, aa kpaai do kuta walakɔ do afa. Amma waati iyi aa fã kuuu, waati bɛɛbɛ nŋu akãi inɛ gɔ ŋa aa yɔkɔ a gũ iri kutau.
14Ŋɔi Moizi í nyi í kita wa bi inɛ ŋau má. Nɔ í jɔ̀ à ce awala à má nɔ à fɔ jĩnɛ nŋa ŋa. 15Ŋɔi í sɔ̃ ŋa í ni, i wɛɛò sɔɔlui ajɔ mɛɛtasiau ŋa. I maà tɔtɔɔ sɛ̃ɛ do inaabo kãma ŋa.
16Iyi ajɔ mɛɛtasiau í to daakɔu ŋɔi ijĩ í wasi ku la nɔ wa ŋɔ nɔ kudũi ijĩ nla nlau í bii iri kutau. Ibai kuu wa dɔ̃ do gbugbã nɔ njo í mu inɛ ŋa iyi à wa bɛu fei jiida jiida. 17Ŋɔi Moizi í fitaò inɛ ŋau wa hai bi kuwa nŋau à bɔ Ilaaɔ̃ ku ko, nɔ à koo à leekĩ abɛi iri kutau.
18Ŋɔi cua í bii iri kutai Sinaiu fei domi Aɔ̃ Lafɛ̃ɛ í kita wa si aninii ina. Cuau í dedei bɛi cuai bi ku ko ina, nɔ iri kutau fei wa yayai do gbugbã. 19Ibai kuuu wa dɔ̃ do gbugbã wa kɔ̃ɔsi. Moizi wa fɔ ide nɔ Ilaaɔ̃ wa jɛaa hee lele.
20Bɛɛbɛi Aɔ̃ Lafɛ̃ɛ í kita wa si iri kutai Sinaiu nɔ í kpe Moizi ŋɔi Moizi í gũ antaii iri kutau. 21Nɔ Aɔ̃ Lafɛ̃ɛ í sɔ̃ɔ í ni, koo sɔ̃ inɛ ŋau i kɔnkɔn du ŋa i ni, a maà saasa a naa ku cɔm. Bii à nɔ à kɔ̀, inɛ nkpɔ nŋa á ku. 22Baa woo wee ŋau taka nŋa, aŋa iyi à nɛ dɔ̃ɔnɛi ku tɛkɛɛ sim wa, aŋa mɔ a ce awala ku ba n maà n kpa ŋa.
23Ŋɔi Moizi í jɛaa í ni, inɛ ŋau a kaa yɔkɔ a gũ antaii iri kutau wa, domi awɔ takaɛ ì fɔ ì ni n nyaa inɛ ŋau kɔɔ n kaakoò iri kutau ku ba a maà maai siɛ wa.
24Ŋɔi Aɔ̃ Lafɛ̃ɛ í sɔ̃ɔ í ni, sinda i nyi bi inɛ ŋau. Si anyiɛ nɔ i gũ wa má, awɔ do Arɔ̃ɔ. Amma woo wee ŋau do zamaau a maà saasa a naa bi tom ku ba n maà n na n kpa ŋa.
25Ŋɔi Moizi í nyi í kita wa má nɔ í naa í sɔ̃ zamaau ide ŋau.
Terpilih Sekarang Ini:
Kufita 19: MKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
2021, SIM International et UEEB