Lucas 4
4
Zezusi hã a'ubuni wi sãmra ré, Wa'uburé te te ipibuzé
Mateus 4.1-11; Marcus 1.12-13
1Zezusi hã 'Re ihâimana u'âsi mono Pẽ'ẽzani ré, ma tô apâ sina siri, Zodã pa hawi. Apâ te te sina siri wamhã, 'Re ihâimana u'âsi mono Pẽ'ẽzani hã ma tô saprõ, rop si 're irosa'wari mono u. 2Tame ma tô Wa'uburé hã pibu, 40 na bâdâ ãma isi'utõrĩ 'remhã. Tame sãmra ré hã marĩ te te 'rẽne õ di. Tahawa mra hã ma tô azâ. 3Tahawa Wa'uburé hã ma tô tãma tinha, ãne:
— Tô sena, a hã 'Re ihâimana u'âsi mono 'ra wamhã, ma'ãpé ã hã ẽtẽ ma nharĩ, i'u'ẽtẽ wapu na aima si'manharĩ da.
4Tawamhã Zezusi hã ma sada'â, ãne:
— Ibaihâ Iwazé pese na rob'ui'éré hã, ãne: “I'u'ẽtẽ wapu na si, 're dahâimana za'ra mono õ di za, ti'ai ãma hã.”
5Taha parimhã, Wa'uburé hã ma tô Zezusi saprõ, sa'a nhisi u. Ta hawi ma tô tãma hâi'ré, danhib'apito norĩ ti'ai mono bâ te te 're ida'madâ'â za'ra mono zé hã. 6Tawamhã, ãne te duré tãma tinha:
— Uburé ã norĩ nhimi'madâ'â nhiptetezé hã wa za aima tisõ, duré uburé marĩ iwẽ iwa 're ihâimana za'ra mono zama. E marĩ wa. Uburé ã norĩ ĩma isa'ré hã hâimana wa, te dama 're anhomri waihu'u pese mono di, te ĩsima 're ida'awẽ mono zéb zarina. 7Ãne wa, ĩ'ãma aiwata da, aihi'rãtitõ ĩma aimei wamhã, uburé ã hã ate hã za.
8Tawamhã Zezusi hã te asa tãma tinha, ãne:
— Ibaihâ Iwazé pese na rob'ui'éré hã, ãne te tinha:
“Uburé Danhib'apito ãma si 're aiwata za'ra wa'aba mono, ate za'ra wa'wa 'Re ihâimana u'âsi mono ãma si. Duré õhõ ma si 're romhuri za'ra wa'aba mono.”
9Taha parimhã, Wa'uburé, ma tô duré Zezusi hã saprõ, Zeruzalẽ u. Tame hâimo ma tô tisã, 'Re ihâimana u'âsi mono nhorõwa 'ri 'rãihâ, 'ri nhisi uptabi u. Ãne te duré tãma tinha:
— Tô sena a hã 'Re ihâimana u'âsi mono 'ra wamhã, ma'ãpé ã hawi asime na, ti'ai u. 10E marĩ wa. Ãne, Ibaihâ Iwazé pese na rob'ui'éré hã te te nharĩ wa:
“'Re ihâimana u'âsi mono te za we satõrĩ za'ra tite hâiwa hawi romhuri'wa norĩ hã, te te siwi ai'madâ'â da.
11Tawamhã tinhib'rata na te za siwi asapa, aipara wi ẽne hã te te ai'u'a tõ da.”
12Tawamhã Zezusi hã te duré asa tãma tinha, ãne:
— Tane nherẽ, ãne duré Ibaihâ Iwazé pese na rob'ui'éré hã te tinha: “Uburé Danhib'apito hã 're pibu za'ra wa'aba mono tõ, ate za'ra wa'wa 'Re ihâimana u'âsi mono hã.”
13Tawamhã Wa'uburé hã uburé marĩ na Zezusi te te pibui parimhã, ma tô oto mo a'â, isiti.
Zezusi hã, romhuri na te te isãna'ratazé, Galiléia ãma
Mateus 4.12-17; Marcus 1.14-15
14Tawamhã Zezusi hã Galiléia u ma tô apâ mo. 'Re ihâimana u'âsi mono Pẽ'ẽzani siptete na 're ihâimana mono hã ma tô isiré tihâiba. Iwasu'u hã ma tô ropé, daro mono bâ Galiléia ãma hã. 15Tawamhã Zudeu norĩ te, rowahutuzé mono na ma tô te te dama rowahutu. Tahawa ma tô uburé da te dasiwi uzei wẽ.
Zezusi hã, Nazaré ãma da te dasiwi iwẽ'õzé
Mateus 13.53-58; Marcus 6.1-6
16Tawamhã Zezusi hã ma tô mo Nazaré u, tiprédubzéb u. Sabadu dawa'utuzém na 're izasi u'âsi mono zéb zarina, ma tô dame ãzé, Zudeu norĩ te, rowahutuzéb u hã. Tame ma tô hâiwi za, Ibaihâ Iwazé pese na rob'ui'éré hã te te dama sõré da. 17Tawamhã ma tô tãma sõmri ni, ibaihâ Izaiasihi nhimi'ui'éré hã. Te te 'ridawa wamhã, ma sõpẽtẽ, ãne rob'ui'éré inomro hã:
18“Uburé Danhib'apito, ma tô Tipẽ'ẽzani hã ĩma tisõ. Ta hã ma tô ĩpisutu, Rowasu'uwẽ na, isibrob'õ norĩ ma, te 're rob'mahârâ mono da. Ma tô duré ĩzatõ, dazazéb 're, 're idasimasa mono ne, 're ihâimana za'ra mono norĩ ma, te 're rob'mahârâ mono da, sima iwẽ na oto 're hâimana za'ra mono da, duré itob'a norĩ hã te 're ato pese mono da, duré da te 're iwati pese za'ra mono norĩ hã te 're anho'reptui mono da, 19duré te 're rowasu'u mono da, bâdâ oto iwisi na hã, Uburé Danhib'apito tinhib'a'uwẽ te te 're i'anho'reptui mono zé hã.”
20Tawamhã Zezusi ma tô ibaihâ hã apâ oto sito. Ma tô tisõ, rowahutuzéb 're dapawapto'wai ma. Taha pari ma tô apâ nhamra. Tawamhã rowahutuzéb 're idahâimana za'ra hã te dasiwi 'madâ'â pese ni. 21Tawamhã Zezusi hã ma tô rowasu'u na tãma sãna'rata za'ra, ãne:
— Ã bâtâ na hã ma tô sina uwaimra, Ibaihâ Iwazé pese na rob'ui'éré inomro hã, nimosi iwapari za'ra wa'wa hã.
22Tahawa Zezusi hã ma tô uburé dasiwi uze ni. Ma tô duré imreme wapari ze na ãma tatob'uzu za'ra ni. Tane nherẽ, ma tô ãne ãma tasisadanharĩ za'ra ni:
— E ã hã, Zuzéhé 'ra ã bâ.
23Tawamhã Zezusi hã ma tô tãma nharĩ za'ra, ãne:
— Ãne na 're idamreme zusi u'âsi mono zém na te za tô ĩma inharĩ za'ra wa'wa: “Dawede'wa, ma'ãpé 'râwi aihâzé asima pari.” Te za duré ãne ĩma inharĩ za'ra wa'wa: “Uburé marĩ, Cafarnau ãma 're i'ab'manharĩ mono zé hã wa tô wapari za'ra ni. Ma'ãpé ãme airob ãma zama tane hã duré a'manharĩ.”
24Tawamhã ma duré ãma uzusi, ãne:
— Tô sena wa za ãne hã aima waihu'u za'ra wa'wa: 'Re ihâimana u'âsi mono zadawa 'mahârâ'wa hã 'maihâimana õ di, isipti'ai 're, sô 're idatob'uzu za'ra mono hã. 25Tô sena wa za duré ãne hã aima waihu'u za'ra wa'wa: Izaraéu ti'ai 'remhã, 'Re ihâimana u'âsi mono zadawa 'mahârâ'wa Elias 're hâimana mono ré, te pi'õ imrotõ norĩ hã ahâ na 're hâimana za'ra. Tawamhã tã ta'a õ wa, si'ubdatõ wahum na duré aiwa wahu ãma isipo'o u hã, mrab zépada hã ma tô tihâiba, uburé taha ti'ai 'remhã. 26Tane nherẽ, 'Re ihâimana u'âsi mono, Elias hã te te satõrĩ õ di, ta norĩ pi'õi mrotõ tẽmemhã. Misi pi'õi mrotõ Sarepita ãma 're isãmra mono u si ma tô satõ, Sidõ 'ratamhã. 27Duré 'Re ihâimana u'âsi mono zadawa 'mahârâ'wa Elizeu 're hâimana mono ré hã ma tô i'wa're ré norĩ hã ahâ na 're si'ubumro, Izaraéu ti'ai 'remhã. Tane nherẽ, 'maipese õ di. Na'ama, Siria ti'ai 're, 're isãmra mono si ma tô tipese.
28Tawamhã uburé rowahutuzéb 're idasi'ubumro norĩ, ãne hã da te wapari za'ra wamhã, ma tô tazahi za'ra ni. 29Tahawa ma tô sô tawahutu za'ra ni. Ma tô dasiwi wazere ni, 'ri wa'õtõ nhiti. Sa'a nhisi 'rãsutu u, ma tô duré dasiwi saprõni ni, 'ri wa'õno iwa isab u, ta hawi da te dasiwi me da, pi'reba. 30Tane nherẽ, Zezusi hã da'ahâ uptabi wa'wa, ma ro'razâ. Ma tô oto mo.
Zezusi hã aibâ hawi, wa'uburé te te isamarĩzé
Marcus 1.21-28
31Tawamhã Zezusi hã ma tô mo Cafarnau u, 'ri wa'õno 're ihâimana mono Galiléia ti'ai 'remhã. Tame te nasi dama rowahutu, sabadu na. 32Tawamhã uburé ma tô ãma tatob'uzu za'ra ni, te te 're irowahutu mono zém na, simiroti pire na te te 're rowahutu mono wa. 33Tawamhã Zudeu norĩ te, rowahutuzéb 'remhã aibâ hã te 're sãmra, wa'uburé ré hã. Ta hã ma tô hârâ 'rãihâ na hâ, ãne:
34— Zezusi, Nazaré ãma i'aiprédu, e marĩ te asima iwẽ, wa'ãma za'ra hã. E wa'uprosi da, te we aimo. Ĩma aiwaihu'u pese uptabi di, a hã ni'wa na hã. A hã 'Re ihâimana u'âsi mono te te i'aipisudu, aimawi tãma 're aihâimana mono da.
35Tawamhã Zezusi hã ma tô Wa'uburé ma timreme hã 'morõwĩ, ãne:
— Ari'iwi! Mo oto aiwatobro, ã hã aibâ hawi!
Tawamhã Wa'uburé ma tô aibâ hã time ti'ai u, uburé danho'a. Taha pari ma tô ihawi watobro, te te u'a ãna. 36Tahawa, ma tô uburé ãma tatob'uzu za'ra ni. Ãne te duré dasima nharĩ za'ra ni:
— E niha hã, ã hã imreme. Ã hã aibâ hã, wa'uburé norĩ ma zama te za mreme pire na rob'ru, duré mreme nhiptete na. Tawamhã isadawa zarina te za wairé!
37Tahawa, Zezusihi wasu'u hã ma tô ropé, uburé tame ti'ai wa'õtõ zababa 're idasi'ubumroi mono norĩ u hã.
Zezusi hã, da'ahâ na te te ida'apesezé
Mateus 8.14-17; Marcus 1.29-39
38Tawamhã Zezusi hã ma tô oto watobro, rowahutuzém hawi. Simahã nhorõwa u, ma tô mo. Simahã maprewa hã wa'ro di. Iwa'ro hã hâimo uptabi. Tahawa ma tô Zezusihi wi waptẽrẽ za'ra ni, ãma sime da. 39Tahawa ma tô itẽme mo. Ma tô mazazâ, isa'warizéb 'rata. Taha pari ma tô rob'ru, iwa'ro ma. Tawamhã pi'õi hawi ma tô iwa'ro hã watobro. Tahawa awa'awi pesere ma tô wahudu, pi'õ hã. Ma tô oto tãma a za'ra, saihuri da.
40Tawamhã bâdâ oto isébrézéb u hã, Zezusihi u ma tô ãwisi za'ra ni, siwa'ru dahâzé sipu'u pese na da'ãma 're ihâimana za'ra mono hã. Tinhib'rada hã ma tô nasi ãma a za'ra, hâiba mono bâ. Tahawa ma tô da'apese. 41Taha siré hã, da'ahâ na wa'uburé ré, 're idahâimana za'ra mono norĩ hawimhã, ma tô wairé, hârâ sina, ãne:
— A hã, 'Re ihâimana u'âsi mono 'ra!
Tane nherẽ, Zezusi hã ma tô timreme hã tãma 'morõwĩrĩ za'ra. Te te tãma 'ru za'ra õ di, imreme za'ra da hã, õ hã Cristu na da te dasiwi waihu'u pese wa.
42Tawamhã awẽ wamhã, Zezusi hã te oto mo, a'ubuni u. Tahawa ma tô da'ahâ uptabi hã sô darĩtĩ za'ra. Isãmrazéb u dasihutu wamhã, ma tô dazadawa za'réi ãna tiwi waptẽrẽ za'ra ni, dahawi morĩ tõ da. 43Tane nherẽ, Zezusi hã ma tô ãne tãma nharĩ za'ra:
— I'ru zahi Rowasu'u wẽ Ité, 'Re ihâimana u'âsi mono da'ãma 're isib'a'uwẽ mono zé hã, 'ri wa'õtõ amoi u zama te dama 're iwasu'u mono da hã, taha da 'Re ihâimana u'âsi mono hã we te te ĩzatõrĩ wa.
44Tahawa Zudeu norĩ te, rowahutuzé 're isimasa mono na ma tô te te dama 're rowasu'u, Zudéa na danhipti'a nho'õmo nhisi 'remhã.
सध्या निवडलेले:
Lucas 4: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
