Génesis 2
2
1Saynömi Tayta Dios kamayta usharqan jana pasata y jana pasacho kaqkunata, kay pasata y kay pasacho kaqkunatapis. 2Lapanta kamaskirnami qanchis kaq junaqcho Tayta Dios jamarqan.#Éxo. 20.11; Heb. 4.4, 10. 3Sayno jamashqanpitami Tayta Dios say junaqta bendisishpan churarqan sagrädu junaq kananpaq.#Éxo. 20.11.
Edén huertacho Adánwan Eva täyashqan
4Kaychömi qelqaraykan jana pasatawan kay pasata Tayta Dios kamashqan.
Jana pasata y kay pasata kamashna karpis 5Tayta Dios manaraqmi tamyasimurqanraqsu. Saymi ima qewapis ni jachapis jeqamurqanraqsu. Saynöpis chakrata arunanpaq runapis manami karqanraqsu. 6Say wisan pasapita yaku pashtamurmi#2.6 O pukutay sharkurmi. intëru pasata ushmarqan.
7Saypitanami alpapita runata Tayta Dios kamarkur kawananpaq senqanpa pükarqan. Saynöpami kawaq runa kananpaq kamarqan. 8Paytami Edéncho jatunkaray huertaman churarqan saycho tänanpaq. Say huertataqa kikin Tayta Diosmi inti jeqamunanlächo rurarqan. 9Say huertachömi Tayta Dios winasirqan imaykaläya kuyaylapaq jachakunata. Say jachakunapa wayuyninmi maypis mikukuy munay karqan. Huerta chawpinchömi juk jacha karqan wayuyninta mikur imayyaqpis runa kawananpaq.#Apoc. 2.7; 22.2, 14. Saynöpis juk jacha karqan wayuyninta mikur ali kaqta y mana ali kaqtapis runa musyananpaq.
10Jinan Edén huertapitami juk mayu pashtamurqan say huertata parqupänanpaq. Huertapita yarqurmi say mayu chuskuman rakikarqan. 11Punta kaq mayupa jutinmi karqan Pisón. Say mayumi päsan Havila partipa. Say partichömi aska qori kaykan. 12Say qoriqa mas ali kaq qorimi kaykan. Saynöpis saycho kaykan seqaypa mushkuq jachapa weqin y kuyaylapaq ónice rumikunapis. 13Jukaq mayupa jutinmi karqan Gihón. Say mayumi tumaykämun Cus partipa. 14Jukaq mayupa jutinmi karqan Tigris. Say mayuqa Asiriapita inti jeqamunan kaqläpami päsan. Jukaq mayupa jutinmi karqan Éufrates.
15Kamashqan runatami Edén huertaman Tayta Dios churarqan saycho arur shumaq rikananpaq. 16Nirkurnami runata nirqan: <<Kay huertacho kaq jachakunapa wayuyninqa lapanpis mikunaykipaqmi kaykan. 17Isanqa ama mikunkisu alita y mana alita musyasikuq jachapa wayuyninta. Sayta mikurqa wanunkipaqmi>>.#Rom. 6.23.
18Nirkurmi Tayta Dios nirqan: <<Japala kar runa lakipaypaqmi kaykan. Saymi yanapänanpaq majanta kamashaq>>.
19Saypitanami alpapita kamashqan tukuy niraq uywakunatawan pajaqkunata#2.19a Wakin runakunaqa vuelaqkunata niyanmi. Adán#2.19b Hebreo idiömacho Adán ninanqa runa ninanmi. kaqman Tayta Dios aparqan jutinkunata churapänanpaq. Adán churapashlanmi lapanpapis jutinkuna kaykan.
20Saynöpami jutinkunata Adán churaparqan ashmana kaq mana ashmana kaq uywakunapata y pajaqkunapatapis. Lapan casta uywakuna kaptinpis runapa majanpaqnöqa manami karqansu. 21Saymi Tayta Dios wanuypa Adánta punukaskasir juk custillanta jorqurirqan. Jorquskirnami kashlan aliyarkasirqan. 22Say jorqushqan custillanpita warmita kamarkurmi runa kaqman pusharqan. 23Warmita rikaykurmi Adán pasaypa kushikushpan nirqan: <<¡Kaymi isanqa tulüpita aysäpita rurash kar kikï niraq kaykan! Olqupita rurash karmi warmi kaykan>>.
24Saymi mamanpa y taytanpa makinpita runa yarqukun warminwan mana rakikaypa tänanpaq. Ishkaq karpis juklaylanömi kayanqa.#Mat. 19.5; Mar. 10.7-8; 1Cor. 6.16; Efe. 5.31. 25Ishkan qarapächula kaykarpis manami mayqanpis penqakuyarqansu.
सध्या निवडलेले:
Génesis 2: qvhB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2003, Wycliffe Bible Translators, Inc. All rights reserved.