Gḭ-Néje 25
25
Ŋgalə Abrakam gə́ yeḛ oji dee gə Ketura
1Abrakam taa dené gə́ raŋg ya ɓəi, ria lə Ketura. 2Yeḛ oji səa Jimran, gə Joksan, gə Medan, gə Madian, gə Jisbak, gə Sua tɔ. 3Joksan oji Seba, gə Dedan. Ŋgalə Dedan to Asurje ləm, gə Letusje ləma, gə Lumje ləm tɔ. 4Ŋgalə Madian to Epa, gə Eper, gə Enok, gə Abida, gə Elda. Deḛ lai neelé to ŋgalə Ketura.
5Abrakam ɔm nékiŋgaje ləa lai ji Isaak’g. 6Ŋganje gə́ yeḛ oji dee gə gamla-denéje ləa kara yeḛ ar dee nénojije tɔ. Ndá loo gə́ yeḛ si kəmba ɓəi ndá yeḛ ar dee d’ya̰ ŋgonee Isaak d’aw əw par gə́ kel dɔ naŋg ɓee gə́ Bər lé.
Kwəi lə Abrakam gə dubu gə́ deḛ dubee
7Aa ooje, ləb si kəmba lə Abrakam lé ɓa nee: Yeḛ si kəmba ləbee tɔl gə dəa rɔ-siri giree-mi (175). 8Ləb si kəmba lə Abrakam bula ləm, ar ndɔje ləa d’asee ləma, ləb ɓuga ləa kara iŋga rɔlel keneŋ ləm tɔ ɓa ndilee teḛ aree wəi aw iŋga njé’g ləa ɓəi. 9Isaak gə Ismael gə́ to ŋganeeje lé dubee mee bolè mbal gə́ Makpéla gə́ to mee ndɔ’g lə Epro̰, ŋgolə Sohar gə́ to gə́ ginkoji’g lə Het lé gə́ wɔji dɔ Mamré njoroŋ. 10To loo-ndɔ gə́ Abrakam ndogo gə ŋgalə Het. Lée neelé deḛ dubu Abrakam gə dené ləa Sara keneŋ#Gn 23.3-16. 11Loo gə́ Abrakam wəi mba̰ ndá Ala tɔr ndia dɔ ŋgonee Isaak’g lé. Yeḛ lé ra ɓee mbɔr bwa-mán gə́ Lahai-rɔi’g dəb tɔ.
Ŋgaka Ismael
12Aa ooje, ŋgaka Ismael, ŋgolə Abrakam gə́ Agar, ɓər lə Sara gə́ dené gə́ to dəw gə́ Ejiptə ojee gə Abrakam lé. 13Aa ooje, ri ŋgalə Ismael gə goo ri dee ləm, gə goo ginkoji dee ləm tɔ ɓa nee: Nebajot to ŋgondər Ismael, gə Kedar, gə Abdeel, gə Mibsam, 14gə Misma, gə Duma, gə Masa, 15gə Adad, gə Tema, gə Jetur, gə Napis, gə Kedma. 16Deḛje neelé to ŋgalə Ismael, ri dee ɓa to nee gə goo ɓeeje lə dee ləm, gə goo loo-si deeje ləm tɔ. Deḛ to mbaije gə́ dɔg-gir-dee-joo gə goo ginkoji dəwje lə dee lə dee tɔ. 17Aa ooje, ləb si kəmba lə Ismael lé ɓa nee: Ləbee aḭ tɔl gə dəa rɔ-munda giree-siri (137). Ndá ndilee teḛ aree wəi aw iŋga njé’g ləa. 18Ŋganeeje ra ɓee un kudee Habila saar teḛ Sur gə́ to no̰ Ejiptə’g loo gə́ aw par gə́ Asiri lé. Yeḛ ra ɓee ləa kəm ŋgakea̰je’g lai tɔ.
D’oji Esawu gə Jakob
19Aa ooje, ŋgaka Isaak gə́ to ŋgolə Abrakam lé ɓa to nee: 20Abrakam oji Isaak. Isaak lé ləbee aḭ rɔ-sɔ ɓa yeḛ taa Rebeka gə́ dené ləa ɓəi. Rebeka lé to ŋgolə Betuel gə́ to dəw gə́ Aram gə́ si Padan-Aram ləm, yeḛ to kɔnan Laba̰ gə́ to dəw gə́ Aram lé ləm tɔ. 21Isaak ra ndòo rɔ Njesigənea̰’g mbata lə dené ləa gə́ aw kad ndá Njesigənea̰ oo kəmtondoo ləa. Togə́bè ɓa Rebeka gə́ dené ləa lé əskèm ya. 22Ŋganje tɔs na̰ mée’g ndá yeḛ pana: Ɓó lé to togə́bè ndá see m’a si kəmba ya wa. Yeḛ aw rɔ Njesigənea̰’g dəjee taree gə mba k’oo. 23Ndá Njesigənea̰ ulá pana:
Ginkoji dəwje joo to məəi’g ləm,
Gin dəwje joo gə́ d’a kḭ rɔi’g lé
D’a kai na̰ ɓəd-ɓəd ləm tɔ.
Siŋga yeḛ gə́ kára a kur dɔ maree’g
Ndá yeḛ gə́ dəa ɔs naŋg kédé lé a kula dəa no̰ yeḛ gə́ ndɔḭ’g lé#Rɔm 9.12.
24Loo gə́ ndɔ koji ŋgon lé teḛ mba̰ ndá aa oo, nduŋgaje ɓa yeḛ oji dee ya. 25Yeḛ gə́ dəa ɔs naŋg kédé lé rəa kas ləm, bḭ rəa to tum-tum ləm tɔ ndá d’unda ria lə Esawu. 26Gée gə́ gogo gə́ ŋgokea̰ teḛ ndá jia wa gel gɔl Esawu. Togə́bè ɓa deḛ d’unda ria lə Jakob. Ləb Isaak aḭ rɔ-misa̰ ɓa yeḛ oji dee ɓəi.
Esawu wa ŋgondər ləa ndogo
27Ŋganje neelé ra tɔg pir-pir. Esawu lé tel to njegər goso̰do̰, to dəw gə́ aw wala ta-ta. Nɛ Jakob to dəw gə́ aw yururu gə́ nai mee kəi-kubuje’g tɔ. 28Isaak unda Esawu dan kəmee’g mbata naḭ-ndo̰ ləa gə́ yeḛ aw sɔ ya. Nɛ Rebeka lé Jakob ɓa yeḛ undá dan kəmee’g ya.
29Ndɔ kára bèe Jakob si ula lɔ-mḭji. Esawu ḭ wala tel ree ndá dao yaa̰, nai lam bèe kar lab ɔree. 30Esawu ula Jakob pana: Ma m’ra ndòo rɔi’g ya, am lɔ-mḭji kas neelé bəl m’o̰ mbata lab ɔrm. Yee gə́ bèe ɓa d’unda ne ri Esawu lé lə Edɔm.
31Jakob pana: Am ndogo səi ŋgondər ləi ɓogənè.
32Esawu tel ilá keneŋ pana: Aa oo, m’a gə kwəi nɛ see ŋgondər lé a kam ɗi wa.
33Jakob pana: Bèe ndá un ndui am kédé ɓa. Togə́bè ɓa yeḛ un ndia aree mba kar Jakob ndogo səa ŋgondər ləa lé ya#Ǝbr 12.16.
34Yen ŋga Jakob ar Esawu muru ləm, gə lɔ-mḭji ləm tɔ. Yeḛ o̰ gə ai ndá uba naŋg ḭ aw. Togə́bè ɓa Esawu oo ŋgondər ləa gə́ né kəmee’g el.
सध्या निवडलेले:
Gḭ-Néje 25: SBA2015
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Ngambai Bible © Alliance Biblique du Tchad 1989, 2015.