Luca 23
23
Zezusi hã Pilatuhu uiwada isabzé wasu'u
Mateu 27.1-2,11-14; Marcu 15.1-5; Zuwã 18.28-38
1Taha pari, ma tô aihĩni tiwahutu za'ra, Zezusi hã te te siwi saprõni da, Pilatuhu u. 2Tawamhã te te itẽme siwi ãwisi wamhã, ma tô siwi wasu'u wasété, ãne:
— Ã hã ma tô dawi ro'wa'rutu, tinhimirowasu'u na. Roma ãma danhib'apito ma, rob'uiprazé hã da te tãma 're arĩ za'ra mono tõ da, ma tô te te 're da'apa'uwati. Danhib'apito na te duré dama 're siwasu'u, 'Re ihâimana u'âsi mono te te ipisutu na, Danho'reptui'wa da.
3Tawamhã Pilatu te Zezusihi ma tinha, ãne:
— E a hã, zudeu norĩ nhib'apito.
Tahawa, ma tô Zezusi hã asa tãma tinha, ãne:
— Tahata tô ma tô tane hã ĩ'ãma iwaihu.
4Tawamhã Pilatu te dama tinha, ãne:
— Iwasété na te waihu'u õ di, wasété wa, te iwẽ'õzéb da hã. — Ãne te sasedoti ipire norĩ ma nharĩ za'ra, 'Re ihâimana u'âsi mono ma da'ãma romhuri'wa ipire norĩ me, uburé dama zama.
5Tane nherẽ, te mreme tete na asa tãma nharĩ za'ra, ãne:
— Tinhimirowasu'u na, ma tô te te dawi 're ro'wa'rutu, daza'rui mono bâ, Zudéa ãma. Galiléa ãma, ma tô roti na sãna'rata. Ãhãta ma tô wei wi oto ãwa.
6-7Tawamhã te Pilatu hã da'azadanha, damreme te te wapari wa:
— E ã hã, Galiléa hawi te wei mo.
— Ĩhe. Ta hawi te wei mo, tiza'rui hawi. — Ãne te asa tãma rowasu'u za'ra ni.
Apito Erodi te te dama 're iroti mono zé, Galiléa hã. Tahawa, Pilatu te te wapari wamhã, te tãma 'ru za'ra, Erodihi u te te siwi saprõni da, tame za a'â sãmra wa, Zeruzalẽ ãma. 8Erodi hã Zezusihi wasu'u hã ma tô te te 're wapari. Tahawa, ma tô te te sima 're wẽ u'âsi, Zezusi te te sabu da. Tawamhã itẽme da te dasiwi ãwisi wamhã, toi uptabi di Erodi hã, titõmo na te te oto 'madâ'â wa. Isõ'a, marĩ dama i'manharĩ waihu'u'õ hã tiwaihu'u pese na te te 'manharĩ da, ma tô aré sima wẽ, Erodi hã. 9Tahawa, ma tô Erodi hã marĩ na sadanharĩ ahâ, Zezusi hã. Tazahã, te te ãma sada'âbâ õ di asa. 10Tahawa, te oto Erodihi u aimasa, sasedoti ipire norĩ hã. Rowahutu'wa norĩ me, te itẽme aimasa. Mreme tete na, ma taré siwi pisutu zahi za'ra, Zezusi hã.
11Tawamhã Erodi norĩ hã ma tô Zezusihi ãma tiwa'ẽ za'ra, taré. Tinhib'a'uwẽ norĩ me, ma ãma tiwa'ẽ za'ra, da'wapéi'wa norĩ me. Ma tô ãma tito za'ra. Dasi'ubuzém na ma tô siwi ãma hâiba ubu, iwẽ na. Tawamhã Erodi hã te oto dama ti'ru, apâ da te dasiwi saprõni da, Pilatuhu u. Tahawa, te apâ siwi saprõ. 12Pilatu norĩ hã Erodihi me, te aré 're si'ruiwapari zahuré. Ãhã na, ma tô oto sisawi zahuré.
Zezusi hã da te dasiwi wĩrĩ da, Pilatu te te idazazezé wasu'u
Mateu 27.15-26; Marcu 15.6-15; Zuwã 18.39–19.16
13Tawamhã Pilatu te sitẽme dazô hâ, sasedoti ipire norĩ zô, 'Re ihâimana u'âsi mono ma, da'ãma romhuri'wa ipire norĩ zô. Duré roti'wa norĩ zô, te tihârâ za'ra, isib'a'uwẽ norĩ me, te te itẽme ubumro da. 14Itẽme sihutu wamhã, te tãma nharĩ za'ra, ãne:
— We ĩtẽme asiwi ãwisi aba wi hã, ma tô ãne ĩma iwasu'u za'ra wa'wa: “Ãhã nhimirowasu'u zarina, te oto ro'wa'rutu na 're dahâimana za'ra.” Ãne ma tô ĩma iwasu'u za'ra wa'wa. Tahawa, wa tô asõ'a za'ra wa'aba, sadanharĩ pese aré, iwasété zô, iwasédé hã ãma sa'ra za'ra wa'aba wa. Tazahã, marĩ hã ãma hâimana õ di, iwasédé hã. 15Erodi hã te te duré sadanharĩ wamhã, marĩ hã te te i'manharĩ wasété zé hã te te duré ãma sãmri õ di. Tahawa, ma tô we apâ watẽme satõrĩ za'ra, marĩ hã ãma hâimana õ wa. Marĩ te te 'manharĩ wasété õ nherẽ, e niha wa za dama ti'ru, da te dasiwi wĩrĩ da. Mare di. 16Taré wa za da'wapéi'wa norĩ ma 'ru za'ra, te te siwi 're pré'é mono da. Taha parimhã, wa za satõ, apâ morĩ da.
17Pascowa na dasaihurizép sidâpâsi, ma tô Pilatu hã dazazém hawi te te 're da'azani, misi si. 18Tawamhã aihĩni te damreme 'rãihâ na tãma nharĩ za'ra ni, ãne:
— Da te dasiwi wĩrĩre. Barabasihi si, wama wazere za'ra na apâ.
19Barabasi hã dazazéb 're, te dame 're sa. Isimiroti zarina, ma tô dasi'wapé hã watobro, romanu norĩ zada, Zeruzalẽ ãma. Ma tô duré da'maiwĩ, Barabasi hã. Tahawa, ma tô dasiwi sẽrẽ ni, dazazéb 're, sab da.
20Pilatu hã ma tô sima wẽ, Zezusi hã apâ te te satõrĩ da. Tahawa, te ãne duré dama tinha. 21Tane nherẽ, damreme 'rãihâ na te nasi 'mahârâ za'ra ni, ãne:
— Wedepo'o nhonhi'rãmi na, da te dasiwi sasõmri, dâ'â da.
22Tawamhã te Pilatu hã duré dama tinha, ãne:
— E marĩ te te 're ab'manharĩ wasété mono bâ. Iwasété zô, te sadanharĩ wamhã, marĩ hã ãma hâimana õ di. E niha wa za bété taré dama ti'ru, da te dasiwi wĩrĩ da. Mare di. Taré wa za ti'ru, da te dasiwi 're pré'é mono da. Taha parip si, te za mo, ĩzadawa para. — Si'ubdatõ oto imreme hã ihâiba na hã.
23Tane nherẽ, te aihĩni norĩ hã ãma sé za'ra, mreme 'rãihâ na, ãne:
— Wedepo'o nhonhi'rãmi na sa'o, dâ'â da.
Tahawa, Pilatu ma tô oto dawapa. 24Da te tiwi iwaptẽrẽzéb uwaibaba, ma tô pisutu, wedepo'o nhonhi'rãmi na sa'o da, Zezusi hã, dâ'â da. 25Da te dasima iwẽ za'ra zéb uwaibaba, ma tô dama ti'ru, aibâ, da te wazere da, dazazém hawi watobro da, apâ morĩ da. Aibâ nhimiroti zarina, ma tô dasi'wapé hã watobro aré, romanu norĩ zada hã. Ma tô duré da'maiwĩ, aibâ hã. Tahawa, ma tô sẽrẽ ni, dazazéb 're, sab da hã. Tawamhã Pilatu te oto ti'ru, Zezusi hã te te siwi âri da da'wapéi'wa norĩ hã, da te dasima iwẽ za'ra zéb uwaibaba, te te tãma 'manharĩ za'ra da, Zezusihi ma.
Zezusi hã, wedepo'o nhonhi'rãmi na dâ'â da, da te dasiwi isasõmrizé wasu'u
Mateu 27.32-44; Marcu 15.21-32; Zuwã 19.17-27
26Tawamhã Zezusi hã te oto siwi saprõ, idâ'âzéb u. Te te siwi saprõni ré, ma tô buru hawimhã aibâ hã da'razâ. Aibâ nhisi hã, Sima na. Simahã za'ru nhisi hã, Sireni na. Te te da'razâri wa, ma tô siwi pa'â, da'wapéi'wa norĩ hã. Isisé ma tô tãma hiri za'ra wedepo'o nhonhi'rãmi hã, Zezusihi zarina te te âri da. Tahawa, te isarina ti'â.
27Tawamhã da'ahâ na te Zezusihi zarina ai'aba'ré ni. Pi'õ zama, te dame ai'aba'ré, wawa sina. Zezusihi ãma pẽ'ẽzé uptabi za'ra wa, te 'ru'ru. 28Tahawa, Zezusi hã ma tô itẽme aipi'ra za'ra, pi'õ norĩ u, te te tãma nharĩ za'ra da, ãne:
— Pi'õ norĩ, Zeruzalẽ ãma 're ai'ubumroi wa'aba mono norĩ hã, ĩ'ãma ai'ru'ru wa'aba tõ. Ãté asisô si, te za 're ai'ru'ru wa'aba mo, ai'ra norĩ zô zama. 29Niwa apto'o ré, bâdâ oto wisi wamhã, aihĩni te za nharĩ za'ra ni, ãne: “Pi'õ i'ra'õ norĩ ma si, 're rowẽ za'ra mono di za, niwa ai'uté te te iwapsõmri za'ra õ norĩ ma hã.” Ãne te za nharĩ za'ra ni. 30Duré dama rowasété wapsi, ẽtẽ 'rãihâ ma, te za tasi'ru za'ra ni, danhisiwi waptã'ã da, te te da'uprosi da. Duré sa'a ma, te za tasi'ru za'ra ni, te te dazuwa za'ra da. 31E marĩ da, wa tô romhâ ré aima rowa'õtõ za'ra wa'wa. Ãhã na, mi wapti'i ré, te za oto rowasédé hã ĩma 'manharĩ za'ra ni. Mi hã 'ré wamhã, e niha za bété. Dama 're rowasété uptabi za'ra mono di za.
32Zezusihi me, te aibâ norĩ hã dasiwi saprõni zahuré ni, isiré dâ'â zahuré da, ta norĩ hã. Rowasété 'manharĩ'wa zahuré, aibâ norĩ hã. 33Tawamhã ma tô oto ãwisi za'ra, Da'rãihi na romnhisi u. Tame ma tô siwi sasõ Zezusi hã, wedepo'o nhonhi'rãmi na dâ'â da. Ma duré rowasété 'manharĩ'wa norĩ hã isiré sasõmri zahuré ni. Te ãma aiwa'aba zahuré, isimire niwĩ, duré isimi'e niwĩmhã.
34Tawamhã Zezusi hã te Timama ma tinha, ãne:
— Ĩmama, da'ãma 'madâ'â õ di za, da te ĩma i'manharĩ wasété za'ra zé hã. Da te dasiwi ĩwaihu'u ãna, ma tô ĩma 'manharĩ wasété za'ra ni.
Tawamhã ẽtẽ zapotore i'ui'éré ré hã ma tô nasi sima sãmra, Zezusihi uzazéb zô. Taha zarina, ma tô sima ãma aipé. 35Zezusi norĩ hã simnhatã ré, te zudeu norĩ hã i'rata asimro, te te 'madâ'â za'ra da. Tahawa, te roti'wa norĩ hã sima nharĩ za'ra, ãne:
— Ma tô te te 're da'anho'reptu aré. Tô sena Danho'reptui'wa da, 'Re ihâimana u'âsi mono te te pisutu wamhã, ma'ãpé sisõ'reptu.
36Da'wapéi'wa norĩ zama, ma tô ãma tiwa'ẽ za'ra. Tawamhã ma itẽme ai'ré za'ra, te te tãma wẽ za'ra da, uwa 'rãi wa'u isé hã, iwa'âbâ suru hã. 37Ãne te tãma nharĩ za'ra:
— A hã zudeu norĩ nhib'apito wamhã, ma'ãpé asisõ'reptu na.
38Zezusihi 'rãi uwaibaba, te da'o, ãma irob'ui'éré ré hã. “Ã hã, zudeu norĩ nhib'apito.” Ãne ãma irob'ui'éré hã.
39Tawamhã rowasété 'manharĩ'wa hâiba amo hã te tãma tinha, ãne:
— A hã Danho'reptui'wa da, 'Re ihâimana u'âsi mono te te aipisutu wamhã, ma'ãpé asisõ'reptu na. Wa norĩ zama, wanho'reptu na.
40Tahawa, ma isiré hã tãma pẽtẽ, ãne:
— Tô'ã. E 'Re ihâimana u'âsi mono nhimihâzé, asima pipa ã bâ, ma tô tane tãma inha. Wa norĩ hã wa wasiré waza'o ni, apito nhimiwada'uri zarina. Taré, da te wama rob'manharĩ õ di, dasiwi. 41Wa norĩ hã wawasété wa, ma tô wama rob'manharĩ ni. Tazahã, ã hã marĩ hã te te dama 'manharĩ wasété õ di.
42Tahawa, te Zezusihi ma tinha, ãne:
— Zezusi, ĩ'ãma aipo're pu'u za, Danhib'apito na apâ we aimorĩ wamhã.
43Tahawa, te Zezusi hã asa tãma tinha, ãne:
— Tô sena wa za aima waihu'u. Ã bâtâ na te za tô ĩ'rata 're asãmra mo, rowẽ uptabi ãma.
Zezusihi dâ'âzé wasu'u
Mateu 27.45-56; Marcu 15.33-41; Zuwã 19.28-30
44Tawamhã ma tô ti'abzuma oto. Abzuma wamhã, ma tô tirobra, daro mono bâ. Bâdâ siprazéb u, te oto robra si nomro. 45Bâdâ sipra wi, ma tô zazahâ hã hâihaipo'o, 'ri 're wa'wa nhitobzé hã, 'Re ihâimana u'âsi mono nhorõwa ãma hã. 46Tahawa, ma tô Zezusi hã Timama ma tinha, mreme 'rãihâ na, ãne:
— Ĩmama. Ãhãta, wa za ĩpẽ'ẽzani hã ãma aima tisõ, asib'rata.
Tawamhã awa'awi ma pẽ'ẽ hai'utõ oto. 47Tawamhã aibâ hã ma tô tinhowẽ, da'wapéi'wa norĩ wada'uri'wa hã, romanu hã. Sõwẽ wamhã, te ãma tiwata, 'Re ihâimana u'âsi mono ãma. Ãne te tinha:
— Nare õ hã, aibâ 're imorĩ wẽ tô.
48Tawamhã da'ahâ na ma tô tasi'rã'õtõ ni, da te ãma rob'madâ'â za'ra da. Tawamhã Zezusi hã dâ'â wi, te 'ri tẽme apâ ai'aba'ré ni, dawawa sina. Ãma dapẽ'ẽzé uptabi za'ra di. 49Zezusihi zawi pese'wa norĩ hã, romhâ na ma tô ãma da'madâ'â za'ra. Pi'õ norĩ zama, te romhâ na ãma da'madâ'â za'ra, Galiléa hawi isarina isi'aba'ré norĩ hã.
Zezusi da te isẽrẽzé wasu'u
Mateu 27.57-61; Marcu 15.42-47; Zuwã 19.38-42
50-51Aibâ hã te 're hâimana, Zuzé na isisi hã. Arimatéa na isa'ru nhisi hã, Zudéa ãma. Aibâ hã iwẽ. Ihâimana wẽ uptabi di, dama. 'Re ihâimana u'âsi mono, da'ãma 're isib'a'uwẽ mono zéb zô, te 're simipari u'âsi. Ta hã, roti'wa ipire. Zudeu norĩ ma roti'wa ipire norĩ siré, te 're simasisi. Tazahã, Zezusi te te siwi âri da, te te sima ãma roti za'ra wamhã, te te ãma dazazei õ di. 52Zezusi hã dâ'â wamhã, te oto Pilatuhu u mo Zuzé hã, Zezusihi hâiba hã te te tiwi waptẽrẽ da. 53Tahawa, ma tô ãma saze, Pilatu hã. Tahawa, ma tô si'ra, wedepo'o nhonhi'rãmi hawi, Zuzé hã. Te te si'rai wamhã, ma tô hâiba ubu, zazahâ ihâirã na. Taha pari, ma tô tisẽ, ab're wa, ẽtẽ zahâpâ ab're siromo wa. Tame ma tô Zezusihi hâiba hã tisẽ, da te iwa ida'manherẽ'õ 're. 54Ãhã romhuri 'rãsutu na ma tisẽ. Romhutu na te za zudeu norĩ hã romhuri zahârizé hã 'madâ'â za'ra.
55Tawamhã Zuzé hã ab're u morĩ wamhã, ma tô pi'õ norĩ hã isarina ai'aba'ré. Zezusihi zarina, Galiléa hawi we isi'aba'ré, pi'õ norĩ hã. Tawamhã ab're hã ma tô sabu za'ra. Duré Zezusihi hâiba, Zuzé te te isẽrẽzé hã ma tô sabu za'ra. 56Tawamhã 'ri tẽme te apâ ai'aba'ré. Tahawa, ma tô marĩ hã sada wa'u za'ra, wedewa'u isadaze hã, te te siwi ãma hâiba u'ré da. Romhuri zahârizém na hã ma tô tiwa'utu za'ra, 'Re ihâimana u'âsi mono te te ipisutuzéb zarina.
सध्या निवडलेले:
Luca 23: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.All rights reserved.
