Markus 9
9
1Yesus mahi mantun, “Ngoneh yoh! Oko dulun nyan halo kokon ikan nyan intoi co aroko angar matoi sorinai kito Korojaan Mohotara dombut ma kuasa.”#9:1 Hiaharai iroh kito Korojaan Mohotara? Oko pira-pira komungkinan: 1) waktu pira-pira murid-Eh sampet kito Yesus bocohaya ingkan sorga nyan puruk, 2) waktu iroh kito Yesus bolum hopuli, ATAWA 3) waktu iroh tomihi kuasa pian Roh Mohotara.
Bopira rasul Yesus kito komuliaan-Eh
9:2-13
(Mat. 17:1-13; Luk. 9:28-36)
2Onom ondo opah iyoh, Yesus nukat ico puruk co hunyung. Are baya mehen Petrus, Yokobus hintang Yohanes hotontarop ma Are. Nyan idi, iroh kito Yesus borubah. 3Jubah-Eh jarin bura ngorolinyap. Arelu oko dulun nyan ngolauh dunia co hegah mupuk lembon dapot jarin korinah kobura isan iyoh. 4Kotika murid-Eh yoh noto songola Nabi Musa hintang Nabi Elia oko nyan intin, rahat hopander ma Yesus. 5Hien Petrus ma Yesus, “Pak Guru, pio lau ito nyan intoi. Amun Iko kolu, olu kaih nampa tolu tonyuap nyan intoi, ico indam-Mu, ico indan nabi Musa, ico indan nabi Elia.” 6(Tapi, sobujur eh Petrus aroko monau ome co sobulih are mantun eh awi are hintang kawan murid co bokon korinah takut.)
7Paluh, oko hawun dombut nyolungkop iroh. Mohotara mantun ingkan hawun cioh, “Tuhboh Anak-Kuh co tongasih-Kuh. Ngoneh ehboh Are!” 8Waktu iroh noto toliut doh, nongkocok iroh aroko bat noto ome bewe nyan intin halo iroh, kocuali Yesus leh.
9Hiah waktu iroh nosuloh ingkan puruk cioh, Yesus ngosiit iroh ina aroh mara ma ome bewe tintun ome co punan tokitan doh. Yesus ngosiit iroh mara iyoh dapot Anak Kolunon bolum hopuli ingkan pompatoi.
10Iroh nonih porentah cioh nyan halo iroh leh. Iroh tolindah hokisok ome co tomaksut Yesus “Bolum hopuli ingkan pompatoi”. 11Paluh, iroh ngisok ma Yesus, “Kura kawan guru agama Yahudi mantun bahawa nabi Elia sobulih dombut sorinai Laca Co Tomonjanji Mohotara?”
12-13Useh Yesus, “Mula aang cioh ocop tonulih ponah Surat Borasih. Nabi Elia angar dombut houn posiap kokon aang indan korombut Laca Co Tomonjanji Mohotara.#9:12-13 Ingkan buku Maleakhi 4:5. Tapi ngoneh ehyoh otuh: Nabi Elia co tomaksut yoh ocop dombut. Kawan dulun umpi kojahat ma are sokohandak atoi doh.#9:12-13 Dulun co tomaksut co samah isan nabi Elia iyohco Yohanes Pombaptis. Nabi Elia hintang Yohanes Pombaptis tomporlaku ma kojahat. Noto 1 Raja-raja 19:2,10 hintang Matius 14:1-12. Tapi, kokon iyoh tojadi sosuai ma antun co tonulih tintun are ponah Surat Borasih. Jadi, porhatieh ka antun co tonulih tintun Anak Kolunon. Surat Borasih mantun bahawa Anak Kolunon angar tomohina hintang orong mondorita. Mikir eh tintun maksut antun cioh.”
Yesus musir roh jahat ingkan ico daja
9:14-29
(Mat. 17:14-21; Luk. 9:37-43a)
14Opaiyoh, Yesus, Petrus, Yokobus, hintang Yohanes hopuli hia kawan murid-Eh co bokon. Iroh noto orong dulun dahat toliut kawan murid taiyoh. Nyan intin oko ka kawan guru agama Yahudi co dahat hobomuseh ma kawan murid taiyoh. 15Tapi nyan kotika iyoh dulun orong yoh noto Yesus, iroh tokocit hintang tongkoru nohambang Are. 16Yesus ngisok, “Ikan hojawap tintun ome?”
17Oko dulun nyan halo dulun orong yoh co museh. Hieeh, “Pak Guru, akuh mehen anak kuh hia Iko. Are tonguasa roh jahat co umpi are uong. 18Sosika roh jahat cioh nyarang are, roh cioh pohampas are hia tana, bauieh hoputak, kosing eh ngoritet, hintang ngolauh betieh jarin kojor. Akuh ocop nyawot kawan murid-Mu musir roh jahat cioh tapi iroh aroko hegah umpi iyoh.”
19Maka, Yesus mantun ma iroh, “Oohh gonorasi co aroko porocaya, pira kotahi oni Akuh sobulih nukui halo ikan? Pira kotahi oni Akuh sobulih sabar ma ikan?!” “Mehen daja conon hia intoi.” 20Paluh, iroh mehen daja cioh hia Yesus.
Kotika kito Yesus, roh jahat cioh pohampas daja cioh hia tana, pokicah-kicah betieh. Daja cioh kolinang-koluwing hintang bauieh hoputak. 21Yesus ngisok ma taman daja cioh, “Ocop pira kotahi anakmu santuh?”
Useh eh, “Ingkan are incah kolik! 22Ocop derek roh jahat cioh bousaha ngompatoi are umpi are tapuk hia apui atawa hia danum. Tapi amun Iko boraoi umpi aranaang, masiboh kaih!”
23Tapi Yesus museh are, “Iko mantun, ‘Amun Iko boraoi?’ Kokon aranaang jarin bodai indan dulun co porocaya.”
24Taman daja cioh holuh noriak, “Akuh porocaya! Tapi dohopboh akuh ina meleh porocaya kole!”
25Kotika Yesus kito sasar orong dulun molai dombut hokumpur nyan intin, Are morentah roh jahat cioh muhat lau. Hie-Eh, “Roh jahat co umpi dulun uong hintang borengen, Akuh morentah iko, pusitbat ingkan daja cotuh. Aroh morasuk are bat!”
26Roh jahat cioh noriak, umpi betin daja cioh kicah-kicah, paluh pusit ingkan are. Daja cioh tokitan isan dulun matoi. Kokon dulun mantun, “Are ocop matoi!” 27Tapi Yesus nantot siluieh, dohop are kokat. Jadi, daja cioh tonjok.
28Opah iyoh, Yesus muntam hia lopo. Nyan intin baya oko Yesus ma kawan murid-Eh leh. Kotika iyoh, iroh ngisok ma Are, “Kura kaih aroko lian musir roh jahat cioh?”
29Yesus museh iroh, “Ikan aroko lian musir roh jahat cotuh amun ikan aroko bodoa.”
Indan kohonduo, Yesus mara tintun pondoritaan co angar tonongkomo-Eh
9:30-32
(Mat. 17:22-23; Luk. 9:43b-45)
30Yesus hintang kawan murid-Eh tulak ingkan intin paluh buah propinsi Galilea. Are aroko kolu dulun bokon monaueh 31awi Are dahat majar kawan murid-Eh leh. Hie-Eh ma iroh, “Anak Kolunon angar tonawan paluh tonyarah hia dulun co naleh Are. Iroh angar ngompatoi Are, tapi Are angar bolum hopuli nyan ondo co kotolu.” 32Iroh aroko paham antun-Eh yoh. Tapi, iroh mahi takut ngisok ma Yesus tintun maksut-Eh.
Monurut Mohotara, ome co poko tohormat
9:33-37
(Mat. 18:1-5; Luk. 9:46-48)
33Opah iyoh, Yesus hintang kawan murid-Eh dapot nyan kota Kapernaum. Kotika iroh ocop nyan lopo, Yesus ngisok ma iroh, “Ikan hosual tintun ome nyan owang calan niin?” 34Tapi iroh tonih leh awi nyan owang calan niin iroh hojawap tintun ome co poko tohormat nyan halo iroh.
35Yesus tuot paluh naah koduo balas murid-Eh yoh ika majar iroh. Hie-Eh, “Dulun co jere jarin poko penting nyan halo ikan, are sobulih jarin dulun co poko aroko penting, hintang jarin polayan kokon dulun.”
36Paluh, Yesus naah ico daja, nyuhu daja cioh tonjok nyan tohun-tohun iroh. Samir ngohapon daja cioh, Are mantun ma iroh, 37“Dulun co norima ico daja isan otuh, artieh are norima Akuh leh. Dulun co norima Akuh, are aroh norima Akuh leh, tapi mahi norima Mohotara co nyoruhan Akuh.”
Murid Yesus co bokon boraoi musir roh jahat
9:38-41
(Luk. 9:49-50)
38Paluh Yohanes mantun, “Pak Guru, kaih noto oko dulun co musir roh jahat hapo aram Mu. Tapi kaih bosiit are, awi are bokon ingkan kolompok ito.”
39Tapi Yesus mantun, “Aroh ikan ngosiit dulun isan are. Awi, ingkan kokon dulun co umpi aang co mosotahir hapo arang-Kuh, arelu oko ico co hegah lansung nokalik mohina Akuh. 40Kokon dulun co aroko naleh ito, borati iroh bopihak ma ito. 41Sika dulun co dohop ikan tului ikan iyohco murid Kristus, maka mositi dulun cioh angar norima tombah. Oluco dulun cioh baya mihi ico cangkir danum indammu. Ngoneh eh boh! Dulun cioh aroko angar niho tombah eh.”
Kawan murid Yesus sobulih ngolawan dosa
9:42-50
(Mat. 18:6-9; Luk. 17:1-2)
42 Yesus mahi mantun, “Amun oko dulun co umpi ico ingkan kawan daja co porocaya ma-Akuh ina umpi dosa, jadi meleh pio indaieh amun oko loong batu tomowot nyan koraieh, paluh tomorotong hia laut. 43Amun silummu umpi iko umpi dosa, notok eh. Awi, meleh pio amun iko ngohaba kobolum sumong-kotahieh nyan sorga arelu oko silan silu hangki iko tenden oko duo silu paluh daai tomende hia apui noraka co aroko angar picop. [44Nyan idi apuieh aroko boraoi picop, hintang ulot eh aroko boraoi matoi.] 45Amun paam umpi iko umpi dosa, notok ehboh. Awi, meleh pio amun iko ngohaba kobolum sumong kototahieh nyan sorga arelu oko silan paa hangki iko tenden oko duo paa paluh daai tomende hia noraka. [46Nyan idi apuieh aroko boraoi picop, hintang ulot eh aroko boraoi matoi.] 47Amun matammu umpi iko bodosa, ngoluet ehboh. Awi, meleh pio amun iko muntam hia Korojaan Mohotara ma ico mata, hangki iko tenden oko duo mata paluh daai tomende hia noraka. 48Nyan idi apuieh aroko boraoi picop, hintang ulot eh aroko boraoi matoi.#9:48 Ingkan buku Yesaya 66:24.#9:43-48 Amun oko aranaang co umpi iko bodosa, maka iko sobulih ngumbot hubungan ma iyoh, oluco ngumbot hubungan ma iyoh korinah ngomporoh iko. Iko tenden sobulih ngumbot hubungan ma iyoh ina mu aroko horoholuh umpi dosa cioh paluh buah hukuman sumong kotahi nyan noraka.
49 Akuh mompokingat isan iyoh, awi sika dulun angar tongompian jarin moruni hapo apui sama isan kurban komolum tongompian suci tului ihin kahing.#9:49 Tek asli bohasa Yunani hapo kiasan ‘tongahing ma apui’. Ingkan buku Imamat 2:13, kahing hintang apui umpi porsembahan suci indan Mohotara.
50Kahing yoh pio. Jadi, ikan sobulih jarin isan kahing. Ikan sobulih bolum landah ma dulun co bokon. Tapi amun kahing jarin boleh, aroko bodai tonguan mohoit kole.”#9:50 Kiasan cotuh borati amun ito umbot porocaya ma Yesus, ito aroko boguna bat indan Are samah isan kahing jarin aroko boguna amun aroko mohoit bat.
सध्या निवडलेले:
Markus 9: TBSS
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
