Ad’u Tinda Wana ni modo zla d’a kuruta
Wana ni modo zla d’a kuruta
Mbaktum mba yam Ad’u Tindid’a ti de zlad’a ni yam led’a handagad’a kahle suma akulona pet, yam sama avo’â kamamba, yam ad’u tinda hi tcho d’a led’a ki ndak ka yam andagad’id’a, yam tak ka Alona nga mi tak tam mi sumid’a yam ad’u tinda handjaf suma Israel-lîna, yam lovot ta Alona mi man suma avo’â handjaf suma Israel-lîna ni suma a mbut lovot ta suta ti mba yam suma andagad’ina peta mi.
Mbaktum mba yam Ad’u Tindid’a ti ndak á wal ad’u mbà:
1. Sapitre d’a 1–11: Ei ndumî zlad’a yam led’a handagad’a kahle suma akulona pet, zla d’a yam ad’u tinda hi suma yam andagad’ina, zla d’a yam mbad’a hi tchod’a kur duniyad’a ata Adam azi ki Ef-fa, zla d’a yam Kain azi ki Abel-la, zla d’a yam Noe ki mbiyo ma kusid’a, zla d’a yam gong nga fiyak ka akulo d’a Babel-lid’a mi.
2. Sapitre d’a 12–50: Ni zla d’a yam andjaf ma avo’â hi Israel-lîna: Sama avo’â ni Abram ma he gagazid’a yam Alonina, mi ge yam kä ad’um mi. Alona mi djogom simi ma dingâ ala Abraham.
Bugola, ei ndumî zla d’a yam goroma Isak-ka ki d’a hi gorom ngolona Jakob-pa. Alona mi djogom simi ma dingâ ala Israel.
Bugola, ei ndumî zla d’a yam Jakob grom suma dogo yam mbànid’a. Azi nabuyo suma dogo yam mbà suma yam Israel-lâ petna. Mbaktumba ti de zlad’a ngola yam Josef Jakob goroma, yam ahle suma a luma, gak Jakob kandjavam pet a i kak avo Ezipte mi.
Mbaktum ndata nga d’i de zlad’a yam ahle suma tetengâ. Wani avok ahlena pet, ti nga d’i vad’ud’a yam sun nda Alona nga mi lat ki sumid’a. Ti de zla d’a avoka ala: NAlona ba, mi lahlena pet; ti de zla d’a dabid’a ala: Alona mi hle vunam ala mam mba mi we hohowa sum mama. Kur ad’u tinda hi mbaktum ndatid’a gak dabi mata, ma nga mi le sun nda ngol la kala nAlona tamba; mi ka sariyad’a yam suma tchona, mi tak sum mama lovota, mi ndjunuzi kur tit mazid’a mi.
Mbaktum ndata ti vad’ud’a yam gagazi d’a hed’a hi suma Israel-lîd’a, ti ndjunuzi á ve gagazi d’a hed’a ad’enga mi. t Wana ni wal mata
Ad’u tinda 1.1–11.32
Abraham 12.1–25.18
Jakob 25.19–36.43
Josef 37.1–50.26
सध्या निवडलेले:
Ad’u Tinda Wana ni modo zla d’a kuruta: BA
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Azumeina Bible © Alliance Biblique du Tchad, 1999.