پیدأیش ۱۴
۱۴
ابرام لوطَ نیجأت دِهه
1 او زمأتٚ میأن بابِلٚ پأدیشأ امرافل، الاسارٚ پأدیشأ اریوک، عیلامٚ پأدیشأ کَدُرلاعُمَر و گوییمٚ پأدیشأ تدعال، 2 اَ بیجیرٚ پأدیشأیأنٚ اَمرأ بوشؤده جنگٚ میأن:
سدومٚ پأدیشأ بارع،
عموره پأدیشأ برشاع،
ادمه پأدیشأ شنعاب،
صبوئیمٚ پأدیشأ شم‌ئیبر
و بالعٚ پأدیشأ (بالع هو صوغر ایسٚه).
3 پٚس سدوم، عموره، ادمه، صبوئیم و بالعٚ پأدیشأیأن کس‌کسٚ اَمرأ ایتأ بوبوستٚده، خوشأنٚ لشکرأنَ سدّیم درّه میأن کی هو بٚمٚرده دریأ درّه ایسٚه، آمأدَه کودٚد. 4 اَشأن دوأزده سأل کدرلاعمرٚ دٚسٚ جیر ایسأ بود. ولی سیزدهومی سألٚ میأن شورش بوکودٚد و اونی فرمأنَ نٚبردٚد.
5 چأردهومی سألٚ میأن، کدرلاعمر او پأدیشأیأنٚ اَمرأ کی عهد دٚوٚسته بو اَ قبیله‌یأنَ فوتورکستده، اوشأنَ شکست بٚدأده: عشتروت قرنینٚ زیمینٚ میأن رفائیأن، هامٚ میأن زوزیأن، قریتینٚ دشتٚ میأن ایمیأن، 6 سعیرٚ کوهٚ میأن حوریأن تأ بیأبأنٚ کنأره میأن فارانٚ ایل.
7 بأزون بوشؤده عینٚ مشفاطٚ میأن (کی اَنٚ پٚسی قادش نأم بٚنأ بوبوسته) و عمالیقیأن و هطؤیم حَصّون تامار میأن کی اموریأن سأمأن دأشتیدی‌یَ، شکست بٚدأده.
8 او وخت سدوم، عموره، ادمه، صبوئیم و بالعٚ (صوغرٚ) پأدیشأیأنٚ لشکرأن بأمؤده بیرون، سِدّیمٚ بیأبأنٚ میأن صف بٚکشِده. 9 اوشأن عیلام پأدیشأ کدرلاعمرٚ اَمرأ، گوییمٚ پأدیشأ تدعال، بابِلٚ پأدیشأ امرافل و الاسارٚ پأدیشأ اریوکٚ اَمرأ بٚجنگستٚده؛ چأرتأ پأدیشأ، پنج‌تأ پأدیشأ ضد ویریشتد. 10 سدّیمٚ درّه میأن طبیعی قیرٚ چأهأنٚ جَا پور بو. او وخت کی سدوم و عموره پأدیشأیأن گروختأندوبود، دکفتٚده قیرٚ چأهأنٚ میأن، ولی او سه‌تأ دِه پأدیشأ بوگروختده کوهأنٚ میأن. 11 پٚس او پأدیشأیأن، کی سدوم و عموره شهرأنَ فتح بوکوده بود اوشأنَ بٚچأپستٚد و تومأمٚ اوشأنٚ مأل و مینأل و خورأکَ بٚبردٚده. 12 اوشأن ابرامٚ برأرزأ، لوطٚم کی سدومٚ میأن سأمأن بیگفته بویَ، تومأمٚ اونی مأل و مینأل اَمرأ خوشأنٚ اَمرأ بٚبردٚده. 13 ایتأ جٚه او مردأکأن کی دوشمنٚ پٚنجه جَا بوگروخته بو، اَ خٚوٚرَ فأرٚسأنه ابرامٚ عبرانی‌یَ. اَ زمأتٚ میأن ابرام، ممری اموری بلوط دأرأنٚ میأن زٚندیگی کودی. ممری اموری، اشکول و عانرٚ برأر بو کی ابرامٚ اَمرأ عهد دٚوٚسته بود.
14 چونکی ابرام وأخبدأرَ بوسته کی اونی برأرزأ اسیرَ بوسته، ۳۱۸ نفر جٚه خو کأربلدٚ آدمأنَ آمأدَه کوده و دوشمنٚ سپأهَ تأ دانٚ دونبألَ کودٚد. 15 شبٚ رِه ابرام خو اَمرأ آدمأنَ چنتأ دسته چأکوده، دوشمنٚ سٚر فوتورکستده و اَشأنَ شکست بٚدأده و تأ حوبَه کی دمشقٚ شومألٚ میأن نٚهأ بو، دونبألَ کوده. 16 ابرام، خو برأرزأ لوط و او زنأکأن و مردأکأن کی اسیرَ بوسته بود، تومأمٚ او مأل و مینألٚ اَمرأ کی بٚچأپسته بوبوسته بویَ پٚسَ گیفته.
17 او وخت کی ابرام، کدرلاعمر و اونی اَمرأ عهد دٚوٚسته پأدیشأیأنَ شکست بٚدأ، وأگردستأندوبو، سدومٚ پأدیشأ تأ شاوه درّه میأن (کی دونبألتر پأدیشأ درّه نأم بٚنأ بوبوسته) بأمؤ ابرامٚ پیشوأز. 18 هطؤیم سألیمٚ پأدیشأ، مِلکیصِدِق کی خودای موتعألٚ کأهینٚم بو، ابرامٚ رِه نأن و شرأب بأوٚرده. 19 بأزون مِلکیصِدِق، ابرامَ برکت بٚدأ و اَطؤ بوگفته: «اَبرام جٚه موتعألٚ خودا ور مووأرک بٚبه، اونکی آسمأن و زیمینَ خلق بوکوده. 20 و موتٚوأرک بٚبه موتعألٚ خودا، کی تی دوشمنأنَ تی دٚسٚ میأن تسلیمَ کوده.» بأزون ابرام جنگٚ غنیمتأنٚ جَا، مِلکیصِدِقَ ده یک فأدأ.
21 سدومٚ پأدیشأ ابرامَ بوگفته: «می مردومَ مٚرَه فأدن، ولی مأل و مینألَ تِرِه بٚدأر.» 22 ابرام جوأب بٚدأ: «یهوه خودا، موتعألٚ خودا، اونکی آسمأن و زیمینَ خلق بوکوده‌یَ قسم، 23 کی حتّا ایتأ سوزنٚ سٚرٚ اَندر تی مألٚ جَا اونسأنم، نٚبه کی بیگی من ابرامَ مأل و مینألدأر چأکودم. 24 فقد ایچی‌یَ قوبیل کونٚم، اونم او خوردنیأنی ایسٚه کی می آدمأن بوخوردٚد؛ ولی عانر، اشکول و ممری سأمَ اَشأنَ فأدن، کی می ورجأ دوشمنٚ اَمرأ بٚجنگستٚده.»
सध्या निवडलेले:
پیدأیش ۱۴: GCB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Gilaki Contemporary Bible is a Product of Transform Iran © 2024. All rights reserved. www.kelisayejame.org