KECHENG 12
12
Abram Aphan Arnam Kepha
1Abram aphan Hemphu pulo, “Nangdet, nangdon-nangrap, lapen nangpo ahem che-onon lapen Ne nangphan nang-kepaklangji adet-le damnon.#Akam 7.2-3; Ibr 11.8 2Nangphan Ne ongdung nangso-nangsu nangpiji, lapen latum isi thedung akhei#Ne nangphan ahirjume nangkepi asonthot kedo-an akhei atumta ahirjume aphan nangphan hangpo plangpo. Ne nangphan pahirme po lapen nangmen pachethang phlup po, anke nang isi ahirjume plangpo.
3Nangphan kepahirjume aling abangphan Ne pahirjume ji,
Bonta nangphan kepahirjuno aling abang aphan Ne pahirjunoji.
Lapen nang pen ajok Ne kadokave akhei aphan pahirmepo.”#Gal 3.8
4Abram arta ningkan 75 ahut, alangli Haran pen barsi, Hemphu alangliphan kepaklemtoi ateng, Lot ta alanglilong dunlo. 5Abram apiso Sarai, lapen akorte asopo Lot, lapen akhi kedo-an lapen Haran along kelong aban atum an ta la cheponlo, lapen Kanaan adet aphan latum barlo.
Latum Kanaan nanglesi, 6Moreh athengpi kangthir, Shekem along kangthir adim nangleletik Abram det adang bithe damlo. (Halaso ahut Kanaan aso atum det arlo dobomlang.) 7Abram aphan Hemphu cheklang si alangphan pulo, “Nangso-nangsu aphan Ne kepiji alongle la helo.” Anke Abram aphan kecheklang a-Hemphu aphan alangli hadak isi adovan buipilo.#Akam 7.5; Gal 3.16 8Laso aphi, alangli nitur anglong akeng-ri Bethel arongsopi anihang anat alangli damlo lapen hadak nichi ke Bethel lapen nihang ke Ai angbong si alangli mukam chekimlo. Hadak ta alangli isi adovan buisi Hemphu aphan archolo. 9Anke alangli adim pen adim dambomsi Kanaan angbong anitur anat lelo.
Ijip Along Abram
10Bonta Kanaan along akhim thurlo, lapen lapu-an hingnolo Abram ha Ijip anitur anat malomso kedodamji aphan damlo. 11Alangli Ijip ahoi kehatji dokdok ahut, alangli piso Sarai aphan pulo, “Nang ke inut kelangmepik a-arloso lo. 12Ijip aso atum nangphan nangthek-long lote nang nepisolo pu latum mathapo, lapen latum nephan pathilotsi lapen nangphan ke nang-pareng-longpo. 13Halatum aphan thannon nang ke ne ingjirpilo; anke nangpen apot latum nephan pareng-longpo lapen nelang pamepo.”#Kech 20.2; 26.7 14Alangli Ijip ahoi hat det aphi, alangli piso arje langmepik la Ijip aso atum thek-long-lo. 15Ajehak kangdai a-saikhi atum bangpi aphan thek-longsi, bangpi arje kelangme alam recho aphan thanlo, lasi bangpi aphan rechohem pondet-lo. 16Bangpi pen apot Abram aphan recho kelang pamepik lo lapen alangli phan biresak api ahur pilo, lapen bi, chainong, gadha, ban atum lapen ka-ut ta pilo.
17Bonta Sarai aphan recho pondet-lo, Hemphu pherememe akeso la aphuthak, lapen rechohem arat atum aphuthak pavang-lo. 18Anke Abram aphan recho pahang-lo lapen arjulo, “Nangli neliphan kopi si keklempor-loma? Kopi athesi bangpi ke nanglipiso lo pu nekethanthe det-loma? 19Bangpi ke nang-ingjir lo pu kopisi nephan nekethan ma, pupete ne en-e detji apot-lo? La nangpisolo, bangpi aphan pon ra damnon!” 20Recho alangli monit atum aphan hukum pilo, Abram lapen apiso aphan lapen alangli kechepahemphu amar asontin ta det pen ingtan toijuilo.
सध्या निवडलेले:
KECHENG 12: KARBIBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Karbi Holy Bible © Bible Society of India, 2010.
Used by permission. All rights reserved worldwide.