Kufita 16
16
Mana do wete ŋa
1Inɛi Izirɛli ŋau fei à nɛ hai Elimu, nɔ à to si gbaa iyi à ya kpe Sini, iyi í wa aninii Elimu do iri kutai Sinai si ajɔ maatũi cukpa minjisiau si anyii kufita nŋa hai ilɛi Ezibiti. 2Tengi bɛ si gbaau inɛi Izirɛli ŋau fei à wasi ku gbagba si Moizi do Arɔ̃ɔ. 3À ni, bii í jɛ Aɔ̃ Lafɛ̃ɛ í kpa wa ilɛi Ezibiti bɛ mɔ wo, iyi bɛ á daama, domi bɛ njɛ à ya ka ba iŋa ka ŋɔ, nɔ à ya ka jɛ ka yo. Amma wee iŋɛ ì gbã wa wa ŋai si gbaau ihɛ̃ i na i jɔ̀ awa fei ka ku do ari.
4Ŋɔi Aɔ̃ Lafɛ̃ɛ í sɔ̃ Moizi í ni, an jɔ̀ pɛ̃ɛ ku maa cuku wa hai lele. Iju iyi í má fei inɛ fei á ya koo maa ko wai zaka bɛi á too ajɔ akã, ku ba n cɔ laakai nŋa, nɔ n cɔ mà aa jirima woodam. 5Si ajɔ mɛɛfasia zaka bɛi à nɛ dɔ̃ɔnɛi ku ko wau, bii à na à tɛkɛɛ, bɛɛbɛ ikɔ minjii á ce.
6Ŋɔi Moizi do Arɔ̃ɔ à sɔ̃ inɛi Izirɛli ŋau fei à ni, aa mà ŋa iyi Aɔ̃ Lafɛ̃ɛi í nya ŋɛ wa hai ilɛi Ezibiti. Alɛi 7-8á na ŋɛ iŋa i ŋɔ ŋa, domi í gbɔ ì waa weeweea si nŋu ŋa. Nɔ ala daakɔ á na ŋɛ pɛ̃ɛ ŋa zaka bɛi á to ŋɛ nɔ aa yɛ amboeɛ ŋa. Yooi awa à jɛ hee ì maa gbagba si wa ŋa. Kù jɛ si awai aa gbagba si ŋa, si Aɔ̃ Lafɛ̃ɛi.
9Nɔ Moizi í sɔ̃ Arɔ̃ɔ í ni, sɔ̃ inɛi Izirɛli ŋau fei i ni a naa wa si wajui Aɔ̃ Lafɛ̃ɛ, domi í gbɔ kugbagba nŋa.
10Ŋɔi waati iyi Arɔ̃ɔ wa ba inɛi Izirɛli ŋau ide ku fɔ, à sinda à cɔ do ikpa gbaau nɔ à yɛ amboei Aɔ̃ Lafɛ̃ɛ í faata wa si kudũi ijĩu. 11Aɔ̃ Lafɛ̃ɛ í ba Moizi ide ku fɔ í ni, 12ǹ gbɔ kugbagbai inɛi Izirɛli ŋau. Sɔ̃ ŋa i ni, Aɔ̃ Lafɛ̃ɛ í ni, alɛi iŋai aa ŋɔ ŋa, nɔ ala daakɔ pɛ̃ɛi aa jɛ hee i yo ŋa. Nɔ aa mà ŋa iyi amui ǹ jɛ Aɔ̃ Lafɛ̃ɛ nŋɛ.
13Iyi alɛ í lɛ ŋɔi wete ŋa à to wa, à naa à bii inya bii à ce asɔu fei, nɔ iyi iju í má daakɔ ikpã í le í kaako inyau. 14Waati iyi ikpãu í wɔ, nɔ à yɛ mii fũfũ keeke gɔ ŋa iyi à yɛ bɛi ngboi mii ku gbɛ̃ si bantumai gbaau. 15Iyi inɛi Izirɛli ŋau à yɔɔ a kù màa nɔ à waa bee njɛ à waa ni, mii ihɛ̃. Ŋɔi Moizi í sɔ̃ ŋa í ni, pɛ̃ɛ iyi Aɔ̃ Lafɛ̃ɛ í na ŋɛ wau mbɛ, nŋui í jɛ ijɛ nŋɛ. 16Wooda iyi Aɔ̃ Lafɛ̃ɛ í na ŋɛ wee. Inɛ fei ku ko iyi á jɛ, irii inɛ akã fei tongoo akã zaka bɛi kukpɔi inɛi kpasɛ̃ɛ ŋa í to.
17Bɛɛbɛ mɔi inɛi Izirɛli ŋau à ce. Inɛ gɔ ŋa à ko í kpɔ, inɛ gɔ ŋa mɔ keeke. 18Si anyiɛ à koo à wãa, nɔ à ba wee inɛ iyi í ko í kpɔ kù re tongoo, inɛ mɔ iyi í ko keeke kù gaizia. Inɛ fei í koi zaka bɛi á mungau ku jɛ nŋa.
Wooda si idei mana
19Moizi í sɔ̃ ŋa í ni, inɛ gɔ ku maà jɔ̀ mbɔ hee daakɔ.
20Amma inɛ gɔ ŋa a kù jirima ideu nɔ à jɔ̀ mbɔɛ hee iju í má, nɔ kokoo ŋa à lɔ si à jɔ̀ í sãmi. Ŋɔi idɔi Moizi í kɔ̃ si inɛ ŋau. 21Daakɔ fei inɛ fei í ya koi zakai ijɛi ajɔ akãɛ. Nɔ iyi à gbe ilɛ bɛ ŋau bii inunu í na í gbãa à ya yɔi.
22Ajɔ mɛɛfasiau à ko ijɛui zaka bɛi à ya kou ikɔ minji, inɛ akã fei tongoo minji. Ŋɔi inɛ ngboi inɛi Izirɛli ŋau fei à koo à sisia Moizi. 23Nɔ Moizi í sɔ̃ ŋa í ni, bɛɛbɛi Aɔ̃ Lafɛ̃ɛ í fɔ. Ala ajɔi kusĩmii Aɔ̃ Lafɛ̃ɛi. I banda mii iyi ì nɛ ku banda ŋa, nɔ i tɛkɛ mii iyi ì nɛ ku tɛkɛ ŋa, nɔ i jɔ̀ kosĩaɛ hee daakɔ ŋa.
24Nɔ à jilɛ mbɔɛ hee iju í má si bɛi Moizi í fɔu, nɔ inɛ nŋu kù sãmi nɔ kokoo ŋa a kù lɔ si. 25Ŋɔi Moizi í ni, i jɔ́ɔ nnyi ŋa, domi nnyi ajɔi kusĩmii. Nnyi i kaa ba nkãma bɛ ŋa. 26Zakai ajɔ mɛɛfai aa ya ba ijɛu ŋa amma ajɔ mɛɛjesia iyi í jɛ ajɔi kusĩmiu i kaa ba ŋa.
27Amma do nŋu fei si ajɔ mɛɛjesiau inɛ gɔ ŋa à fita à bɔ ku ko má, amma a kù ba nkãma. 28Ŋɔi Aɔ̃ Lafɛ̃ɛ í sɔ̃ Moizi í ni, kù jɛ iŋɛ i kaa jirima woodam do kukɔsim ŋa ajɔ kãma ŋa? 29I cɔ ŋa, ǹ jilɛ nŋɛ ajɔi kusĩmii ku ba i sĩmi ŋa. Na ŋɔi í jɔ̀ si ajɔ mɛɛfasiau ǹ ya n na ŋɛ ijɛi ajɔ minji. Ajɔ mɛɛjesiau inɛ fei ku buba ideɛ, inɛ kãma ku maà fita hai bii í wa.
30Hai waati bɛɛbɛi inɛ ŋau à ya sĩmi si ajɔ mɛɛjesiau.
31Ŋɔi inɛi Izirɛli ŋau à sɔ ijɛu mana#16:31 mana Bii ì gbɔ iriu, í ya jɔ bɛi à waa nii, mii ihɛ̃, do feei Ebɛɛ.. Í yɛ bɛi ngboi ama jĩi gɔ iyi à ya kpe kɔriandi, nɔ í yɛ fũfũ. Kudɔ̃ɛ í yɛ bɛi kaa iyi à ce do nyikɔ̃.
32Ŋɔi Moizi í ni má, wooda iyi Aɔ̃ Lafɛ̃ɛ í jilɛ si gãmɛi manau wee. Aɔ̃ Lafɛ̃ɛ í ni i wã manau tongoo akã i jilɔɔ ŋa na tɔku nŋɛ ŋa iyi aa na a dede. Do yaase bɛɛbɛi aa yɛ ijɛ iyi Aɔ̃ Lafɛ̃ɛ í wo ŋɛ do si gbaa si waati iyi í nya ŋɛ wa hai ilɛi Ezibiti.
33Ŋɔi Moizi í sɔ̃ Arɔ̃ɔ í ni, so ama caka gɔ i dasi mana tongoo akã, nɔ i jilɔɔ si wajui Aɔ̃ Lafɛ̃ɛ ku ba tɔku nŋɛ ŋa a na a yɔɔ.
34Nɔ Arɔ̃ɔ í ce bɛi Aɔ̃ Lafɛ̃ɛ í fɔu, í koo í jilɛ ama cakau si wajui kuta ŋa bii Aɔ̃ Lafɛ̃ɛ í kɔ akabuuɛ ku ba a jilɛa tɔku nŋa ŋau.
35Inɛi Izirɛli ŋau à jɛ manau zakai adɔ̃ ciiji hee à koo à to si ilɛ bii inɛ ŋa à wa. À waa jɔ́ɔi hee à koo à to bi ku koi ilɛi Kanaã.
36Tongoo si bii à ya ko manaui à ya kpe omɛɛ. Nɔ omɛɛ mɛɛwai à mungaò gũa gɔ iyi à ya kpe efa.
Terpilih Sekarang Ini:
Kufita 16: MKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
2021, SIM International et UEEB