پیدأیش ۱۲
۱۲
خودا دعوت ابرامٚ جَا
1 خوداوند ابرامَ بٚفرمأسته: «تی سرزیمین، تی پِئرٚ خأنه و تی فکٚ فأمیلَ وِلَ کون و بوشو او سرزیمینٚ میأن کی من تٚرَه اویَه اوسه کونٚم. 2 من تٚرَه ایتأ پیله اومتٚ پِئر چأکونم. و تٚرَه برکت دٚهٚم و تی نأمَ پیلّه کونٚم و تو برکتَ بأعیث بی. 3 اوشأنی‌یَ کی تٚرَه برکت دٚهٚده، برکت دٚهٚم و اوشأنی‌یَ کی تٚرَه لعنت کونٚده، لعنت کونٚم. تومأمٚ دونیأ مردوم تی جَا برکت یأفده.»
4 پٚس ابرام خوداوندٚ دستورٚ موطأبٚق، بوشؤ و لوطٚم اونی اَمرأ رأ دکفته. ابرام هفتأد و پنج سأل دأشتی کی حرانَ بٚنأ بوشؤ. 5 اون خو زنأی سارای و خو برأرزأ لوط، غولأمأن و تومأمٚ خو مأل و مینألَ کی حرانٚ میأن بٚدٚس بأوٚرده بو، اوسأده و کوچ بوکوده کنعانٚ میأن. 6 او وخت کی فأرٚسِده کنعانٚ میأن، شکیمٚ میأن موره بلوط دأرٚ ورجأ چأدر بٚزِده. او زمأتٚ میأن کنعأنیأن او سرزیمینٚ میأن سأمأن دأشتیدی، 7 او وخت خوداوند خؤرِه ابرام رِه آشیکأرَ کوده، بٚفرمأسته: «من اَ سرزیمینَ تی نتأجَ بٚخشم.» پٚس ابرام اویَه کی خوداوند اونی رِه آشیکأرَ بوسته بو ایتأ مذبح چأکوده.
8 بأزون جٚه اویَه کوچ بوکوده، بوشؤ او کوهستأنی سرزیمینٚ میأن کی جٚه غربٚ ور شؤیی بیت‌ئیل و جٚه شرقٚ ور شؤیی عای میأن. ابرام او جیگأ میأن چأدر بٚزِه و خوداوندٚ رِه ایتأ مذبح چأکوده، اونَ پرستٚش بوکود. 9 اَطؤیی بو کی ابرام دأل بٚدأل هر جیگأ میأن ایسأنٚ اَمرأ کوچ بوکوده نِگبٚ ور.
ابرام مصرٚ میأن
10 ولی او سرزیمینٚ میأن قأطی سأل بأمؤ، پٚس ابرام بوشؤ مصر کی اویَه زٚندیگی بوکونه. 11 او وخت کی فأرٚسِده مصرٚ سرزیمینٚ مرزٚ میأن، ابرام خو زنأکَ بوگفته: «تو ایتأ قشنگٚ زنأی ایسی. 12 او وخت کی مصر آدمأن تٚرَه بیدینٚد، گده: "اَ زنأی اونی شینه. اونَ بوکوشیم و اونی زنَ صأب بیبیم!" 13 پٚس اوشأنَ بوگو کی تو می خأخوری، کی تی وأسی مٚرَه نوکوشد و می اَمرأ مهرٚوأنی اَمرأ رفتأر بوکوند.» 14 او وخت کی بوشؤده مصرٚ میأن، اویَه آدمأن بیدِده کی سارای ایتأ قشنگٚ زنأی ایسٚه. 15 ای عیده جٚه فرعونٚ دربأرٚ آدمأن، سارایَ بیدِده و فرعونٚ ورجأ جٚه اونی قشنگی خٚیلی تعریف بوکودٚد. فرعون دستور بٚدأ کی اونَ بٚبرد اونی قصرٚ میأن. 16 بأزون فرعون سارایَ وأسی، ابرامَ فرأوأن گوسوٚند، گأب، شوتور، اولأغ و غولأمأن و کنیزأن پیشکش فأدأ.
17 ولی خوداوند، فرعون و تومأمٚ اونی قصرٚ آدمأنَ ایتأ سختٚ بلأ میأن تأوٚدأ، چونکی سارای، ابرامٚ زنَ بٚبرده بو خو قصرٚ میأن. 18 فرعون ابرامَ خو ورجأ دؤخأده و اونَ بوگفته: «اَن چی کأر بو کی می اَمرأ بوکودی؟ چٚره مٚرَه نوگفتی کی سارای تی زنأکه؟ 19 چٚره بوگفتی اون تی خأخوره کی من اونَ می زن چأکونم؟ هسأ، اونَ اوسأن و جٚه اَیَه بوشو.»
20 بأزون فرعون خو مأمورأنَ فرمأن بٚدأ کی ابرام و اونی زنَ و اونی غولأمأن و کولفتأن و هرچی کی دأشتٚده اَمرأ اوسه کونٚد.
सध्या निवडलेले:
پیدأیش ۱۲: GCB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Gilaki Contemporary Bible is a Product of Transform Iran © 2024. All rights reserved. www.kelisayejame.org