Mariko 9

1Kanji Yesu era kubura abu bandu mbu: «Kubinali, nábabura kwa mwa bano bandu bàli anola, bauma mubo batákafe bàtasa kulola kwa Bwami bwa Ongo* bwáika ne'buashi.»

Yesu ábindulwa ehuhe

(Mat 17:1-13; Luk 9:28-36)

2Era nyuma sa suku ndatu, Yesu era kutola Petero, na Yakobo, na Yowani. Era kwérukira nabo ku ndulungu nguma irerere, bera kubera'ko beine. Ábere bera bàli'ko, Yesu era kubindulwa ehuhe mwa na meho mabo. 3Enjimba sai sera kulangala na kwêngengenya busese. No'la ùngaala kulangasa enjimba bacha muno butala chiro àtanali.

4Unao-unao, abu banafunzi* kuna kulola ku Musa na Eliya báhambala na Yesu. 5-6Petero na balikabo bera kuina cha bàngateta bushi ne'kutungwa busese. Petero era kwire ábura Yesu mbu: «Mukangirisi, kungakomire tubére anola, tuímbe'o bitala bihatu: chiuma chingába chao, ne'chinji chánaba cha Musa, ne'chinji chingába cha Eliya.»

7Chasinda, kwera kuulukira lumbumbu kuna kubahukira. Mulo, mwera kuulukira murenge ola wábaa wáteta mbu: «Onola i'Mwana wanyi musiirwa. Mundaa mwámomvirisa!»

8Abu banafunzi* bera kúuma emeho yeyi ne'yi, si chiro bákachilola ku unji mundu ala'uma nabo, kureka Yesu yeine.

9Ábere bera bândaala kwe'i ndulungu, Yesu era kubachichika mbu: «Ebi mwera kulola'ko, mùtaburaa'bi chiro na mundu asibya kuikira mango nyi Mwana we'Mundu nyingába nòmwokire.»

10Rero oyu mwasi, abu banafunzi* bera kunasirira kuo. Si bera kutangirisa bábusanya mbu: «Oku kwômwoka, kukwera kuteta kute?»

Ebanafunzi bábusa Yesu era luulu se'kubaha kwa Eliya

11Era nyuma se'bi, ebanafunzi* ba Yesu bera kumubusa mbu: «eWaliya, chi chénjire chátuma ebakangirisi be'Mwaso* báteta mbu byěmire Eliya abáhe tanga?» 12Yesu nai mbu: «Kubinali, byěmire Eliya abáhe tanga, ěkale àkunganyise emyasi yoshi. Rero, chi chitúmire eMaanjiko Mabuya-buya mateta mbu eMwana we'Mundu ěmire àlibusibwe busese na kukenyibwa? 13Nábabura kwa Eliya #9:13 Eliya: Ábaa murebi wo'kwa mira mwa lubaa lwe'Bayuta. eBayuta, bábaa batúla balángalire mbu Eliya angáfuluka, chasiya abúre ebandu mbu bàchikunganyaa kwa kuika kwe'Mununusi wabo. Oyu Eliya, ola Yesu àtechire'ko anola, àli Yowani Mubatisayi. àikire mira, si ebandu bamúkoreraa byoshi bya babáa banáhonjire kukulikana no'kwa Maanjiko Mabuya-buya matúla màtechire era luulu sai.»

Yesu âmbula echihwasi kwa mwana

(Mat 17:14-21; Luk 9:37-43a)

14Mango Yesu na'bu banafunzi* bahatu, báikaa ala banji banafunzi* bábaa bàli, bera kulola ku bandu banene bàbasungwire, bushi bábaa báenda ebwaka ne'bakangirisi be'Mwaso*. 15Abu bandu boshi, mango bálolaa ku Yesu, bera kusanwa busese. Unao-unao, bera kulibita báye kumuhuukasa.

16Yesu era kubusa ebanafunzi* bai mbu: «Bwaka buchiye bu mwáenda na bano bandu?»

17Si mundu muuma mwa luamba era kumwǎkula mbu: «Mukangirisi, nàkuretere emwana wanyi, bushi asímbirwe na chihwasi. Ne'chi chihwasi, chámuhubise musuru. 18Na mu chira chisiki cha chàmusimbirire'mo, chénde chámuhundanga kwa chitaka, ne'fula lyánamutumba kwa bunu. Chasinda, ánatangirisa ákuutanga emeno, na ányanyaala. Nera kubura ebanafunzi* bao mbu bǎmbulaa'chi, si ‹pyo!›»

19Yesu era kuteta mbu: «Aaye! Mu bandu be'sine suku, mutéte bwemeresi! Nyikáendekera kuba nenyu na kunde nômva emyasi yenyu kuikira mangochi? Nyíreteraa oyu mwana anola!»

20Bera kunamuretera'i. Cha chihwasi, mwa kunalola ku Yesu, kuna kukukumanya ola mwana busese, kuna kumuhunda kwa chitaka, era kupuka-pukira ala'shi ne'fula lyámutumba kwa bunu.

21Yesu kukwera kubusa eshe mbu: «Ono mwana énde ába bacha kutengera mangochi?»

Nai mbu: «Kutengera elyana etoto lyai. 22Chira mango, chénde chámuumanga mwa muliro, no'mwa meshi, chasiya chìmwîte. Rero, utúfiraa bonjo utúase, akaba ùngaala!»

23Yesu nai mbu: «Chi chatúmire wáteta mbu akaba nyìngaala? Uményereraa kwa byoshi byénde byánaalikana kwo'la wète bwemeresi!»

24Unao-unao, eshe we'mwana kuna kuteta na murenge munene mbu: «Nemérere! Si unyíasaa ebwemeresi bwanyi buéndekere kuba bunene.»

25Mango Yesu álolaa kwa bandu báendekera báchilunda aola, era kukaliira cha chihwasi mbu: «Eu chihwasi, u'wáhubise ono mwana musuru ne'kumusiba ematwi, nàtechire mbu umútengaa'ko! Kanji sìutanáchimuhubiriraa!» 26Echi chihwasi, kuna kulakanga na murenge munene, na chákukukumanya ola mwana busese. Chasinda, chera kumutenga'ko.

Wamwana era kwire ába ngo'la wafíre. Bushi no'ku, bandu banene bera kutangirisa báteta mbu: «Aaye, afíre mira.» 27Si Yesu era kumusímbira kwa mino àmwêmuse, na ábatuka.

28Era nyuma se'bi, mango Yesu ábaa era êngiriraa mwa nyumba, àli yeine ne'banafunzi* bai, bera kumubusa mbu: «eWaliya! Echi chihwasi, chi chàtumaa tubeke twáfundwa kwâmbula'chi?» 29Nai mbu: «Echihwasi cha chìri nge'chi, chénde chánâmbulwa kurengera ememo oshâo.»

Yesu áteta kanji era luulu se'kufa ne'kwômoka kwai

(Mat 17:22-23; Luk 9:43b-45)

30Yesu ne'banafunzi* bai bera kutenga aola, bera kurenga mwa chio che'Kalilaya. Si atáhondaa ebandu baménye ala àli, 31bushi ábaa ákangirisa ebanafunzi* bai. Era kubabura mbu: «Nyi Mwana we'Mundu nyingânyibwa mwa mino se'bandu. Na'bu bandu bu bangányita. Si kwa lusuku lwa kahatu nyingômoka.» 32Si ei myasi, ebanafunzi* bai chiro bákamenyerera kute yábaa ìtechire, bera kufa buba bwa kumubusa mwasi.

Emukulu-kulu mwa Bwami bo'kwa nguba

(Mat 18:1-5; Luk 9:46-48)

33Yesu ne'banafunzi* bai bera kuika mwa musi we'Kaperinaumu. Ábere bera bàli mwa nyumba, era kubabusa mbu: «Mango mwabáa mùli mwa njira, chi mwabáa mwáenzanya kwe'bwaka?» 34Bera kusira, bushi mango bábaa bàli mwa njira, bábaa báenzanya ebwaka mbu nde i'mukulu-kulu wa balikabo.

35Yesu era kwire ékela, na âmaala endumwa* sai ekumi ne'biri na ábura'si mbu: «Akaba emundu àngahonda kuba mubere-bere, ěmire àchiíre kuba musinda-sinda wa balikabo boshi, ábe na muanda wabo.»

36Chasinda, era kutola mwana mutoto muuma, era kumwemanza mwa kachi-kachi kabo na ámuobera. Era kubabura mbu: 37«Emundu ola ùngahuukasa emwana mutoto ola ulí ngo'no kwe'sina lyanyi, eri nyi ahúukasise. No'la wànyihuukasise, atá nyeine nyi àhuukasise, si ahúukasise no'la wányitumaa.»

Ola utá murenda wetu eri àli mwira wetu

(Luk 9:49-50)

38Yowani era kubura Yesu mbu: «Mukangirisi, twalólaa ku mundu muuma énjire âmbula ebihwasi kwe'sina lyao. Si twabáa twénjire twámwanga, bushi àtatula wo'mwa chikembe chetu.»

39Yesu nai mbu: «Si mùtachimwângaa, bushi ola ùngaira echisomerano kwe'sina lyanyi, àtangachiteta bulio era luulu sanyi. 40Bushi ola utá murenda wetu, eri àli kwa lunda lwetu. 41Kubinali, nábabura kwa ola ukáberesa ngumbu ya meshi bushi mùli bandu ba Kirisito*, oyola atákaine elwêmbo lwai chiro hicha.

Ekuchilánga kwa mabi

(Mat 18:6-9; Luk 17:1-2)

42«Mwa bano bana batoto bànyêmerere, emundu ola ùngatuma muuma mubo êngirira mwa bibi, kùngabere kukulu kwo'yu mundu áminyirwe lusho lunene mwe'osi, aúmwe mwa nyanja.

43«Rero, emino yao akaba ìngatuma wáira mabi, uíshaa'i. Bushi kùngakubera kukulu wěngirire mwa chisiki che'kalamo wéte mino nguma, wàkuata mino ebiri, chasinda uúmwe era kusimu mwa muliro ola ùtasima. [ 44Eyi kusimu, itúla mifunyu era ìtafa, itúla na muliro ola ùtasima.] 45Ne'kuulu kwao, akaba kùngatuma wáira mabi, uíshaa'ko. Bushi kungakubera kukulu wěngirire mwa chisiki che'kalamo wéte kuulu kuuma, wàkuata maulu mabiri, chasinda uúmwe era kusimu. [ 46Eyi kusimu, ìtula mifunyu era ìtafa, itúla na muliro ola ùtasima.] 47Ne'liho lyao nali, akaba lìngatuma wêngira mwa bibi, wǒmwolaa'li. Bushi kùngakubera kukulu wěngirire mwa chisiki che'kalamo wéte liho liuma, wàkuata meho mabiri, chasinda uúmwe era kusimu. 48Eyi kusimu, itúla mifunyu era ìtafa, itúla na muliro ola ùtasima.

49«Rero, chira mundu akákomisibwa* mwa kurenzibwa mwa muliro, ngo'kwa emitulo* nai yénde yákomisibwa* mwa kulunga mwe'munyu.#9:49 Mango eBaisiraeli béndee bátula Ongo emitulo ye'biryo, béndee bákomya'bi mwa kulunga mwe'munyu. Somaa Balawi 2:13.

50«Emunyu, katúla kandu kabuya. Si akaba àngaesa ebuloke bwai, kutachiri cha bàngabika'mo chasiya ahúbe kuloka. Rero nenyu mubáa nga munyu ola uchête buloke, kanji mubáa ne'bôlo mwa kachi-kachi kenyu.»

सध्या निवडलेले:

Mariko 9: tbt

ठळक

सामायिक करा

कॉपी करा