Mt 10
10
Jesús yiyaĝanalo joga'me doce jo'ne lamaĝa's
(Mc 3.13-19; Lc 6.12-16)
1Yem qama'le Jesús yiyaĝanalo joga'me doce jo'ne lapaĝaguenataqa, qama'le yanema da'me lañoqotaĝanaĝa'j qaedi yamaĝadegue gaa'me payac lepaqa'li jo'ne paĝachiguilo nataq'aen qaedi e'n yemedegue gaa'me yodapecache napite'nadi nataq'aen nayaliaĝaco. 2Naajo' mach'e lenaqa'te joga'me doce 'me lamaĝa's: 'uaechiñe ñe'me Simón (da'me lenaĝat laqaya Pedro), Andrés jo'ne laqaya ñe'me Simón, Santiago nataq'aen laqaya Juan mach'e c'oqo'te ñe'me Zebedeo, 3Felipe, Bartolomé; Tomás nataq'aen Mateo (nach'eñe lo'o da'me nejetenaguec ga'me Roma), Santiago mach'e c'oĝot ñe'me Alfeo, nataq'aen Tadeo, 4Simón jo'ne celote, nataq'aen Judas Iscariote, jo'ne ua'edi yanegue ñe'me Jesús.
Jesús yamaĝalo'te gaa'me lapaĝaguenataqa da'me 'yaĝatetedac da'me lejaliaĝa joñe'me Dios
(Mc 6.7-13; Lc 9.1-6)
5Jesús yama' naa'me naajo' doce jo'ne eetojo' da'me yaqataĝaneque: “Ena'te auec'achiya di'me 'naleua joga'me ja judiopi uotaĝa ta'le ayouelo joga'me noyaqa 'me neda'ña di'me Samaria. 6Nach'edata da'me auec'achiyalo ga'me lec'oqo'tepi ñe'me Israel 'me ena'ama ga'me 'naĝanaĝatelpi jo'ne yejoma'tape. 7Jamoyi, a'uaĝachetac queda'me joote qoyoqo'ta da'me lejaliaĝa ñe'me Dios 'me na'ague di'me piyem. 8Anec'alaĝachidegue jogaa'me yeleua'ape, a'niyelaĝachiidijeguem jogaa'me joote yele'u, aueñi yoqovite' jogaa'me nolaĝa polio' lalataqa nataq'aen auamaqayidegue jogaa'me payagodipi lepaqa'li. Dojo' nañoqotaĝanaĝac ami qoyanema nayi: qaya'te lajo'vi ta'le oquiyot. Chane'eja ena'te auauoyi lajo'vi da'me auec'alaqataĝañi.
9“Ena'te auachiyi ga'me anaicauai jo'ne oro uotaĝa plata uotaĝa cobre qom anejachii'ña da'me oquiyi, 10uotaĝa auauoyi aneje'niye queda'me aueuoitac. Ena'te auachiyi ga'me anejomaĝaiquii laqaya uotaĝa gaa'me adapela'chidi' uotaĝa ga'me adaje'li, qa'a ñe'me onataĝanaĝaic chimaqachiñe ta'le qoyanem ga'me yalic.
11“Qom auec'achiya gamachaqaega noic uotaĝa 'nachaqa', qama'le aueloyaque ga'me jiyaĝaua jo'ne chimaqachiñe qaedi nach'ega oviya'ajop chayovida'a qom mach'e oquiya'ae ga'me noic. 12Mane'e qom ayoue ga'me emec, auep'iyeñi' gaa'me jo'ne netedaue ga'me. 13Qom gaa'me jiyaĝa'u 'me netedaue ga'me 'nachaqa' ami 'yamaqate'n, qama'le da'me 'nemaĝac jo'ne auepaquitapega male yepaquichigui. Qalaĝaja qom ja ami 'te 'yamaqate'n, qama'le auajelaĝañiyot ñe'me Dios qaedi ami 'niyelaĝadetot da'me 'nemaĝac. 14Chane'eja qom ja jetaque ami yaconegueta nataq'aen da'me ja jetaque ami naquiaĝanalo, qama'le oquiya'ae ga'me 'nachaqa' uotaĝa noic qama'le anechiyoqoyidiñe ga'me enaĝayaĝa jonaa'me adapia'chidi'. 15Ami ja'aĝatema queda'me qom yovita ga'me nolo' jo'ne laloqo' da'me 'uo da'me le'uaĝanaĝanaĝac ñe'me Dios, qama'le yataqachiñe lama'aja da'me ne'uaĝanaguec jena'me jenjo' noic, ja ena'ama ga'me jiyaĝadipi ca'li 'me neda'ña di'me noic jo'ne Sodoma nataq'aen Gomorra.
'Uo da'me anecanaguequi qom'te
16“Yataqachiñe anaquiaĝañiya da'me dojo' 'yaqatac, queda'me ami jama' nayi, qalaĝaja ena'am ta'le ami 'naĝanaĝatelpi jo'ne jamaĝauelo jogaa'me diquiya'ape. Chane'eja 'noota qom ami yatenaĝanaĝayaqa, aueñiya'ama jogaa'me nanayaqa, nataq'aen qaya'te anedaĝayaĝaqui, aueñiya'ama jogaa'me doqoto'pi. 17'Noota qom anechilela't, qa'a ami qoyanouelo qomle jogaa'me jaliaĝanaqa nataq'aen ami qoyachauelo jogaa'me judiopi lemaĝaiqui' da'me ami qoye'uaĝa'n 18chayovida'a da'me ami qoyauelo'te jogaa'me jaliaĝanaqa 'me yelolo'te naa'me ale'u lael choqogaa'me jaliaĝanaqa jo'ne p'ajodaye. Ami qo'yeteque da'me dojo' qa'a yajouaĝat da'me jayem; qama'le naq'aeta qomle da'me auepitaqachiñiyac queda'me jayem a'uaĝachiyema nale auajoyiya'agueta jogaa'me nataq'aen gaa'me ja judiopi laje'. 19Qalaĝaja qom ami qoyauelo'te jogaa'me jaliaĝanaqa 'me p'ajodaye ena'te diyachiyelo naa'me adai'lidi' queda'me jach'e jogamaĝa anenaĝachiyegue qom a'uachiyegueta, qa'a qom yovita ga'me laloqo' da'me male 'uo ga'me adetaĝayaĝaqui qama'le Dios ami yanema naa'me at'aqataqadi'. 20Qa'a ja naqa'ami da'me auauoyi ga'me adetaĝayaĝaqui dite ñe'me Lepaqal joñe'me Adet'ai nach'eñe ami yojaĝanaĝa'n.
21“Jogaa'me mach'e naqaya' dachinataĝalo'te qomle jogaa'me mach'e laqaya' qaedi qoyala't, nataq'aen jogaa'me net'al yadegue gaa'me mach'e c'oqo'te; nataq'aen jogaa'me nec'oqo'te nautenalo gaa'me mach'e let'al qaedi qoyala't. 22Ena'uaque jogaa'me aleua laje' ami qonautenalo qa'a jouaĝat jayem; qalaĝaja ga'me jo'ne 'nañaĝatela't chayovida'a ga'me loiquiaqa' da'me 'loyaĝac, qama'le nach'ega nec'alegue qomle. 23Qom ami qoyecaa'tape, oquiya'e di'me oñiya'ña qama'le auapiñeya ga'me noic laqaya. Eja ami ja'aĝatema queda'me ja auaqanachichi ta'le yemeda auecaechiyalo jogaa'me noyaqa jona'me israelpi, chayovida'a male 'ñiyelaq, da'me jayem jo'ne jayem Jiyaĝaua Lec'oĝot.
24“Qaya'te napaĝaguenatac ta'le napacalegue ga'me napaĝaguenoqo't, nataq'aen qaya'te nelatac ta'le napacalegue ga'me ladipa. 25Chane'eja qaya'te yepaguejaque laqaya ga'me napaĝaguenatac qom joote ena'am ga'me napaĝaguenoqo't, nataq'aen ga'me nelatac qom joote ena'am ga'me ladipa. Qom qoyenapega Beelzebú ñe'me net'a, ¿jach'e jogamaĝa 'naqataqa jo'ne qoyachalo'te qomle gaa'me 'lachaqadiaĝa'u jo'ne mach'e c'oqo'tolqa?
Ena'te ami qolanaqayaqa da'me a'uaqataĝañetac
(Lc 12.2-7)
26“Chane'eja ena'te at'oyiyapega ga'me jiyaĝadipi. Qa'a qaya'te gamachaqaega qoyapadetalegue ta'le ja yovita da'me male qo'youatelegue, nataq'aen qaya'te qoyoĝotetapiñe ta'le ja yovita da'me qonoma'a. 27Ga'me jo'ne ami ja'aĝatema nale 'naltapiye, qama'le aueñi taue ga'me nolo' da'me a'uaĝachetac; nataq'aen ga'me ja di'yoq 'me auomachiiya, qama'le aviyaĝañetac, auapiilo'te gaa'me emaqa da'me a'uaĝachetac. 28Ena'te at'oyiyalo gaa'me jo'ne yaqanate't ta'le ami yala't, qa'a ja yaqanate't ta'le yala't ñe'me adepaqali. Nach'edata da'me at'oyiyapega ñe'me jo'ne yaqanatet ta'le ami yamaĝauelo di'me ne'uaĝanaqa' ga'me loeco lo'olpi jo'ne payac 'lachaqa' qaedi yapalaĝat ñe'me adepaqali nataq'aen ga'me adapachi.
29“¿Qo'li ja aueñi 'te tayí ch'e onole nemena nale auemeñi' gaa'me dojolqa mayodi? Qalaĝaja qaya'te gamachaqaega ta'le talegue jena'me aleua qom ja naq'aeta ga'me yaje'tema ñe'me Adet'ai. 30Qama'le da'me ami, chayovida'alo naa'me adayoqochidi', ñe'me Dios joote onolqa'tape naloqote'tape. 31Chane'eja ena'te ami qolanaqayaqa, qa'a ami yataqachiñe anapaquiyalegue da'me lajo'viyaĝa'j gaa'me qayoĝode' mayodipi.
32“Qom 'uo gamachaqaega jayem yotauan nale dajoya'agueta joga'me jiyaĝadipi, qama'le nach'e ena'am da'me jayem jotauan joga'me qom jajoya'aguet ñe'me Taĝadena' 'me na'ague di'me piyem. 33Qalaĝaja ga'me jo'ne jayem nemanec nale dajoya'agueta ga'me jiyaĝadipi, nach'e ena'am da'me jayem ñemanec joga'me qom jajoya'aguet ñe'me Taĝadena' 'me na'ague di'me piyem.
Jesús chiyaqayi da'me uojoyelo ga'me jiyaĝadipi
(Lc 12.51-53; 14.26-27)
34Ena'te auepíchitapega ta'le ñeda'a da'me 'lemaĝac jena'me aleua; da'me ñanaequena ca'li, ja yajouaĝat da'me ñedo'oquena da'me 'nemaĝac, dite da'me nalada't. 35Ñanaequena qaedi ñautenaĝaneguet qomle ga'me let'a ga'me jiyaĝaua, nataq'aen qaedi jaga'me nec'oqote nautena qomle jaga'me mach'e lat'e, nataq'aen qaedi jaga'me yauo nautena qomle jaga'me mach'e li'yodo. 36Chane'eja gaa'me laute'u ga'me jiyaĝaua nach'egaua jo'ne mach'e laqaya'olqa. 37Ñe'me jo'ne noqopita ga'me let'a uotaĝa lat'e qama'te ja yaguegue da'me jayem noqopita, qama'le ja tayet da'me ñauela't. Nataq'aen ñe'me jo'ne noqopita ga'me c'oĝot uotaĝa c'oqote qama'te ja yaguegue da'me jayem noqopita, qama'le ja tayet da'me ñauela't. 38Nataq'aen ñe'me jo'ne ja yachitac jaga'me sodoso qaedi jayem equegue, ja tayet da'me ñauela't. 39Ñe'me jo'ne jetaque nec'alaĝategue da'me mach'e 'loyaĝac, qama'le qodoĝotaĝanec qomle, qalaĝaja ñe'me jo'ne jayem uajouem da'me 'loyaĝac, nach'eñe qamqa'me nec'alaĝategue qomle.
Ga'me nejetenague'j gaa'me ami yaconegueta
(Mc 9.41)
40Qom 'uo ga'me ami yaconegueta, qama'le naqayem da'me jayem yaconeguet; nataq'aen ga'me jo'ne jayem yaconeguet, qama'le nach'e ena'am yaconeguet ñe'me jo'ne jayem namaĝaquena. 41Ga'me jo'ne yaconeguet ñe'me Dios 'laqataĝanaĝanec yajouaĝat da'me eja 'yaĝatetac da'me 'laqataĝanaĝac ñe'me Dios, qama'le nach'ega nalo'taguet da'me lajo'viyaĝac ñe'me Dios 'laqataĝanaĝanec qom qoyejeten. Nataq'aen ga'me jo'ne yaconeguet ñe'me jiyaĝaua jo'ne yataqatelegue yajouaĝat da'me eja yataqatelegue ñe'me, qama'le nach'ega naloteguet da'me lajo'viyaĝac ñe'me yataqatelegue qom qoyejeten. 42Nataq'aen gamachaqaega jo'ne yanem ga'me laiquip ga'me jiyaĝaua jo'ne chiyaqauelo naa'me naajo' jo'ne ja p'ajodaye, qa'a yajouaĝat da'me mach'e yapaĝaguenataqa, eja ami ja'aĝatema queda'me yataqachiñe 'uo qomle ga'me nejetenaguec.
सध्या निवडलेले:
Mt 10: TSN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Nuevo Testament Toba del Oeste © 2010 Sociedad Bíblica Argentina
