Mateo 4

Jesure Neñañe

(Mr 1.12-13; Lc 4.1-13)

1Ja̱ jeteyo'je Maija'quë joyopi sai sapi, cue̱ne yejana, huati neñajaquë caquë.

2Ja̱rote paji'i, cuarenta mu'seña cui'ne cuarenta ñamiña ti a̱o a̱ima'quëpi. Ja̱je pa'ina, a̱o ëaye nëji'i, i̱te. 3Ja̱ maca huatipi Jesure tsio dani neñasi'i caquë capi:

“Maija'quë mamaquërepa pani iye quë̱na pë̱are pan de'huajë̱'ë.”

4Ja̱je caquëna, Jesupi i̱te sehuopi:

“Toyase'e caji: Coa pan a̱iñe mañapi pa'iye peoji, pa̱i. Coa ai jerepa Maija'quë cayere yo'oyepi pa'iye pa'iji.”

5Ja̱ maca huatipi Jerusalénna sapi, Maija'quëre se̱ huë'e ë̱mëje'ena. 6Cui'ne ja̱rona capi, i̱te: “Maija'quë mamaquërepa pani i̱ñopi to̱mejë'ë, yejana. Toyase'e caji, ñeje:

Maija'quëpi i̱ hui̱ñaohuaire cua̱ñeina, jë̱ñapi tse̱'e pajëna,

quë̱na pëna i̱ quë̱o ja'hua a'si to̱meñe peoye to̱meja'quë api.”

7Caquëna, Jesupi i̱te sehuopi:

“Yequë hue̱'ñapi toyase'eje̱ caji:

‘Më'ë Ëjaë Diusure neñasi'i caquë yo'oma'ë pa'ijë̱'ë.’ ”

8Ti̱jupë huatipi sa co̱pi, jai cu̱tihuëna. Ja̱rona sani si'a yejaña pa'iyere cui'ne si'aye i̱o de'oyere i̱ñopi. 9I̱ñoquë capi, i̱te: “Yë'ëpi më'ëre si'aye iyere i̱sisi'i, më'ëpi yë'ëni do're ja'runi de'oquëre pani caquë pa'ito.”

10Caquëna, ja̱ maca Jesupi i̱te capi: “Saijë̱'ë, Satanás. Toyase'e caji:

Më'ë Ëjaë, Diusuni de'oquëre pa'ni caquë sihuajë̱'ë.

Cui'ne ja̱ëse'ere te'ire necaijë̱'ë.”

11Ja̱ maca Jesure jo̱sa yo'osiquë huati saquëna, hui̱ñaohua'i dani de'oyerepa necaë'ë.

Jesús Galilea Yejana Yo'o Huëoye

(Mr 1.14-15; Lc 4.14-15)

12Juan co cua̱ñosiquë pa'iji. Asani Galilea yejana saji'i, Jesús. 13Ja̱je saisiquëta'a pëama'ë paji'i, Nazaret daripë. Pëama'ë Capernaum daripëna sani paji'i, jaira të̱'tëpa pa'icona, Zabulón cui'ne Neftalí yeja quë'rona. 14Ja̱je yo'opi, Isaías Maija'quëre quëacaiquë toyaquë pa'ise'epi ti̱'ajaquë caquë i̱ toyase'e caji:

15“Zabulón cui'ne Neftalí yeja pa'icohua'ipi,

Jai tsiaya të̱'tëpa ma'a pa'icohua'ipi,

Jordán tsiaya je te̱'te pa'icohua'ipi,

Galilea judío pa̱i peo hue̱'ña pa'icohua'ipi.

16Nea hue̱'ñare pa'isicohua'ipi

Jaiye miañere ñahuë.

Cui'ne ju̱'iñepi tëhuosicohua'i pa'isicohua'ini,

Miañere papi ñata saopi.”

17Ja̱ maca Jesús quëa huëopi, ñeje caquë: “Ja̱'në cuasase'e je̱oni po̱nëjë'ë, ma'tëmo cua̱ñeñe ja'yere pa'iji.”

Cuatro Hua'i Yo'ecohua'ire Jesús Soiye

(Mr 1.16-20; Lc 5.1-11)

18Jesús Galilea jaira të̱'tëpaja̱'a saiquëpi ja̱ maca ñapi, cayahua'ire, yo'jeipi cui'ne maja'yëpi pa'ijëna. Simón ja̱re i̱pi yequë mami Pedro hue'equëpi, cui'ne i̱ yo'jei Andrés paë'ë. Hua'i yo'ecohua'i sëte tsiayana yo'eñu'u cajë yo'e nëare je̱a dësohuë. 19Ja̱ maca Jesús capi, ja̱ohua'ire:

“Tuijë̱'ë, yë'ëni. Yë'ëpi pa̱ire yo'ecohua'ire nesi'i, mësarute.”

20Ja̱je ca maca i̱ti macapi i̱ohua'i yo'e nëa se je̱oni i̱ ja̱'re co̱ni saë'ë.

21A'ri maña se̱ña maca Jesús saiquëpi ñapi, cui'ne cayaohua'ire yo'jeipi, maja'yëpi pa'ijëna. Ja̱ohua'i cato Zebedeo mamajë paë'ë, Jacobo cui'ne Juan. Ja̱ohua'ipi pëca ja'quë ja̱'re co̱ni i̱ohua'i yo'e nëare que̱'quejë jai yohuëre paë'ë. Pa'ijëna, ja̱ohua'ire Jesupi soipi. 22Soina, i̱ti macapi yohuëre je̱oni cui'ne pëca ja'quëre saiyë cani i̱ ja̱'re co̱ni saë'ë.

Jesús Jai Pa̱ire Ye'yaye

(Lc 6.17-19)

23Jesús si'a hue̱'ña Galilea quë'ro ye'yaroja̱ji'i, pa̱i tsi'si hue̱'ñana. De'o cocare quëaquë, cui'ne Maija'quë cua̱ñeñe ayere quëaquë cui'ne si'a ju̱'i dahuë jujuquë cuji'i. 24Ja̱je yo'oquëna, Jesús yo'oye Siria yeja pa'icohua'i asahuë. Asani si'aohua'i ai yo'ocohua'ire dahuë, i̱ quë'rona. A'si ju̱'icohua'ire, co'a joyo hue'ecohua'ire, hue'hue dahuë ju̱'icohua'ire, cui'ne quë'quë dahuë ju̱'icohua'ire dahuë. Dajëna, Jesupi jujupi. 25Ja̱je yo'oquëna, jai pa̱i Galilea acohua'ipi Decápolis pa'icohua'ipi, Jerusalén pa'icohua'ipi, cui'ne Judea yeja pa'icohua'ipi cui'ne Jordán tsiaya je te̱'te pa'icohua'ipi co̱ni i̱te pe'tehuë.

सध्या निवडलेले:

Mateo 4: sey

ठळक

सामायिक करा

कॉपी करा