Mariko 10
10
Yesu ákangirisa era luulu se'kulikanuka mwa buhosi
(Mat 19:1-12; Luk 16:18)
1Yesu era kutenga mwe'chi chisiki, era kuya mwa chio che'Yuteya, kwa unji mushirirya we'lwishi lwe'Yorotani. Áikire'yi, kanji bandu banene bera kubuanana ala ábaa àli. Era kutangirisa ábakangirisa kanji ngo'kwa ábaa anátula àkomere.
2Bafarisayo* bauma bera kumuíkira chasiya bàmuereke. Bera kumubusa mbu: «Ewashe! eMwaso* wetu atúla emérere mbu emulume aúlusaa mukai?»
3Yesu nai mbu: «Muomba* muchiye i'Musa ábarekeraa?» 4Nabo mbu: «Musa êresaa emulume eloso lwe'kuanjikira mukai emaruba me'kulikana nai, chasinda ánamuulusa.»
5Yesu era kubabura mbu: «Emichima yenyu isibu iyátumaa Musa ábaanjikira oyu muomba*. 6Si mwa ndangiriso mango Ongo ábumbaa byoshi, ‹ábumbaa emulume ne'mukasi.›#10:6 Somaa Ndangiriso 1:27. 7‹Echera chi chikátuma emulume áreka eshe na nyina, ánaimba ebwai buhosi buna mukai. 8Abu babiri bánere báhuba mundu muuma.›#10:7-8 Somaa Ndangiriso 2:24. Aola, bàtachiri babiri si bera bàli mundu muuma. 9Bushi no'ku, bya Ongo ábikire ala'uma, kùtabaa chiro na mundu asibya ola ukábirikanya.»
10Mango Yesu ne'banafunzi* bai bábaa bera bengíriraa mwa nyumba, nabo bera kumubusa kanji era luulu so'yu mwasi. 11Era kubǎkula mbu: «Akaba emulume àngaulusa mukai, chasinda ánahwera unji, àmenyaa kwa àbanjire ekiri. 12Ne'mukasi nai, akaba àngachíkula mwa mwai, chasinda ánahweribwa na unji mulume, nai anámenyaa kwa àbanjire ekiri.»
Yesu áahanyira ebana batoto
(Mat 19:13-15; Luk 18:15-17)
13Lusuku luuma, bandu bauma báreteraa Yesu bana batoto, abábike kwe'mino. Si ebanafunzi* bai, bera kukaliira abu bandu. 14Mango Yesu álolaa bacha, era kuáya busese. Era kwire ábura ebanafunzi* bai mbu: «Murékaa ebana batoto babáhe ene nyìri! Mùtabângaa, bushi ebandu ba bàli nga'bo, bu besha eBwami bwa Ongo*. 15Kubinali, nábabura kwa akaba emundu àtangemerera emyasi ye'Bwami bwa Ongo* nga mwana mutoto, atákêngirire'mo chiro na hicha.» 16Chasinda era kuobera abu bana, era kubabika kwe'mino na ábaahanyira.
Emuare éma Yesu eano
(Mat 19:16-30; Luk 18:18-30)
17Mango Yesu ábaa era áchiuma, mundu muuma era kumuíkira áenda álibita. Era kukoma emafi era muhondo sai, era kumubusa mbu: «Mukangirisi mubuya! Chi němire kuira chasiya nyibóne ekalamo ke'suku ne'mango?»
18Yesu nai mbu: «Chi chátuma wányerika mbu mubuya? Si kutáli mundu mubuya kureka Ongo yeine oshâo! 19Si wìshi kwa miomba* itúla itèchire mbu: ‹Uténdaa wêta, uténdaa wábanda ekiri, uténdaa wêba, uténdaa wêkerana bisha, uténdaa wátebana, úndaa wátunda eho na nyoko.› #10:19 Somaa Kutenga 20:12-16; Bukengere 5:16-20. » 20Oyu mundu, era kumwǎkula mbu: «Mukangirisi! Kutengera elyana etoto lyanyi, ei miomba* yoshi, nerísa nénde náikulikira.»
21Yesu era kumusindera na meho ma nzii, era kumubura mbu: «Uchíri uínyire mwasi muuma oshâo. Uyáa kuusa ebindu byao byoshi. Ne'buteya bwa bingáfa, wánaabira'bo ebakene. Úkaira bacha, ungába eri wàbikirirwe mwandu kwa nguba. Chasinda, wánere wábaha kunyikulikira.»
22Oyu mundu mango ômvaa bacha, ebuso bwai kuna kwîna, era kuchiendera àsibukire busese, bushi ábaa éte bikulo binene.
23Yesu era kutumbikisa ebanafaunzi* bai ba bábaa bamúsungwire. Era kubabura mbu: «Emuare, ekwingirira kwai mwa Bwami bwa Ongo* kukoochire busese!»
24Ebanafunzi* bômvire bacha, bera kusanwa busese. Si Yesu era kuhuba kubabura mbu: «Ebana banyi, ekwêngirira mwa Bwami bwa Ongo*, kukoochire busese! 25Kusibuire engamiya kurenga mwa chiture che'singe, si kanji kusibuire busese kwa muare kwîngirira mwa Bwami bwa Ongo*!»
26Ebanafunzi* kanji bômvire bacha, bera kunaendekera básanwa busese, na bátangirisa bábusanya mbu: «Ewashe! Rero, nde kasi i'ukére wánunulibwa?»
27Yesu era kubatumbikisa na ábabura mbu: «Kwa bandu, ebyera bìtangaalikana, si ku'Ongo bìtali bacha. Bushi era mwai yeke, byoshi byénde byánaalikana.»
28Petero kukwera kumubura mbu: «eWaliya, ulólaa! Tubano twàrekire byoshi chasiya tukukulikire.»
29Yesu nai mbu: «Kubinali, nábabura kwa akaba emundu àngareka enyumba yai, nesi banyakabo, nesi baliwabo, nesi nyina, nesi eshe, nesi ebana bai nesi emahwa mai bushi nanyi na bushi ne'Mwasi Mubuya-buya, 30oyola, mango anáchiri muno butala, angábona lwêmbo lunene ku kali eyana. Angábona: enyumba, na banyakabo, na baliwabo, na banyina, ne'bana, ne'mahwa. Si chiro bacha, angálola no'kwa malibuko. No'mwa suku sa sikáika, mu akére ábona ekalamo ke'suku ne'mango. 31Bandu banene ba bàli babere-bere lwarero, bakába basinda-sinda. Na ba bàli basinda-sinda, bakába babere-bere.»
Yesu áteta ebwakahatu era luulu se'kufa ne'kômoka kwai
(Mat 20:17-19; Luk 18:31-34)
32Mango Yesu ne'banafunzi* bai bábaa bàli mwa njira bérukira eYerusalemu, Yesu ábaa àbahondorere. Abu banafunzi* bábaa báchǎnya, ne'banji bandu ba bábaa bàli nabo, bábaa báfa buba.
Yesu era kuhuba kutola endumwa* sai ekumi ne'biri, era kutangirisa ábura'si emyasi era ingámuikira. 33Era kubabura mbu: «Mulólaa, tubano bano twera twérukira mwa musi we'Yerusalemu. Na mwo'yu musi, mu nyono nyi Mwana we'Mundu nyingânyibwa mwa mino se'bakulu-kulu be'bakuhanyi*, ne'bakangirisi be'Mwaso*. Bangányichinjibusa chasiya nyǐchibwe. Chasinda, bangányana mwa mino se'bandu ba bàteshi Ongo. 34Abola, bangányishekera na kunyichira'ko, bangányihuta etuchi, chasinda bangányita. Si kwa lusuku lwa kahatu, nyingômwoka.»
Benyi Sebetayo báchihondera ebukulu-kulu
(Mat 20:20-28)
35Era nyuma se'bi, baala ba Sebetayo, Yakobo na Yowani bera kuikira Yesu na bámubura mbu: «Mukangirisi, twéte mwasi muuma ola twákwema ùtuirire.» 36Yesu era kubabusa mbu: «Chi mwáhonda nyìbairire?» 37Nabo mbu: «Cha twáhonda chi che'chine: mango ungába mwe'tunda lyao, wěmereraa twíkale ala'uma nao muuma kwa lunda lwe'malyo, ne'unji kwa lwe'marembe.» 38Yesu nai mbu: «Era! Bya mwéma, mùtabîshi! Eri mùngaala kumwa engumbu ye'malibuko era nyingámwa? Na mango nyingábatisibwa mwa malibuko, nenyu mungáala kubatisibwa mumo?» 39Nabo mbu: «Nechi, tungáala.»
Yesu kukwera kubabura mbu: «Kubinali, engumbu ye'malibuko era nyingámwa, nenyu mungánamwa kui. Na mango nyingábatisibwa mwa malibuko, nenyu mungánabatisibwa mumo. 40Si ekwikása ebandu kwa lunda lwanyi lwe'malyo nesi lwe'marembe, bìtanyêrekere. Ebi bisiki, Ongo yeine iwábikunganyisise ebandu ba álondwere mira.»
41Sa sinji ndumwa* ekumi mango sômvaa bacha, sera kuáya Yakobo na Yowani. 42Bushi no'ku, Yesu kukwera kwâmaala boshi na ábabura mbu: «Si mwìshi kwa mwa bandu ba bàteshi Ongo, ebami babo bénde bábaenza mwa bine. Ne'bakulu-kulu babo, bénde bábalibusa. 43Si mwabo, biténdaa byába bacha mwa kachi-kachi kenyu. Bushi ola wáhonda kuba mukulu-kulu mu mwabo, ěmire ábe muanda wenyu. 44No'la wáhonda kuba mubere-bere mu mwabo, ěmire ábe kaungu* ka boshi. 45Bushi nyi Mwana we'Mundu nanyi ndábahaa mbu béndaa bányikorera. Si nábahaa nyinde nákorerana na kwâna ekalamo kanyi, nyinúnule bandu banene.»
Yesu álamya Baritolomayo
(Mat 20:29-34; Luk 18:35-43)
46Chasinda, Yesu ne'banafunzi* bai bera kuika mwa musi we'Yeriko. Mango bábaa bera bátenga'mo, bandu banene busese bera kubakulikira. Kwa musike se'njira, kwábaa kwékese muuta muuma ola wábaa wénjire wémeresa ebuteya. Oyu muuta iwábaa Baritolomayo, mwenyi Timayo. 47Mango ômvaa kwa Yesu we'Nasareti iwárenga, era kutangirisa álakanga na murenge munene mbu: «eWaliya! Yesu Mwenyi Tauti, unyífiraa bonjo!» 48Bandu banene bera kumukalíiranga mbu asíraa. Si era kunaendekera álakanga na murenge munene mbu: «eWaliya! Mwenyi Tauti, unyífiraa bonjo!»
49Yesu era kwîmanga, na áteta mbu: «Mumwâmaalaa.» Bera kunamwamáala na bámubura mbu: «Sèsaa emuchima wǐmange! Àkwâmaere.»
50Ola muuta, kuna kúuma ekochi lyai era musike, kuna kubanzukala na áya ala Yesu ábaa àli.
51Yesu era kumubusa mbu: «Chi wáhonda nyikuírire?» Nai mbu: «Mukangirisi, náhonda nyihúbe kulola.»
52Yesu kukwera kumubura mbu: «Uéndaa, ebwemeresi bwao bwàkulamise.»
Unao-unao kuna kuhuba kulola, na átangirisa ákulikira Yesu.
सध्या निवडलेले:
Mariko 10: tbt
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2017 Wycliffe Bible Translators, Inc.
