SAHRUOTHUNA 8
8
Tiypa-aa A Ky
1Cuorasala Khazing ta Noah hne tiypalaw chunglie ama hne a awpa saruopa bangkhuo hne sahring bangkhuo kha aa thyi yi. Caacuonakawta alyi cung luo kha thliy pahruosa te tiy ca a kyle. 2Aa thuvna lie a awpa tiyhnaa zaw, avuo thlaluo-aw zaw kha khaa te, avuo taata zaa saapa khy ca a huo. 3Alyi lie tiy ca kyle hryly te, ning zakha sawngaa a ta ningpa, 4thla sariynapa a ning hraa hlyisariynapa lie tiypalaw ca Ararat ama tapa tluo cunglie aa tuo. 5Tiy ca thla hraanapa te khata ky hryly te, thla hraanapa a ning khanapa lie tluodaw ca aa luo.
6Ning sawliy khutaata Noah ta tiypalaw thlaluo-aw kha pahaw te, 7ra-aa kha a pathlie; alyi lie tiy a kyna te ta kaabung kaathaw te aa zule pari. 8Cakhutaa cata alyi taata tiy kha a ky sasaw tli ma tapa pachang riypata thuvruv kha a pathlie; 9cuorasala alyi lie tiy kha a ky vie li lie nakawta thuvruv ca aa cangna riypa hmung li pata tiypalaw luo kha a vya kaa. Caacuonakawta Noah ta a kuv kya pazupa te tiypalaw chung luo ca a pangie pakhaa. 10Ning sariy a huo khutaata thuvruv ca tiypalaw taa cata a pathlie pakhaa; 11thuvruv ca olif thinghnaa hringpa kha a hmyataw lie a vya puvle te zuoluo ta a vya kaa pakhaa; caacuonakawta Noah ta alyi lie tiy a ky tli tapa kha a pachang. 12Cakhutaa cata Noah ta ning sariy huo pakhaa te thuvruv kha a pathlie ca ama'a luo vya kaa va tli.
13Noah kung 601 a ta kungpa, thla khanapa a ning khanapa lieta alyi taata tiy ca a ky diy. Noah ta tiypalaw thlungkhuv kha pahaw te a mang ca alyi ca a huv tli tapa kha a hmung. 14A thla hningnapa, ning kiy ning sariynapa ning lie kha alyi ca a huv diy tli. 15Cakhutaata Khazing ta Noah kha, 16“Nama hne na napuv hne na sacapaa zaw hne ama napuv zaw hne khata tiypalaw taa hingta pya tie ung. 17Nama hne a awpa a hringpa saruopa bangkhuo, pavaa hne saruopa, alyi lie a valepa saruopa bangkhuo ca alyi lie hing ama pung ama zaa riypata pyakhyi tie yi,” a ta. 18Caacuonakawta Noah ca a napuvnung, a sacapaa zaw'a nata ama napuv zaw hneta tiypalaw taa cata ama pya. 19Saruopa bangkhuo, aa valepa saruopa bangkhuo hne pavaa bangkhuo, alyi lie a tle thepa bangkhuo ca a phuvphuv ta tiypalaw taa cata ama pya.
Noah Kyihuo Ta Khazing Biekuo
20Cakhutaa cata Noah ca bienatluophie suokha kha sa te, a pathepa saruopa hne pavaa phang taa khata phang kha kaluo kha la te, myirue panaana pihluo te Abyipa kha aa bie.
21 Abyipa ta capa rangpa-ue ca a thyi tiyta a palung chungraw ta, “Alyi hing cawsaa nakaw hingta khatiy tahmuo chie sa pakhaa'a va tli ang, tahematapakieca cawsaa pathiypalung ca ama cawta baataata a chie tlarya; khatiy tahmuo ata i tuepa haa hingta a hringpa sapa hmang tie hing para pakhaa'a va tli ang. 22Alyi aa hmang chung bangkhuo ca, ciycyi cuo aw'a te sahrie cuo a aw aa,
a kang cuo hne a lung cuo aw'a te,
cuovuo hne thlasiy, chung hne zuo ca
khatiy tahmuo ci buo'a vyi,” a ta.
सध्या निवडलेले:
SAHRUOTHUNA 8: LNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lutuv Holy Bible © Bible Society of Myanmar, 2023.