Kufita 11
11
Baaui wahalai ankãanyi
1Ŋɔi Aɔ̃ Lafɛ̃ɛ í sɔ̃ Moizi í ni, an jɔ̀ wahalai ankãanyi ku naa si Faraɔ̃ do si inɛi Ezibiti ŋa. Si anyii nŋu, á jɔ̀ ŋɛ i nɛ ŋa. Á lele iŋɛ fei mɔm nii hai ihɛ̃. 2Na nŋu, koo sɔ̃ inɛi Izirɛli ŋau i ni inɛmɔkɔ do inaabo fei ku tɔɔ mii ndii wura do isɔ fũfũ bi kpaasiɛ.
3Aɔ̃ Lafɛ̃ɛ í jɔ̀ inɛi Ezibiti ŋau à cea inɛi Izirɛli ŋau didɔ̃. Akawei Faraɔ̃ ŋau do inɛi Ezibiti ŋau fei à mà bɛɛrɛi Moizi takaɛ ntɔ ntɔ.
4[Waati iyi Moizi í wa bi Faraɔ̃], í sɔ̃ɔ í ni, ide iyi Aɔ̃ Lafɛ̃ɛ í fɔ wee. Í ni, zakai idũ laja nŋu á naa ku dabii si ilɛi Ezibiti fei. 5Nɔ inɛ ŋa iyi à bí sinte si ilɛu fei aa kui, hai ama yemmai awɔ takaɛ, awɔ ilaalu, do ti inaabo woo ce icɛɛ iyi í ya maa lɔlɔu, hee ku koo si mɛɛmu nŋɛ ŋa fei. 6Anu ku dɔ̃ nla nlai á wa si ilɛu fei iyi dimiɛ kù ce titã nɔ dimiɛ kaa ce má. 7Amma a kaa gbɔ iba kãma bi inɛi Izirɛli ŋa, hai amanɛ ŋa hee ku koo si mɛɛmu ŋa. Baa aja kaa gbongboo. Si bɛɛbɛ aa mà ŋa iyi nŋu Aɔ̃ Lafɛ̃ɛ í nya inɛi Izirɛli ŋa ikã hai si inɔi inɛi Ezibiti ŋa. 8Moizi í ni má, waati bɛɛbɛ, akaweɛ ŋau fei aa naa a sɛɛbata si wajum a maa ni, koo nɛ, awɔ do inɛɛ ŋau fei. Bɛ gbakã an nɛi.
Iyi Moizi í fɔ bɛɛbɛ í tã, ŋɔi í fita hai bi Faraɔ̃ do idɔɔkɔ̃ nla nla.
9Nɔ Aɔ̃ Lafɛ̃ɛ í sɔ̃ Moizi má í ni, Faraɔ̃ kaa gbɔ ideɛ titã. Bɛɛbɛi an jɔ̀ ku ce ku ba maamaakem ŋa ku kpɔ ku maa kɔ̃ɔsi si ilɛi Ezibiti.
10Wee Moizi do Arɔ̃ɔ à ce maamaake ikã ikã nkpɔ nkpɔ tã si wajui Faraɔ̃, amma Aɔ̃ Lafɛ̃ɛ í jɔ̀ í lele idɔɛ nɔ í kɔ̀ ku jɔ̀ inɛi Izirɛli ŋau a nɛ hai si ilɛɛ.
Terpilih Sekarang Ini:
Kufita 11: MKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
2021, SIM International et UEEB