KECHENG 7
7
Langthepi
1Anke Noah aphan Hemphu pulo, “Telong along nang lapen nanghem asor an damnon, athema laso a-ove Ne ingno nang dhoromi pet abang-lo. 2Nanglong chor throksi kangthir-et api cheponnon, alo lapen api, lapen kangthirthe api echor, alo lapen api, 3lapen kangjar avo chor throksi, alo lapen api, latum ajat pirthe athak kepadoji aphan. 4Athema ni throksi aphi Ne pirthe athak jophlikep niphlikep arve pajangji lapen Ne kepinchong achethe kedo-an asontin pirthe athak pen Ne pavedetji.” 5Lapen Noah aphan Hemphu hukum kepi an alangli klempi-et-lo.
6Pirthe athak langthepi kevang ahut Noah arta ningkan pharo throk. 7Noah lapen asopomar lapen apiso lapen amunpimar atum pen pen alangli lang-heihei alangthepi pen kejokji aphan telong arlo lutdamlo.#Mat 24.38-39; Luk 17.27 8Kangthir api lapen kangthirthe api, lapen vo atum, lapen longle athak keklim api an, 9jonni jonni alo lapen api-heihei Noah pen pen Arnam Noah aphan hukum kepitang ateng pen telong arlo lutdamlo. 10Lapen ni throksi aphi langhei-hei alangthepi pirthe athak vang-lo.
11Noah arta ningkan pharothrok ahut hini achiklo, krethroksi arni, halaso arni longle arlo kedo-an lang-amek ingbob et-lo, lapen sining-heihei anghap chingpudang-lo.#2 Pit 3.6 12Lapen pirthe athak jophlikep niphlikep arve jang-lo. 13Halaso arni amat Noah lapen asopo atum, Shem Ham lapen Japheth, lapen Noah apiso, lapen alangli sopo atum apiso bangkethom halatum pen pen telong arlo lutdamlo, 14latum lapen ajattin api, kepangreng api halatum ajattin, lapen longle athak keklim api ajattin, avo ajattin. 15Latum Noah pen pen telong arlo lutdamlo, echor-echor achethe kevangphun api kedo-an. 16Lapen latum api-alo lutdamlo, ok api an, alangliphan Arnam hukum kepi ateng pen lutdamlo. Anke Noah chethapdet aphi Hemphu inghap ingkirlo.
17Pirthe athak langthepi jophlikep niphlikep dobomlang; lapen lang thebomlang, lapen telong panglang-lo, lapen la pirthe athak inglangpong-lo. 18Langhei-hei dothip lo lapen pirthe athak jasemetsi thelo; lapen telong lang-heihei athak inglangpong-lo. 19Lapen lang-heihei pirthe athak lapu-an thelo, sining aber kedo anglongpi-heihei kangtui an ta pip-et-lo; 20inglongpi-heihei athak anta lang inglum-et-lo, lahei aphan ingrup 15 apar inglum lo. 21Lapen pirthe athak chethe kedo api an thi-et-lo, vo, chainong, pi atum, pirthe athak keklim api anta, lapen monit kedo an; 22kekrengtai longle athak chethekevang api an thi-et-lo. 23Pirthe athak kereng-et api an monit, marat api lapen vo kedo-anta Hemphu pathi-et-lo. Ahin kebi ke Noah lapen alanglilong telong along kedo atum ansi reng-longchot-lo. 24Lang ni 150 an sanserek-lo.
सध्या निवडलेले:
KECHENG 7: KARBIBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Karbi Holy Bible © Bible Society of India, 2010.
Used by permission. All rights reserved worldwide.