Lucas 20
20
Zezusi hã, ni'wa sadawa para te te 're rowasu'u mono zô, da te dasiwi isadanharĩzé
Mateus 21.23-27; Marcus 11.27-33
1Nimahã bâtâ na hã, Zezusi hã ma tô Rowasu'uwẽ na dama rowahutu, 'Re ihâimana u'âsi mono nhorõwa 'ri 'rãihâ ãma, 'ri 'wawi wa'ra 're. Taha ré ma tô itẽme aimasa, sasedoti norĩ nhib'ihâ'a norĩ hã, duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã, duré Zudeu norĩ ma roti'wa norĩ zama. 2Ta norĩ hã ma tô siwi sadanha, ãne:
— Ma'ãpé wama wasu'u za'ra na: E 'wa sadawa para ma tô ãhã marĩ hã 're i'ab'manharĩ mo. E 'wa hã ma tô asimiroti pire aima tisõ.
3Tawamhã Zezusi hã ma tô asa tãma nharĩ za'ra, ãne:
— Ĩzama wa za duré asa asadanharĩ za'ra wa'wa. Ma'ãpé ĩma waihu'u za'ra wa'aba za. 4E 'wa sadawa para, Zuwã hã ma tô â dawabzuri hã te te dama 're a'manharĩ. E 'Re ihâimana u'âsi mono zadawa para, e niwamhã ti'ai ãma dazadawa para.
5Tahawa, ma tô sima nharĩ za'ra, ãne:
— 'Re ihâimana u'âsi mono zadawa param na, wa te ãma wasiwi sada'âbâ wamhã, te za wazadanharĩ za'ra, ãne: “Tawamhã bété, e niha bâ Zuwã hã asiwi sazei wa'aba õ di.” 6Tazahã, ti'ai ãma dazadawa param na, wa te ãma sada'âbâ za'ra wamhã, ã hã da'ahâ uptabi hã te za ẽtẽ na dasiwi wa'uprosi ni, Zuwã hã 'Re ihâimana u'âsi mono zadawa 'mahârâ'wa na, da te dasiwi 're 'madâ'â mono wa.
7Tahawa, ma tô siwi sada'â, ãne:
— Wa te waihu'u za'ra õ di, ni'wa sadawa para Zuwã hã â dawabzuri te te dama 're i'ab'manharĩ mono na hã.
8Tawamhã Zezusi hã ma tô asa tãma nharĩ za'ra, ãne:
— Tane duré wa hã, te aima waihu'u za'ra wa'aba õ di za, ni'wa sadawa para, ã hã marĩ te 're i'ab'manharĩ mono na hã.
Buru 'madâ'â'wa norĩ iwasété norĩ
Mateus 21.33-46; Marcus 12.1-12
9Taha parimhã, Zezusi hã ma tô duré dama rowasu'u romnhimiré'é na, ãne:
— Aibâ hã ma tô a're, uva'ru hã. Tawamhã buru 'madâ'â'wa norĩ ma, ma tisõ, iwa'âbâ apo'o zô. Taha pari darob amoi u ma tô mo romhâ na, wahub ahâ na a'â sãmra da, tame. 10Tawamhã i'rã nhinarĩzé bâdâ oto wisi wamhã, tite romhuri'wa hã ma tô 'mazatõ, i'rãi apo hã te te tãma sõmri za'ra da, ite hã. Tane nherẽ, buru 'madâ'â'wa norĩ hã ma tô siwi azâ. Taha pari ubana ma tô siwi satõ. 11Tawamhã aimawi hã ma tô duré 'mazatõ. Tane nherẽ, ta hã ma tô duré siwi azâ. Taha pari ma tô tãma rob'manharĩ za'ra, sisém na apâ morĩ da. Taha pari ma tô siwi satõ, sib'rata baba na. 12Tawamhã si'ubdatõ ãma hã ma tô duré satõ tite romhuri'wa hã. Tane nherẽ, ta hã buru 'madâ'â'wa norĩ hã ma tô duré siwi u'a, taha pari ma tô duré siwi sama apâ. 13Tawamhã buru tede'wa hã ma tô sima tinha, ãne: “E marĩ wa za oto 'manha. Ĩ'ra hã wa za oto satõ ĩma isawi uptabi hã. Ãté ta hã te za siwi wazé.”
14— Tane nherẽ, buru 'madâ'â'wa norĩ hã, i'ra te te siwi 'madâ'â wamhã, ma tô sima nharĩ za'ra, ãne: “Õ hã, buru tede'wai 'ra. Niwamhã õhõ te hã za, buru hã. Oto wa te wasiwi wĩrĩ aba. Tawamhã buru hã wate za'ra za oto.”
15— Tawamhã buru nhiti ma tô siwi time. Tame ma tô siwi tiwĩ.
— Ãne wamhã, e marĩ te za 'manha, buru tede'wa hã. 16Te za sô timorĩ za'ra. Tawamhã te za uprosi, buru 'madâ'â'wa norĩ hã. Taha parimhã te za tisõ oto, aimawi norĩ buru 'madâ'â'wa norĩ ma.
Tawamhã ãne hã Zezusihi nhimirowasu'u da te iwapari za'ra norĩ hã ma tô nharĩ za'ra ni, ãne:
— Õne hã niwa iromhâimana õ da si.
17Tawamhã Zezusi hã ma tô da'a'madâ'â pese. Taha pari ma tô da'azadanha, ãne:
— Tawamhã bété e marĩ te wasu'u, Ibaihâ Iwazé pese na rob'ui'éré te te inharĩ hã, ã hã: “Ẽne, 'ri'wa norĩ te te siwi iwẽ'õ hã, ta hã danhipai u te pire uptabi na oto tihâiba.” 18Ã hã ẽtẽ nhisiwi, ni'wa hã waptã'ã wamhã, te za te te wa'õtõ 'rare. Duré ã hã ẽne hã ni'wa nhisiwi waptã'ã wamhã, te za su pese.
Zezusi hã, da te dasiwi isadanharĩzé, rob'uiprazé danhib'apito ma, da te 're i'arĩ za'ra mono zém na
Mateus 22.15-22; Marcus 12.13-17
19Tawamhã 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã duré sasedoti norĩ zama, ma tô sina sadaihu'u za'ra, Zezusi hã rowasu'u na romnhimiré te te iwasu'u hã, tô õ norĩ udâna na hã. Tahawa tô aré tame te te siwi i'âri da si. Tane nherẽ, dama pahi za'ra di. 20Tahawa, ma tô Zezusihi hâimanazém na tirĩtĩ nho'õmo za'ra oto. Wapsãi'a'wa norĩ hã ma tô duré satõrĩ za'ra, sena newa isiré hâimana za'ra da, Zezusi hã te te siwi âri da, nimame marĩ na te te i'upazéb ãma hã, tawap si te te siwi ãwisi da, da'ãma rowairébézéb u, duré apito u zama. 21Tawamhã wapsãi'a'wa norĩ hã ma tô siwi sadanha, ãne:
— Rowahutu'wa, wa aiwaihu'u za'ra ni, sena na 're inharĩ mono na hã duré i'uwaibaba na si 're irowahutu mono na hã, duré i'asimiba'a õ na hã. Tazahã, 'Re ihâimana u'âsi mono te, bâdâdi na sena uptabi te dama 're irowahutu mo. 22Tahawa, ma'ãpé ãma wazada'âbâ za'ra na. E i'uwaibaba, rob'uiprazé arĩ hã, Cézaha ma, wa te 're iwa'âbâ za'ra mono da hã. E niwamhã mare di.
23Tane nherẽ, Zezusi hã ma tô tiwi waihu'u za'ra, hâimana nhipese na te te siwi isadanharĩ na hã. Tahawa ma tô tãma nharĩ za'ra, ãne:
24— Ma'ãpé, we ĩma 'mai'âri aba, rob'uiprazé isapotore hã. E 'wa nhisi ãma hã, duré e 'wai podo ãma hã.
Tawamhã ma tô ãma siwi sada'â, ãne:
— Apito Cézaha podo.
25Tawamhã Zezusi hã ma tô tãma nharĩ za'ra, ãne:
— Cézaha te marĩ hã, ma'ãpé tô Cézaha ma 're sõmri za'ra wa'aba mono. Tane duré 'Re ihâimana u'âsi mono te marĩ hã, 'Re ihâimana u'âsi mono ma, 're sõmri za'ra wa'aba mono.
26Tawamhã i'uwaibaba na te te ãma sada'âbâ za'ra wa, timreme na te i'upazé hã hâimana õ di, danho'a hã. Tahawa, te ari'iwi aimasa. Ma tô ãma titob'uzu za'ra, te te ãma isada'âbâ za'ra zém na hã.
Zezusi hã, dahâiwa'utuzém na da te isadanharĩzé
Mateus 22.23-33; Marcus 12.18-27
27Tawamhã nima norĩ saduceu norĩ hã ma aihutu, Zezusihi u, apâ 're idahâiwa'utu za'ra mono õ na te te dama 're iroti za'ra mono hã. 28Tahawa te siwi sadanha, ãne:
— Rowahutu'wa, Mozési hã ma tô rob'ui'éré ãne wama hiri za'ra: “Aibâ dâ'â wamhã, timro 'ra ãna te te rẽme wamhã, isisãnawã hã tô ãma mro da, i'amo aba ãma, 'ra zahuré wamhã, i'ra hã isisãnawã idâ'â 'ra ne 're hâimana za'ra mono da.” 29Wa za pé oto aima rowasu'u za'ra ni. Aibâ norĩ hã te 're hâimana za'ra, 7 na ihâiba za'ra sisãnawã si hã. Tawamhã ipoto'rada hã ma tô timro. Tane nherẽ, ma tô dârâ, 'ra õ ré. 30Tahawa, ma tô isõsi hã duré ãma timro, tizédé'aba mro na. Tane nherẽ, ma duré dârâ, 'ra õ ré. 31Tahawa, ma tô duré taha nhosi hã ãma timro. Tane nherẽ, ma duré dârâ, 'ra õ ré. Ãne siparabâsi, ma tô aré sisõwa're're nasi ãma timro za'ra. Tawamhã ma tô oto uburé sisarina ai'utõ, 'ra õ ré. 32Tawamhã pi'õ zama ma tô oto dârâ, timro norĩ zarina. 33Taha zarina, 'Re ihâimana u'âsi mono te te ida'ahâiwa'utuzé bâtâ ãma hã, e 'wai mro na te za pi'õ hã tihâiba, 7 na uburé ãma imro za'ra 'remhã.
34Tahawa, te Zezusi hã asa tãma rowasu'u za'ra, ãne:
— Ti'ab ré si, te za dasina 're damro za'ra. 35Tane nherẽ, hâiwa ãma hã dasina 're damro za'ra mono õ di za oto. Niwap si, te za 'Re ihâimana u'âsi mono hã ab're hawi ahâiwa'utu, te te 're i'awẽsãmri mono norĩ hã, hâiwa ãma i'rata 're si'ubumroi u'âsi mono da. 36Ta norĩ hã, hâiwa ãma 'Re ihâimana u'âsi mono ma romhuri'wa norĩ ne, te za dâ'â ãna 're hâimana u'âsi za'ra, dâ'â waihu'u ãna. 'Re ihâimana u'âsi mono 'ra, te za 're dahâimana za'ra, ab're hawi za te te da'ahâiwa'utu wamhã. 37Mozési hã ma tô sõ'awi hâi'ré, idâ'â za'ra norĩ 'Re ihâimana u'âsi mono za te te i'ahâiwa'utu na hã. Wede zapore iro'o hawi te te tãma nharĩ wamhã, ma tô Uburé Danhib'apito hã tãma siwasu'u, ãne: “Wa hã Abra'ãhã te 'Re ihâimana u'âsi mono, duré Izaquihi te 'Re ihâimana u'âsi mono, duré Zacoho te.” 38Ãne na ma tô sihâi'ré, 'Re ihâimana u'âsi mono, idâ'â norĩ tei õ na hã, dâ'â ãna 're ihâimana za'ra mono norĩ te si na hã, uburé dadâ'â ãna 're idahâimana za'ra mono hã õhõ ma si 're dahâimana za'ra mono wa.
39Tawamhã nima norĩ rowahutu'wa norĩ hã ma tô tãma nharĩ za'ra, ãne:
— Rowahutu'wa, ãma iwazada'âbâ za'ra zé hã wẽ uptabi di!
40Tahawa ni'wa hã oto sada si'aibâ õ di, te te isadanharĩ zahu da hã.
Danho'reptui'wai ãma, Zezusi te te ida'azadanharĩzé
Mateus 22.41-46; Marcus 12.35-37
41Taha pari Zezusi hã ma tô da'azadanha, ãne:
— 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã te Danho'reptui'wa hã te te dama 're wasu'u za'ra, Davihi nhihudu na. E niha te ãma 're irosa'rata za'ra wa'aba mo. 42Tô õ hã Davi hã si'uihâ na ma tô ãma rob'ui'éré, Salmo ãma hã, ãne:
“Uburé Danhib'apito hã ma tô Ĩnhib'apito ma tinha, ãne:
‘Ĩnhimire niwĩ asãmra, 43asitob'ru norĩ aipara nhimizusizéb zahâpâ, te isõrézéb u.’ ”
44Tawamhã Davi hã, Danho'reptui'wa hã Tinhib'apito na te te 're sisi mono nherẽ, e niha tawamhã merẽ Danho'reptui'wa hã te Davihi nhihudu 're mo.
Zezusi te te dama iroti mono zé, 'Re ihâimana u'âsi mono nhimiroti zahi na rob'ui'éré na rowahutu'wa norĩ ne, 're dahâimana za'ra mono tõ da
Mateus 23.1-36; Marcus 12.38-40
45Tawamhã da te wapari za'ra ré, te Zezusi hã tinha, isiré 're inomro mono norĩ ma, ãne:
46— Ma'ãpé 're asipibui pese za'ra wa'aba mono, 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hâimanazé wi hã. Ta norĩ ma hã iwẽ, uza hâi wẽ na 're inomro mono da hã. Duré da te dasina 're i'ubumroi mono zéb ãma, wazép sina, da te 're iwaibui wẽ mono da si, tãma iwẽ za'ra hã. Duré dama ipire norĩ simasisizém na 're si'ubumroi mono da si, tãma iwẽ za'ra hã, Zudeu norĩ te rowahutuzéb ãma hã duré dasiré 're idasaihuri mono zéb ãma zama. 47Pi'õi mrotõ norĩ wi, te hâimana nhipese na isibrom na 're simisaihuri za'ra. Duré hâimana wẽ newa, te hâimana nhipese na rowaptẽrẽ hã pa na te te 're 'manharĩ za'ra. Tahawa te za ta norĩ ma, danhipai u 'Re ihâimana u'âsi mono hã tãma rob'manharĩ wasété uptabi za'ra.
सध्या निवडलेले:
Lucas 20: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
