Luke 12
12
1အွယ့်ခိန်းခါ့ဒီ့လူထုပိန်ရိန့်ရိန့်ဖုန်းအွယ့် စုလေးကာတာ ဗွမ့်တွို့နောင် အီယျန်လိုလေကာတွို့။ ကိုယ်တော်မိန့်ကီစွက် တပည့်ဖုန်းနိန်းဒွိုး "ဒင်စတိထွို့ဆန့်ကင်ကာ ဆူတော်ကောင်ယောင်ဆောင်ဖုန်း ဗွမ့်နောင်ဖာရိရှဲဖုန်း ငြီလုဲင်။ 2ပလူးပိန်ပလားပလားဒီ့ အန်ဒင်အွိုဒါ အာကာ ကမိုးစေးကန်းဒါတာဖုန်း။ ဒေါင့်မာလဲ့ ပလူးဖုန်း အီသျှီကြိုင်ကာဘ တာအွယ့်ဟိုဖုန်း အခိန်းအဘာဒွို့ အီအိုတို။ ပလူးကားကအို အီသိထန်းတို အာကာလျှို့ဝှက်ချက်ဖုန်း။ 3အွယ့်ကြားမဲ့ နားကဒေါင့်ဒါတာ တချိကူဖုန်းအွယ့် အီဟွမ့်သိလိုကာ တခါ့ကု။ ငိုဒေါင့်အိုဖီထွိုင့်စေးကန်းခန်ကုအွယ့် အီပျန့်ဗွမ့်နောင် အိုယွမ်ခူလောင်ထွို့ ဒေါင့်က့နေ" မိန့်လေနိန်းအွယ့်။ 4"ငါးခမိန်းဖုန်း၊နာကြိုင်ကြိုင်ကာလုဲင်။ ကျန်စကန်မာ ပလူးအီမိုးစီ့နားက့ဖုန်းမာ။အာကာဒီ့ လွို့ထွို့ နားက့နန် လီမိုးစီ့ဒါဟာ တာလငါ့ဖုန်းဟာ။ 5ဒေါင့်မာလဲ့ နားက့အီစကန်ဘာဒွို ပျန့်ဘို့ဗွယ်ဖရာ အပါးဟို့။ ဗွယ်ဖရာဒွို့ ချွော်ဒါ နားက့ဆက်ကာဟ၊မေစီ့ထွို့ သုံဖီဒါတွို့ငရုဲင်းတာလဲ့ အာအာဏာအိုအို။ အွယ့်ကြားမဲ့ စကန်ယွမ်ယွမ်လိုကာဘို့ အွယ့်ပလားငါ့လုဲင်။ 6အန်ကားကာ ထူကျောက်အန်ငေဘာနောင် ကွမ်အန်ငြီ့ကျပ်ဟို့ မေဟနောဝ်။ ဒေါင့်မာလဲ့ ဗွယ်ဖရာဒွိုး ထူကျောက်အဘာငါ့လဲ့ လီအိုပိန်းဟာ။ 7နားခူးလောင် ခူးစွမ်းဖုန်း အိုတျားမာ တွက်စေးကန်းထွို့လိ။ ကျန်းစကန်ကာမာ။ နားက့နုဲင့် တန်းဖိုဒူးထိုင် ထူကျောက်ဖုန်း။" 8"ငါးဒေါင့်နားက့ဒွို၊ လက်ခံငါးထွို့ ပလူးကဝန်ခံဒါ ပလားမေငါ့စာ လမားမားယောဝ် ဗွယ်ဖရာဖုခုအွယ့် ပလူးဒွိုးပလားဒွို ပျန့်တို ငါးတပည့် အီဝန်ခံတို ဗွယ်ဖရာလွှော်ဖုန်းမေငါ့ နိန်းအွယ့်။ 9ဒေါင့်မာလဲ့ မေငြင်းပယ်ငါး ပလူးဖုန်းမေငါ့အွယ့် အီခံငြင်းပယ်ဘာ လွှော်ဖုန်းမေငါ့။ 10နားမေဆန့်ကင် ဗွယ်ဖရာဖုခုအွယ့် နာအီခံဘာတို တခွင်လွှတ်လဲ့ နားမေဆန့်ကင် ဉာဏ်ရောင်တော်အွယ့် နားအီခံဘာ တခွင့်လွှတ်လီမေဟ။ 11နားမေခံဟောင်ဘာ ပလူးအုပ်ချုပ်စာ ဓမ္မရုံးကုဖုန်း မေဟလဲ့ ပဒူးဖုန်းမေငါ့ခါ့ အီရေးနားနန်တာ ကျန်းနန်မာ အီဒေါင့်ဘာနိန်းမာတာမာ။ 12အွယ့်ခိန်းနာရီကုခါ့ နားက့အီဒေါင့်ထန်ဘာနိန်းမာတာ ဉာဏ်ရောင်တော်ဒွို အီစွမ့်ဖီတို နားက့" မိန့်နိန်းအွယ့်။ 13ထွို့မဲ့ လူထုကုကအိုဒါ ပလူးအပလားအွယ့် "ဗွယ်၊ မိန့်ဖီငါးဝေခူ ဖီပန်ဖီချန်း ငါးကလ့ထွိုက်ဒါ ငါ့ဖာ့တကလွိုင်ဥစ္စာဖုန်း"လျှောက်ကိုယ်တော်နိန်းအွယ့်။ 14ဒေါင့်မာလဲ့ ကိုယ်တော်အွယ့် "နား၊ လမာအပ်စေးကန်းငါး ဖီဆုံးဖြတ်ဖီ နားက့အန်းတငြီ့ခါကု ဖီကပန် တကလွိုင်ဥစ္စာတာ"မိန့်ချာဒါ့နိန်းအွယ့်။ 15ထွို့မဲ့ ကိုယ်တော်အွယ့် "နားက့နန်နောင်နန် ဒင်စတိထွို့ ရှောင်လိုကာ လောဖတရားဖုန်းလုဲင်။ ကွက်တဟနာ မေဒေါင့်အွယ့် နားက့သဌေချမ်စာတွို့ တျာမားမားယောဝ်း၊ နားကပွိုင်းဆိုင်ဒါတာဖုန်းအွယ့် ဘဝဆက်တာ တစစ်မှန်ယွမ် လီမေဟာ" မိန့်လေလူထုနိန်းအွယ့်။ 16ထွို့မဲ့ ကိုယ်တော်ယေရှုအွယ့် မိန့်လေလူထုဖုန်း တတိုက်တွိုန်အပုဒ်။ "အလိုင်ခါ့ သဌေအပလားလုဲင်ကူ့အွယ့် ဟန်တွမ့်ဟန်လာ ထန်ဟေယွမ်တွို့။ 17အာအွယ့် " ငါးဆောင့်ကထန်ဒါး ဟန်းတွမ့်ဟန်းလားဖုန်းတာ ခမ်းလန်လောင်ကျီ့
လီအိုဟမဲ့ အီမိုးဘာနိန်းမာ" အိုကျင်စာတာနိန်းအွယ့်။ 18ထွို့မဲ့ အာအွယ့် " ဒွိုးခါ့ ငါးအီမိုးနိန်းဒွိုး။ယားကေ့ကေ့ ငါးကွိုင့်ဖုန်းထွို့ အီတေဒူထိုင်ဒါ့ ကွိုင့်ဖုန်းထွို့မဲ့ ငါးအီဆျန်စို့ ငါ့ဟန်တွမ့်ဟန်းလားဖုန်းနောင် တကလွိုင်ခိုဖုန်း ကားကအို အွယ့်ကုပါ။ 19ထွို့မဲ့ ငါးလောင်းစေကန်းထွို့လိထွို့ တကလွိုင်ခိုးဖုန်း လွမ်ကျီ့ ခမိန်နိန်းနိန်းတာအွယ့််ကြားမဲ့ တေထွို့ဒွို့ ငါးအီအိုနား စာယာတာထွို့ အီအန်အိုထွို့ အိုပျော်ပျော်ချန့်တာ ငါအီဒေါင့်နိန်းအွယ့်" ဒေါင့်နိန်းအွယ့်။ 20ဒေါင့်မားလဲ့ ဗွယ့်ဖရားအွယ့် "ပလူးဘာ။ နားအီစီ့ဘာလိဟန်ဟဒွို၊ထွို့မဲ့ နားကလှောင်စေးကန်းတာကကအိုဖုန်းအွယ့် အီတွိုဘာတို ပလားလငါ့ဆောင့်" မိန့်နိန်းအွယ့်။ 21ထွို့မဲ့ ကိုယ်တော်ယေရှုအွယ့် "အကြောင်ခရာ အွယ့်ဟိုအွယ့် ဗွယ်ဖရာမေငါ့ကုဒီ့ ပျန့်တသဌေချမ်စာ မေဟထွို့ နန်တိုးတာ လောင်စေကန်း တကလွိုင်ဥစ္စာဖုန်းထွို့ ပလူးကထင်ဒါ သဌေချမ်စာစာဖုန်း အီကြုံကာဘာတာတို မိန့်နိန်းအွယ့်ထွို့ ဖီစွက်ကေ့ တတိုက်တွိုင်။ 22ထွို့မဲ့ ကိုယ်တော်ယေရှုအွယ့် " အွယ့်မဲ့ ငါးဒေါင့်နားက့ဒွို နားကားဘဝ ကမွမ့်တာ ကျန်းကူလားကာမာ။နားက အန်အိုတာခယောဝ်၊နန်လောင်တာ အီအိုတို့ဘာဟနာ ခယောဝ် ကျန်ကူလားကာမာ။ 23ဆက်ဒွို အရေဒူးထိုင် တအန် ထွို့ နန်လောင်ဒွိုလဲ့ အရေဒူးထိုင် ကန်ကျိန်း။ 24ဟွိုင့်ကား ထူးအာ့ဖုန်းလုဲင်။ အာကားဒီ့ စုဟကေးဟ။ ကွိုင်ကအီလှောင်းတားလဲ့ အိုဟ။ ဒေါင့်မာလဲ့ ဗွယ်ဖရားဒွို အန်လွူအာကာ။ နားကားနုဲင့် တန်ဖိုဒူထိုင်ထူဖုန်းမေဟနောဝ်။ 25အိုနန်ကူလားတာဒွို့ မိုးထွော့ဖီတွို့ နားက့ဆက်အနာရီအာ့နောဝ်။ 26နားက့နုဲင့် တမိုးပီပီတာငါးလဲ့ မေလီတတ်နွိုင်ဟအွယ့် တမိုးလငါ့ဖုန်းတာ ဘာဟနာ နားက့အိုကူလားကာ။ 27ဟွိုင့်ကာကောဝ်နွိုးဖုန်းလုဲင်။ အာကားဒီ့ မိုးဟတမိုး၊ အာကာတာ ကွမ်လာငါးလဲ့ လီမိုးကာဟ။ ဒေါင့်မာလဲ့ ငါးဒေါင့်နားက့ဒွို ထျက်အကီကီခါ့ ကအိုဒါ ခွမ့်ဒူရှောလမုန်ကန်ကျိန်းခိုဖုန်းမသဲ ဖုထုဟ ကောဝ်နွိုးဖုန်း။ 28ဗွယ်ဖရာဒွို အခိန်းကာလအဆင်ပီကု၊ ဟန်ငြီးကု အိုမွမ့်ထွို့ ဒါအငြီ့ အီခံဘာဖီးဖရုန်စို့မီးကု နောင်ကောဝ်နွိုးဖုန်းမသဲ အိုဖန်ဆင်ဖီ ဖီကဖုတင်တယ် အွယ့် မေနားက့တာ အီဖန်ဆင်ဖီလွို့ထိုင် တျားမားမား။ နားက့တယွမ်အန်နုဲင့် ဆျန်ယွမ်တွို့။ 29နားကားဒွိုး ကျန်းနန်ကားမာ တအန်းတအိုတာမာ။ 30ပလူးလီစသိဟ ဗွယ်ဖရာစာဖုန်းမဲ့ အိုနန်ကူလားကာ နိန်းအွယ့်။ ဒေါင့်မာလဲ့ နားက့ဖာ့ ဗွယ်ဖရာဒွို အိုသိတို နားက့ အိုလူတာဒွိုးဟို။ 31ခရားနိန်းအွယ့် နား မေနာခံထွို့ ထောင့်တွဲ့ဘို့ နားဖဝအဆက်ကု ကပျန့်ဒါ အရေဒူစွက် ဗွယ်ဖရာတအုပ်စိုနားလောင် အွယ့် အာဒီ့ အီဖီတို နားက့တအိုလိုကားကအို။ 32ဘဲဖုန်းပီ၊ ကျန်းစကန်ကာမာ။ နားက့ဖဖရာဒွို ဟွမ်နိတ်ဆက်တို ဖီဘာနားက့ သာသနာတော်။ 33အန်ကားကေ ဥစ္စာကားကအိုးထွို့ လှူကေ့ ပလူးဆင်ရဲစာဖုန်းလုဲင်။ မိုးလိုကာ နားက့တာ လီလူးဒါဟ တောင်ပိုင်းဖုန်းထွို့မဲ့ ဆျန်လိုကာ နားက့ ဥစ္စာ ရတနာဖုန်း အွိုက် တတောင်ကွမ်းဖုန်း လီတွိုဟ စီးဖုန်းလီယားဒါဟ ဝိန်ခမ်းကုလုဲင်။ 34နားကသ့ဖုန်းလဲ့ အီအိုတည်တို နားက့ဥစ္စာရတနာအိုကု။ 35ဗွမ့်နောင် ပလူးအိုလိမီး ကျွမ်ဟာ့ဟာ့ အိုကီတိန်တိနောင် လုံကီထွို့ အီမိုးဗွယ်ဖရာတမိုးဖုန်းတာ အိုရျန်းထွို့စေးကန်းတစေစေလုဲင်။ 36ဗွမ့်နောင် စွမ်းအိုပွိုင်း အဗွယ် အိုမင်္ဂလာပွဲကျိန်း နားက့လဲ့ အိုပွိုင်းစေးကန်းထွို့ကာငါးအီကျိန်းလုဲင်။ အဗွယ်ကျိန်းထွို့ မေဒုန်ကန်တင်းခါ့ အာကာအွယ့် အိုပွိုင်းဘောင့်ဖီလိုကာ ကန်တင်။ 37အာကျိန်းခိန် စွမ်းမေအိုကျင်းတာစာအွယ့် အဗွယ်အီဖီးသညင် ဆုလာဒ်ဖုန်း။ ငါ့ဒေါင့်နားက့ဒွို၊ ဗွယ်အွယ့် အန်ဆျန်အာကအိုနန်းထွို့ အီအန်လွူ တအန်ဖုန်း။ 38ဗွယ်အွယ့် မေကျိန်းမွိုင်ဟခိန်းယောဝ်း ၊ မွိုင်ကိုးခိန်းယောဝ် အစွမ်းဖုန်း မေအိုရျန်းထွို့စေးကန်းအွယ့် အာဒီ အီဟွမ်ခိုယွမ်တွို့။ 39ဒေါင့်မာလဲ့ နားက့ အီဒင်စတိလိုကာဘာ၊ မေသိစေးကန်း တောင်ကွမ်ဒွို အီလေးကမာခိန်းအွယ့် အာဒွို အီအိုကျင့်တာထွို့ လီခွင်ဖီဟ တောင်ကွမ်းကျိန်နွူးဖောက်တာအာယွမ်ကုဟာ။ 40ကွက်အွယ့်မဲ့ ကမားခိန်းယောဝ် အိုရျန်းစေးကန်းကာလုဲင်။ ကွက်တဟနာမေဒေါင့်အွယ့် ငါး၊ဗွယ်ဖရာဖုခုဒွို အီပြန်ကြွချာဒါ နားက့လီထင်ခါ့ခိန်ခါဟနေ" မိန့်နိန်းအွယ့်။ 41ထွို့မဲ့ ပေတရုအွယ့် "ဗွယ်၊ တတိုက်တွိုန်ဒွိုးဘာဒွို မိန့်လေဖီက့တားဟို့နောဝ် ပလူးလငါ့ကားကကအိုတာလဲ့ ပါပါနောဝ်" တစီ့လျှောက်လေနိန်းအွယ့်။ 42ထွို့မဲ့ ကိုယ်တော်ယေရှုအွယ့် "ငါဒွို ဗွမ့်နောင် ပလူးပညာအိုထွို့ သစ္စာတရာအိုအွယ့်မဲ့ ကျေရင်ဖီဘာအဗွယ်ယွမ်ကုစာ ငါးဒွိုမိန့်ဖီတို ပလူးကားကအိုတာ။ အဗွယ်ခန့်အပ်အာ အခိန်းမေတန်း ဖီကကျေရင်ဖီ စွမ်းလငါ့တာ တအန်ဖုန်း။ 43အဗွယ်မေကျိန်းတွိုခိန်း မေသျှီဘာ စွမ်းအိုမိုးတမိုးထွို့ စွမ်းအွယ့်ပလားအွယ့် အီခံစာဘာဆုလာဒ်ဖုန်း။ 44ငါးဒေါင့် နားက့အမှန်ဒွို၊ အဗွယ်ဒီ့ အီအန်ချန့်အာ အိုပွိုင်းဟွိုင့်ဖီ အာတကလွိုင်ဥစ္စာဖုန်း ကားကအိုဖုန်း။ 45ဒေါင့်မာလဲ့ စွမ်းအွယ့်ပလား အာသကုအွယ့် "ငါးဗွယ် အီကျိန်းတွိုလာတို" ထင်နိန်းအွယ့်ထွို့ တွယ်စွမ်းမွော်စွမ်းခုလငါ့ထွို့၊ အန်၊အိုထွို့ မေအိုမွမ်းဘို့တာအွယ့် 46စွမ်းအွယ့်ပလားဗွယ်အွယ့် မေကျိန်းတို အာလီထင်ဟမငြီး၊ အာလီသိဟခိန်းကုအွယ့် အီဖီအာ အပျက်တန်ဒူထွို့ အီအန်းချန့်အိုကိုနောင် ပလူးသစ္စာတရာလီအိုဟစာ။ 47အိုသိတိုဗွယ်တာအိုလူလဲ့ တပုဲင်စေကန်းလီအိုဟ စွမ်း၊ မေဟလဲ့ အာဗွယ်အိုလူအတွိုန် လီမိုးတွယ့်ဟစွမ့်အွယ့် အီခံတွယ်စာ့ဘာနောင်ကီ။ 48ဒေါင့်မာလဲ့ လီသိဟဗွယ်တအိုလူထွို့ မိုးမားတမားထွိုက်ဖီအပျက်ကီဒဏ်စာဒွို အီခံတွယ်ဘာဆျန်ဟို့။ ဒေါင့်မာလဲ့အီခံကွူ့ဘာ ပလူးကလဟေတာစာ ကားကအိုဆောင့်။ ပလူးခံဘာ အပ်ဟေစာဆောင့်အွယ့် အီခံဘာကွူဟေ။ 49"ထွို့မဲ့ ငါးဒွိုး ဒီသီပလင့်ကမ်ဖာဟန်နောင်မီးအွယ့်မဲ့ငါးလေးလေ။ ငါးအလိုအိုဖီးကပျန့် မီးအိုကျွမ်ထွို့။ 50ငြီ့ဟ ငါးအီခံဘာ တဆင်ရဲတခုဲင်ဒူ အိုအဘာ။ တာအွယ့်ဘာ မေခထွို့ကောင့် ငါးဒွိုအီကြုံတသခုဲင်ဖုန်း။ 51ငါဒွိုး နားက့ထင်ဘာ အီလေကျိဖီ တငြိမ်ချမ် ကမ်ဖာဒွို့ဘာကုနောင်။ လီမေဟာ။ ငါးလေးဒွို့ ဖီကခွယ်ခြာဖီ ပလူးဖုန်းတာတို။ 52တေးတွို့ဒွိုး ပလူးအန်းတငေးမိသားစုကုအွယ့် အန်တငြီ့စာနောင် အန်တတွမ့်စာ မေဟလဲ့ အန်တတွမ့်နောင် အန်တငြီ့စာအွယ့် အီဆန်းကင်လိုကာထွို့ အီဗွမ့်လိုကာဟ။ 53ဖနောင်ဖုခု၊ ဖုခုနောင်ဖ၊ မွိုနောင်ဖုမွော်၊ ဖုမွော်နောင်မွို၊ သျှီနောင်ဒေ၊ဒေနောင်သျှီအွယ့် အီဆန့်ကင်လိုကာထွို့ အီဖာ့လိုကာ။ 54ထွိုမဲ့ ကိုယ်တော်အွယ့် "နားကားဒွိုး မေသျှီးကန်အွမ်သျှိတိန်ထန်လပွူးဒွိုင့်အွယ့် နားက့ဒေါင့်ဒါစွူတွို့ ကန်အီစို့။ပျန့်ဒါတို နိန်းအွယ့်။ 55ကန်ဇျီးလဝီ မေဇျီးကျိန်းအွယ့်လဲ့ နားက့ဒေါင့်ဒါတို ကန်ရာသီ အီလားဒူထန်။ နိန်းအွယ့်လဲ့ ပျန့်ပျန့်ဒါ။ 56ဆူတော်ကောင်ယောင်ဆောင်ဖုန်း၊နားက့ဒွို ဟွိုင့်မုနောင်ဟန်ထွို့ ဆဒါ ရာသီဥတုဖုန်း။ဒေါင့်မာလဲ့ ဒွိုးခအိုပျန့်တာဟနာ နားက့လီခွယ်ခြာဒါကာဟ ကွက်တဟနာ။ 57ဖီကမိုး တမှန်ဖုန်းတာ နန်နောင်နန် ဘာဟနာ လီခြိုင်းကာဒါဟ။ 58ပလူးအပလားပလား မေစွယ်နားတရာအွယ့် ခတွိုကောင်းတရာရွမ်းခါ့ ကြိုစာညှိဖီးကကေကေ့လုဲင်။ မေလီမေဟအွယ့် ပလူးဒေါင့်ဖီးတရာစာအွယ့် အီဖီပျန့်နားအပျက်စာထွို့ အီအပ်နား ရွမ်းတမိုးစာဆောင့်။ ထွို့မဲ့ ရွမ်းတမိုးစာအွယ့်ပလားအွယ့် အီစူနား ထောင်ကု။ 59ငါးဒေါင့် နားက့ဒွို၊ နားက့ဆောင့် ဗီဆန်ကန်စာ့စွက်အွယ့်ဘာ တွိုတွို့ကလူး မေကဆပ်ကောင်းအွယ့် နားအီထန်းဘာ အွယ့်ကုပါ လီမေဟ။
सध्या निवडलेले:
Luke 12: ltpv-rv
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
