Màtíyò 11
11
Jâŋ tómsoó nɨ̀fuùb noò yɨ́ Yésùù
(Góòmɓwê Lk 7.18-35)
1Ɓwâ Yésù ya nacáŋhȩ nɨ̀fuùb no cóóŋ ɨ́ bɨrɨ́b lè sóóŋ kíì, ŋgə́ ɨ́ éíkî nɨ́ ɓè; ŋgə́ ɨ́ gì nɨ́ tɔ̀ɔ̀ɓéèsénɨ àm Mèèín kwɨ́ì ɗɔ̀ɔ́b kɨ́ no kwe no.
2Jâŋ nò kɔhɨ kùb kɔ ə́mní yaá dúú nìrì, á ŋgə́ ók sà̧à̧ Krístùù. Kí á ŋgə́ tómso nùb kù tɨŋtɨ̀ŋ nɨ̀fuùb noò no, 3ŋgáb gɨ̀ fɔ́nɨ Yésù ɨnè: «Wu ɨ́ du nò nɨ́m ɗəŋhȩ yi du gònɨ rɨ kèè, nɨ́m móŋndóŋ nò ji?» 4Yésù ɨ́ tàcùnà ŋgáb ɨnè: «Gɨnáam tànànɨ Jâŋ nɨ́m nyí óklé ɓe kɨ́ nyí pə́ré. 5Ɓùɓú̧ù̧b á pə́cùnɨ, nùb gurub ɗə́mne á gɨ̀cùnɨ gùr ɗɨ́ɗɨ̧́. Njɨ̀njə́ə̀b, njɨ̀ɨ̀b ɓoò sɨttɨ́, mgbòŋtóob á ókcùnɨ. Nɨ̀kwííb á sə̀ə̀mcùnɨ, nùb tiri á cè óknɨ Kìn Nyɔ̧ɔ̧́. 6Mɨ̀tù ɓa dùnɨ ɓe nò ə́ə́m nóò du gùwá ɓe ɨ́r moò rɨ á!»
7Ɓwâ nɨ̀fuùb Jáàŋ yi gɨré, á Yésù yi yaré nyìnnànɨ nɨ̀vɨ́tɨ̀b àm Jáàŋ sóò, ŋgə́ a tace: «Ní á nyí yi gɨ pénɨ ŋgwàì ndɨ̀ŋnì? Nyí yi gɨ pénɨ kɨ̀càì cɨ́cɔ̧̂ du jɨ̀ɨ̀niì á à? Ɗàwá. 8Nyí ma yi gɨce nɨ́ pénɨ ní? Nyí yi gɨ pénɨ nò du ɓe júk nyɔ̧ɔ̧́ ceí á à? Nùb duɓacéye bɨ́ lénɨ júúb nyɔ̧ɔ̧́ ceí á bɨ́ mvènnɨ́b jííbí hamnin. 9Nyí ma yi gɨce nɨ́ pénɨ ní? Nyí yi gɨ pénɨ tɨ́kìn Mèèín kèè? I̧i̧, mɨ tànàɓà nyí, ŋgə́ ndóŋɓacéyetɨ́ nɨ́ tɨ́kìn Mèèín. 10Ɓetí ɓe ɨ́r Jáàŋ á káàtà Mèèín du wáànɨ ɨnè ru: ‹Mèín taá, péye, mɨ tómsotɨ́ tɨ́kìn moò wo tíí, ŋgə́ gɨ̀ wu njáínkɨ́nànɨ jɨ̀r.› 11Mɨ tanaɓa nyí àmɨɨr wááŋ á: mvókín nɨ̀vɨ́tɨ̀bì, nò jíri kù ɗóhe ɓe Jâŋ nò kɔhɨ kùb kɔ ə́mní ɗàá hò̧ sə̀myèwá. Ɨ́dù nɨ́m mwi̧ nò ti mɨ̀ténè Haam Mèèín noò ndóŋtɨ́ ŋgə́. 12Yàrénɨ ɓwâ Jâŋ nò kɔhɨ kùb kɔ ə́mní há̧á̧ gònɨ féínnɨ ɗàrò, nùb kù á ɗúnɨ lèènɨ su ɓe Ŋgɔ̧́ɔ̧̀ Mèèín, nùb du ɓe nyòmeè á mánɨ gànɨ ŋgɔ̧́ɔ̧̀ kɨ́ a dù kɨ́ vúmè. 13Tɨ́kɨ̀nɨ́b Mèèín lâs, ɓe ɓíì Mòyíìs ya nyintɨ́ àm ŋgɔ̧́ɔ̧̀ kíì há̧á̧ ɨ́ gò féínnɨ ɓwâ Jáàŋ. 14Ɓè nyí fɨ́tɨ mɨ ə́ə̀mnaniì, Èlî, tɨ́kìn Mèèín yi ɓa gònɨ kɨ́, Jâŋ á. 15Nò du ɓe tó ók àmnì, óktɨ.
16«Mɨ áɓàyè nùb jíìb mwánnè hȩ na bɨ? Ŋgáb á fɨ́tîn ɓe mucutɨ́b du du̧ú̧ laŋtaŋ kù no, nùb kù a yà kɨ́ŋsònànɨ kùb ɓoò ɨnè: 17‹Nɨ́m kunnatɨ́ nyí jíín, nyí ɨ́ mvû wànnɨ; nɨ́m soŋnatɨ́ nyí bɨ̀ìmèrè, nyí yéínwa!› 18Nɨ́m ɗəəŋtɨ́ Jâŋ yi goó ɗɔ̀bín. Cɔŋ yoo, súm yoo, àm noò yi nɨ́ ɓe kí ɗànyàŋwá, kùb ɨ́ tà: ‹ŋgə́ á ɓe nɨ̀wàtɨ̀b só!› 19Mwin Nɨ̀rì ɨ́ gò, ŋgə́ ɨ́ tàŋ nɨ́ cɔŋ, ŋgə́ ɨ́ mèì nɨ́ súm, kùb ɨ́ tà: ‹Pə́náhá mvə̀cɔɔ̀ŋ ndè, ɓe mbirú rè, ɓwàjìrí nùb ɓáhe làmpóò ɓe nùb ɓáŋhɨ́bí!› Ɨ́dù nɨ́ɨ́b nɨ̀vɨ́tɨ̀b du ndɨ̀ŋniì ɨ́ du túùmnɨ kɨ̀cáàb Mèèín á ɗɨ́ɗɨ̧́ ru.»
Kwɨ́ì nùb no kwe ya mvú ɓàndɨ̀nɨ sumí
(Góòmɓwê Lk 10.13-15)
20Kí á Yésù ya yetɨkom kwɨ́ì ŋgə́ ya ndɨŋvíi nɨ́ɨ́b sɨ̀sɨ̀rí no kwe ɓe àm nùb kwɨ́ì kɨ́ noò ya du sum ŋgábè ɓàndɨ̀wáá, ŋgə́ ɨ́ tà: 21«Jábɨ́r á ɓe wu Kòràsə̧̂! Jábɨ́r á ɓe wu Bètsáyídà! Ɓetí nɨ́ɨ́b sɨ̀sɨ̀rí ya ndɨŋ yá nyínè rè, ya dùyè Tíìr ɓe Sìdôŋ á naa, nùb kwɨ́ì kɨ́ noò yè ya lə́réé júúb jɨ̀rí só kúríí, ɗà ŋgáb a sàtèè tu̧ ŋgwéé, túùmnɨ ɨnayâna vúm ɓandɨtɨ́ sum vúmè. 22Àm kɨ́ á, mɨ tanaɓa nyí wááŋ: ye Mèín ɓa ŋgùnnɨ nɨ̀vɨ́tɨ̀bì, jábɨ́r kùb ɓa túùmnɨ nùb Tíìr ɓe nùb Sìdóòŋ ɓa dùnɨ cə̀k á, kɨ́ nyínè ɨ́ ɓa ndóòŋnɨ. 23Wu ɗàrɨ́ cè, Kàpèrnàwûm, wu lə́mne wu ɓa wútɨ̀wúnɨ síí há̧á̧ ɓɨllin á à? Kùb ɓa wu nyísénɨ ɗàá há̧á̧ ko̧ó̧ á. Ɓetí nɨ́ɨ́b sɨ̀sɨ̀rí kùb ya ndɨŋ yá woò rè, ya du Sòdôm á naa, kwɨ́í kɨ́ yè á yè dùnɨ há̧á̧ ɗàrò. 24Àm kɨ́ á, mɨ tànàɓà nyí wááŋ: ye Mèín ɓa ŋgùnnɨ nɨ̀vɨ́tɨ̀bì, jábɨ́r kùb ɓa túùmnɨ nùb Sòdóòm ɓa dùnɨ cə̀k á, kí woò ɨ́ ɓa ndóòŋnɨ.»
Gonáam yɨ́ moò kwànɨ ùwí
(Góòmɓwê Lk 10.21-22)
25Ɓwâ kɨ́ á Yésù ya yóŋ Mèín, ŋgə́ ɨ́ tà: «Tá, wu nò du Kéké ɓɨɨr ɓe ɗɔ̀bí, mɨ sáktií wu àm wu ya yokna nùb kɨ̀cáblì ɓe nùb ɗɨŋhí̧ nɨ́ɨ́b wu ya túumna mucutɨ́bí rè. 26I̧i̧ Tá, á mè u̧nè. Àm wu ya ɗú dù u̧nèé á.
27«Tá moò yi ɨ́ naɓa mɨ nɨ́ɨ́b lâs lu, nò ɗəŋhȩ muní nɨ ɗàà, sé Tá. Nò kù ɗəəŋce Táà nɨ ɗàà, sé Mwin, ɓe nùb Mwin ɗú ɗə̀ŋhɨ̀ Táà.
28«Nyí lâs, nyí nùb du ɓe ha̧á̧ lúhîn ŋgwéné, nyí nùb du yenné, gonáam yɨ́ moò, mɨ ɓa nyí nànɨ ùwí á. 29Ə́əmnáam ɓíhɨ̀b moò, nyí a ə́ə̀mɓwê mɨ dù tá tɔ̀hí nyínè. Ɓetí mɨ á mɨ kerîn, sum móò á cè gurîn. U̧ á nyí ɓa kwànɨ ùwí ɗóhe ɓe nyínè. 30Ɓíhɨ̀b moò bɨ tamnì ɗàà, ha̧á̧ kɨ́ á cè nɨ́ wáŋnîn.»
सध्या निवडलेले:
Màtíyò 11: NTV
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2007 Alliance Biblique du Cameroun, B.P. 1133, Cameroon
