Lukas 24

Nabiyag a Huway ti Jesus

(Mateo 28:1-10; Markos 16:1-8; Juan 20:1-10)

1Nadid, magamulaldew palla nu simba ay immangay dán u bábbey hide tu páglabbángngan, tawed de u pabango hide a inhanda de. 2Káddemát de ay nedemáttan de a negulung dan u bito a tumáttákláb tu pintuwan nu páglábbángngan. 3Pero kássáddáp de ay awan de netan u bangkay ni Jesus. 4Magulu-guluwan palla hide tu nangyare ay bigla dálla a pimmeta u duwwa a lállake a makasile ti damit. 5Dipo tu ánteng de ay limmuhud hide a sayad u hupa de tu luta. Tinanung hide nu lállake a duwwa, “Bakin ehyukán moy u biyag tu lugar nu patay hide? 6Nabiyag dán a huway ti Jesus, awan dán he siya! Isipan moy u kinagi na dán nikam nikuna he palla siya ti Galilea. 7Awan beman kinagi na a, ‘U Anak nu Tolay ay kailangan a metokyon tu makasalanan hide sakay mepako tu kudus, sakay tu katállo a aldew ay mabiyag siya a huway.’”

8Kanya naalaala de u kinákkagi ni Jesus tu itod, 9kanya nagsole hide sakay inbaheta de itod a atanan tu sapulo ay ti essa a apostol sakay tu agum de hide. 10U bábbey hide ay di Maria Magdalena, Juana, sakay ti Maria a ina ni Santiago; iye hide sakay tu agum pa a bábbey a kaguman de u nagbaheta tu Apostol hide. 11Pero awan naniwala u Apostol hide dipo tu akala de ay gimi-gimet la nu bábbey hide. 12Pero timmaknág ti Pedro sakay gummággenan a immangay tu páglábbángngan. Simmáddáp siya, sakay nikuna ilingán na ay awan siya ti iba a netan nan u damit a lino a nangbalut de ni Jesus. Kaya nagsole siya a grabi u taka na.

U Nangyare tu Duwwa a Patamo ti Emaus

(Markos 16:12-13)

13Ti aldew biyan itod ay paangay tu baryo a Emaus u duwwa a disepulus ni Jesus. U kadeyo nu Emaus ti Jerusalem ay sapulo ay ti essa a kilometro. 14Págguhunan de a duwwa u nangyare hide. 15Mentaras a mágguhon hide sakay magtanungan ay immadene nide ti Jesus sakay náksabay. 16Netan de siya pero awan de natengge a kumán a natakáppan u mata de. 17Tinanung hide ni Jesus, “Ánya ben i págguhunan moye?”

Kaya ummimang hide ti sa badit tu páglakad de a malungkut a tahod. 18Timmabbeg u essa nide a u ngahan na ay ti Cleopas. Kinagi na, “Hiko wád la i dayuway ti Jerusalem a awan nakabaheta tu nangyare hide ti nakadaman na tode a aldew.”

19Tinanung na hide, “Ánya beman itod hide a pangyayare?”

Timmábbeg hide, “Tungkul tu nangyare ni Jesus a taga-Nazaret, essa a prupeta a makapangyariyan tu gimet sakay tu pagtoldu na, magin tu atubang nu Diyos sakay tu tolay hide. 20Dinakáp siya nu puno me hide a saserdote sakay nu puno hide tu banuwan para mahatulan ti kamatayan, sakay nepako tu kudus. 21Áasaan mi pa be a siya u mángligtas tu lahe hide ni Israel. Sakay bakán la a ina, katállo na dán nadid a aldew sapul a mangyare itod. 22Nahákned kame tu imbaheta nu agum a bábbey a kakagumanan me. Magamulaldew kan palla ay immangay dán hide tu páglábbángngan, 23pero awan de kanon netan u bangkay na hod. Nagsole hide sakay kinagi de a te netan kan hide a duwwa a anghel a nagkagi nide a biyag ti Jesus. 24Immangay be u agum me hide tu páglábbángngan sakay konna bi hod u netan de. Pero awan de netan ti Jesus.”

25Kinagi nide ni Jesus, “Awan kam beman makaintendi? Bakin awan moy paniwalaan u atanan a kinagi nu prupeta hide? 26Awan beman kailangan madanas nu Cristo u atanan a paghihirap a iye bagu na a matanggap u marangal na a páppágyanan ti langet?” 27Sakay impaliwanag nide ni Jesus u atanan a nesulat tu Kasulatan tungkul tu sadile na, sapul tu insulat ni Moises hanggan tu insulat nu prupeta hide.

28Nikuna adene dán hide ti Emaus a tamuwan de ay nagkunware a magtulos-tulos siya a tamo tu adeyo a lugar,#24:28 Basaán tu Markos 6:48. 29pero pinugád de siya, “Máktulos ka palla nikame, dipo sumahám dán i aldiwe sakay mágdadidiklám dán.” Kaya nákkuyog ngane siya nide. 30Nikuna kaatubang di dán siya a kuman ay nangalap siya tu tinapay sakay nagpasalamat tu Diyos. Káttapos ay hinate-hate na sakay inyatád na nide. 31Ti itod la a nabukasan u mata de sakay natengge de ti Jesus, pero bigla siya a nawan. 32Nakagi de, “Kaya bál a konna dálla hod u sahat tam mentaras a mákpágguhon sakay makánpaliwanagán nikita tu Kasulatán.”

33Ti itod be ay nagsole hide ti Jerusalem. Dinemáttan de hod a mamág-ipun-ipun u sapulo ay ti essa sakay tu agum de hide. 34Kinagi de tu duwwa, “Tatahoden bál a nabiyag a huway u Panginoon! Pimmeta siya ni Simon!” 35Sakay inyistorya be nu duwwa u nangyare nide tu dilan, sakay ni kodya di siya a natengge nikuna a paghate-hatiyan na u tinapay.

Pimmeta ti Jesus tu Disepulus na hide

(Mateo 28:16-20; Markos 16:14-18; Juan 20:19-23; Gimet 1:6-8)

36Mentaras a mamágguhon hide tungkul tu nangyare ay timmáknag ti Jesus tu bállog de, sakay kinagi na, “Magkahod kam nakwa ti kapayapaan!” 37Pero nahákned hide sakay nanteng dipo u akala de tu katoy tu atubang de ay multo. 38Kanya kinagi nide ni Jesus, “Bakin magalanganin kam? Sakay bakin manteng kam? 39Ilingán moy i kamát sakay i tikád kuwáy, hikán iye. Kahapánnák moy sakay malasán. U multo ay awan ti pilas sakay awan ti tulang, pero hikán ay tehhod a konna tu keitan moy.”

40Pákkakagi na hod ay impeta na u kamát na sakay u tikád na. 41Nikuna awan padi hide makapaniwala dipo tu saya sakay tu hákned de ay tinanung hide ni Jesus, “Te makan kam beman hina?” 42Inatádden di siya ti sagálgál a ikan a neapoy. 43Inalap na itod sakay kinan na tu atubang de.

44Káttapos ay kinagi na nide, “Iye u gusto ko a tumbukán nikuna kagiyán ko nikam tu itod pa nikuna a kakagumanák moy padla; a kailangan a matupad u atanan a nesulat tungkul nikán tu Kautusan ni Moises, sakay tu insulat nu prupeta hide, sakay tu libro nu Kansiyon hide.”

45Binukasan na u iisip de para maintendiyan de u Kasulatan hide. 46Sakay kinagi na nide, “Konna he u nesulat, ‘Kailangan a maghirap sakay matay u Cristo sakay mabiyag a huway tu katállo a aldew.’ 47Tu pamamag-itan nu ngahan na, u págsise sakay kapatawadan nu kasalanan ay dapat a ipangaral tu atanan a bansa, sapul ti Jerusalem. 48Hikam u mangpatunay ti iye hide a bagay. 49Tandaan moy, paangayán kuhe u inpananto nu Ama ko, kaya dyan kam lumakad ti Jerusalem mentaras a awan kam pagkaluuben nu kapangyariyan a gábwat ti langet.”

U Káangay ni Jesus ti Langet

(Markos 16:19-20; Gimet 1:9-11)

50Káttapos ay inkuyog hide ni Jesus ti Betania. Káddemát di hod ay inyontok na u kamát na sakay pinagpala na hide. 51Mentaras a pagpalaán na hide ay mággaoontok siya a patamo ti langet. 52Sinamba de siya; káttapos ay nagsole dán hide ti Jerusalem, a grabi u kasayaan de. 53Palagi hide tu templo sakay he hod hide a magpapuriyán tu Diyos.

सध्या निवडलेले:

Lukas 24: MBJC

ठळक

सामायिक करा

कॉपी करा