Kufita 14
14
Faraɔ̃ wa da hãmɛi inɛi Izirɛli ŋa
1Aɔ̃ Lafɛ̃ɛ í ba Moizi ide ku fɔ í ni, 2sɔ̃ inɛi Izirɛli ŋa a sinda a na a buba kɔkɔi Pihahirɔti, ilu iyi í wa si aninii Migidɔli do tenku, wajui Baali-Sefɔ̃ɔ. Tengi bɛi aa maa wa ŋa, kɔkɔi tenkuu. 3Faraɔ̃ á tamaa ì nyɔ ŋai si ilɛu, i kaa yɔkɔ i fita hai si gbaau ihɛ̃ ŋa. 4Amu Aɔ̃ Lafɛ̃ɛ an jɔ̀ idɔi Faraɔ̃ ku le nɔ ku maa da hãmɛ nŋɛ wa. Waati bɛɛbɛ an nyisi amboem si Faraɔ̃ do woo ce igũɛ ŋa fei, nɔ inɛi Ezibiti ŋau aa mà iyi amui ǹ jɛ Aɔ̃ Lafɛ̃ɛ.
Bɛɛbɛ mɔi inɛi Izirɛli ŋau à ce.
5Iyi à koo à sɔ̃ ilaalui Ezibiti à ni inɛi Izirɛli ŋa à waa sa, ŋɔi lasabui Faraɔ̃ do ti akaweɛ ŋau í kpaasi si gãmɛi inɛi Izirɛli ŋau. À waa ni, bɛirei à ce à jɔ̀ inɛi Izirɛli ŋau à jɔ̀ icɛ nŋa à waa nɛ. 6Ŋɔi Faraɔ̃ í dĩa acĩɛ ŋa sarɛtii igũ nɔ í da hãmɛ nŋa, nŋu do woo ce igũɛ ŋa. 7Í kooi do sarɛtii igũ cĩɔ cĩɔ mɛɛfa (600) iyi í re do gbugbã, nɔ kù jɛ andi nŋu bɛ, í ko sarɛtii igũi ilɛi Ezibiti fei, nɔ si inɔi sarɛti ŋau fei woo ce igũ ŋa à wa sii. 8Aɔ̃ Lafɛ̃ɛ í jɔ̀ idɔi Faraɔ̃ ilaalui Ezibitiu í le nɔ wa da hãmɛi inɛi Izirɛli ŋau waati iyi à fita hai si ilɛu à waa nɛ do wɔɔkɔ. 9Soogei Ezibiti ŋau do acĩ nŋa ŋau do sarɛtii igũ ŋau do masa ŋau fei à waa da hãmɛi inɛi Izirɛli ŋau, nɔ à koo à ba ŋa kɔkɔi Pihahirɔti bɛ, tengii Baali-Sefɔ̃ɔ, bii à waa buba kɔkɔi tenkuu.
10Iyi inɛi Izirɛli ŋau à yɛ inɛi Ezibiti ŋa à dasi kpãa à waa da hãmɛi aŋa wa, nɔ à yɛ iyi Faraɔ̃ í maai si aŋa wa tã, ŋɔi zigi nŋa í da ntɔ ntɔ. Nɔ à wasi ku dɔ̃ si Aɔ̃ Lafɛ̃ɛ anu hee lele. 11Nɔ à sɔ̃ Moizi à ni, balɛ ŋa a kù kpɔ Ezibiti bɛi? Na mii í ce ì gbã wa ì jɔ̀ à waa na ku ku si gbaau ihɛ̃. Bɛirei í ce ì jɔ̀ à fita wa hai ilɛi Ezibiti. 12À sɔ̃ɛ sãa sãa hai waati iyi à wa Ezibiti bɛ à ni, jɔ̀ wa sɛ̃ɛ ka cea inɛi Ezibiti ŋa icɛ. Nŋu bɛ á tia do iyi aa ka naa ka ku si gbaau ihɛ̃. 13Ŋɔi Moizi í jɛ nŋa í ni, i maà ce njo ŋa. I leekĩ dim dim ŋa aa yɛ bɛi Aɔ̃ Lafɛ̃ɛ á na ku faaba ŋɛ nnyi, domi inɛi Ezibiti ŋau bɛ iyi ì waa yɛ nnyi ŋa, i kaa yɛ ŋa má ŋa ajɔ kãma. 14Aɔ̃ Lafɛ̃ɛi á na ku ce igũ si agbɛ nŋɛ. Iŋɛ i leekĩ sɛ̃ɛ ŋa.
Kukuai tenku
15Ŋɔi Aɔ̃ Lafɛ̃ɛ í bee Moizi í ni, na mii í ce ì waa dɔ̃ sim anu ŋa. Sɔ̃ inɛi Izirɛli ŋau i ni a dede a nɛ. 16Awɔ takaɛ so goloɛ i wuu lele nɔ i tɛ awɔɛ si tenkuu ku ba inyiu ku kpɛ̃ si anini nɔ inɛi Izirɛli ŋa a kua tenkuu si ilɛ ngbɛ. 17Nɔ an jɔ̀ idɔi inɛi Ezibiti ŋau ku le ku ba aŋa mɔ a lɔ a too fiti nŋɛ wa. Nɔ an nyisi amboem si Faraɔ̃ do woo ce igũɛ ŋa do sarɛtii igũɛ ŋa do masaɛ ŋau fei. 18Nɔ inɛi Ezibiti ŋa aa mà iyi amu Aɔ̃ Lafɛ̃ɛi si waati iyi an nyisi amboem do yaase bɛɛbɛ.
19Ŋɔi amalekai Ilaaɔ̃ iyi í tako wa cuaa inɛi Izirɛli ŋau í koo í leekĩ do anyi nŋa. Nɔ kudũi ijĩ iyi í tako wa cua nŋau í koo í wa do anyi nŋa. 20Í koo í wa si afei inɛi Izirɛli ŋa do inɛi Ezibiti ŋau. Kudũi ijĩu í ce ilu kuku do ikpa akã, ikpa akã mɔ í ce inya kumá. Si bɛɛbɛ inɛi ŋau, kãma nŋa ci ya maai si njɛ idũ.
21Ŋɔi Moizi í tɛ awɔɛ si tenkuu. Nɔ Aɔ̃ Lafɛ̃ɛ í jɔ̀ fufu nla gɔ í ce wa hai nunui daakɔ idũu fei ku ba inyiu ku kpɛ̃ nɔ ilɛu ku gbɛ. Iyi inyiu í kpɛ̃ 22ŋɔi inɛi Izirɛli ŋau à kua tenkuu si ilɛ ngbɛ. Do cingaa cingaa fei inyiu í cei bɛi idĩ. 23Ŋɔi inɛi Ezibiti ŋau à lɔ à waa too ŋa. Acĩi Faraɔ̃ ŋa do sarɛtii igũɛ ŋa do masaɛ ŋa, aŋa fei à lɔ si aninii inyii tenkuu à waa too fiti nŋa. 24Daadaakɔ Aɔ̃ Lafɛ̃ɛ í cɔ inɛi Ezibiti ŋau hai si kudũi ijĩu do hai si inau wa nɔ í jɔ̀ isɛɛnɛ nŋau kù nɛ yaase má. 25Í jɔ̀ kutɛi sarɛtii igũ nŋa ŋau wa mile nɔ kù waa nɛ dee dee má. Ŋɔi inɛi Ezibiti ŋau à waa ni, ka saa inɛi Izirɛli ŋau ku jĩ, domi Aɔ̃ Lafɛ̃ɛi wa ce igũ do awa si agbɛ nŋa.
26Ŋɔi Aɔ̃ Lafɛ̃ɛ í sɔ̃ Moizi í ni, tɛ awɔɛ si inyii tenkuu ku ba inyiu ku baa si inɛi Ezibiti ŋau do si sarɛtii igũ nŋa ŋa do si masa nŋa ŋau.
27Ŋɔi Moizi í ce bɛɛbɛ. Nɔ daadaakɔ inyii tenkuu wa baa si agbɛɛ. Ŋɔi inɛi Ezibiti ŋau à waa bi a sa a fita hai inɔ inyiu, amma Aɔ̃ Lafɛ̃ɛ í tale ŋa si inyiu. 28Iyi inyiu í baa si agbɛɛ ŋɔi í bii sarɛtii igũ ŋau do masa ŋau do sooge woo ja igũi Faraɔ̃ ŋau fei, aŋa iyi à lɔ inɔ tenkuu si anyii kulɔi inɛi Izirɛli ŋau, aŋa fei à ce nfe. Baa inɛ akã kù fita si. 29Amma waati iyi inɛi Izirɛli ŋa à tako à lɔ, si ilɛ ngbɛi à nɛ. Hai do awɔ njɛ do awɔ canga nŋa ŋa fei inyiu í cei bɛi idĩ.
30Ajɔ nŋu bɛ Aɔ̃ Lafɛ̃ɛ í faaba inɛi Izirɛli ŋa hai si awɔi inɛi Ezibiti ŋa nɔ à yɛ iku nŋa ŋa itĩi tenkuu. 31Nɔ inɛi Izirɛli ŋa à yɛ yaase bɛi Aɔ̃ Lafɛ̃ɛ í nyaò aŋa hai si awɔi inɛi Ezibiti ŋau do gbugbãɛ. Nŋui í jɔ̀ à waa jirimaɛ nɔ à dasiɛ naanɛ, nŋu do Moizi woo ce icɛɛ.
Terpilih Sekarang Ini:
Kufita 14: MKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
2021, SIM International et UEEB