زکریأ ۸
۸
خودا برکتٚ وعده اورشلیمَ
1 ایوأردِه یهوه صبایوتٚ پیغأم می رو بأمؤ:
2 «یهوه صبایوت اَطؤچی فرمأیه: جٚه اونچی کی دوشمنأن اورشلیمٚ سٚر بأوٚردٚد خٚیلی برزخ ایسٚم، چونکی من اورشلیمَ دوس دأرم. 3 اَسه وأگردم می سرزیمین اورشلیمٚ میأن و اویَه سأمأن گیرم و اورشلیم، "اَمینٚ شهر" و یهوه صبایوتٚ کوه "موقدسٚ کوه" دؤخأده بِه.
4 «یهوه صبایوت اَطؤچی فرمأیه: اورشلیم ایوأردِه آبأدَ بِه و پیرٚمردأکأن و پیرٚزنأکأن خوشأنٚ دٚسٚ میأن عصأ اَمرأ ایوأردِه نیشینٚده شهرٚ میدأنأنٚ میأن 5 و اونٚ کوچه‌یأنٚ میأن پورَ بِه جٚه او جأغلأن کی بأزی کودنٚ رِه موشغول ایسٚد.
6 «یهوه صبایوت اَطؤچی فرمأیه: اَن تأنِه شِمِره کی او قومأنٚ البأقی شین ایسید بأوٚر کودنی نٚبه، ولی اونٚ انجأم دٚئن مِرِه هیذره کأر نأرِه. اَن ایسٚه اونچی کی یهوه صبایوت فرمأیه. 7 یهوه صبایوت فرمأیه: حتم بٚدأرید کی من جٚه شرق و غرب می قومأنَ هرتأ جیگأ کی پخشٚ پلأ بوبوستٚد نیجأت دٚهٚم 8 و اوشأنَ وأگردأنٚم کی اورشلیمٚ میأن کأمیل اَمنیتٚ دورون سأمأن بیگیرٚد. اوشأن می قومأن و من اوشأنٚ خودا بٚم و اَشأنٚ سٚر حِئقت و عیدألتٚ اَمرأ پأدیشأیی کونٚم.
9 «یهوه صبایوت فرمأیه: هسأ، دٚس بوجونبأنید و اومیدٚ اَمرأ کأر بوکونید، چونکی او وخت کی یهوه صبایوتٚ خأنه پأکأرَ سٚر بیگیفتید پیغمبرأن خوشأنٚ گبأنٚ اَمرأ تترج شٚمٚره تِشویق بوکودٚد. 10 چونکی پیشتر جٚه اَنکی معبدَ ایوأردِه چأکودن سٚر بیگیفته بٚبه، هیذره موزد مردومٚ کأرٚ رِه و هیذره پول حیوأنَ کرأیه کودنٚ رِه نٚنأ بو و موسأفرأن دوشمنٚ خطرٚ جَا امنیت نأشتیدی. من هرتأ آدمَ خو همسأده ضد اَنتیریک بوکوده بوم. 11 ولی یهوه صبایوت فرمأیه: اَسه دِه می قومأنٚ البأقئنٚ اَمرأ پیشترأنٚ مأنستَن کردکأر نوکونٚم. 12 اوطؤ کی صولح و آرأمٚشٚ میأن کیشأورزی کونیدی و فرأوأنٚ مأصول فأگیریدی. رٚزٚ دأرأن مِیوه جَا پورَ بٚده و زیمینٚ رو خٚیلی وأرٚش وأرِه. تومأمٚ اَ برکتأن او قومأنٚ البأقی آدمأنٚ شین بِه. 13 جٚه اَن پیشتر البأقی قومأن، یوهودأ و ایسرأییلَ لعن بوبوسته دأنستیدی. ولی اَسه من شٚمٚره نیجأت دٚهٚم کی مووأرک بیبید. پٚس نوأترسِنید، بلکی قوّت بٚدأرید و معبدٚ ایوأردِه چأکودنَ سٚر بیگیرید.
14 «چونکی یهوه صبایوت فرمأیه: او وخت کی شیمی پیله‌بابایأن مٚرَه برزخَ کودٚد، تصمیم بیگیفتٚم شٚمٚره موجأزأت بوکونٚم و یهوه صبایوت گه کی می چومَ جٚه اَ کأر دٚنوٚستم. 15 ولی اَسه قصد دأرم اورشلیم و یوهودأ دودمأنَ برکت فأدٚم. پٚس نوأترسِنید! 16 ولی شیمی وظیفه اَن ایسٚه: شیمی گبأن شیمی همسأده اَمرأ رأست بٚبه. شیمی دأدگأیأنٚ میأن عیدألتٚ اَمرأ رأی بٚدید کی صولح و آشتی بٚبه. 17 البأقئنٚ اَذِت‌آزأرٚ فیکر نیبید و دورُغٚ قسم نوخورید، چونکی من اَ کردکأرأنٚ جَا نیفرت دأرم.»
18 ایتأ دِه پیغأم جٚه یهوه صبایوتٚ ور بأمؤ مِرِه: 19 «یهوه صبایوت اَطؤچی فرمأیه: او چأرومی، پنجومی، هفتومی و دهومی مأهأنٚ میأن کی روزه‌یأن گیفتیدی و او روجأن کی عزأدأری کودیدی تومأنَ بٚده و اَ مرأسیم، شأد و خوشألی عَیدأنٚ اَمرأ عوضَ بِه! پٚس شومأنٚم اَی یوهودأ آدمأن، جٚه اَنٚ پٚسی حِئقت و آشتی‌یَ دوس بٚدأرید.»
20 یهوه صبایوت اَطؤچی فرمأیه: «خٚیلی آدمأن دونیأ مملکتأنٚ جَا فوتورکده اورشلیمٚ میأن. 21 ایتأ شهرٚ آدمأن اویتأ شهرٚ آدمأنَ گده: "بأیید بیشیم اورشلیمٚ میأن و خوداوندٚ جَا بٚخأییم اَمٚرَه برکت بٚده. بأیید یهوه صبایوتَ پرستٚش بوکونیم. من خأیٚم بٚشٚم." 22 هطؤیه، خٚیلی جٚه آدمأن و حتّا پیله قومأن اَیٚده اورشلیمٚ میأن یهوه صبایوتٚ ورجأ کی اونَ پرستٚش بوکونٚد اونٚ جَا برکت بٚخأیٚد. 23 یهوه صبایوت اَطؤچی فرمأیه: او روجأنٚ میأن ده نفر جٚه جوروأجورٚ قومأن ایتأ یوهودی آدمَ دٚس بٚدأمن بٚده گده: اَمٚرَم تی اَمرأ بٚبر چونکی دأنیم خودا تی اَمرأیه.»
सध्या निवडलेले:
زکریأ ۸: GCB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Gilaki Contemporary Bible is a Product of Transform Iran © 2024. All rights reserved. www.kelisayejame.org