Luk 22

U korupakö tegi kato hamate menai e Iesu

(Matiu 26:1-5,14-16, Mak 14:1-2,10-11, Jon 11:45-53)

1A pöata e susuku hakapa tara Kannouna tara Beret te möa tu Is, ti ngö hasei u Paska. 2Ba u pris pan nu tson hihatuts tara Lo e torohanan sake ner ta maroro tegi kato hamate momous menaien e Iesu. Taraha? Nori i matoutir u katuun.

3Be Satan e seina tere Judas Iskariot, a töa tara maloto na huol a katunun tsitsilo tere Iesu. 4Be Judas ena ranga gono merena u pris pan na u katuun pan turu tson kahete na tara Luman Lotu Pan, tega mar hala menaien e Iesu i taren. 5Ba nori e sasaalar me kitser u raranga tegi hala menaien ta moni. 6Be Judas e haniga nena a ka teka me tanian sake nena ta maroro tega hala hamous menaien e Iesu i taren.

U Herokona tara Kannouna turu Paska

(Matiu 26:17-25, Mak 14:12-21, Jon 13:21-30)

7Tara pöata tara Kannouna tara Beret te möa ta Is, u lan tegi atung hamate merai u tunan sipsipina turu Paska e butu hakapa. 8Be Iesu e tula mera nei ere Pita mere Jon u raranga teka, “La mula ba limiou tena hamatsköe miou a manka, bara tena noue rou a kannouna turu Paska.” 9Ba nori e rangate ren, “Alö e ngilem ime tegona herokeia lam a kannou teka?” 10Ba nonei e poeiena, “A töa tson te söate nou a töa tabeli ramun e hitupali gono mera nou limiou te butu moa limiou iahana taun. Ba limiou te kukutie moien batena tasu moa tara luma te la uanouen. 11Ba limiou tena poe mou tara katuun terena luma, ‘A Tson Hihatuts e poe nama, Ime te kana a makum temi nou gono mera goua lia u katunun tsitsilo i tar a kannouna turu Paska?’ 12Ba nonei te haröto ranoui limiou a makum pan iahana luma iasa te ka hakapa mei u tebol na man gumgum. Nonei tara makum teka tena heroke moa limiou a mamanaka tara kannou.” 13Ba nori e lar mena sabier a mamanaka temar ranga mera leien e Iesu, me heroko taleier a kannouna turu Paska.

A Komunio Tutuun

(Matiu 26:26-30, Mak 14:22-26, 1 Korin 11:23-25)

14A pöata e butu hakapa be Iesu nu aposol e gum ria turu tebol. 15Ba nonei e poeiena i taren, “Alia e ngil koruegu tego nou gono merai limiou a kannouna turu Paska teka i mamina tegona sagoheia lia a kamits! 16Taraha? Alia e ranga mera goulimiou, alia ema antunan nou lele gouien romana e antunana tara pöata te butu hamanana a manka te haharuei nena a kannou teka tara Nipepeito tere Sunahan.” 17Be Iesu e luena a kap uain me haniga uana tere Sunahan me poeiena, “Lueiam a kap teka ba limiou a man tötöa te ua mia i tanen. 18Taraha? Alia e ranga mera goulimiou, alia ema ua lele gou ii u uain e antunana tara pöata te la nama romana a Nipepeito tere Sunahan.” 19Be Iesu e lu hasena a beret me haniga uana tere Sunahan me posepose nen. Ba nonei e hala ranen me poeiena, “Nonei u tuenrei i tar teka tena mate sil ranou limiou. Alimiou ena markato has uamou teka bate hakats pouts namou lia.” 20Ba i murina ti nou hakapaien, be Iesu e luena a kap uain me markato has mena neien iesana me poeiena, “A kap teka te takis bera noulimiou e haharuei nena u ranga hamana u tsimus tena kitse gou ii lia u rahatsing i tar.

21“Kaba taraiam, a katuun te hala nanoua lia turu pakö i tar e nou gono has menou lia tara kannou teka! 22E manana, alia tu butun Katunuma egona mate, temar hopö kap menai e Sunahan alia. Kaba a nomi pan e butu noua nonei tara katuun tena hala nanoua lia turu pakö!” 23Ba u katunun tsitsilo e hiarangrangata naier esi koru ta töa i gusuren te katoe nou a ka teka.

Esi te tson mammam nou?

24Ba u katunun tsitsilo e hialaalater esi tega mammamia i taren. 25Be Iesu e poeiena i taren, “U king tara man han i puta e roron pile hakarapoto koru raier u katuun i taren, na u katuun pan e ngil beri a peisaren a solo ‘A Tsunono Pan a Niga.’ 26Kaba a markato teka ema tatei ka neia i gusumilimiou. A katuun i tamilimiou te panina ega kato here nai a peisanen a katuun papala, na tsunono i tamilimiou e tatei here nei a katunun kui. 27Esi te panina, a katuun te gumuna bate nouna, tsi a katuun te sösöatena a kannou? A katuun te gumuna, nonei te panina. Kaba lia e ka gia i gusumilimiou e heregi a katunun sösöata kannou. 28Alimiou u ka gono memoulia tara man pöata ti torohaneia lia u katuun. 29Ba lia te hala ragou ii limiou a nitsunono tego king uaiam limiou, temar hala has menai lia e Tamar a nitsunono tego king uu lia. 30Alimiou ena nou mou nena ua gono memou lia tara kannou tara Nipepeito i tar, ba limiou tena gum mia romana tara man gumgum a man göagono turu king, ba limiou te tsonun onuna moua romana tara maloto na huol a hun katunura i Israel.”

E Iesu e hatei mamin tega holis uu e Pita

(Matiu 26:31-35, Mak 14:27-31, Jon 13:36-38)

31Be Iesu e poeiena tere Pita, “Saimon, Saimon, hengo! E Satan e rangata hatagala sil tega torohana meraien limiou hoboto, be Sunahan e hanigana. A nitorohana tere Satan teka e here nei a katuun te lu katena a kannou a niga na bita. 32Kaba lia u singo hakapa sileiou lö, o Saimon, tegoma hapolasa menai lö a nihamana i tamölö. Ba tara pöata te hakopis pouts muma lö romana i tar, ba lö te hatagala rem u toulamölö.” 33Be Pita e poeiena, “O Tsunono, alia e hanein la gono megou lö tara karabus na tou mate has!” 34Kaba e Iesu e ranga me poeiena, “Alia e ranga megou lö, o Pita, i bong teka a keriou ema kekeretskö noa noi ba lö te holis namou lia tara topisa a pöata.”

A pous moni na pora na u kilatan hiatatung

35Be Iesu e poeiena i taren, “Tara pöata tu tula ra lia limiou, ba limiou ema la memule ta pous moni na ta pora na tu sendol, alimiou u makmakum ba has naiam ta ka?” Ba nori e ranga palise ren me poeier. “E möa.” 36Be Iesu e poeiena, “Kaba esi te ka mena a pous moni tsi a pora ega lueien. Na esi te möana tu kilatan hiatatung ega haholin u hasobö pan i tanen bate holena tu töa. 37Taraha? Alia e ranga mera gilimiou a ka teka: u raranga turu Buku u Göagono ega butu hamana te poeiena, ‘Nonei i ngöe ii a katuun a omi.’ Nonei e ranga nanou lia, na u raranga ti koloto sile ii lia ega butu hamana.” 38Ba u katunun tsitsilo e poeier, “Tsunono, u huol u kilatan hiatatung teka.” Ba nonei e poeiena i taren, “Hanöa iam!”

E Iesu e singo uu tere Sunahan

(Matiu 26:36-46, Mak 14:32-42)

39Be Iesu nu katunun tsitsilo e laba ner a makum iasa me la uaier turu Pokus tara Ruein Olip ti roron markato uaien. 40Pöata ti tukuien tara makum teka, ba nonei e poeiena i taren, “Singo uaiam tere Sunahan. U hiamus e namots tagala saluhe bala rariou limiou.” 41-42Ba nonei e gamon laba ranen, antunaia te lapo menari a hatu, me hatukununa me singona, “O Tamar, te ngil mia lö, ba lö te hatongo kap ba namoi lia a kamits teka te katsin butuna i tar. Kaba lö goma kato uai turu ngil i tar. Alö go markato uu turu ngil i tamölö.” 43-44Ba töa angelona i Kolö e butuna i tanen me hatagale nen. Taraha? E Iesu e sagohi a nitaatagi pan koru. Ba nonei e singo hatagala koru lenina. Ba u sioung i tanen e butu here nei u rahatsing me rus uana i puta. 45I murinen ba nonei e takeina me la pouts uana turu katunun tsitsilo i tanen mena sabe ranen ba nori te sohor. Taraha? Nori i mate koru mei a nitaatagi pan. 46Ba nonei e poeiena i taren, “Aha te soho memi limiou? Takei iam bate singo uamiou tere Sunahan. U hiamus e namots tagala saluhe rariou limiou.”

E Iesu i pilein

(Matiu 26:47-56, Mak 14:43-50, Jon 18:3-11)

47E Iesu e ranga noa has bu katuun te tukur. E Judas, a töa tara maloto na huol a katunun tsitsilo i tanen, te peigi ramen. Ba nonei e la uanama tere Iesu tegomi mutsi menaien abuabunen. 48Be Iesu e poeiena, “Judas, alö e haröto namia lia turu pakö i tar te mutsi mena milö alia?”

49Pöata ti tareia u katunun tsitsilo a ka te butu hamanasa, ba nori e poeier, “O Tsunono, alö e ngilem alam go atung raien u kilata?” 50Ba töa i taren e ngats ba nena u talinga tara pal matou tara katunun kui turu pris pan. 51Kaba e Iesu e poe, “E antunana!” Ba nonei e sebeleiena a katuun me kato haniga poutsena a talinganen.

52Be Iesu e poeiena turu pris pan na u katuun pan turu tson taratara kap tara Luman Lotu Pan na u tsunono ti la silema tegimi lu menaien, “Aha te la sil memu mei limiou a man kilatan hiatatung na man baru batemi pile kap here nami lia a kopkop? 53Alia u ka gono meraiou limiou turu mamana u lan iahana Luman Lotu Pan, kaba limiou ima pile kap nami lia. Kaba a pöata i tamilimiou teka, a nitagalana turu kuhil.”

E Pita e holisin tega atei sil menaien e Iesu

(Matiu 26:57-58,69-75, Mak 14:53-54,66-72, Jon 18:12-18,25-27)

54Ba nori e pile kap naier e Iesu me lu mena rien i luma tara tsunono pan turu pris. E Pita e kukutema, kaba e lehana ba raien. 55U tula i haatseia i gusuna makum i pal matana luma, be Pita e hasohalana turu katuun ti gum hahisi u tula. 56Tara pöata te tareia a töa taholun kui e Pita te gum uaien i rehina u tula, ba nonei e tara hamatskö uana tere Pita me poeiena, “A katuun teka e ka gono has mei e Iesu!” 57Be Pita e holisina me poeiena, “Alia ema atei sile gien!” 58Ema lehanai, ba tana katuun e tare nen me poeiena tere Pita, “Alö has a töa i taren!” Be Pita e ranga palisina, “Alia u möa!” 59Ba i murina töa aua, ba tana katuun e ranga hatagala lel nena e Pita, “U mana koru a katuun teka e ka gono has mei e Iesu. Nonei has a toun Galili!” 60Be Pita e ranga palisina, “Alia ema atei silegi a ka te ranga nemölö!”

Tara pöata noa has te rangaia e Pita, ba keriou a tson te kekeretsköna. 61Ba Tsunono e habiritsina me tara hamatskö uana tere Pita, be Pita e hakats sabe nena u ranga tara Tsunono te ranga mam naien, “I bong teka a keriou ema kekeretskö noa noi balö te holis namou lia tara topisa pöata.” 62Be Pita e lakasana me na tabe hataatagi koruna.

Nori i hahakosiin e Iesu me muke ren

(Matiu 26:67-68, Mak 14:65)

63-64Ba u katuun ti tara kapiin e Iesu e hahakos naren. Ba nori e kitser a matanen me muke ren me rangate ren, “Alö a propet? Bara, esi te muke lalou lö?” 65Ba nori e katoeier u mamana u ranga u omi i tanen.

E Iesu i hakeia turu Kout Pan

(Matiu 26:59-66, Mak 14:55-64, Jon 18:19-24)

66Tara bongbong ba u tsunono turu Jiu na u pris pan nu tson hihatuts tara Lo e gono hobotor, be Iesu e lu menari turu hagum i taren. 67Ba nori e poeier i tanen, “Hatei ramoulam, alö e Mesaia?” Ba nonei e ranga palisina, “Sanena alia go ranga meraiou limiou, ba limiou tema hamane mi lia. 68Na sanena alia go rangata raiou limiou tu töa tu harangata, ba limiou tema palise mi lia. 69Kaba i murina a pöata teka, alia tu butun Katunuma ena gum gia romana tara pal matou tere Sunahan te Tagala Soköna!” 70Ba nori hoboto e rangatar, “Alö banei a Pien Tson tere Sunahan?” Ba nonei e ranga palis ranen, “Alimiou peisa has te ranga miou.” 71Ba nori e poeier, “Ara ema ngil lele rei ta katuun tega sakeien tu ranga! Ara e hengo hakape lila te ranga homi ua lalen.”

सध्या निवडलेले:

Luk 22: HLA 2020

ठळक

सामायिक करा

कॉपी करा