Matiu 4

*Satan tohongi *Jises

Mk 1:12-13; Lk 4:1-13

1Muhin *Holi Spirit kapiti Jises hani he lohong lehe Satan tohongi haputaian. 2Jises tai angiang leili 40 ngain ma ipong ape pate i hitol. 3Satan nahih hani kapin ape i ukek, “Na o tel Nati Haeu, kolitiniwa tesol pot ie haniwa bret.”

4Jises pahoi i, “Leili pepai Haeu i kak ukek,

“ ‘Seilon ala i hana hatapo namilon hani kakai Haeu kumahe an.’ ” (Deut 8:3)

5Muhin Satan hakahita Jises hani Jerusalem ape hatuhi i he teik tumi *Ingi Haeu patul wanen. 6Ape Satan kakane i, “Na masin salan o tel Nati Haeu, tautit haniwa itan. Ti leili pepai Haeu i kak ukek,

“ ‘Haeu talo tesol engelaun tengeni awaiam he minalato

lehe kalak taen aem pot kum hamange.’ ”

(Ps 91:11-12)

7Jises hone i, “Leili pepai Haeu tin i kak ukek, ‘Kum totohongi Haeu tel Masiwi.’ ” (Deut 6:16)

8Satan hakahita ulei Jises hani tehu maunten patul wanen ape kola hani i hatesol xux ma soliai waliko ti tehu pon itan ie. 9Satan hone Jises, “Hatesol waliko ie nga hani tetam na o lokuha lotui nga.”

10Jises kak pahoi i, “Nahih xaxaua Satan! Teik pepai Haeu i kak ukek,

“ ‘Lotuiwa mewenae Haeu tel Masiwi

ma ailewa mewenae puasan.’ ” (Deut 6:13)

11Ape Satan nahih salili Jises. Teka *engel ti Haeu tahia hani kapi Jises ape lato ngahati i.

Jises hutui puasan leili Galili

Mk 1:14-15; Lk 4:14-15; Jn 4:43-45

12Ti Jises hongoa ka Jon kalabusawen, i nahih alia hani texux xux Galili. 13I salili Nasaret ape aile tonan Kapenaum, tehu taon xohixohin ti kanitax Galili ma xuxi teka Sebulun ma Naptali. 14Waliko ie sohot haponowiai kakai *Aisaia, masin ti i kakawen,

15-16“Teka seilon ti xux ti Sebulun ma Naptali,

xux ti pahoiwa kanitax Galili, pape kan Jodan,

tewaok ti Galili ti *teka kumahe Ju totonai,

laha toto he tilokoan ti saun lialun

tuahe laha po tunahi lalape xewai Haeu.

Laha toto he tilokoan ti matemate

tuahe xewai Haeu po haxewa laha.” (Isa 9:1-2)

17Lokon ien Jises hutui pupuasan ti sawateniai kakai Haeu i ukek, “Amuto towiahua ti lialui woumuto nake xohiwen ti Haeu neini hatesol seilon.”

Jises tike waxaini seilon hani kahikahin

Mk 1:16-20

18Ti Jises tau nanahih pape kanitax Galili, i ningahi hua seilon ti tikei xixi, Saimon Pita ma tel ukalan Andru. Lalu totowi upen puliai xixi. 19Jises hone lalu, “Kahitima nga lehe nga hanau amulu tike waxainiai seilon hani kahikahik.” 20Kakanua lalu hana lioi upen ape kahiti i.

21Jises nahih ahewa ape i ningahi hahutalin liai, Jeims ma Jon, nati Sebedi. Lalu he tea koap kapi tel tamalalu apepeseni upenaulato. Ape Jises tiloi lalu. 22Ape salan, lalu nahih salili tea koap ma tel tamalalu ape kahiti i.

Jises kakaxi *meng solian ti Haeu ma i haewia teka tinun

Mk 1:35-39; Lk 4:42-44

23Jises nahih hani tesol tesol ti Galili hahanau teka seilon leili *synagog, ing ti apuhai teka *Ju. I kakaxi meng solian ti Haeu neini seilon ape i aile hasolia teka hina nax tenen tenen. 24Menge waliko ti i ailele i sawat kakalini hatexux xux ti Siria. Ape teka seilon atoheni hani i hatesol teka tinun, teka hina moloan lalap, seilon teka *spirit lialun kapiti hahalialu, teka lawe laha put xexex ma teka laha kum nahih uke. Jises aile haewia laha. 25Kilan wanen seilon kakahiti i, teka ti Galili, seilon ti huopanim taon axan Dekapolis, Jerusalem, Judia ma teka ti liai tepaun ti tehu kan Jodan.

सध्या निवडलेले:

Matiu 4: ssg

ठळक

सामायिक करा

कॉपी करा