Luke 6

She we Sabata

(Matewu 12:1-8; Mako 2:23-28)

1 # Matama 23:25 Kwakati mu zhuba limwe le Ndzimu le kunyaluluka le Sabata, Jesu kabe eyenda akapalama minda ye mathunde e korong ana badiyiwa babe, ngono bakatangisa kumwaula zwiyako zwe korong bezwisokosa mu maboko abo beja shanga dzayo. 2Bamwe be Bafarasi bakabhuzwa beti, “Ini muyita tjisingadumigwe mu nsi we Sabata?”

3Jesu kabashandula eti, “Apa amuthu mukabala tjakathamwa ndi Dafite, paakabe iye ne baakabe anabo bana zhala kene? 4#Zwipo 24:9#1 Samuele 21:1-6Wakangina mu ng'umba ye Ndzimu katola kaja zwiwunga zwakapiwa Ndzimu, zwisingadumigwe kujiwa nge mmwe kuzhe kwe bapirisiti koga. Wakapabo baakabe anabo kuti baje.”

5Ipapo Jesu kati ku bali, “Nkololo we Nthu ndi She we Sabata.”

Jesu unopodza nlume we luboko gwakashweshwana

(Matewu 12:9-14; Mako 3:1-6)

6Kukati zhuba limwe le Sabata kakale, kati engina mu ng'umba ye mitembezelo ediya, kukabe kuna nlume wakashweshwana luboko gwe luji. 7Bafarasi ne badiyi be nlayo bakabe beshaka tjabangabona Jesu nlandu nditjo, ndizo bakanteya kubona kene ewopodza nge Sabata. 8Koga Jesu kaziba tjabakabe bekumbula, ngono kati ku nlume una luboko gwakashweshwana, “Buya ume apa.” Ndizo kamilika kama ipapo. 9Jesu kati ku bali, “Ndomubhuzwa, ndikupi kumu nlayo nge Sabata, kuyita ndulamo kene kuyita mbipo, kutjidza kene kubulaya?” 10Kabalinga bose ngono ipapo kati ku nlume iwoyu “Tambunudza luboko gugo.” Kathama sa ikoko, ngono luboko gugwe gukapola.

11Koga bakazhala bushongola bakatangisa kulebesana tjekwabo kuti Jesu bantini.

Jesu unoshalula batumwa bali gumi lina babili

(Matewu 10:1-4; Mako 3:13-19)

12Mu mazhuba iyawo, Jesu kabhuda kayenda ku dombo kunotembezela, ngono katembezela Ndzimu busiku gose. 13Kukati kwayedza, kadana badiyiwa babe, ngono kashalula bali gumi lina babili, ibo baakadana eti batumwa. 14Ibo ndibo Simoni (waakatumila eti Pita) ne nnung'una uwe Enduru na Jakubo, na Johani na Filipo na Bhatolomeo, 15na Matewu, na Tomasi na Jakubo nkololo wa Alifeo na Simoni we ngwila sununguko, 16na Judasi nkololo wa Jakubo, na Judasi Isikariyoti, iye wakadwa kabe n'wongi wa Jesu.

Jesu unodiya, kakale unopodza

(Matewu 4:23-25)

17Kadeluka nabo, ngono kama nabo pathu pakalizalizana. Mbunga nkulu we badiyiwa babe wakabe uli ipapo ne bunji gwe bathu kudwa mu ntuthu we Judiya wose ne mu Jerusalema ne mu tjekelo dze makungwa e Tire ne Sidoni, 18bakabe bazha kuwon'hwa ne kupodziwa njigwele dzabo. Ibabo bakabe bedziyidziwa nge meya mibi bakapodziwa. 19Mbunga wose we bathu ukagwisa kuti unkuthe, ngobe masimba akabe ebhuda munli, ebapodza bose.

Kushatha ne buyendasi

(Matewu 5:1-12)

20Ngono wakamilidza mesho kalinga badiyiwa babe kati,

“Makakombolegwa imwi bashayi,

ngobe bushe gwe Ndzimu nge gwenyu.

21Makakombolegwa imwi muna zhala ngwenu,

ngobe Ndzimu unowomugutsha.

Makakombolegwa imwi banolila ngwenu,

ngobe mowoseka.

22 # 1 Pita 4:14 “Makakombolegwa imwi ha bathu bemubenga kakale bemushalaula, bemutuka kakale beleba kwakabipa nge kwenyu beti mu babi ngekwe Nkololo we Nthu. 23#2 Zwiyitikalo 36:16; Mishingo 7:52Mupululudze mu zhuba ilelo, mutjuluke nge kushatha, ngobe mbhayilo wenyu nkulu u kudzimu. Ngobe nditjo tjakaitiwa ndi bobabatategulu babo mu balebesambeli.

24“Yee mme wee! Mapalala imwi bafumi,

ngobe maamutjila kale, nyaladzo yenyu.

25Yee mme wee! Mapalala imwi banoguta ngwenu,

ngobe mowobe ne zhala.

Yee mme wee! Mapalala imwi banoseka ngwenu,

ngobe mowobe ne buyendasi, kakale mowolila.

26“Yee mme wee! Mapalala imwi, munolebgwa bubuya nge kwenyu, ngobe ndiko bobatategulu babo sekwa bakaamutjila balebesambeli be manyepkhwa.”

Ida zwita zwizo

(Matewu 5:38-48; 7:12a)

27“Koga ndomubudza imwi banondihwa, idani zwita zwenyu, shingilani banomubenga ndulamo. 28Mukombolele banomulonga bhiso, mutembezelele banomubhata zwakabipa. 29Ha nthu ekupkhwaula mu lushaya, umpe gumwe. Ha mmwe ekutolela jasi lilo usindzibile kutola ne hempe tjitjo. 30Ipa mmwe ne mmwe unokukumbila, ngono ha mmwe etola tjimwe tjitjo, usitjatjishake kuti atjikubgwilize. 31#Matewu 7:12Itilani bamwe sekwa munoda bemuyitila.”

32“Ha muda banomuda, mobuyigwa ngeni kene? Ne batjinyi banoda banobada. 33Kakale ha mushinga ndulamo kuna ibabo bakamululwamila, mobuyigwa ngeni kene? Batjinyi na ibobo banothama sa ikoko. 34Kakale ha muadzima ibabo bamunogalabgwe kuti banowomubuzila, mobuyigwa ngeni? Batjinyi na ibobo banoadzima batjinyi, begalabgwe kuti banowobabuzila nge buzhalo. 35Koga idani zwita zwenyu, muzwishingile ndulamo, kakale mubaadzime musakagalabgwe kubuzigwa. Ipapo mbhayilo wenyu unowobe nkulu, mukabe bana be Upezhugwi zhugwi, ngobe wakalulwamila basingaboke ne babi. 36Ibeni ne ngoni koga sa Tate benyu bana ngoni.”

Kusumikilisa bamwe

(Matewu 7:1-5)

37“Musisumikilise, kuti ndizo musisumikilisiwe. Musitilike bamwe nlandu, ndizo amutowotilikwabo nlandu. Muzwiibhatigwe bamwe ndizo mowozwiibhatigwabo. 38Ipani ndizo mowopiwabo. Tjilizanyo tjakalulwama, tjakatshambigwa tjikazunguziwa ngono tjitebukana, tjowobigwa pa makumbo awo.” Tjilizanyo tjamunolizanya nditjo mowolizanyigwabo nditjo.

39 # Matewu 15:14 Kakale kababudza tjifaniso etji, “Apa bhofu lingakweba bhofu limwe kene? Apa abangawile bose mu gomba kene? 40#Matewu 10:24, 25; Johani 13:16; 15:20N'diyiwa aangapinde n'diyi uwe, koga mmwe ne mmwe wadiyiwa kwakapelela unonga n'diyi uwe.”

41“Wakalingilani lubatsha gumu zhisho le ikamu tjitjo koga usingabone guni limu zhisho lilo kene? 42Apa ungadwa ikamu tjitjo tjini uti ‘ikamu, ima ndiduse lubatsha gumu zhisho lilo,’ koga iwe nge kuko ukong'wa kubona guni muna lilo zhisho? Ntjengedzi ndiwe! Dusa guni limu zhisho lilo kutanga, kudwa ipapo ndiko kwaunowobona zubuyanana kudusa lubatsha gumu zhisho le ikamu tjitjo.

Nti ne zwizwalo zwawo

(Matewu 7:16-20; 12:33-35)

43“Akuna nti mbuya unozwala zwizwalo zwakabipa, kakale nti wakabipa autozwala zwizwalo zwibuya. 44#Matewu 12:33Nti mmwe ne mmwe unozibgwa nge zwizwalo zwawo. Bathu abatotjela phaya mu miti ye mihwa, kene zhambi mu matenjana e mihwa. 45#Matewu 12:34Nthu wakalulwama unoshinga zwithu zwakalulwama zwimu moyo uwe ne nthu mbi unoshinga zwithu zwakabipa zwimu moyo uwe, ngobe tjinolebgwa nge nlomo uwe, nditjo tjaanatjo mu moyo uwe.

Babaki bakatjenjela ne bezwilengwe

(Matewu 7:24-27)

46“Ini mundidana ‘She, She,’ koga musingashinge tjandinoleba? 47Ndowomulakidza kuti unongani iye unozha kundili kahwa matama kaalondolodza. 48Unonga nthu ebaka ng'umba, unotsha kanginisa, kateya mbako iye pezhugwi kwe lutombo. Kukati nkubila uzha, ukaloba ng'umba iyeyo ngono ukasitongo izunguza, ngobe yakabakiwa zubuyanana. 49Koga iye unohwa matama angu, ngono kasialondolodze unonga nthu unobaka ng'umba isina thiwa. Ha nkubila uloba ng'umba iyeyo, inowa tjinyolotjo ne kukolomoka kwayo kukabe kukulu.”

सध्या निवडलेले:

Luke 6: KBTP

ठळक

सामायिक करा

कॉपी करा